ಶೀತ, ಗಂಟಲು ಕೆರತ ಹೋಗಲಾಡಿಸುತ್ತೆ ಈ ರಸಂ

ಈ ವರ್ಷ ಕಳೆದ ವರ್ಷಕ್ಕಿಂತ ತುಸು ಅಧಿಕವೇ ಮಳೆ ಸುರಿಯುತ್ತಿದೆ. ವಾತಾವರಣ ತುಂಬಾ ತಂಪಾಗಿರುವುದರಿಂದ ಶೀತ, ಜ್ವರ, ಗಂಟಲು ಕೆರೆತ ಈ ರೀತಿಯ ಸಮಸ್ಯೆಗಳು ಹೆಚ್ಚಾಗಿ ಕಂಡು ಬರುತ್ತಿದೆ.

ಮಳೆಗಾಲ ಮತ್ತು ಚಳಿಗಾಲದಲ್ಲಿ ಅನ್ನ, ಹುಳಿ, ಪಲ್ಯ ಇವುಗಳ ಜೊತೆ ಒಂದು ರಸಂ ಕೂಡ ಮಾಡಿದರೆ ಒಳ್ಳೆಯದು. ಏಕೆಂದರೆ ಶುಂಠಿ ಅಥವಾ ಕರಿ ಮೆಣಸು ಬಳಸಿ ರಸಂ ತಯಾರಿಸುವುದರಿಂದ ಈ ರಸಂ ತಿಂದರೆ ಶೀತ, ಕೆಮ್ಮಿನಂತಹ ತೊಂದರೆಗಳು ಕಾಡುವುದಿಲ್ಲ, ಬಾಯಿಗೂ ರುಚಿಕರವಾಗಿರುತ್ತದೆ, ಮೈ ಕೂಡ ಬೆಚ್ಚಗಿರುತ್ತದೆ.

ಇಲ್ಲಿ ನಾವು ಕರಿ ಮೆಣಸು ಬಳಸಿ ಮಾಡುವ ಆಂಧ್ರ ಶೈಲಿಯ ರಸಂನ ರೆಸಿಪಿ ನೀಡಿದ್ದೇವೆ ನೋಡಿ:

ಬೇಕಾಗುವ ಸಾಮಾಗ್ರಿಗಳು
* ಬೇಯಿಸಿ ಮ್ಯಾಶ್ ಮಾಡಿದ ತೊಗರಿ ಬೇಳೆ(2 ದೊಡ್ಡ ಚಮಚ)
* ದೊಡ್ಡ ಗಾತ್ರದ ಟೊಮೆಟೊ 1
* 1/4 ಚಮಚ ಅರಿಶಿಣ ಪುಡಿ
* ಹುಣಸೆ ಹಣ್ಣು( ನಿಂಬೆ ಹಣ್ಣು ಗಾತ್ರದಷ್ಟು)
* ಅರ್ಧ ಚಮಚ ಬೆಲ್ಲದ ಪುಡಿ (ಬೇಕಿದ್ದರೆ)
* ಸ್ವಲ್ಪ ಕರಿಬೇವಿನ ಎಲೆ
ರುಚಿಗೆ ತಕ್ಕ ಉಪ್ಪು
3 ಕಪ್ ನೀರು

ರಸಂ ಪೌಡರ್ ಗೆ ಬೇಕಾಗುವ ಸಾಮಾಗ್ರಿಗಳು
* 1 ಚಮಚ ತೊಗರಿಬೇಳೆ
* 2 ಚಮಚ ಕರಿ ಮೆಣಸು
* ಒಂದೂವರೆ ಚಮಚ ಕೊತ್ತಂಬರಿ ಬೀಜ
* 3/4 ಚಮಚ ಜೀರಿಗೆ

ಇವೆಲ್ಲವನ್ನು ರೋಸ್ಟ್ ಮಾಡಿ ಪುಡಿ ಮಾಡಿ.

ಒಗ್ಗರಣೆಗೆ
ಅರ್ಧ ಚಮಚ ಸಾಸಿವೆ
ಸ್ವಲ್ಪ ಇಂಗು
1 ಒಣ ಮೆಣಸು
ಸ್ವಲ್ಪ ಕೊತ್ತಂಬರಿ ಸೊಪ್ಪು
2 ಚಮಚ ತುಪ್ಪ

ತಯಾರಿಸುವ ವಿಧಾನ:

* ತಳ ಸ್ವಲ್ಪ ದೊಡ್ಡದಿರುವ ಪಾತ್ರೆಗೆ 3 ಕಪ್ ನೀರು ಹಾಕಿ ಅದರಲ್ಲಿ ಕತ್ತರಿಸಿದ ಟೊಮೆಟೊ, ಹುಣಸೆ ಹಣ್ಣಿಸ ರಸ, ಉಪ್ಪು, ಅರಿಶಿಣ ಪುಡಿ, ಸ್ವಲ್ಪ ತಾಜಾ ಕೊತ್ತಂಬರಿ ಸೊಪ್ಪು, ಬೆಲ್ಲ ಹಾಕಿ ಕುದಿಸಿ, ನೀರು ಕುದಿ ಬಂದ ಮೇಲೆ ಮತ್ತೆ 5 ನಿಮಿಷ ಕುದಿಸಿ.

* ಈಗ ರಸಂ ಪುಡಿ ಹಾಕಿ, ಮ್ಯಾಶ್ ಮಾಡಿದ ದಾಲ್ ಹಾಕಿ ಮತ್ತೆ 5 ನಿಮಿಷ ಕುದಿಸಿ.

* ನಂತರ ಒಗ್ಗರಣೆ ಪಾತ್ರೆಗೆ ತುಪ್ಪ ಹಾಕಿ ಬಿಸಿ ಮಾಡಿ ಸಾಸಿವೆ ಹಾಕಿ, ಸಾಸಿವೆ ಚಟಾಪಟಾ ಶಬ್ದ ಮಾಡುವಾಗ ಒಣ ಮೆಣಸು ಮತ್ತು ಕರಿ ಬೇವಿನ ಎಲೆ ಮತ್ತು ಇಂಗು ಹಾಕಿ ಅದನ್ನು ಕುದಿಯುತ್ತಿರುವ ರಸಂಗೆ ಹಾಕಿ ಒಮ್ಮೆ ಮಿಕ್ಸ್ ಮಾಡಿ 2 ನಿಮಿಷ ಕುದಿಸಿ, ಉರಿಯಿಂದ ಇಳಿಸಿ, ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿದರೆ ಪೆಪ್ಪರ್ ರಸಂ (ಕರಿ ಮೆಣಸಿನ ರಸಂ) ರೆಡಿ.
ಇದನ್ನು ಅನ್ನದ ಜೊತೆ ಕಲೆಸಿಕೊಂಡು ತಿನ್ನಲು ತುಂಬಾ ರುಚಿಯಾಗಿರುತ್ತದೆ.