ಶ್ವಾಸಕೋಶಗಳನ್ನು ಆರೋಗ್ಯಕರವಾಗಿರಿಸುವ ಆಹಾರಗಳು-ತಪ್ಪದೇ ಸೇವಿಸಿ

ಕ್ಯಾರೋಟಿನಾಯ್ಡು ಹೆಚ್ಚಿರುವ ಆಹಾರಗಳು

ಕ್ಯಾರೋಟೀನ್ ಎಂಬುದೊಂದು ವರ್ಣದ್ರವ್ಯವಾಗಿದ್ದು ಆಹಾರದ ಬಣ್ಣಕ್ಕೆ ಕಾರಣವಾಗಿವೆ. ಕ್ಯಾರೆಟ್, ಸಿಹಿಗೆಣಸು, ಹಸಿರು ಮತ್ತು ದಪ್ಪನೆಯ ಎಲೆಗಳು, ಟೊಮಾಟೋ ಮೊದಲಾದವುಗಳಲ್ಲಿ ಈ ಕ್ಯಾರೋಟಿನಾಯ್ಡುಗಳು ಹೆಚ್ಚಿರುತ್ತವೆ. ಕ್ಯಾರೋಟಿನಾಯ್ಡುಗಳು ಶ್ವಾಸಕೋಶದ ಆರೋಗ್ಯಕ್ಕೆ ಅತಿ ಅಗತ್ಯವಾದ ಪೋಷಕಾಂಶಗಳಾಗಿವೆ. ಅಲ್ಲದೇ ಶ್ವಾಸಕೋಶದ ಕ್ಯಾನ್ಸರ್ ಆವರಿಸುವ ಸಾಧ್ಯತೆಯನ್ನು ಕಡಿಮೆಗೊಳಿಸುವ ಆಂಟಿ ಆಕ್ಸಿಡೆಂಟು ಸಹಾ ಆಗಿದೆ. ಅಲ್ಲದೇ ಈಗಾಗಲೇ ಅಸ್ತಮಾ ಹಾಗೂ ಶ್ವಾಸಕೋಶದ ತೊಂದರೆಯಿಂದ ಬಳಲುತ್ತಿರುವ ವ್ಯಕ್ತಿಗಳಿಗೆ ಸೂಕ್ತವಾಗಿದೆ. ಆದ್ದರಿಂದ ಆಗಾಗ ಕ್ಯಾರೋಟಿನಾಯ್ಡು ಹೆಚ್ಚಿರುವ ಆಹಾರಗಳನ್ನು ಸಾಕಷ್ಟು ಪ್ರಮಾಣದಲ್ಲಿ ಸೇವಿಸಬೇಕು.

ಒಮೆಗಾ 3 ಕೊಬ್ಬಿನ ಆಮ್ಲಗಳು ಹೆಚ್ಚಿರುವ ಆಹಾರಗಳು

ಈ ಆಹಾರಗಳು ಶ್ವಾಸಕೋಶದ ಆರೋಗ್ಯ ಹೆಚ್ಚಿಸುವ ಅತ್ಯುತ್ತಮ ಆಹಾರಗಳಲ್ಲೊಂದಾಗಿವೆ. ಒಟ್ಟಾರೆ ಆರೋಗ್ಯ, ವಿಶೇಷವಾಗಿ ಹೃದಯದ ಆರೋಗ್ಯಕ್ಕೆ ಕೊಬ್ಬಿನ ಆಮ್ಲಗಳು ಎಷ್ಟು ಮುಖ್ಯ ಎಂದು ನಾವೀಗಾಗಲೇ ಅರಿತಿದ್ದೇವೆ. ಇವುಗಳು ಹೆಚ್ಚಿರುವ ಆಹಾರ ಸೇವನೆಯಿಂದ ಇನ್ನೊಂದು ಉತ್ತಮ ಕಾರ್ಯವಾಗುತದೆ. ಇವು ಅಸ್ತಮಾದ ಲಕ್ಷಣಗಳಾದ ಉಸಿರು ಕಟ್ಟುವುದು, ಉಸಿರಾಡುವಾಗ ಸೀಟಿಯಂತಹ ಸದ್ದು ಬರುವುದು ಮೊದಲಾದ ತೊಂದರೆಗಳನ್ನು ನಿವಾರಿಸುತ್ತವೆ. ಒಮೆಗಾ ೩ ಕೊಬ್ಬಿನ ಆಮ್ಲಗಳು ಹೆಚ್ಚಿರುವ ಆಹಾರದ ಸೇವನೆಯಿಂದ ಅಸ್ತಮಾ ರೋಗಿಗಳಿಗೆ ಹೆಚ್ಚಿನ ಪ್ರಯೋಜನವಿದೆ. ಒಮೆಗಾ ೩ ಕೊಬ್ಬಿನ ಆಮ್ಲಗಳು ಹೆಚ್ಚಿರುವ ಆಹಾರಗಳೆಂದರೆ ಸಾಲ್ಮನ್, ಟ್ಯೂನಾ, ಟ್ರೌಟ್ ಮೊದಲಾದ ಮೀನುಗಳು, ಒಣಫಲಗಳೂ ಹಾಗೂ ಅಗಸೆ ಬೀಜಗಳು.

