ಡಯಟ್ ಅಥವಾ ವ್ಯಾಯಾಮ ಮಾಡದೇ ದೇಹದ ತೂಕ ಇಳಿಯುತ್ತಿದೆಯೇ? ಹಾಗಾದರೆ ಇಂತಹ ಭಯಾನಕ ಕಾಯಿಲೆಗಳ ಲಕ್ಷಣವಿರಬಹುದು!

ಥೈರಾಯ್ಡ್

ಒಂದು ವೇಳೆ ಥೈರಾಯ್ಡ್ ಗ್ರಂತಿ ಸಾಮಾನ್ಯಕ್ಕೂ ಹೆಚ್ಚು ಕಾರ್ಯಶೀಲವಾಗಿದ್ದರೆ ಇದರಿಂದ ಹೈಪರ್ ಥೈರಾಯ್ಡಿಸಂ (hyperthyroidism) ಎಂಬ ಸ್ಥಿತಿ ಎದುರಾಗುತ್ತದೆ ಹಾಗೂ ಇದು ಶೀಘ್ರ ತೂಕ ಇಳಿಕೆಗೆ ಕಾರಣವಾಗುತ್ತದೆ. ಸಾಮಾನ್ಯವಾಗಿ ಈ ತೊಂದರೆ ತನ್ನ ಇರುವಿಕೆಯನ್ನು ಪ್ರಕಟಿಸದೇ ಇರುವ ಕಾರಣ ಇದರ ಇರುವಿಕೆಯನ್ನು ಪರೀಕ್ಷೆಯ ಹೊರತಾಗಿ ಖಚಿತಪಡಿಸುವುದು ಕಷ್ಟ. ಆದರೆ ಈ ತೊಂದರೆಯ ಇರುವಿಕೆಯನ್ನು ಹಸಿವಿನಲ್ಲಿ ಹೆಚ್ಚಳ, ಉಸಿರಾಟದಲ್ಲಿ ತೀವ್ರ ಉಬ್ಬರವಿಳಿತ, ಸದಾ ಮೈ ಬಿಸಿ ಇರುವಂತಿರುವುದು ಮೊದಲಾದ ಲಕ್ಷಣಗಳ ಮೂಲಕವೂ ಅರಿಯಬಹುದು. ಆದರೆ ಈ ಲಕ್ಷಣಗಳು ಹೆಚ್ಚಾಗಿ ಕಂಡುಬರುವುದು ತೀವ್ರಗೊಂಡ ಬಳಿಕವೇ ಹೊರತು ತೂಕದ ಇಳಿಕೆಯೇ ಪ್ರಮುಖ ಸೂಚನೆಯಾಗಿದೆ. ಇವುಗಳಲ್ಲೊಂದೂ ಲಕ್ಷಣವನ್ನು ನೀವು ಅನುಭವಿಸುತ್ತಿದ್ದರೆ ತಕ್ಷಣವೇ ಥೈರಾಯ್ಡ್ ಗ್ರಂಥಿಯ ಪರೀಕ್ಷೆ ಮಾಡಿಸಿಕೊಳ್ಳಬೇಕು.

ಕರುಳಿನ ಕಾಯಿಲೆಗಳು

ಸೀಲಿಯಾಕ್ ಕಾಯಿಲೆ ಎಂಬ ಕರುಳಿಗೆ ಸಂಬಂಧಿಸಿದ ಕಾಯಿಲೆ ಇರುವ ವ್ಯಕ್ತಿಗಳು ಆಹಾರದಲ್ಲಿರುವ ಗ್ಲುಟೆನ್ ಪ್ರಮಾಣವನ್ನು ಜೀರ್ಣಿಸಿಕೊಳ್ಳಲು ಅಸಮರ್ಥರಾಗಿರುತ್ತಾರೆ ಹಾಗೂ ಈ ತೊಂದರೆಯಿಂದ ತೂಕ ಇಳಿಕೆಯ ಹೊರತಾಗಿ ಬೇರಾವುದೇ ಲಕ್ಷಣಗಳು ಕಾಣಬರುವುದಿಲ್ಲ. ಈ ಕಾಯಿಲೆ ಮೇದೋಜೀರಕ ಗ್ರಂಥಿಯ ಕ್ಷಮತೆಯನ್ನು ಕುಗ್ಗಿಸಿ ಜೀರ್ಣಕ್ರಿಯೆಗೆ ಅಗತ್ಯವಿರುವ ಕಿಣ್ವಗಳನ್ನು ಉತ್ಪಾದಿಸಲು ಅಸಾಧ್ಯವಾಗುವಂತೆ ಮಾಡುತ್ತದೆ. ಪರಿಣಾಮವಾಗಿ ಬಣ್ಣ ಬದಲಾದ ಮಲ, ಕೊಬ್ಬುಯುಕ್ತ ಊಟದ ಬಳಿಕ ವಾಕರಿಕೆ ಹಾಗೂ ಹೊಟ್ಟೆಯಲ್ಲಿ ಕಿವುಚಿದಂತೆ ನೋವಾಗುವುದು ಮೊದಲಾದವು ಸೀಲಿಯಾಕ್ ಕಾಯಿಲೆಯ ಇತರ ಲಕ್ಷಣಗಳಾಗಿವೆ.

