ಈ ಬದನೆಕಾಯಿ ಗೊಜ್ಜು ಖಾರ ಪ್ರಿಯರಿಗೆ ಮಾತ್ರ

ಬದನೆಕಾಯಿ ಗೊಜ್ಜನ್ನು ತರಾವರಿ ರುಚಿಯಲ್ಲಿ ತಯಾರಿಸಬಹುದು. ಆಹಾರ ವಿಷಯದಲ್ಲಿ ಒಬ್ಬೊಬ್ಬರ ಬಾಯಿ ರುಚಿ ಒಂದೊಂದು ರೀತಿ ಇರುತ್ತದೆ. ಅಡುಗೆ ಖಾರವಿದ್ದರೆ ಮಾತ್ರ ರುಚಿಯಪ್ಪಾ ಅನ್ನುವ ಖಾರ ಪ್ರಿಯರಿಗಾ ಈ ಬದನೆಕಾಯಿ ಗೊಜ್ಜಿನ ರೆಸಿಪಿ ನೀಡಿದ್ದೇವೆ.

ಇದನ್ನು ಮಾಡುವ ವಿಧಾನ ಸರಳವಾಗಿದ್ದು, ರೆಸಿಪಿಗೆ ಮುಂದೆ ಓದಿ:

ಬೇಕಾಗುವ ಸಾಮಾಗ್ರಿಗಳು
ಬದನೆಕಾಯಿ 4-5 (ಸಾಧಾರಣ ಗಾತ್ರದ್ದು)
ಈರುಳ್ಳಿ 2
ಕಡಲೆ ಬೇಳೆ 1 ಚಮಚ
ಕೊತ್ತಂಬರಿ ಬೀಜ 1 ಚಮಚ
ಅರಿಶಿಣ ಪುಡಿ ಅರ್ಧ ಚಮಚ
ಒಣ ಮೆಣಸು 5-6
ಸಾಸಿವೆ 1/2 ಚಮಚ
ಸ್ವಲ್ಪ ಕರಿಬೇವಿನ ಎಲೆ
ರುಚಿಗೆ ತಕ್ಕ ಉಪ್ಪು
ಎಣ್ಣೆ 2 ಚಮಚ

ತಯಾರಿಸುವ ವಿಧಾನ:

* ಬದನೆಕಾಯಿ ಶುದ್ಧ ಮಾಡಿ ಅದನ್ನು ಉದ್ದುದ್ದವಾಗಿ ಕತ್ತರಿಸಿ.

* ಬಾಣಲೆಯಲ್ಲಿ ಒಂದು ಚಮಚ ಎಣ್ಣೆ ಹಾಕಿ ಅದರಲ್ಲಿ ಒಣ ಮೆಣಸು, ಕೊತ್ತಂಬರಿ ಬೀಜ, ಕಡಲೆ ಹಾಕಿ ಕೊತ್ತಂಬರಿ ಬೀಜ ಮತ್ತು ಕಡಲೆ ಬೀಜ ಬಣ್ಣ ಸ್ವಲ್ಪ ಬದಲಾಗುವವರೆಗೆ ಹುರಿದು ನಂತರ ಉರಿಯಿಂದ ತೆಗೆದು ಆರಲು ಇಡಿ.

* ತಣ್ಣಗಾದ ಮೇಲೆ ಅವುಗಳನ್ನು ಮಿಕ್ಸಿಯಲ್ಲಿ ಹಾಕಿ, ಅರಿಶಿಣ ಸೇರಿಸಿ ರುಬ್ಬಿ.

* ಈಗ ಪಾತ್ರೆಯನ್ನು ಬಿಸಿ ಮಾಡಿ ಅದರಲ್ಲಿ 1 ಚಮಚ ಎಣ್ಣೆ ಬಿಸಿ ಮಾಡಿ, ನಂತರ ಸಾಸಿವೆ ಹಾಕಿ, ಸಾಸಿವೆ ಚಿಟುಗುಟ್ಟುವಾಗ ಕರಿಬೇವಿನ ಎಲೆ ಹಾಕಿ ನಂತರ ಕತ್ತರಿಸಿದ ಈರುಳ್ಳಿ ಹಾಕಿ , ಈರುಳ್ಳಿ ಸ್ವಲ್ಪ ಕಂದು ಬಣ್ಣ ಬರುವವರಗೆ ಹುರಿಯಿರಿ. ಈಗ ಕತ್ತರಿಸಿದ ಬದನೆಕಾಯಿ ಹಾಕಿ ಮತ್ತೆ 3-4 ನಿಮಿಷ ಹುರಿಯಿರಿ, ರುಚಿಗೆ ತಕ್ಕ ಉಪ್ಪನ್ನು ಸೇರಿಸಿ, ನಂತರ ರುಬ್ಬಿದ ಮಿಶ್ರಣವನ್ನು ಹಾಕಿ ಮಿಕ್ಸ್ ಮಾಡಿ. ಬೇಕಿದ್ದರೆ ಸ್ವಲ್ಪವೇ ಸ್ವಲ್ಪ ನೀರು ಹಾಕಿ.

* ನಂತರ ಪಾತ್ರೆಯ ಬಾಯಿ ಮುಚ್ಚಿ ಬೇಯಿಸಿ, ಹೀಗೆ ಬೇಯಿಸುವಾಗ 5 ನಿಮಿಷಕ್ಕೊಮ್ಮೆ ಪಾತ್ರೆಯ ಮುಚ್ಚಳ ತೆಗೆದು ಬದನೆಕಾಯಿಯನ್ನು ಸೌಟ್ ನಿಂದ ಆಡಿಸಲು ಮರೆಯಬೇಡಿ.

* ಬದನೆಕಾಯಿ ಬೆಂದ ನಂತರ ಉರಿಯಿಂದ ಇಳಿಸಿದರೆ ಬದನೆಕಾಯಿ ಗೊಜ್ಜು ರೆಡಿ.