ಕೋಸಿನ ಜಾತಿಯ ತರಕಾರಿಗಳು

ಶ್ವಾಸಕೋಶದ ಆರೋಗ್ಯ ಹೆಚ್ಚಿಸಲು ಕೋಸಿನ ಬಗೆಯ ಆಹಾರಗಳು ಅತ್ಯುತ್ತಮವಾಗಿವೆ. ಇದರಲ್ಲಿ ಎಲೆಕೋಸು, ಬ್ರೋಕೋಲಿ, ನವಿಲುಕೋಸು, ಹೂಕೋಸು, ಬ್ರಸಲ್ಸ್ ಮೊಳಕೆ ಮೊದಲಾದವು ಸೇರಿವೆ. ಇವುಗಳು ಆಂಟಿ ಆಕ್ಸಿಡೆಂಟುಗಳಿಂದ ಸಮೃದ್ದವಾಗಿವೆ. ಇವುಗಳ ಸೇವನೆಯಿಂದ ಶ್ವಾಸಕೋಶದಲ್ಲಿ ಸಂಗ್ರಹವಾಗಿದ್ದ ಎಲ್ಲಾ ಕಲ್ಮಶಗಳು ನಿವಾರಿಸಲ್ಪಡುತ್ತವೆ. ಈ ತರಕಾರಿಗಳ ಅತ್ಯುತ್ತಮ ಪ್ರಯೋಜನವನ್ನು ಆದಷ್ಟು ಇವುಗಳನ್ನು ಹಸಿಯಾಗಿಯೇ ಸಾಲಾಡ್ ರೂಪದಲ್ಲಿ ಸೇವಿಸುವ ಮೂಲಕ ಪಡೆಯಬಹುದು.

ಫೋಲೇಟ್ ಹೆಚ್ಚಿರುವ ಆಹಾರಗಳು

ಫೋಲೇಟ್ ಭರಿತ ಆಹಾರಗಳನ್ನು ಸೇವಿಸಿದ ಬಳಿಕ ನಮ್ಮ ದೇಹದಲ್ಲಿ ಇವು ಫೋಲಿಕ್ ಆಮ್ಲವಾಗಿ ಪರಿವರ್ತನೆಗೊಳ್ಳುತ್ತವೆ. ಪಾಲಕ್ ಸೊಪ್ಪು. ಬ್ರೋಕೋಲಿ, ಬೀಟ್ರೂಟ್, ಲಿಂಬೆಯ ಜಾತಿಯ ಹಣ್ಣುಗಳು, ದ್ವಿದಳ ಧಾನ್ಯಗಳು ಹಾಗೂ ಬೆಣ್ಣೆಹಣ್ಣಿನಲ್ಲಿ ಫೋಲೇಟ್ ಹೆಚ್ಚಿರುತ್ತದೆ. ಇವುಗಳ ಸೇವನೆಯಿಂದ ದೇಹದಲ್ಲಿ ಕ್ಯಾನ್ಸರ್ ಉಂಟುಮಾಡುವ ಕಣಗಳನ್ನು, ವಿಶೇಷವಾಗಿ ಶ್ವಾಸಕೋಶದಲ್ಲಿರುವ ಕಣಗಳನ್ನು ನಿವಾರಿಸಿ ಶ್ವಾಸಕೋಶದ ಕ್ಯಾನ್ಸರ್ ನಿಂದ ರಕ್ಷಣೆ ಒದಗಿಸುತ್ತದೆ. ಶ್ವಾಸಕೋಶದ ಆರೋಗ್ಯ ಕಾಪಾಡಲು ಇವು ಅತ್ಯುತ್ತಮ ಆಹಾರಗಳಾಗಿವೆ.

