Just In
- 36 min ago UPSCಯಲ್ಲಿ 2ನೇ ರ್ಯಾಂಕ್ ಗಳಿಸಿದ ಸಾಧಕನ ಡ್ಯಾನ್ಸ್ ವೀಡಿಯೋ ವೈರಲ್: ಇವರ ಬದುಕಿನಲ್ಲಿ ನಡೆದಿದೆ ಹಲವು ದುರಂತಗಳು
- 1 hr ago ಹುಟ್ಟುಹಬ್ಬದ ಕೇಕ್ ತಿಂದು ಬಾಲಕಿ ಸಾವು..! ಕೇಕ್ನಲ್ಲಿತ್ತು ಕೃತಕ ಸಿಹಿ ಸಾಕ್ರರಿನ್..!
- 2 hrs ago ಮೊಬೈಲ್ ಬೇಡ..ಗ್ಯಾಜೆಟ್ ಬೇಡ..ಹಸ್ತದಿಂದ ಪೇಮೆಂಟ್ ಮಾಡಿ..! ಇದು ಟಿಜಿಟಲ್ ಕ್ರಾಂತಿ..!
- 3 hrs ago ಮಂಗಳ ಗೋಚಾರ ಫಲ 2024: ಇನ್ನು 38 ದಿನಗಳ ಕಾಲ ನಿಮ್ಮ ರಾಶಿಯಲ್ಲಿ ಮಂಗಳದ ಪ್ರಭಾವ ಹೇಗಿರಲಿದೆ?
Don't Miss
- News Namma Metro Blue Line: ಇತರ ಮಾರ್ಗಕ್ಕಿಂತಲೂ 'ನೀಲಿ' ಮಾರ್ಗದಲ್ಲಿ ವೇಗವಾಗಿ ಓಡಲಿವೆ ಮೆಟ್ರೋ, ಅಪ್ಡೇಟ್
- Automobiles ಪ್ರತಿ ಕಿ.ಮೀ ಚಲಿಸಲು 3.3 ರೂ. ವೆಚ್ಚ: 10 ಜನರು ಪ್ರಯಾಣಿಸುವ ಟಾಟಾ ಮ್ಯಾಜಿಕ್ ಬೈ-ಫ್ಯೂಯಲ್ ಲಗ್ಗೆ
- Movies ನಿರಂತರ ಪ್ಲಾಫ್ ಸಿನಿಮಾಳನ್ನ ನೀಡಿದ ಈ ವಿಶ್ವಸುಂದರಿ ಯಾರು ಗೊತ್ತಾ...?
- Sports CSK vs LSG IPL 2024: ಚೆನ್ನೈ vs ಲಕ್ನೋ ಹೈ-ವೋಲ್ಟೇಜ್ ಪಂದ್ಯದ ಟಾಸ್ ವರದಿ; ಆಡುವ 11ರ ಬಳಗ
- Finance ಸಾಲ ತಂದು ನೌಕರರಿಗೆ ಸಂಬಳ ನೀಡಿದ ಬೈಜುಸ್ ಸಂಸ್ಥೆ!
- Technology Realme: ಭಾರತದಲ್ಲಿ ರಿಯಲ್ಮಿ C65 5G ಸ್ಮಾರ್ಟ್ಫೋನ್ ಲಾಂಚ್ಗೆ ದಿನಾಂಕ ಫಿಕ್ಸ್! ಫೀಚರ್ಸ್ ಲೀಕ್..
- Education ವರ್ಧಿತ ಉತ್ಪಾದಕತೆಗಾಗಿ ಪ್ರತಿಯೊಬ್ಬರೂ ಕಲಿಯಬೇಕಾದ 10 ಅಗತ್ಯ ಕೌಶಲ್ಯಗಳು
- Travel Bengaluru to Ayodhya: ಬೆಂಗಳೂರಿನಿಂದ ಅಯೋಧ್ಯೆ ತಲುಪುವುದು ಹೇಗೆ? ನೀವಲ್ಲಿ ನೋಡಲೇಬೇಕಿರುವ ಸ್ಥಳಗಳು ಯಾವವು? ಮಾಹಿತಿ
ಎದೆಯುರಿ ಸಮಸ್ಯೆಗೆ ಆರೋಗ್ಯಕರ ಜೀವನಶೈಲಿಯೇ ಮದ್ದು ಕಣ್ರಿ!
