ಹಚ್ಚ ಹಸಿರು ಬೀನ್ಸ್‌ನಲ್ಲಿ ಅಡಗಿದೆ ತೂಕ ಇಳಿಸುವ ರಹಸ್ಯ!

ಜೀರ್ಣಕ್ರಿಯೆಯನ್ನು ನಿಧಾನಗೊಳಿಸುತ್ತದೆ

ಬೀನ್ಸ್‌ನಲ್ಲಿರುವ ನಾರುಗಳು ಅಷ್ಟು ಸುಲಭವಾಗಿ ಜೀರ್ಣವಾಗದಿರುವುದರಿಂದ ಪೂರ್ಣವಾಗಿ ಜೀರ್ಣವಾಗಲು ಹೆಚ್ಚು ಸಮಯ ತೆಗೆದುಕೊಳ್ಳುತ್ತದೆ. ಇದರಿಂದಾಗಿ ಬೇಗನೇ ಹಸಿವಾಗದೇ ಹೆಚ್ಚು ಹೆಚ್ಚು ತಿನ್ನುವ ಬಯಕೆ ಕುಂಠಿತವಾಗುತ್ತದೆ. ಪರಿಣಾಮವಾಗಿ ತೂಕ ಕಳೆದುಕೊಳ್ಳಲು ಪರೋಕ್ಷವಾಗಿ ಸಹಕರಿಸುತ್ತದೆ.

ಅತಿ ಹೆಚ್ಚಿನ ನಾರು

ಬೀನ್ಸ್ ನಲ್ಲಿರುವ ನಾರನ್ನು ಜೀರ್ಣಿಸಲು ಜೀರ್ಣಾಂಗಗಳಿಗೆ ಹೆಚ್ಚಿನ ಶಕ್ತಿ ಅವಶ್ಯವಿರುವ ಕಾರಣ ದೇಹದಲ್ಲಿ ಸಂಗ್ರಹವಾಗಿರುವ ಕೊಬ್ಬನ್ನು ಬಳಸಬೇಕಾಗಿ ಬರುತ್ತದೆ.ತನ್ಮೂಲಕ ಕೊಬ್ಬು ಕಡಿಮೆಯಾಗಿ ತೂಕ ಇಳಿಯುತ್ತದೆ.

ಉತ್ತಮ ಪ್ರಮಾಣದ ಪ್ರೋಟೀನ್ ಲಭ್ಯವಿದೆ

ಸಾಮಾನ್ಯವಾಗಿ ಪ್ರೋಟೀನುಗಳು ನಮಗೆ ಮಾಂಸಾಹಾರದ ಮೂಲಕ ಹೆಚ್ಚು ಪ್ರಮಾಣದಲ್ಲಿ ದೊರಕುತ್ತದೆ.ಆದರೆ ಜೊತೆಗೇ ಕೊಬ್ಬು ಮತ್ತು ಇತರ ಅನಗತ್ಯ ಪೋಷಕಾಂಶಗಳು ಆಗಾಧ ಪ್ರಮಾಣದಲ್ಲಿ ದೊರಕುವುದರಿಂದ ಮಾಂಸಾಹಾರ ಸೇವನೆಯಿಂದ ತೂಕ ಬೇಗನೇ ಕಡಿಮೆಯಾಗದು, ಬದಲಿಗೆ ಇನ್ನಷ್ಟು ಹೆಚ್ಚುವ ಅಪಾಯವಿದೆ. ಇದರ ಬದಲಿಗೆ ಬೀನ್ಸ್ ಗಳನ್ನು ಸೇವಿಸುವ ಮೂಲಕ ದೇಹಕ್ಕೆ ಅಗತ್ಯವಿರುವ ಪ್ರಮಾಣದಲ್ಲಿ ಪ್ರೋಟೀನನ್ನೂ ಪಡೆಯಬಹುದು ಹಾಗೂ ಅನಗತ್ಯವಾದ ಕೊಬ್ಬು ಬೆಳೆಯುವುದನ್ನೂ ತಡೆಯಬಹುದು. ಇದರಿಂದಲೂ ದೇಹದ ತೂಕ ಕಡಿಮೆಯಾಗಲು ಸಾಧ್ಯವಾಗುತ್ತದೆ.

ಕಡಿಮೆ ಕ್ಯಾಲೋರಿಗಳು

ಸಾಮಾನ್ಯವಾಗಿ ಒಂದು ಪ್ರಮಾಣದ ಇತರ ಆಹಾರಗಳಿಗಿಂತಲೂ ಬೇಯಿಸಿದ ಬೀನ್ಸ್ ನಲ್ಲಿ ಮೂರರ ಒಂದು ಪ್ರಮಾಣದಷ್ಟು ಮಾತ್ರ ಕ್ಯಾಲೋರಿಗಳಿರುತ್ತವೆ. ಇದರಿಂದ ಹಸಿವು ಪೂರ್ಣವಾದರೂ ದೇಹಕ್ಕೆ ಅಗತ್ಯವಾದ ಶಕ್ತಿ ದೊರಕದೇ ಇರುವುದರಿಂದ ಅನಿವಾರ್ಯವಾಗಿ ದೇಹ ಸಂಗ್ರಹವಾಗಿದ್ದ ಕೊಬ್ಬನ್ನು ಬಳಸಲೇಬೇಕಾಗುತ್ತದೆ. ಪರಿಣಾಮವಾಗಿ ಹೆಚ್ಚಿನ ಕೊಬ್ಬು ಕರಗಿ ತೂಕ ಇಳಿಯಲು ಸಾಧ್ಯವಾಗುತ್ತದೆ.

