ಅಮೆರಿಕದ ಚಾಪ್ ಸ್ಯೂ ನೂಡಲ್ಸ್ ಟೇಸ್ಟ್ ನೋಡಿ

ಇಂಡೋ-ಚೈನೀಸ್ ಖಾರದ ತಿನಿಸಾಗಿರುವ ಅಮೆರಿಕನ್ ಚಾಪ್ ಸ್ಯೂ ನೂಡಲ್ಸ್ ತಯಾರಿಸೋದು ತುಂಬಾ ಸುಲಭ. ನೂಡಲ್ಸ್ ನೊಂದಿಗೆ ತರಕಾರಿ ಗ್ರೇವಿ ಮಾಡಿ ತಿನ್ನುವ ಈ ಖಾದ್ಯವಂತೂ ರುಚಿಗೆ ಹೇಳಿ ಮಾಡಿಸಿದ್ದು.

ಅಮೆರಿಕದಲ್ಲಿ ಈ ಚಾಪ್ ಸ್ಯೂ ತಿನಿಸನ್ನು ಮಾಂಸ ಬೆರೆಸಿ ಮಾಡಲಾಗುತ್ತೆ. ಆದರೆ ಇಂಡೋ ಚೈನೀಸ್ ಪ್ರಕಾರ ತರಕಾರಿಯಿಂದ ನೂಡಲ್ಸ್ ಮಾಡೋದು ಹೇಗೆ ಎಂದು ಇಲ್ಲಿ ತಿಳಿದುಕೊಳ್ಳಿ.

ಚಾಪ್ ಸ್ಯೂ ನೂಡಲ್ಸ್ ಗೆ ಏನೇನು ಬೇಕು:
* 500 ಗ್ರಾಂ ಬೇಯಿಸಿದ ನೂಡಲ್ಸ್
* ತರಕಾರಿ (ಅಣಬೆ, ಕ್ಯಾರೆಟ್, ಕ್ಯಾಪ್ಸಿಕಂ, ಈರುಳ್ಳಿ, ಎಲೆಕೋಸು (ಉದ್ದುದ್ದವಾಗಿ ಕತ್ತರಿಸಿರಬೇಕು)
* 3-4 ಎರಡು ಭಾಗ ಕತ್ತರಿಸಿದೆ ಬೇಬಿ ಕಾರ್ನ್
* 5-6 ಬೆಳ್ಳುಳ್ಳಿ ಎಸಳು ಅಥವಾ ಪೇಸ್ಟ್
* 3-4 ಹಸಿರು ಮೆಣಸಿನಕಾಯಿ
* 4-5 ಚಮಚ ಸೋಯಾ ಸಾಸ್
* 1/2 ಚಮಚ ಟೊಮೆಟೊ ಕೆಚಪ್
* 1 ಚಮಚ ಚಿಲ್ಲಿ ಸಾಸ್, 1 ಚಮಚ ಮೆಣಸಿನ ಪುಡಿ
* ಉಪ್ಪು, ಎಣ್ಣೆ, ನೀರು

ಚಾಪ್ ಸ್ಯೂ ನೂಡಲ್ಸ್ ತಯಾರಿಸುವ ವಿಧಾನ:
1. ಬಾಣಲೆಗೆ ಸ್ವಲ್ಪ ಎಣ್ಣೆ ಹಾಕಿ ಕಾಯಿಸಿ ಅದಕ್ಕೆ ಬೇಯಿಸಿದ ನೂಡಲ್ಸ್ ಹಾಕಬೇಕು. ನೂಡಲ್ಸ್ ಗರಿಗರಿಯಾಗುವವರೆಗೂ ಹುರಿದು ಒಂದೆಡೆ ಇಟ್ಟುಕೊಳ್ಳಬೇಕು. ನೂಡಲ್ಸ್ ನಲ್ಲಿರುವ ಎಣ್ಣೆ ಹೋಗಲು ಅದನ್ನು ಟಿಶ್ಯೂ ಪೇಪರ್ ಮೇಲೆ ಸೋರಲು ಬಿಡಬಹುದು.

2. ಬಾಣಲೆಗೆ 2 ಚಮಚ ಎಣ್ಣೆ ಹಾಕಿ ಕಾಯಿಸಿ ಅದರಲ್ಲಿ ಬೆಳ್ಳುಳ್ಳಿ, ಈರುಳ್ಳಿ, ಕ್ಯಾರೆಟ್, ಕ್ಯಾಪ್ಸಿಕಂ, ಎಲೆಕೋಸು, ಬೇಬಿ ಕಾರ್ನ್, ಹಸಿರು ಮೆಣಸಿನಕಾಯಿ ಮತ್ತು ಅಣಬೆ ಹಾಕಿ ಹುರಿದು ಮುಚ್ಚುಳ ಮುಚ್ಚಿ 2-3 ನಿಮಿಷ ಬೇಯಿಸಬೇಕು.

3. ನಂತರ ರುಚಿಗೆ ತಕ್ಕಷ್ಟು ಉಪ್ಪು, ಸೋಯಾ ಸಾಸ್, ಟೊಮೆಟೊ ಕೆಚಪ್, ಚಿಲ್ಲಿ ಸಾಸ್ ಹಾಕಿ ಚೆನ್ನಾಗಿ ಬೆರೆಸಿ ಈ ಮಿಶ್ರಣವನ್ನು 2 ನಿಮಿಷ ಬೇಯಿಸಿ ಸ್ವಲ್ಪ ನೀರು ಹಾಕಬೇಕು. 3-4 ನಿಮಿಷ ಬೇಯಿಸಿ ಉರಿಯನ್ನು ಆರಿಸಬೇಕು.

4. ಈಗ ಪ್ಲೇಟ್ ಗೆ ಹುರಿದಿಟ್ಟುಕೊಂಡಿದ್ದ ನೂಡಲ್ಸ್ ಹಾಕಿ ಅದಕ್ಕೆ ಗ್ರೇವಿ ಬೆರೆಸಿಕೊಂಡು ತಿಂದರೆ ಚಾಪ್ ಸ್ಯೂ ನೂಡಲ್ಸ್ ತಿನ್ನಲು ರೆಡಿಯಾಗಿರುತ್ತೆ. ಇದನ್ನು ಬಿಸಿ ಬಿಸಿ ಇದ್ದಾಗಲೇ ತಿನ್ನಬೇಕು. ತಣ್ಣಗಾದ ಮೇಲೆ ತಿನ್ನಲು ರುಚಿಯೆನಿಸುವುದಿಲ್ಲ.