ಫ್ರಿಜ್‌ನಲ್ಲಿ ಇಟ್ಟ ಆಹಾರ ಬೇಗ ಕೆಡುತ್ತಿದ್ಯಾ? ಈ 5 ಮ್ಯಾಜಿಕ್ ಟ್ರಿಕ್ಸ್ ಬಳಸಿ.. ಫ್ರೆಶ್ ಆಗಿಡಿ!

ಫ್ರಿಡ್ಜ್ ನಲ್ಲಿರುವ ಆಹಾರ ಬೇಗ ಹಾಳಾಗುತ್ತದೆಯೇ? ಈ 5 ತಂತ್ರಗಳು ಅದನ್ನು ಹೆಚ್ಚು ಕಾಲ ತಾಜಾವಾಗಿಡಲು ಸಹಾಯ ಮಾಡುತ್ತದೆ. ಹೌದು, ಇಂದಿನ ವೇಗದ ಜೀವನದಲ್ಲಿ ರೆಫ್ರಿಜರೇಟರ್ (ಫ್ರಿಡ್ಜ್-Fridge) ಪ್ರತಿ ಮನೆಯ ಅವಿಭಾಜ್ಯ ಅಂಗವಾಗಿದೆ. ತರಕಾರಿ, ಹಣ್ಣುಗಳು, ಹಾಲು ಅಥವಾ ರಾತ್ರಿ ಉಳಿದ ಅಡುಗೆಯನ್ನು ಹಾಳಾಗದಂತೆ ಸಂರಕ್ಷಿಸಲು ನಾವು ಫ್ರಿಡ್ಜ್ ಅನ್ನು ಅವಲಂಬಿಸಿದ್ದೇವೆ.

ಆದರೆ, ಅನೇಕ ಬಾರಿ ಫ್ರಿಡ್ಜ್‌ನಲ್ಲಿದ್ದರೂ ಸಹ ಆಹಾರ ಪದಾರ್ಥಗಳು ಬೇಗನೆ ಒಣಗುತ್ತವೆ, ಕೆಟ್ಟ ವಾಸನೆ ಬರುತ್ತವೆ ಅಥವಾ ಹಾಳಾಗುತ್ತವೆ. ಇದು ಆಹಾರ ಪೋಲು ಮಾಡುವುದಲ್ಲದೆ, ಆರೋಗ್ಯದ ಮೇಲೂ ದುಷ್ಪರಿಣಾಮ ಬೀರುತ್ತದೆ. ಫ್ರಿಡ್ಜ್ (Refrigerator) ಸರಿಯಾಗಿ ಕಾರ್ಯನಿರ್ವಹಿಸಲು ಮತ್ತು ಅದರಲ್ಲಿಟ್ಟ ಆಹಾರ ಪದಾರ್ಥಗಳು ದೀರ್ಘಕಾಲ ತಾಜಾವಾಗಿರಲು ನಾವು ಕೆಲವು ಸ್ಮಾರ್ಟ್ ಕಿಚನ್ ಟಿಪ್ಸ್‌ಗಳನ್ನು ಪಾಲಿಸುವುದು ಅತೀ ಅಗತ್ಯ.

ಆಹಾರವನ್ನು ದೀರ್ಘಕಾಲ ಫ್ರೆಶ್ ಆಗಿಡಲು ನೆರವಾಗುವ 5 ಪ್ರಮುಖ ತಂತ್ರಗಳ (Food storage containers) ಬಗ್ಗೆ ಈ ಲೇಖನದಲ್ಲಿ ತಿಳಿಯೋಣ.

ಗಾಳಿಯಾಡದ ಡಬ್ಬಗಳ ಬಳಕೆ

ಆಹಾರವನ್ನು ಫ್ರಿಡ್ಜ್‌ನಲ್ಲಿ ಇಡುವಾಗ ತೆರೆದಿಡುವುದು ತಪ್ಪಾದ ಅಭ್ಯಾಸ. ಆಹಾರ ಪದಾರ್ಥಗಳನ್ನು ಯಾವಾಗಲೂ ಗಾಳಿಯಾಡದ ಡಬ್ಬಗಳಲ್ಲಿ (Use Airtight Containers) ಶೇಖರಿಸಿಡುವುದು ಅತ್ಯಂತ ಸುರಕ್ಷಿತ ಮತ್ತು ಪ್ರಯೋಜನಕಾರಿ.