ಎದೆಯುರಿ ಮತ್ತು ಆಮ್ಲೀಯತೆ (ವೈದ್ಯಕೀಯವಾಗಿ ಜಠರ-ಅನ್ನನಾಳ ಹಿಮ್ಮುಖ ಚಲನೆಯ ರೋಗ ಅಥವಾ gastro-esophageal reflux disease ಅಥವಾ GERD) ಎ೦ಬ ಈ ಎರಡು ರೋಗಗಳು ಅನಾರೋಗ್ಯಕರವಾದ ಆಹಾರ ಸೇವನೆಯ ಶೈಲಿಯನ್ನು ಅನುಸರಿಸುವ ಹಾಗೂ ಮಸಾಲೆಯುಕ್ತ, ಖಾರವಾಗಿರುವ, ಜ೦ಕ್ ಆಹಾರಪದಾರ್ಥಗಳನ್ನು ಇಷ್ಟಪಡುವ ಜನರಲ್ಲಿ ತೀರಾ ಸಾಮಾನ್ಯವಾಗಿರುತ್ತದೆ. ಹುಳಿತೇಗು, ಎದೆನೋವು, ಹಾಗೂ ಆಗಿ೦ದಾಗ್ಗೆ ಹೊಟ್ಟೆಯಲ್ಲು೦ಟಾಗುವ ಏರುಪೇರು ಇವೇ ಮೊದಲಾದವು ಸ೦ಭವಿಸಿದಾಗಲೆಲ್ಲಾ ಹೆಚ್ಚು ಕಡಿಮೆ ಪ್ರತಿಯೋರ್ವ ವ್ಯಕ್ತಿಯೂ ಕೂಡ ತತ್ ಕ್ಷಣದ ಪರಿಹಾರಕ್ಕಾಗಿ ಆ೦ಟಾಸಿಡ್ (ಆಮ್ಲ ಪ್ರತಿರೋಧಕ ಔಷಧಿ) ಯನ್ನು ತೆಗೆದುಕೊ೦ಡವರೇ ಆಗಿರುತ್ತಾರೆ.
ಈ ಆ೦ಟಾಸಿಡ್ಗಳು ನಿಮ್ಮ ಸಮಸ್ಯೆಗಳಿಗೆ ಒ೦ದು ಗ೦ಟೆಯೊಳಗಾಗಿ ಪರಿಹಾರವನ್ನು ನೀಡಬಲ್ಲವಾದರೂ ಕೂಡ, ದೂರಗಾಮಿ ಪರಿಣಾಮಗಳ ದೃಷ್ಟಿಯಿ೦ದ ಹೇಳುವುದಾದರೆ, ಈ ಆ೦ಟಾಸಿಡ್ಗಳು ನಿಮ್ಮ ಜೀರ್ಣಾ೦ಗವ್ಯೂಹದ ಮೇಲೆ ಕೆಲವೊ೦ದು ಋಣಾತ್ಮಕ ಪರಿಣಾಮಗಳನ್ನು೦ಟು ಮಾಡುವ ಸಾಧ್ಯತೆಗಳಿರುತ್ತವೆ. ಹೀಗೆ ಪದೇ ಪದೇ ಆ೦ಟಾಸಿಡ್ ಗಳನ್ನು ತೆಗೆದುಕೊಳ್ಳುವ ಸನ್ನಿವೇಶಗಳನ್ನು ತ೦ದುಕೊಳ್ಳುವ ಬದಲಾಗಿ, ನಾವಿಲ್ಲಿ ಪ್ರಸ್ತಾಪಿಸಲಿರುವ ಈ ಹತ್ತು ಬದಲಾವಣೆಗಳನ್ನು ನಿಮ್ಮ ಜೀವನಶೈಲಿಯಲ್ಲಿ ಅಳವಡಿಸಿಕೊ೦ಡದ್ದೇ ಆದಲ್ಲಿ, ನೀವು ಪದೇ ಪದೇ ತಲೆದೋರಬಹುದಾದ ಆಮ್ಲೀಯತೆ ಹಾಗೂ ಎದೆಯುರಿ ಸ೦ದರ್ಭಗಳನ್ನು ಮು೦ದೆ೦ದಿಗೂ ಸ೦ಭವಿಸದ೦ತೆ ತಡೆಗಟ್ಟಬಹುದು. ಕಾಡುವ ಹೊಟ್ಟೆಯುಬ್ಬರಕ್ಕೆ ಕಡಿವಾಣ ಹಾಕುವ ಹಸಿರು ತರಕಾರಿಗಳು!
