ಪರೋಟದಲ್ಲಿ ಭಿನ್ನ ರುಚಿ-ಕಾರ್ನ್ ಪರೋಟ

ಪರೋಟವನ್ನು ಕೆಲವರು ಗೋಧಿಯಿಂದ ತಯಾರಿಸಿದರೆ, ಕೆಲವರು ಮೈದಾ ಬಳಸಿ ತಯಾರಿಸುತ್ತಾರೆ. ಆದರೆ ಮೈದಾ ಬಳಸಿ ಮಾಡುವ ಪರೋಟಕ್ಕಿಂತ, ಗೋಧಿಯಿಂದ ಮಾಡುವ ಪರೋಟ ಒಳ್ಳೆಯದು.

ಪರೋಟದಲ್ಲಿ ಇತರ ಮಸಾಲೆ ಪದಾರ್ಥಗಳನ್ನು ತುಂಬಿ ತಯಾರಿಸಿದರಂತೂ ತುಂಬಾ ರುಚಿಯಾಗಿರುತ್ತದೆ. ಈ ರೀತಿ ಮಸಾಲೆ ತುಂಬಿ ಮಾಡುವ ಪರೋಟಗಳಲ್ಲಿ ಆಲೂ ಪರೋಟವಂತೂ ತುಂಬಾ ಫೇಮಸ್. ಆಲೂ ಪರೋಟದಷ್ಟೇ ರುಚಿಕರವಾದ ಮತ್ತೊಂದು ಪರೋಟದ ರೆಸಿಪಿಯನ್ನು ಇಲ್ಲಿ ನೀಡಿದ್ದೇನೆ ನೋಡಿ:

ಬೇಕಾಗುವ ಸಾಮಾಗ್ರಿಗಳು
ಗೋಧಿ ಹಿಟ್ಟು 2 ಕಪ್
ರುಚಿಗೆ ತಕ್ಕ ಉಪ್ಪು
ನೀರು 1 ಕಪ್

ಇತರ ಸಾಮಾಗ್ರಿಗಳು
ಜೋಳ 1 ಕಪ್
ಈರುಳ್ಳಿ 1
ಹಸಿ ಮೆಣಸಿನಕಾಯಿ 2
ಬೇಯಿಸಿದ ಆಲೂಗಡ್ಡೆ 1
ನಿಂಬೆ ರಸ 1 ಚಮಚ ಮತ್ತು ಜೀರಿಗೆ ಪುಡಿ ಅರ್ಧ ಚಮಚ
ರುಚಿಗೆ ತಕ್ಕ ಉಪ್ಪು
ಎಣ್ಣೆ 2 ಚಮಚ

ತಯಾರಿಸುವ ವಿಧಾನ:

* ಗೋಧಿ ಹಿಟ್ಟಿಗೆ ರುಚಿಗೆ ತಕ್ಕ ಉಪ್ಪು ಹಾಗೂ ಸ್ವಲ್ಪ ನೀರು ಹಾಕಿ ಚಪಾತಿಯ ಹದಕ್ಕೆ ತಟ್ಟಿ, ಅದನ್ನು ಕಾಟನ್ ಬಟ್ಟೆಯಿಂದ ಮುಚ್ಚಿ ಒಂದು ಬದಿಯಲ್ಲಿಡಿ.

* ಈಗ ಪ್ಯಾನ್ ಅನ್ನು ಗ್ಯಾಸ್ ಮೇಲೆ ಇಟ್ಟು ಬಿಸಿ ಮಾಡಿದ ಬಳಿಕ, 1 ಚಮಚ ಎಣ್ಣೆ ಹಾಕಿ, ಎಣ್ಣೆ ಬಿಸಿಯಾದಾಗ ಕತ್ತರಿಸಿದ ಹಸಿ ಮೆಣಸಿನಕಾಯಿ, ಈರುಳ್ಳಿ ಹಾಕಿ, ಈರುಳ್ಳಿ ಕಂದು ಬಣ್ಣ ಬರುವವರೆಗೆ ಫ್ರೈ ಮಾಡಿ.

* ಜೋಳವನ್ನು ಹಾಕಿ ಮತ್ತೆ 5 ನಿಮಿಷ ಫ್ರೈ ಮಾಡಿ, ಮ್ಯಾಶ್ ಮಾಡಿದ ಆಲೂಗಡ್ಡೆಯನ್ನು ಸೇರಿಸಿ, ನಂತರ ಜೀರಿಗೆ ಪುಡಿ ಹಾಕಿ, ರುಚಿಗೆ ತಕ್ಕ ಉಪ್ಪು, ನಿಂಬೆ ರಸ ಹಾಕಿ ಮಿಕ್ಸ್ ಮಾಡಿ 2-3 ನಿಮಿಷ ಸೌಟ್ ನಿಂದ ಆಡಿಸುತ್ತಾ ಬೇಯಿಸಿ, ನಂತರ ಉರಿಯಿಂದ ಇಳಿಸಿ ತಣ್ಣಗಾಗಲು ಇಡಿ.

* ನಂತರ ಅವುಗಳಿಂದ 8-10 ಉಂಡೆ ಕಟ್ಟಿ.

* ಈಗ ಕಲೆಸಿಟ್ಟ ಗೋಧಿ ಹಿಟ್ಟಿನಿಂದ 8-10 ಉಂಡೆ ಕಟ್ಟಿ.

* ಈಗ ಒಂದು ಉಂಡೆಯನ್ನು ತೆಗೆದುಕೊಂಡು ಚಪಾತಿಗೆ ಲಟ್ಟಿಸಿದಂತೆ ಲಟ್ಟಿಸಿ, ಅದರಲ್ಲಿ ಜೋಳದ ಉಂಡೆ ಇಟ್ಟು, ಮತ್ತೆ ಉಂಡೆ ಕಟ್ಟಿ ಲಟ್ಟಿಸಿ. ಈ ರೀತಿ ಉಳಿದ ಉಂಡೆಗಳನ್ನು ಲಟ್ಟಿಸಿ.

* ನಂತರ ತವಾವನ್ನು ಬಿಸಿ ಮಾಡಿ ಲಟ್ಟಿಸಿದ ಪರೋಟವನ್ನು ತವಾಕ್ಕೆ ಹಾಕಿ ಎರಡೂ ಬದಿ ಸ್ವಲ್ಪ ಕಂದು ಬಣ್ಣ ಬಂದಾಗ ತೆಗೆಯಿರಿ.

ತಯಾರಾದ ಕಾರ್ನ್ ಪರೊಟವನ್ನು ಮೊಸರು ಬಜ್ಜಿಯ ಜೊತೆ ಸವಿಯಿರಿ.