ಒಂದು ಹನಿ ಎಣ್ಣೆ ಇಲ್ಲದೆ ಮಾಡಿ ದಹೀ ಭಲ್ಲಾ! ರುಚಿ, ಆರೋಗ್ಯದಲ್ಲಿ ರಾಜಿ ಇಲ್ಲ.. ತೂಕ ಡಬಲ್ ಇಳಿಯುತ್ತೆ

ಒಂದು ಹನಿ ಎಣ್ಣೆ ಬಳಸದೆ ಮಾಡಿ ದಹೀ ಭಲ್ಲಾ! ಡಯಟ್ ಮಾಡುವವರಿಗೂ ಇದು ಫೇವರೆಟ್ ಸ್ನಾಕ್. ಹೌದು, ರುಚಿಕರವಾದ ದಹೀ ಭಲ್ಲಾ (Dahi Bhalla) ಸವಿಯಲು ಪ್ರತಿಯೊಬ್ಬರಿಗೂ ಇಷ್ಟ. ಅದರಲ್ಲೂ ತಣ್ಣನೆಯ ಮೊಸರು ಮತ್ತು ವಿವಿಧ ಚಟ್ನಿಗಳೊಂದಿಗೆ ಸಿದ್ಧಪಡಿಸಿದ ದಹೀ ಭಲ್ಲಾ ಅಥವಾ ವಡಾ ಅನೇಕರ ಅಚ್ಚುಮೆಚ್ಚಿನ ತಿನಿಸು. ಆದರೆ, ಸಾಮಾನ್ಯವಾಗಿ ಎಣ್ಣೆಯಲ್ಲಿ ಕರಿದ ವಡೆಗಳನ್ನು ಒಳಗೊಂಡಿರುವ ಕಾರಣ, ಆರೋಗ್ಯ ಪ್ರಜ್ಞೆಯುಳ್ಳವರು ಇದನ್ನು ಸೇವಿಸಲು ಹಿಂಜರಿಯುತ್ತಾರೆ.

ಈಗ ಅಂತಹ ಚಿಂತೆ ಬಿಡಿ! ಒಂದು ಹನಿ ಎಣ್ಣೆಯನ್ನೂ ಉಪಯೋಗಿಸದೆ ಆವಿಯಲ್ಲಿ ಬೇಯಿಸಿ ಮಾಡುವ 'ಆಯಿಲ್‌ಲೆಸ್ ದಹೀ ಭಲ್ಲಾ' (Healthy Oil-Free Dahi Bhalla Recipe) ರೆಸಿಪಿ ಇಲ್ಲಿದೆ. ರುಚಿಯಲ್ಲಿ ರಾಜಿ ಮಾಡಿಕೊಳ್ಳದೆ, ಆರೋಗ್ಯಕ್ಕೂ ಪೂರಕವಾದ ಈ ವಿಶೇಷ ರೆಸಿಪಿಯ ಬಗ್ಗೆ ವಿವರವಾಗಿ ತಿಳಿಯಿರಿ.

ಹಬ್ಬ ಹರಿದಿನಗಳಲ್ಲಿ ಅಥವಾ ಸ್ನೇಹಿತರ ಪಾರ್ಟಿಗಳಲ್ಲಿ ದಹೀ ಭಲ್ಲಾ ಅಥವಾ ದಹೀ ವಡೆ ಮುಖ್ಯ ಆಕರ್ಷಣೆಯಾಗಿರುತ್ತದೆ. ಆದರೆ, ಸಾಂಪ್ರದಾಯಿಕವಾಗಿ ಉದ್ದಿನ ಬೇಳೆ ಹಿಟ್ಟಿನಿಂದ ತಯಾರಿಸಿ ಎಣ್ಣೆಯಲ್ಲಿ ಡೀಪ್ ಫ್ರೈ ಮಾಡುವುದರಿಂದ ಕ್ಯಾಲೊರಿಗಳು ವಿಪರೀತ ಹೆಚ್ಚಾಗುತ್ತವೆ. ಆದರೆ, ಈ ಹೊಸ ವಿಧಾನದಿಂದ ಎಣ್ಣೆಯ ಬಳಕೆಯ ಬಗ್ಗೆ ಆತಂಕ ಪಡದೆ ಮನಸಾರೆ ಸವಿಯಬಹುದು.