ಬೀನ್ಸ್ ನಲ್ಲಿ ಕ್ಯಾಲೋರಿ ಕಡಿಮೆ ಇದ್ದರೂ ಶಕ್ತಿ ಹೆಚ್ಚಿದೆ

ಜೀರ್ಣಕ್ರಿಯೆಯಿಂದ ನಮ್ಮ ರಕ್ತದಲ್ಲಿ ಸೇರುವ ಕ್ಯಾಲೋರಿಗಳಿಗೂ ಪೋಷಕಾಂಶಗಳಿಗೂ ನೇರ ಸಂಬಂಧವಿದೆ. ಕ್ಯಾಲೋರಿ ಕಡಿಮೆ ಇದ್ದರೂ ಪೋಷಕಾಂಶಗಳ ಕಾರಣ ಜೀವಕೋಶಗಳಿಗೆ ಅಗತ್ಯಪ್ರಮಾಣದ ಶಕ್ತಿ ಲಭ್ಯವಾಗಿ ದಿನದ ಚಟುವಟಿಕೆಯಲ್ಲಿ ಯಾವುದೇ ತೊಂದರೆ ಕಂಡುಬರದೇ ಇರುವುದು ಬೀನ್ಸ್‌ನ ಹೆಗ್ಗಳಿಕೆಯಾಗಿದೆ. ಆದ್ದರಿಂದ ಕ್ರೀಡಾಪಟುಗಳು ಮತ್ತು ಅಧಿಕ ದೈಹಿಕ ಶ್ರಮ ಪಡುವವರು ಬೀನ್ಸ್ ಅನ್ನು ಹೆಚ್ಚಿನ ಪ್ರಮಾಣದಲ್ಲಿ ಸೇವಿಸಬಹುದು.

ಮಾಂಸಾಹಾರಿಗಳಿಗೂ ಸೂಕ್ತವಾಗಿದೆ

ಒಂದು ವೇಳೆ ಮಾಂಸಾಹಾರದಿಂದ ವಿಮುಖರಾಗಲು ಇಚ್ಛಿಸದೇ ತೂಕ ಹೆಚ್ಚಿಸಿಕೊಳ್ಳಲೂ ಇಷ್ಟವಿಲ್ಲದವರಿಗೆ ಬೀನ್ಸ್ ಅತ್ಯುತ್ತಮ ಆಯ್ಕೆಯಾಗಿದೆ.ಇದಕ್ಕಾಗಿ ಸ್ವಲ್ಪ ಪ್ರಮಾಣದಲ್ಲಿ ಕೋಳಿಮಾಂಸವನ್ನು ಹೆಚ್ಚಿನ ಪ್ರಮಾಣದ ಬೀನ್ಸ್ ನ ಜೊತೆ ಸೇವಿಸುವುದರಿಂದ ಎರಡೂ ಅಗತ್ಯಗಳನ್ನು ಪೂರೈಸಿಕೊಳ್ಳಬಹುದು.

ಮಧುಮೇಹಿಗಳಿಗೂ ಸೂಕ್ತವಾಗಿದೆ

ಮೊದಲ ವಿಧದ ಮಧುಮೇಹಿಗಳು ಬೀನ್ಸ್ ಅನ್ನು ಆತಂಕವಿಲ್ಲದೇ ಸೇವಿಸಬಹುದು. ಏಕೆಂದರೆ ಬೀನ್ಸ್ ನಲ್ಲಿರುವ ಕರಗುವ ನಾರು ರಕ್ತದಲ್ಲಿ ಹೆಚ್ಚಿನ ಸಕ್ಕರೆಯ ಪ್ರಮಾಣವನ್ನು ನಿಯಂತ್ರಿಸುತ್ತದೆ. ಇದರಿಂದ ಕಡಿಮೆ ಇನ್ಸುಲಿನ್ ರಕ್ತದಲ್ಲಿ ಸೇರಿಸಿದರೆ ಸಾಕಾಗುತ್ತದೆ. ಬೀನ್ಸ್ ನಲ್ಲಿ ಸಕ್ಕರೆ ಅಂಶ ಅತ್ಯಲ್ಪ ಪ್ರಮಾಣದಲ್ಲಿರುವುದು ಹಾಗೂ ರಕ್ತದ ಸಕ್ಕರೆಯನ್ನು ನಿಯಂತ್ರಿಸುವ ಗುಣಗಳಿಂದ ಮಧುಮೇಹಿಗಳೂ ಸೇವಿಸಬಹುದಾದ ಉತ್ತಮ ಆಹಾರವಾಗಿದೆ.