ಹೀಗೆ ಮಾಡುವುದರಿಂದ ಆಹಾರದಲ್ಲಿನ ತೇವಾಂಶ ಹಾಗೆಯೇ ಉಳಿದು ಪದಾರ್ಥಗಳು ಒಣಗುವುದಿಲ್ಲ. ಅಲ್ಲದೆ, ಒಂದು ಪದಾರ್ಥದ ವಾಸನೆ ಮತ್ತೊಂದು ಪದಾರ್ಥಕ್ಕೆ ಹರಡುವುದಿಲ್ಲ. ಗಾಳಿಯಾಡದ ಡಬ್ಬಗಳು ಬ್ಯಾಕ್ಟೀರಿಯಾಗಳು ಹರಡುವುದನ್ನು ತಡೆದು ಆಹಾರ ಹೆಚ್ಚು ದಿನ ತಾಜಾವಾಗಿರುತ್ತದೆ.

ಬಿಸಿ ಆಹಾರವನ್ನು ನೇರವಾಗಿ ಫ್ರಿಡ್ಜ್‌ನಲ್ಲಿ ಇಡಬೇಡಿ

ಅಡುಗೆ ಮಾಡಿದ ತಕ್ಷಣ ಅಥವಾ ಆಹಾರ ಬಿಸಿಯಾಗಿರುವಾಗಲೇ ಅದನ್ನು ಫ್ರಿಡ್ಜ್‌ನಲ್ಲಿ ಇಡುವ ಅಭ್ಯಾಸ ಅನೇಕರಿಗಿದೆ. ಇದು ಫ್ರಿಡ್ಜ್ ಮತ್ತು ಅದರಲ್ಲಿನ ಇತರೆ ಆಹಾರ ಎರಡಕ್ಕೂ ಹಾನಿಕಾರಕ.

ಬಿಸಿ ಆಹಾರವನ್ನು ಇಟ್ಟಾಗ ಫ್ರಿಡ್ಜ್‌ನ ಒಳಗಿನ ತಾಪಮಾನ ಹಠಾತ್ತನೆ ಹೆಚ್ಚಾಗುತ್ತದೆ. ಇದನ್ನು ತಣ್ಣಗಾಗಿಸಲು ಫ್ರಿಡ್ಜ್ ಹೆಚ್ಚು ಶ್ರಮ ಹಾಕಬೇಕಾಗುತ್ತದೆ. ಈ ಪ್ರಕ್ರಿಯೆಯಲ್ಲಿ ಪಕ್ಕದಲ್ಲೇ ಇರುವ ಹಾಲು ಅಥವಾ ಇತರ ತರಕಾರಿಗಳು ಬೇಗನೆ ಹಾಳಾಗುವ ಸಾಧ್ಯತೆ ಇರುತ್ತದೆ. ಆದ್ದರಿಂದ, ಆಹಾರ ಸಂಪೂರ್ಣವಾಗಿ ತಣ್ಣಗಾದ ನಂತರವೇ ಫ್ರಿಡ್ಜ್ ಒಳಗೆ ಇಡಿ.

ಹಣ್ಣು ಮತ್ತು ತರಕಾರಿಗಳನ್ನು ಪ್ರತ್ಯೇಕವಾಗಿ ಇರಿಸಿ

ನಮಗೆಲ್ಲರಿಗೂ ಹಣ್ಣು ಮತ್ತು ತರಕಾರಿಗಳನ್ನು ಒಂದೇ ಬಾಕ್ಸ್‌ನಲ್ಲಿ ಅಥವಾ ಪಕ್ಕಪಕ್ಕದಲ್ಲಿ ಇಡುವ ಅಭ್ಯಾಸವಿರುತ್ತದೆ. ಆದರೆ, ವಿಜ್ಞಾನದ ಪ್ರಕಾರ ಇಂತಹ ಸಂಗ್ರಹಣೆ ಸರಿಯಲ್ಲ.

ಸೇಬು, ಬಾಳೆಹಣ್ಣಿನಂತಹ ಕೆಲವು ಹಣ್ಣುಗಳು 'ಎಥಿಲೀನ್' ಎಂಬ ಅನಿಲವನ್ನು ಬಿಡುಗಡೆ ಮಾಡುತ್ತವೆ. ಈ ಅನಿಲವು ಪಕ್ಕದಲ್ಲಿರುವ ಹಸಿರು ತರಕಾರಿಗಳು ಬೇಗನೆ ಹಣ್ಣಾಗುವಂತೆ ಅಥವಾ ಕೊಳೆಯುವಂತೆ ಮಾಡುತ್ತದೆ. ಆದ್ದರಿಂದ ಫ್ರಿಡ್ಜ್‌ನಲ್ಲಿ ಹಣ್ಣುಗಳಿಗೆ ಮತ್ತು ತರಕಾರಿಗಳಿಗಿರುವ ಪ್ರತ್ಯೇಕ ವಿಭಾಗಗಳನ್ನು (Sections) ಸರಿಯಾಗಿ ಬಳಸಿ.