ದಹೀ ಭಲ್ಲಾಗೆ ಬೇಕಾಗುವ ಪದಾರ್ಥಗಳು

• ಉದ್ದಿನ ಬೇಳೆ
• ಶುಂಠಿ
• ಹಸಿ ಮೆಣಸಿನಕಾಯಿ
• ಇಂಗು
• ಉಪ್ಪು
• ಮೊಸರು
• ಜೀರಿಗೆ ಪುಡಿ
• ಅಚ್ಚಖಾರ ಪುಡಿ
• ಕಪ್ಪು ಉಪ್ಪು
• ಸಿಹಿ ಹುಣಸೆಹಣ್ಣಿನ ಚಟ್ನಿ
• ಪುದೀನಾ ಚಟ್ನಿ
• ದಾಳಿಂಬೆ ಕಾಳುಗಳು
• ಸೇವ್ (ಓಂಪುಡಿ)

ದಹೀ ಭಲ್ಲಾ ತಯಾರಿಸುವ ವಿಧಾನ

- ಮೊದಲು ಉದ್ದಿನ ಬೇಳೆಯನ್ನು ಚೆನ್ನಾಗಿ ತೊಳೆದು 7-8 ಗಂಟೆಗಳ ಕಾಲ ಅಥವಾ ಇಡೀ ರಾತ್ರಿ ನೆನೆಸಿಡಿ.

- ನಂತರ ನೀರನ್ನು ಪೂರ್ಣವಾಗಿ ಬಸಿದು, ಮಿಕ್ಸಿ ಜಾರ್‌ಗೆ ವರ್ಗಾಯಿಸಿ. ಇದಕ್ಕೆ ಹಸಿಮೆಣಸಿನಕಾಯಿ ಮತ್ತು ಶುಂಠಿ ಸೇರಿಸಿ, ಅತಿ ಕಡಿಮೆ ನೀರು ಬಳಸಿ ನುಣ್ಣಗೆ, ಗಟ್ಟಿಯಾದ ಮಿಶ್ರಣವಾಗಿ ರುಬ್ಬಿಕೊಳ್ಳಿ.

- ರುಬ್ಬಿದ ಹಿಟ್ಟನ್ನು ಒಂದು ಅಗಲವಾದ ಪಾತ್ರೆಗೆ ವರ್ಗಾಯಿಸಿ. ಬಳಿಕ, ಕೈಯಿಂದ ಅಥವಾ ವಿಸ್ಕರ್‌ನಿಂದ ಒಂದೇ ದಿಕ್ಕಿನಲ್ಲಿ 5 ರಿಂದ 7 ನಿಮಿಷಗಳ ಕಾಲ ಚೆನ್ನಾಗಿ ಪೆಟ್ ಮಾಡಿ. ಇದರಿಂದ ಹಿಟ್ಟಿನಲ್ಲಿ ಗಾಳಿ ತುಂಬಿ ಹಗುರಾಗುತ್ತದೆ. ಈ ಪ್ರಕ್ರಿಯೆಯು ವಡೆಗಳು ಮೃದುವಾಗಿ ಮತ್ತು ಸ್ಪಂಜು ರೀತಿಯ ರಚನೆಯನ್ನು ಹೊಂದಲು ಸಹಾಯಕವಾಗಿದೆ.

- ಈ ರೆಸಿಪಿಯ ಪ್ರಮುಖ ಹಂತವೆಂದರೆ ಆವಿಯಲ್ಲಿ ಬೇಯಿಸುವುದು. ಇಡ್ಲಿ ತಟ್ಟೆಗಳಿಗೆ ಅಥವಾ ಸಣ್ಣ ಬೌಲ್‌ಗಳಿಗೆ ಹಿಟ್ಟು ಅಂಟದಿರಲು ಸ್ವಲ್ಪ ತುಪ್ಪ ಅಥವಾ ಎಣ್ಣೆ ಸವರಿ, ಹಿಟ್ಟನ್ನು ಇಡ್ಲಿ ಆಕಾರದಲ್ಲಿ ಹಾಕಿ.

- ಇಡ್ಲಿ ಪಾತ್ರೆಯಲ್ಲಿ ನೀರನ್ನು ಕುದಿಸಿ, ಈ ತಟ್ಟೆಗಳನ್ನು ಇಟ್ಟು ಮಧ್ಯಮ ಉರಿಯಲ್ಲಿ ಸುಮಾರು 10-12 ನಿಮಿಷಗಳ ಕಾಲ ಆವಿಯಲ್ಲಿ ಬೇಯಿಸಿ.