ವಿಟಮಿನ್ ಸಿ ಇರುವ ಆಹಾರಗಳು

ಶ್ವಾಸಕೋಶಗಳ ಆರೋಗ್ಯ ಉತ್ತಮವಾಗಿರಲು ಆಗಾಗ ಸಾಕಷ್ಟು ಪ್ರಮಾಣದಲ್ಲಿ ವಿಟಮಿನ್ ಸಿ ಸೇವಿಸುತ್ತಿರಬೇಕು. ಇದೊಂದು ಪ್ರಬಲ ಆಂಟಿ ಆಕ್ಸಿಡೆಂಟ್ ಆಗಿದ್ದು ಶ್ವಾಸಕೋಶಕ್ಕೆ ಆಗಮಿಸುವ ರಕ್ತದಲ್ಲಿ ಆಮ್ಲಜನಕವನ್ನು ಪೂರೈಸುವ ಕೆಲಸದಲ್ಲಿ ಮಹತ್ತರ ಪಾತ್ರ ವಹಿಸುತ್ತದೆ. ಅಲ್ಲದೇ ರೋಗ ನಿರೋಧಕ ಶಕ್ತಿಯನ್ನೂ ಹೆಚ್ಚಿಸಿ ಶ್ವಾಸಕೋಶದ ಸಹಿತ ದೇಹದ ಎಲ್ಲಾ ಅಂಗಗಳನ್ನು ರಕ್ಷಿಸುತ್ತದೆ. ಆದ್ದರಿಂದ ವಿಟಮಿನ್ ಸಿ ಇರುವ ಆಹಾರಗಳನ್ನು ಹೆಚ್ಚು ಹೆಚ್ಚಾಗಿ ಸೇವಿಸುವುದು ಅಗತ್ಯ. ಎಲ್ಲಾ ಬಗೆಯ ಲಿಂಬೆಯ ಜಾತಿಯ ಹಣ್ಣುಗಳು, ಅಂದರೆ ಕಿತ್ತಳೆ, ಲಿಂಬೆ, ಚಕ್ಕೋತ, ಮೂಸಂಬಿ ಹಾಗೂ ಟೊಮಾಟೋ ಮತ್ತು ದೊಣ್ಣೆಮೆಣಸು, ಕಿವಿ ಹಣ್ಣು, ಸ್ಟ್ರಾಬೆರಿ, ದ್ರಾಕ್ಷಿ, ಅನಾನಾಸು ಮತ್ತು ಮಾವಿನ ಹಣ್ಣಿನಲ್ಲಿಯೂ ವಿಟಮಿನ್ ಸಿ ಇದೆ. ಈ ಎಲ್ಲಾ ಹಣ್ಣುಗಳು ಆರೋಗ್ಯವನ್ನು ವೃದ್ದಿಸುವ ಜೊತೆಗೇ ಶ್ವಾಸಕೋಶದಿಂದ ಕಲ್ಮಶಗಳನ್ನು ನಿವಾರಿಸಲೂ ನೆರವಾಗುತ್ತವೆ.

ಬೆಳ್ಳುಳ್ಳಿ

ಇದರಲ್ಲಿರುವ ಆಲಿಸಿನ್ ಎಂಬ ಪೋಷಕಾಂಶ ಹಲವು ವಿಧದಲ್ಲಿ ಆರೋಗ್ಯವನ್ನು ವೃದ್ದಿಸುತ್ತದೆ. ವಿಶೇಷವಾಗಿ ಶ್ವಾಸಕೋಶದ ಸೋಂಕಿನ ವಿರುದ್ದ ಹೋರಾಡುತ್ತದೆ ಹಾಗೂ ಸೋಂಕು ಉಂಟಾಗಿದ್ದರೆ ಇದನ್ನು ಶೀಘ್ರವೇ ಕಡಿಮೆಗೊಳಿಸಲೂ ನೆರವಾಗುತ್ತದೆ. ಬೆಳ್ಳುಳ್ಳಿಯಲ್ಲಿ ಉತ್ತಮ ಆಂಟಿ ಆಕ್ಸಿಡೆಂಟ್ ಗುಣವಿದೆ ಹಾಗೂ ಕ್ಯಾನ್ಸರ್‌ಕಾರಕ ಫ್ರೀ ರ್‍ಯಾಡಿಕಲ್ ಎಂಬ ಕಣಗಳನ್ನು ಶ್ವಾಸಕೋಶ ಹಾಗೂ ದೇಹದ ಇತರ ಭಾಗಗಳಿಂದ ನಿವಾರಿಸಲು ನೆರವಾಗುತ್ತದೆ. ಅಲ್ಲದೇ ಶ್ವಾಸಕೋಶದ ಕ್ಯಾನ್ಸರ್ ಆವರಿಸುವುದರಿಂದಲೂ ರಕ್ಷಣೆ ಒದಗಿಸುತ್ತದೆ. ಅಸ್ತಮಾ ರೋಗಿಗಳಿಗೆ ಬೆಳ್ಳುಳ್ಳಿ ಅತ್ಯುತ್ತಮ ಆಹಾರವಾಗಿದೆ ಹಾಗೂ ಶ್ವಾಸಕೋಶದಲ್ಲಿ ಸೋಂಕು ಉಂಟಾಗಿರುವವರಿಗೂ ಇದು ಅತ್ಯುತ್ತಮವಾಗಿದೆ.