ಫ್ರಿಡ್ಜ್ ಅತಿಯಾಗಿ ತುಂಬಿಸಬೇಡಿ

ಹಬ್ಬದ ದಿನಗಳಲ್ಲಿ ಅಥವಾ ವಾರದ ಸಂತೆ ಮಾಡಿದಾಗ ನಾವು ಫ್ರಿಡ್ಜ್ ಅನ್ನು ಕಂಠಪೂರ್ತಿ (Don't Overcrowd) ತುಂಬಿಸುತ್ತೇವೆ. ಹೀಗೆ ಮಾಡುವುದರಿಂದ ಫ್ರಿಡ್ಜ್‌ನ ಒಳಗಿನ ತಂಪಾದ ಗಾಳಿಯ ಸಂಚಲನ (Air Circulation) ಸರಿಯಾಗಿ ಆಗುವುದಿಲ್ಲ.

ಗಾಳಿಯಾಡಲು ಜಾಗವಿಲ್ಲದಿದ್ದರೆ ಕೆಲವು ಭಾಗಗಳಿಗೆ ತಂಪು ತಲುಪುವುದಿಲ್ಲ, ಇದರಿಂದ ಅಲ್ಲಿರುವ ಆಹಾರ ಪದಾರ್ಥಗಳು ಬೇಗನೆ ಕೆಡುತ್ತವೆ. ಫ್ರಿಡ್ಜ್‌ನಲ್ಲಿ ಗಾಳಿ ಮುಕ್ತವಾಗಿ ಸಂಚರಿಸಲು ಪದಾರ್ಥಗಳ ನಡುವೆ ಸ್ವಲ್ಪ ಜಾಗ ಬಿಡುವುದು ಅವಶ್ಯಕ.

ನಿಯಮಿತವಾಗಿ ಫ್ರಿಡ್ಜ್ ಸ್ವಚ್ಛಗೊಳಿಸಿ

ಮನೆಯ ಮೂಲೆ ಮೂಲೆಗಳನ್ನು ಸ್ವಚ್ಛಗೊಳಿಸುವ ನಾವು ಫ್ರಿಡ್ಜ್ ಸ್ವಚ್ಛತೆಯನ್ನು ನಿರ್ಲಕ್ಷಿಸುತ್ತೇವೆ. ಫ್ರಿಡ್ಜ್‌ನಲ್ಲಿ ಚೆಲ್ಲಿದ ಹಾಲು, ಹಳೆಯ ತರಕಾರಿ ಎಲೆಗಳು ಅಥವಾ ದೀರ್ಘಕಾಲದವರೆಗೆ ಇಟ್ಟ ಪದಾರ್ಥಗಳು ಬ್ಯಾಕ್ಟೀರಿಯಾಗಳ ಕೇಂದ್ರವಾಗುತ್ತವೆ.

ಒಟ್ಟಾರೆ, ವಾರಕ್ಕೊಮ್ಮೆಯಾದರೂ ಫ್ರಿಡ್ಜ್ ಅನ್ನು ಸಂಪೂರ್ಣವಾಗಿ ಖಾಲಿ ಮಾಡಿ ಸ್ವಚ್ಛಗೊಳಿಸಿ. ಹಳೆಯದಾದ ಅಥವಾ ಎಕ್ಸ್‌ಪೈರಿ ದಿನಾಂಕ ಮುಗಿದ ಪದಾರ್ಥಗಳನ್ನು ತಕ್ಷಣವೇ ಎಸೆದುಬಿಡಿ. ಇದು ಫ್ರಿಡ್ಜ್‌ನಲ್ಲಿ ಕೆಟ್ಟ ವಾಸನೆ ಬರದಂತೆ ತಡೆಯುತ್ತದೆ ಮತ್ತು ಹೊಸದಾಗಿ ಇಡುವ ಆಹಾರವನ್ನು ಸುರಕ್ಷಿತವಾಗಿರಿಸುತ್ತದೆ.