- ಒಂದು ಪಾತ್ರೆಯಲ್ಲಿ ಉಗುರು ಬೆಚ್ಚಗಿನ ನೀರನ್ನು ತೆಗೆದುಕೊಂಡು ಅದಕ್ಕೆ ಉಪ್ಪು, ಇಂಗು ಮತ್ತು ಸ್ವಲ್ಪ ಕೊತ್ತಂಬರಿ ಸೊಪ್ಪನ್ನು ಸೇರಿಸಿ.

- ಆವಿಯಲ್ಲಿ ಬೆಂದ ವಡೆಗಳನ್ನು ಈ ನೀರಿನಲ್ಲಿ 10-15 ನಿಮಿಷಗಳ ಕಾಲ ನೆನೆಸಿಡಿ. ಇದರಿಂದ ವಡೆಗಳು ಇನ್ನಷ್ಟು ಮೃದುವಾಗುತ್ತವೆ ಮತ್ತು ಇಂಗಿನ ಸುವಾಸನೆಯನ್ನು ಚೆನ್ನಾಗಿ ಹೀರಿಕೊಳ್ಳುತ್ತವೆ.

- ನೀರಿನಲ್ಲಿ ನೆನೆದ ವಡೆಗಳನ್ನು ತೆಗೆದು ಅಂಗೈ ಮಧ್ಯೆ ಇಟ್ಟು ಮೆಲ್ಲಗೆ ಒತ್ತಿ ಹೆಚ್ಚುವರಿ ನೀರನ್ನು ತೆಗೆಯಿರಿ. ಒಂದು ಪ್ಲೇಟ್‌ನಲ್ಲಿ ವಡೆಗಳನ್ನು ಇಟ್ಟು, ಅದರ ಮೇಲೆ ಚೆನ್ನಾಗಿ ಕದಡಿದ ಗಟ್ಟಿಯಾದ ಸಿಹಿಯಾದ ಮೊಸರನ್ನು ಹಾಕಿ. ನಂತರ ಮೇಲೆ ಖಾರವಾದ ಹಸಿರು ಚಟ್ನಿ ಮತ್ತು ಸಿಹಿ ಹುಣಸೆ ಚಟ್ನಿ ಸೇರಿಸಿ.

- ಅಂತಿಮವಾಗಿ, ಜೀರಿಗೆ ಪುಡಿ, ಖಾರ ಪುಡಿ, ಕಪ್ಪು ಉಪ್ಪು ಮತ್ತು ದಾಳಿಂಬೆ ಕಾಳುಗಳಿಂದ ಅಲಂಕರಿಸಿದರೆ, ರುಚಿಯಾದ ಜೀರೋ ಆಯಿಲ್ ದಹೀ ಭಲ್ಲಾ ಸಿದ್ಧ.

ದೇಹಕ್ಕೆ ಕೊಬ್ಬು ಸೇರಲ್ಲ

ಎಣ್ಣೆಯಲ್ಲಿ ಕರಿಯದ ಕಾರಣ ಇದು ಕಡಿಮೆ ಕ್ಯಾಲೊರಿಗಳನ್ನು ಹೊಂದಿರುತ್ತದೆ. ದೇಹಕ್ಕೆ ಅನಗತ್ಯ ಕೊಬ್ಬು ಸೇರುವುದಿಲ್ಲ. ಇಂಗು ಮತ್ತು ಮೊಸರು ಇರುವುದರಿಂದ ಜೀರ್ಣಕ್ರಿಯೆಗೆ ಸುಲಭವಾಗುತ್ತದೆ ಮತ್ತು ಹೊಟ್ಟೆ ಉಬ್ಬರದ ಸಮಸ್ಯೆ ಕಾಡುವುದಿಲ್ಲ. ಫಿಟ್‌ನೆಸ್ ಹಾಗೂ ತೂಕ ಇಳಿಸುವ ಹಂಬಲ ಇರುವವರಿಗೆ ಇದು ಸೂಕ್ತ ಆಯ್ಕೆ, ಯಾವುದೇ ಅಪರಾಧ ಪ್ರಜ್ಞೆ ಇಲ್ಲದೆ ಸವಿಯಬಹುದು. ಅಲ್ಲದೆ, ಉದ್ದಿನ ಬೇಳೆಯಲ್ಲಿ ಪ್ರೋಟೀನ್ ಸಮೃದ್ಧವಾಗಿರುವುದರಿಂದ ತಕ್ಷಣದ ಶಕ್ತಿ ಒದಗಿಸುತ್ತದೆ.