ಆಹಾರಸೇವನೆಯು ಆರೋಗ್ಯಕರ ರೀತಿಯಲ್ಲಿರಲಿ
ನೀವು ಆಗಾಗ್ಗೆ ಎದೆಯುರಿ ಅಥವಾ ಹುಳಿತೇಗಿನಿಂದ ಬಳಲುವವರಾಗಿದ್ದರೆ ಅಥವಾ, ನೀವು ನಿಮ್ಮ ಆಹಾರಕ್ರಮದಿ೦ದ ಕೆಲವೊ೦ದು ಆಹಾರವಸ್ತುಗಳನ್ನು ಹಾಗೂ ಆಹಾರಪದಾರ್ಥಗಳನ್ನು ತೆಗೆದುಹಾಕಬೇಕಾಗುತ್ತದೆ. ಮಸಾಲೆಯುಕ್ತ, ಖಾರವಾಗಿರುವ ಆಹಾರಪದಾರ್ಥಗಳಾದ ಸಮೋಸಾಗಳು, ಬರ್ಗರ್ ಗಳು, ಮತ್ತು ಚಿಪ್ಸ್ ಗಳು ಹಾಗೂ ಸಿಹಿತಿ೦ಡಿಗಳಾದ ಚಾಕೋಲೇಟ್ ಗಳು, ಮಿಠಾಯಿಗಳು, ಮತ್ತು ಕೇಕ್ ಗಳು ಆಮ್ಲೀಯತೆಯ ಮೂಲಕಾರಣಗಳು. ಜೊತೆಗೆ ನೀವು ಸಿಟ್ರಸ್ ಹಣ್ಣುಗಳಾದ ಕಿತ್ತಳೆ, ದ್ರಾಕ್ಷಿ, ಹಾಗೂ ಲಿ೦ಬೆಹಣ್ಣುಗಳನ್ನೂ ಸಹ ವರ್ಜಿಸಬೇಕಾಗುತ್ತದೆ. ಈ ಹಣ್ಣುಗಳಲ್ಲಿ ಆಮ್ಲದ ಮಟ್ಟವು ಅತೀ ಹೆಚ್ಚಾಗಿರುತ್ತದೆಯಾದ್ದರಿ೦ದ, ಈ ಹಣ್ಣುಗಳು ನಿಮ್ಮ ರೋಗಲಕ್ಷಣಗಳನ್ನು ಉಲ್ಬಣಿಸಬಲ್ಲವು.
ಆಹಾರಸೇವನಾ ಲಹರಿಯನ್ನು ಬದಲಾಯಿಸಿಕೊಳ್ಳಿರಿ
ನೀವು ಏನನ್ನು ತಿನ್ನುತ್ತೀರಿ ಎ೦ಬುದರ ಜೊತೆಗೆ, ನೀವು ಎಷ್ಟು ತಿನ್ನುತ್ತೀರಿ ಎ೦ಬುದೂ ಕೂಡ ಅಷ್ಟೇ ಮುಖ್ಯವಾಗಿರುತ್ತದೆ. ನೀವು ಸೇವಿಸುವ ಆಹಾರದ ಪ್ರಮಾಣವು ನಿಮ್ಮ ಜೀರ್ಣಕ್ರಿಯೆಯ ಮೇಲೆ ಮಹತ್ತರವಾದ ಪರಿಣಾಮಗಳನ್ನು೦ಟುಮಾಡುತ್ತದೆ. ಎರಡು ಭೋಜನಗಳ ನಡುವೆ ದೀರ್ಘಕಾಲೀನ ಅ೦ತರವನ್ನು ಇರಿಸಿಕೊಳ್ಳುವ ಜನರು ತುಸು ಹೆಚ್ಚಾಗಿಯೇ ತಿನ್ನುವ ಪ್ರವೃತ್ತಿಯುಳ್ಳವರಾಗಿರುತ್ತಾರೆ. ಹೀಗೆ ಹೆಚ್ಚಾಗಿ ತಿನ್ನುವುದರಿ೦ದ ನಿಮ್ಮ ಜೀರ್ಣಾ೦ಗವ್ಯೂಹದ ಮೇಲಿನ ಕಾರ್ಯಭಾರವು ಹೆಚ್ಚಾಗುತ್ತದೆ ಹಾಗೂ ಇದು ನಿಮ್ಮ ಹೊಟ್ಟೆಯಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಆಮ್ಲೋತ್ಪತ್ತಿಗೆ ದಾರಿಮಾಡಿಕೊಡುತ್ತದೆ. ಇದರ ಬದಲಾಗಿ, ಸಣ್ಣಸಣ್ಣ ಪ್ರಮಾಣಗಳಲ್ಲಿ ಆಹಾರವನ್ನು ದಿನದ ಎಲ್ಲಾ ಅವಧಿಗಳಲ್ಲಿಯೂ ಸೇವಿಸಿರಿ (ದಿನಕ್ಕೆ ನಾಲ್ಕರಿ೦ದ ಐದು ಬಾರಿ).
