ಯುಗಾದಿಗೆ ಸ್ಪೆಷಲ್.. ತೆಲಂಗಾಣ ಶೈಲಿಯ ಸಾಫ್ಟ್ ನೇತಿ ಒಬ್ಬಟ್ಟು ಮಾಡಿ! ಬಾಯಲ್ಲಿ ಇಟ್ಟರೆ ಕರಗುವ ರುಚಿ

ಯುಗಾದಿ ವಿಶೇಷ.. ತೆಲಂಗಾಣ ಶೈಲಿಯ ಮೃದುವಾದ ತುಪ್ಪದ ಒಬ್ಬಟ್ಟು ರೆಸಿಪಿ.. ಬಾಯಲ್ಲಿ ಇಟ್ಟರೆ ಕರಗುವ ರುಚಿ. ಹೌದ, ಯುಗಾದಿ (Ugadi) ಹಬ್ಬ ಬಂತೆಂದರೆ ಸಾಕು, ಮನೆಮನೆಯಲ್ಲಿ ಹೋಳಿಗೆಯ ಘಮಲು ಆವರಿಸಿರುತ್ತದೆ. ಆಂಧ್ರಪ್ರದೇಶ, ತೆಲಂಗಾಣದಲ್ಲಿ ನೇತಿ ಬೊಬ್ಬಟ್ಟು (Nethi Bobbatlu) ಎಂದು ಪ್ರಸಿದ್ಧವಾದ ಈ ಮೃದುವಾದ ತುಪ್ಪದ ಒಬ್ಬಟ್ಟು, ಬಾಯಲ್ಲಿಟ್ಟರೆ ಕರಗುತ್ತದೆ. ತುಪ್ಪದ ಪರಿಮಳ ಮತ್ತು ಹೂರಣದ ವಿಶೇಷ ರುಚಿ ಹಬ್ಬದ ಸಂಭ್ರಮವನ್ನು ಇಮ್ಮಡಿಗೊಳಿಸುತ್ತದೆ.

ಮಾರ್ಚ್ 19 ರ ಯುಗಾದಿ ಹಬ್ಬಕ್ಕಾಗಿ, ಮನೆಯಲ್ಲೇ ಹೋಟೆಲ್ ಶೈಲಿಯ ಮೃದುವಾದ, ರುಚಿಕರವಾದ ತೆಲಂಗಾಣ 'ನೇತಿ ಬೊಬ್ಬಟ್ಟು' ತಯಾರಿಸಲು ನೀವು ಬಯಸುತ್ತೀರಾ? ಹಾಗಿದ್ದರೆ, ಸುಲಭ ಹಾಗೂ ಹಂತ-ಹಂತದ ಮಾರ್ಗದರ್ಶಿಯನ್ನು ಇಲ್ಲಿ ನೀಡಲಾಗಿದೆ. ಒಬ್ಬಟ್ಟು (obbattu) ಮಾಡುವುದು ಒಂದು ಕಲೆ. ಇದನ್ನು ಸರಿಯಾದ ಪ್ರಮಾಣ ಮತ್ತು ತಾಳ್ಮೆಯಿಂದ ಮಾಡಿದರೆ, ಹರಿಯದೇ, ಬಾಯಲ್ಲಿ ಇಟ್ಟರೆ ಕರಗುವಂತಹ ಪರಿಪೂರ್ಣ ಒಬ್ಬಟ್ಟುಗಳನ್ನು ಸಿದ್ಧಪಡಿಸಬಹುದು.

ತೆಲಂಗಾಣ ಶೈಲಿಯಲ್ಲಿ ಮೈದಾ ಮತ್ತು ಗೋಧಿ ಹಿಟ್ಟಿನ ಮಿಶ್ರಣವನ್ನು ಬಳಸಿ ಇದನ್ನು ತಯಾರಿಸಲಾಗುತ್ತದೆ. ನೇತಿ ಬೊಬ್ಬಟ್ಟು ತಯಾರಿಸಲು ಬೇಕಾದ ಪದಾರ್ಥಗಳು ಮತ್ತು ತಯಾರಿಸುವ ಸುಲಭ ವಿಧಾನ (Telangana Style Nethi Bobbatlu Recipe) ಇಲ್ಲಿದೆ.

ನೇತಿ ಬೊಬ್ಬಟ್ಟು ತಯಾರಿಸಲು ಬೇಕಾದ ಪದಾರ್ಥಗಳು

ಹೂರಣಕ್ಕಾಗಿ

• ಕಡಲೆಬೇಳೆ
• ಪುಡಿ ಮಾಡಿದ ಬೆಲ್ಲ
• ಏಲಕ್ಕಿ ಪುಡಿ
• ತುಪ್ಪ

ಹಿಟ್ಟಿಗಾಗಿ

• ಮೈದಾ ಹಿಟ್ಟು
• ಗೋಧಿ ಹಿಟ್ಟು
• ತುಪ್ಪ
• ಉಪ್ಪು
• ನೀರು

ತಯಾರಿಸುವ ವಿಧಾನ

- ಕಡಲೆಬೇಳೆಯನ್ನು ಶುಚಿಯಾಗಿ ತೊಳೆದು, ಸಾಕಷ್ಟು ನೀರು ಹಾಕಿ ಚೆನ್ನಾಗಿ ಬೇಯಿಸಿ. ಬೇಳೆ ಮೆತ್ತಗಾಗಬೇಕು. ಆದರೆ. ರಸವಾಗಿ ಸ್ಮ್ಯಾಶ್ ಆಗಬಾರದು.

