ಚಳಿಯಲ್ಲಿ ತಿನ್ನಿ ಬಿಸಿಬಿಸಿ ಹೆಸರುಬೇಳೆ ಸಮೋಸ

Snacks

oi-Prasad P Naik

By * ಸೌಭಾಗ್ಯ, ತುಮಕೂರು

Published: Thursday, January 6, 2011, 15:15 [IST]

ತಿಂಡಿಪೋತರಿಗೆ ಚಾಟ್ ಮನೆಗಳಲ್ಲಿ ತಟ್ಟೆಯ ಮೇಲೆ ದುಂಡಗೆ ಇಟ್ಟ ಡುಮ್ಮನೆ ಇರುವ ಆಲೂಗಡ್ಡೆ ಸಮೋಸಗಳನ್ನು ಕಂಡ ಕೂಡಲೆ ತಿನ್ನದೆ ಇರಲು ಸಾಧ್ಯವೇ ಇಲ್ಲ. ಅಯ್ಯೋ ಸಿಕ್ಕಾಪಟ್ಟೆ ಗ್ಯಾಸು ಗೀಸು ಅಂತ ಆರೋಗ್ಯವೂ ಹಾಳು ಅಂತೀರಾ? ಆದರೇನು ಮಾಡ್ತೀರಾ, ತಿನ್ನಬೇಕೆನಿಸಿದಾಗ ಆ ಜಿಹ್ವಾ ಚಾಪಲ್ಯವನ್ನು ಹಿಡಿದಿಟ್ಟುಕೊಳ್ಳಲೂಬಾರದು. ಎಂತೆಂಥದೋ ಎಣ್ಣೆಯಲ್ಲಿ ಕರಿದ, ಆರೋಗ್ಯವನ್ನೂ ಹಾಳುಗೆಡವುವ ಆಲೂ ಸಮೋಸ ಬದಲು ಹೆಸರುಬೇಳೆಯ ಸಮೋಸವನ್ನು ಮನೆಯಲ್ಲೇ ಮಾಡಿ ಆರೋಗ್ಯವನ್ನೂ ದಿವಿನಾಗಿಟ್ಟುಕೊಳ್ಳಿ. ಈ ಚಳಿಗಾಲದಲ್ಲಿ ಸಂಜೆಯ ವೇಳೆಗೆ ಕಾಫಿ ಅಥವಾ ಚಹಾದ ಜೊತೆಗೆ ಒಳ್ಳೆ ಟೈಮ್ ಪಾಸ್ ತಿಂಡಿಯೂ ಹೌದು.

ಬೇಕಾಗುವ ಸಾಮಗ್ರಿಗಳು

ಮೈದಾ - 1 ಬಟ್ಟಲು
ರವೆ - 1 ಬಟ್ಟಲು
ಹೆಸರುಬೇಳೆ - 1 ಬಟ್ಟಲು
ಈರುಳ್ಳಿ - ದೊಡ್ಡ ಗಾತ್ರದ್ದು 4 (ತುಟ್ಟಿಯಾಗಿರುವುದರಿಂದ 3 ಸಾಕು)
ಗರಂ ಮಸಾಲ - ಅರ್ಧ ಚಮಚ
ಚಾಟ್ ಮಸಾಲ - ಅರ್ಧ ಚಮಚ
ಖಾರದಪುಡಿ - 1 ಚಮಚ
ಉಪ್ಪು - ರುಚಿಗೆ ತಕ್ಕಷ್ಟು
ಕೊತ್ತಂಬರಿ ಸೊಪ್ಪು - ಸ್ವಲ್ಪ
ಎಣ್ಣೆ ಕರಿಯಲು
ಟೊಮೆಟೊ ಸಾಸ್ - 1 ಚಮಚ

ಮಾಡುವ ವಿಧಾನ

* ಮೈದಾ ಮತ್ತು ರವೆಗೆ ನೀರು ಸೇರಿಸಿ ಚಪಾತಿ ಹಿಟ್ಟಿನಂತೆ ಕಲಸಿ, ಸ್ವಲ್ಪ ತುಪ್ಪ ಸೇರಿಸಿ ನಾದಿ ಮುಚ್ಚಿಡಿ.

* ಹೆಸರುಬೇಳೆಯನ್ನು ಕುಕ್ಕರಿನಲ್ಲಿ ಒಂದೆರಡು ಕೂಗನ್ನು ಕೂಗಿಸಿ ಸ್ಟೌವಿನಿಂದ ಕೆಳಗಿಳಿಸಿ.

* ಇನ್ನೊಂದೆಡೆ ಒಗ್ಗರಣೆಯನ್ನು ತಯಾರಿಸಿಕೊಂಡು ಹೆಚ್ಚಿಕೊಂಡ ಈರುಳ್ಳಿ ಹಾಕಿ ಚೆನ್ನಾಗಿ ತಾಳಿಸಿ.

* ಅದಕ್ಕೆ ಬೇಯಿಸಿಟ್ಟ ಹೆಸರುಬೇಳೆ ಬೆರೆಸಿ, ಚಾಟ್ ಮಸಾಲ, ಗರಂ ಮಸಾಲ, ಖಾರದ ಪುಡಿ, ಉಪ್ಪು, ಕೊತ್ತಂಬರಿ ಸೊಪ್ಪು ಎಲ್ಲ ಸೇರಿಸಿ ಪಲ್ಯ ತಯಾರಿಸಿಕೊಳ್ಳಿ.

* ನಂತರ ಹಿಟ್ಟನ್ನು ತ್ರಿಕೋನಾಕಾರದಲ್ಲಿ ಲಟ್ಟಿಸಿಕೊಂಡು ಅದರಲ್ಲಿ ಪಲ್ಯ ತುಂಬಿ, ಅಂಚುಗಳನ್ನು ಸರಿಯಾಗಿ ಮುಚ್ಚಿ, ಚೆನ್ನಾಗಿ ಕಾದ ಎಣ್ಣೆಯಲ್ಲಿ ಕರಿಯಿರಿ.

* ಮುಂದ? ಮುಂದೇನು? ಟೊಮೆಟೊ ಸಾಸ್ ಹಾಕಿಕೊಂಡು ಬಿಸಿಯಿರುವಾಗಲೇ ಜಮಾಯಿಸಿ.