ಮಧುಮೇಹ

ಮಧುಮೇಹದ ಪರಿಣಾಮವಾಗಿಯೂ ತೂಕ ಇಳಿಯಬಹುದು. ಇತರ ಲಕ್ಷಣಗಳೆಂದರೆ ಸತತ ಮೂತ್ರಕ್ಕೆ ಅವಸರವಾಗುವುದು, ಸದಾ ಬಾಯಾರಿಕೆ ಅನ್ನಿಸುವುದು, ಗಾಯಗಳು ಮಾಗಲು ಹೆಚ್ಚಿನ ಸಮಯ ತೆಗೆದುಕೊಳ್ಳುವುದು ಮೊದಲಾದವು ಪ್ರಮುಖವಾಗಿವೆ. ಮಧುಮೇಹಿಗಳ ರಕ್ತದಲ್ಲಿರುವ ಗ್ಲೂಕೋಸ್ ಬಳಸಲ್ಪಡದೇ ಹೋಗುವ ಕಾರಣ ಇದನ್ನು ಆಗಾಗ ವಿಸರ್ಜಿಸಬೇಕಾದುದೇ ಸತತ ಮೂತ್ರಕ್ಕೆ ಕಾರಣ. ಮಧುಮೇಹಿಗಳ ಸ್ನಾಯುಗಳು ಗ್ಲುಕೋಸ್ ಕೊರತೆಯಿಂದ ಬಳಲುತ್ತವೆ ಹಾಗೂ ಸ್ನಾಯುಗಳು ಬೆಳೆಯದೇ ಶೀಘ್ರವಾಗಿ ತೂಕ ಇಳಿಯುತ್ತದೆ.

ಖಿನ್ನತೆ

ಮಾನಸಿಕ ತೊಂದರೆಯಾದ ಖಿನ್ನತೆಯ ಪ್ರಮುಖ ಪರಿಣಾಮವೆಂದರೆ ತೂಕದಲ್ಲಿ ಇಳಿಕೆ. ಕೆಲವೊಮ್ಮೆ ಇದಕ್ಕೆ ವ್ಯತಿರಿಕ್ತವಾಗಿ ಹೆಚ್ಚು ಆಹಾರ ಸೇವನೆಗೆ ಪ್ರಚೋದಿಸುವ ಮೂಲಕ ತೂಕದಲ್ಲಿ ಹೆಚ್ಚಳಕ್ಕೂ ಕಾರಣವಾಗಬಹುದು, ಆದರೆ ಸಾಮಾನ್ಯವಾಗಿ ತೂಕ ಕೆಳೆದುಕೊಳ್ಳುವುದೇ ಪ್ರಮುಖವಾಗಿ ಕಂಡುಬರುತ್ತದೆ.

ಕ್ಯಾನ್ಸರ್

ಕೇವಲ ಹೊಟ್ಟೆಗೆ ಸಂಬಂಧಿಸಿದ ಕ್ಯಾನ್ಸರ್ ಹೊರತಾಗಿ ಇತರ ಅಂಗಗಳ ಕ್ಯಾನ್ಸರ್, ಹೊಟ್ಟೆಯಲ್ಲಿರುವ ಗಡ್ಡೆಗಳು, ಹೊಟ್ಟೆ ಕರುಳಿನ ಒಳಪದರದಲ್ಲಿ ಎದ್ದಿರುವ ಹುಣ್ಣುಗಳು ಮೊದಲಾದವು ಈ ಭಾಗದಲ್ಲಿ ಉರಿಯೂತವನ್ನುಂಟುಮಾಡಿ ಆಹಾರದಿಂದ ಪೋಷಕಾಂಶಗಳ ಹೀರುವಿಕೆಗೆ ಅಡ್ಡಿಪಡಿಸ್ತುತವೆ. ಪರಿಣಾಮವಾಗಿ ತೂಕ ಶೀಘ್ರವಾಗಿ ಇಳಿಯುತ್ತದೆ. ಅನ್ನನಾಳ, ಕರುಳು ಮತ್ತು ಹೊಟ್ಟೆಯಲ್ಲಿ ಗಡ್ಡೆ ಹಾಗೂ ಉರಿಯೂತವಿದ್ದರೂ ದೇಹದ ತೂಕ ಶೀಘ್ರವಾಗಿ ಇಳಿಯುತ್ತದೆ.

ಸಂಧಿವಾತ (Rheumatoid arthritis)

ಇದೊಂದು ಉರಿಯೂತದ ಪರಿಣಾಮವಾಗಿ ಎದುರಾಗುವ ಕಾಯಿಲೆಯಾಗಿದ್ದು ಈ ತೊಂದರೆ ಇರುವ ವ್ಯಕ್ತಿಗಳಿಗೆ ಹಸಿವು ಕಡಿಮೆಯಾಗುತ್ತದೆ. ಪರಿಣಾಮವಾಗಿ ಇವರ ಆಹಾರದ ಪ್ರಮಾಣವೂ ಕುಗ್ಗುತ್ತದೆ ತನ್ಮೂಲಕ ತೂಕವೂ ಇಳಿಯುತ್ತದೆ. ಈ ಉರಿಯೂತ ಉಲ್ಬಣಗೊಳ್ಳುತ್ತಾ ಹೋದಂತೆ ಹೊಟ್ಟೆ ಮತ್ತು ಕರುಳುಗಳ ಒಳಗೂ ಉರಿಯೂತ ವ್ಯಾಪಿಸಿ ಆಹಾರದಿಂದ ಪೋಷಕಾಂಶಗಳನ್ನು ಹೀರಿಕೊಳ್ಳುವ ಕ್ಷಮತೆಯೂ ಕ್ಷೀಣಿಸುತ್ತದೆ ಹಾಗೂ ಇದೇ ತೂಕ ಇಳಿಕೆಗೆ ಕಾರಣವಾಗಬಹುದು.