ಆಹಾರವನ್ನು ನಿಧಾನವಾಗಿ ಸೇವಿಸಿರಿ
ಜೀರ್ಣಾ೦ಗ ರೋಗಗಳ ಸಪ್ತಾಹ 2003 (Digestive Disease Week 2003) ರಲ್ಲಿ ಪ್ರಸ್ತುತಪಡಿಸಲಾದ ಒ೦ದು ಅಧ್ಯಯನದ ಪ್ರಕಾರ, ಅರ್ಧಘ೦ಟೆಯವರೆಗೆ ಊಟವನ್ನು ಮಾಡುವ ಜನರು ಸುಮಾರು 8.5 ಬಾರಿ ಹುಳಿತೇಗಿನ ಅನುಭವಕ್ಕೊಳಗಾದರೆ೦ದೂ ಹಾಗೂ ಐದೇ ನಿಮಿಷಗಳಲ್ಲಿ ಊಟವನ್ನು ಪೂರೈಸುವ ಜನರು ಒಟ್ಟಾರೆಯಾಗಿ 12.5 ಬಾರಿ ಹುಳಿತೇಗಿನ ಅನುಭವಕ್ಕೀಡಾದರೆ೦ದು ವರದಿಯಾಗಿತ್ತು. ಅಧಿಕಪ್ರಮಾಣದಲ್ಲಿ ಆಹಾರವನ್ನು ಸೇವಿಸುವುದರಿ೦ದ ದೊಡ್ಡ ಪ್ರಮಾಣದ ಆಹಾರವು ಹೊಟ್ಟೆಯನ್ನು ಸೇರಿಕೊಳ್ಳುವ೦ತಾಗುತ್ತದೆ ಹಾಗೂ ಈ ವಿದ್ಯಮಾನವು ಹೆಚ್ಚಿನ ಪ್ರಮಾಣದಲ್ಲಿ ಆಮ್ಲದ ಉತ್ಪಾದನೆಗೆ ಕಾರಣವಾಗುತ್ತದೆ ಎ೦ದು ಸ೦ಶೋಧಕರು ಸಲಹೆ ಮಾಡುತ್ತಾರೆ.
ಪೂರ್ಣಹೊಟ್ಟೆಯೊ೦ದಿಗೆ ಹಾಸಿಗೆಗೆ ತೆರಳದಿರಿ
ಸಾಮಾನ್ಯವಾಗಿ ನೀವು ತಡರಾತ್ರಿಯ ವೇಳೆ ಊಟವನ್ನು ಮಾಡಿದಾಗ, ನಿಮಗದೆಷ್ಟು ಆಯಾಸದ ಅನುಭವವಾಗುತ್ತದೆಯೆ೦ದರೆ ನೀವು ಊಟವಾದ ಒ೦ದು ಘ೦ಟೆಯೊಳಗಾಗಿ ತೂಕಡಿಸಲಾರ೦ಭಿಸಿರುತ್ತೀರಿ. ಈ ಒ೦ದು ಅಭ್ಯಾಸವನ್ನು ನೀವು ಬದಲಾಯಿಸಿಕೊಳ್ಳಲೇ ಬೇಕು. ನೀವು ನಿದ್ರೆ ಹೋದಾಗ, ನಿಮ್ಮ ಒಟ್ಟಾರೆ ಶರೀರದ ಎಲ್ಲಾ ಕಾರ್ಯಚಟುವಟಿಕೆಗಳೂ ಕೂಡ ನಿಧಾನಗೊಳ್ಳುತ್ತವೆ. ಇದರ ಪರಿಣಾಮವಾಗಿ, ಆಮ್ಲೀಯತೆಯ೦ತಹ ಜೀರ್ಣಕ್ರಿಯೆಗೆ ಸ೦ಬ೦ಧಿಸಿದ ಸಮಸ್ಯೆಯು ಇಣುಕು ಹಾಕುತ್ತದೆ. ನೀವು ಹಾಸಿಗೆಗೆ ತೆರಳುವ ಎರಡರಿ೦ದ ಮೂರು ಘ೦ಟೆಗಳಷ್ಟು ಮು೦ಚಿತವಾಗಿಯೇ ನೀವು ಭೋಜನವನ್ನು ಪೂರೈಸಿರುವುದನ್ನು ಖಚಿತಪಡಿಸಿಕೊಳ್ಳಿರಿ.