- ಬೆಂದ ನಂತರ ನೀರನ್ನು ಬಸಿದು, ಬಿಸಿಯಿರುವಾಗಲೇ ಬೆಲ್ಲ, ಏಲಕ್ಕಿ ಪುಡಿ ಹಾಗೂ ಒಂದು ಚಮಚ ತುಪ್ಪ ಸೇರಿಸಿ. ಸಣ್ಣ ಉರಿಯಲ್ಲಿ ಸುಮಾರು 15 ನಿಮಿಷ ಬೇಯಿಸಿ. ಬೆಲ್ಲ ಕರಗಿ ಬೇಳೆಯೊಂದಿಗೆ ಬೆರೆತು ಗಟ್ಟಿಯಾದ ಮೇಲೆ, ಈ ಮಿಶ್ರಣವನ್ನು ನುಣ್ಣಗೆ ರುಬ್ಬಿಕೊಳ್ಳಿ. ಈಗ ನಿಮ್ಮ ಹೂರಣ ಸಿದ್ಧ.

- ಜರಡಿ ಹಿಡಿದ ಮೈದಾ ಮತ್ತು ಗೋಧಿ ಹಿಟ್ಟನ್ನು ಒಂದು ದೊಡ್ಡ ಪಾತ್ರೆಯಲ್ಲಿ ಮಿಕ್ಸ್ ಮಾಡಿ. ಇದಕ್ಕೆ ಒಂದು ಚಿಟಿಕೆ ಉಪ್ಪು, ಒಂದು ಚಮಚ ತುಪ್ಪ ಸೇರಿಸಿ. ಸ್ವಲ್ಪ ನೀರು ಹಾಕುತ್ತಾ ಚಪಾತಿ ಹಿಟ್ಟಿಗಿಂತ ಮೃದುವಾಗಿ ಕಲಸಿ.

- ಹಿಟ್ಟನ್ನು ಚೆನ್ನಾಗಿ ನಾದಿದರೆ ಒಬ್ಬಟ್ಟು ಮೃದುವಾಗುತ್ತದೆ. ಕಲಸಿದ ಹಿಟ್ಟಿನ ಮೇಲೆ ತುಪ್ಪ ಸವರಿ, ಕನಿಷ್ಠ ಒಂದು ಗಂಟೆ ನೆನೆಯಲು ಬಿಡಿ.

- ನೆನೆದ ಹಿಟ್ಟಿನಿಂದ ಸಣ್ಣ ಉಂಡೆಯನ್ನು ತೆಗೆದು, ಹದವಾಗಿ ಲಟ್ಟಿಸಿ ಅಥವಾ ಕೈಯಿಂದಲೇ ಹರಡಿ. ಅದರ ಮಧ್ಯದಲ್ಲಿ ಹೂರಣದ ಉಂಡೆಯನ್ನು ಇಟ್ಟು, ಮೋದಕದಂತೆ ಹಿಟ್ಟಿನಿಂದ ಮುಚ್ಚಿ. ಹೆಚ್ಚುವರಿ ಹಿಟ್ಟನ್ನು ತೆಗೆದು, ಎಣ್ಣೆ / ತುಪ್ಪ ಸವರಿದ ಪ್ಲಾಸ್ಟಿಕ್ ಹಾಳೆಯ ಮೇಲೆ ಲಟ್ಟಣಿಗೆಯಿಂದ ಹಗುರವಾಗಿ ಲಟ್ಟಿಸಿ.

- ಕಾವಲಿಯನ್ನು ಬಿಸಿ ಮಾಡಿ ತುಪ್ಪ ಸವರಿ. ಲಟ್ಟಿಸಿದ ಬೊಬ್ಬಟ್ಟನ್ನು ಕಾವಲಿ ಮೇಲೆ ಇರಿಸಿ, ಮಧ್ಯಮ ಉರಿಯಲ್ಲಿ ಬೇಯಿಸಿ. ಎರಡೂ ಕಡೆ ತುಪ್ಪ ಹಚ್ಚಿ, ಹೊಂಬಣ್ಣ ಬರುವವರೆಗೆ ಸುಟ್ಟರೆ, ಘಮಘಮಿಸುವ 'ನೇತಿ ಬೊಬ್ಬಟ್ಟು' ಸಿದ್ಧ.

ಪರಿಪೂರ್ಣ ಒಬ್ಬಟ್ಟು ತಯಾರಿಸಲು ಟ್ರಿಕ್

* ಹಿಟ್ಟು ಗಟ್ಟಿಯಾದರೆ ಮೃದು ಒಬ್ಬಟ್ಟು ಬರದು. ಕಣಕದಲ್ಲಿ ಸಾಕಷ್ಟು ತುಪ್ಪ / ಎಣ್ಣೆ ಇದ್ದರೆ ಲಟ್ಟಿಸುವಾಗ ಹರಿಯುವುದಿಲ್ಲ.

* ಉತ್ತಮ ಬಣ್ಣ ಹಾಗೂ ರುಚಿಗಾಗಿ ಉತ್ತಮ ಗುಣಮಟ್ಟದ ಅಚ್ಚು ಬೆಲ್ಲ ಬಳಸಿ.

* ಬೊಬ್ಬಟ್ಟು ತಟ್ಟೆಯಿಂದ ತೆಗೆದ ತಕ್ಷಣ ಒಂದರ ಮೇಲೊಂದು ಇಡದೆ, ತಣ್ಣಗಾದ ಬಳಿಕ ಜೋಡಿಸಿ.