ಕರಿಬೇವಿನ ಹಸಿ ಹಸಿ ಚಟ್ನಿ ರೆಸಿಪಿ

* ತೇಜಸ್ವಿನಿ ಹೆಗಡೆ, ಬೆಂಗಳೂರು.

ಕರಿಬೇವು ಅತ್ಯುತ್ತಮ ಕ್ರಿಮಿನಾಶಕ ಸಸ್ಯ ಪ್ರಬೇಧ. ಕ್ಯಾಲ್ಶಿಯಮ್ ಕೊರತೆಗೆ, ಕೊಲೆಸ್ಟ್ರಾಲ್ ಹತೋಟಿಗೆ ದಿವ್ಯೌಷಧಿ. ಪ್ರತಿದಿನ 5 ಕರಿಬೇವಿನೆಲೆಗಳ ಸೇವನೆಯಿಂದ ರಕ್ತ ಶುದ್ಧಿಯಾಗುವುದಲ್ಲದೇ ಕೊಲೆಸ್ಟ್ರಾಲ್ ಕೂಡಾ ತಹಬಂದಿಗೆ ಬರುವುದು. ಇದರ ತಂಬುಳಿಯನ್ನು ಅಜೀರ್ಣಕ್ಕೆ ಉಪಯೋಗಿಸುತ್ತಾರೆ. ಬೇವಿನ ಚಟ್ನಿಯನ್ನು ಬೆಳಗಿನ ತಿಂಡಿಯಾದ ದೋಸೆ, ಇಡ್ಲಿ, ಚಪಾತಿಯ ಜೊತೆಗೆ ಇಲ್ಲವೇ ಬಿಸಿ ಅನ್ನಕ್ಕೆ ಕಲಸಿಕೊಂಡೂ ತಿನ್ನಬಹುದು.

ಈ ಚಟ್ನಿಯನ್ನು ಹಸಿಮೆಣಸನ್ನು ಹಾಕಿಯೂ ಇಲ್ಲಾ ಕಡ್ಡಿ ಮೆಣಸನ್ನು ಬಳಸಿಯೂ ತಯಾರಿಸಬಹುದು. ಎರಡರಲ್ಲಿ ಒಂದನ್ನು ಮಾತ್ರ ಬಳಸಬೇಕು.

ಅಗತ್ಯ ಸಾಮಗ್ರಿಗಳು :

ಹಸಿಮೆಣಸನ್ನು ಬಳಸುವುದಾದರೆ - 2-3 (ತುಂಬಾ ಖಾರವಿದ್ದರೆ ಕಡಿಮೆಯೂ ಹಾಕಬಹುದು. ಖಾರಕ್ಕೆ ತಕ್ಕಂತೆ ಬಳಸುವುದು.)
ಕಡ್ಡಿಮೆಣಸನ್ನು ಬಳಸುವುದಾದರೆ 3-4
ಕರಿಬೇವಿನ ಗರಿ - 12
ಕಾಯಿ ತುರಿ - 1 ಕಪ್
ಹುಣಸೇ ಹಣ್ಣು - ರುಚಿಗೆ ತಕ್ಕಷ್ಟು (ಸಾಮಾನ್ಯವಾಗಿ ಎರಡು ಕಡಲೇ ಕಾಳಿನ ಗಾತ್ರಷ್ಟು)
ಉಪ್ಪು - ರುಚಿಗೆ ತಕ್ಕಷ್ಟು
ಇಂಗು - ಕಡಲೇ ಕಾಳಿನ ಗಾತ್ರದಷ್ಟು
ಸಾಸಿವೆ - 1/4 ಚಮಚ
ಎಣ್ಣೆ - 1-2 ಚಮಚ

ಮಾಡುವ ವಿಧಾನ :

* ಕರಿಬೇವಿನ ಎಲೆಗಳನ್ನು ಚೆನ್ನಾಗಿ ತೊಳೆದಿಟ್ಟುಕೊಳ್ಳಬೇಕು.
* ಬಾಣಲೆಯಲ್ಲಿ ಎಣ್ಣೆ ಹಾಕಿ ಇಂಗು, ಮೆಣಸು(ಕಡ್ಡಿ ಅಥವಾ ಹಸಿ ಮೆಣಸು) ಹಾಗೂ ಕರಿಬೇವಿನೆಲೆಗಳನ್ನು ಹಾಕಿ ಬಾಡಿಸಿಕೊಳ್ಳಬೇಕು.
* ತಣಿದ ನಂತರ ಕಾಯಿತುರಿಯ ಜೊತೆಗೆ ಹುಳಿ ಹಾಗೂ ಉಪ್ಪನ್ನು ಹಾಕಿ ಬಾಡಿಸಿಕೊಂಡ ಮಿಶ್ರಣವನ್ನೂ ಸೇರಿಸಿ ನುಣ್ಣಗೆ ರುಬ್ಬಬೇಕು.
* ನಂತರ ಇದಕ್ಕೆ ಸಾಸಿವೆ ಒಗ್ಗರಣೆಯನ್ನು ಕೊಡಬೇಕು.