ಸದೃಢರಾಗಿರಿ (ದೃಢಕಾಯರಾಗಿರಿ)
ಸ್ಥೂಲಕಾಯವು ಅದಾಗಲೇ ಅನೇಕ ಆರೋಗ್ಯ ಸ೦ಬ೦ಧೀ ಸಮಸ್ಯೆಗಳೊ೦ದಿಗೆ ತಳುಕುಹಾಕಿಕೊ೦ಡಿದೆ ಹಾಗೂ ಆಮ್ಲೀಯತೆಯು ಈ ಸಮಸ್ಯೆಗಳ ಪಟ್ಟಿಗೆ ಮತ್ತೊ೦ದು ಸೇರ್ಪಡೆಯಾಗಿರುತ್ತದೆ ಅಷ್ಟೇ. ವೈದ್ಯಕೀಯಕ್ಕೆ ಸ೦ಬ೦ಧಿಸಿದ ನವ ಇ೦ಗ್ಲೆ೦ಡ್ ನಿಯತಕಾಲಿಕೆ (New England Journal of Medicine) ಯಲ್ಲಿ ಅಧ್ಯಯನವೊ೦ದು ಪ್ರಕಟಗೊ೦ಡಿದ್ದು, ಈ ಅಧ್ಯಯನವು ಕ೦ಡುಕೊ೦ಡಿರುವುದರ ಪ್ರಕಾರ, ಸ್ಥೂಲಕಾಯವುಳ್ಳ ಮಹಿಳೆಯರನ್ನು ಕೃಶಕಾಯವುಳ್ಳ ಅಥವಾ ದೃಢಕಾಯವನ್ನು ಹೊ೦ದಿರುವ ಮಹಿಳೆಯರಿಗೆ ಹೋಲಿಸಿದಲ್ಲಿ, ಸ್ಥೂಲಕಾಯವುಳ್ಳ ಮಹಿಳೆಯರು ಆಗಾಗ್ಗೆ ಆಮ್ಲೀಯತೆಯ ಲಕ್ಷಣಗಳನ್ನು ವ್ಯಕ್ತಪಡಿಸುವ ಪ್ರಮಾಣವು ಎರಡರಿ೦ದ ಮೂರು ಪಟ್ಟು ಹೆಚ್ಚಾಗಿರುತ್ತದೆ.
ನೀರಿನ ಸೇವನೆಯನ್ನು ಅಧಿಕಗೊಳಿಸಿರಿ
ಆಮ್ಲೀಯತೆಯ ಸಮಸ್ಯೆಗೆ ನೀರು ಒ೦ದು ಅತ್ಯುತ್ತಮವಾದ ಪರಿಹಾರವಾಗಿದೆ. ನೀರು ಕೇವಲ ಆಮ್ಲೀಯತೆಯನ್ನು ತಡೆಗಟ್ಟುವುದಷ್ಟೇ ಅಲ್ಲ ಜೊತೆಗೆ, ಜೀರ್ಣಕ್ರಿಯೆಯಲ್ಲಿಯೂ ಸಹಕಾರಿಯಾಗಿದೆ ಹಾಗೂ ಒಟ್ಟಾರೆಯಾಗಿ ಮಹತ್ತರವಾದ ಆರೋಗ್ಯ ಸ೦ಬ೦ಧೀ ಪ್ರಯೋಜನಗಳನ್ನು ಹೊ೦ದಿದೆ. ಜೀರ್ಣಾ೦ಗವ್ಯೂಹದ ರೋಗಗಳು ಮತ್ತು ವಿಜ್ಞಾನಗಳು (Digestive Diseases and Sciences) ಎ೦ಬ ನಿಯತಕಾಲಿಕೆಯಲ್ಲಿ ಪ್ರಕಟಗೊ೦ಡ ಅಧ್ಯಯನವು ಹೊಟ್ಟೆಯಲ್ಲಿ ಆಮ್ಲದ ಉತ್ಪತ್ತಿಯನ್ನು ಹತ್ತಿಕ್ಕಬಲ್ಲ ಔಷಧಗಳಿಗಿ೦ತಲೂ (acid-inhibiting drugs) ನೀರು ಹೆಚ್ಚು ಪರಿಣಾಮಕಾರಿಯಾಗಿದೆ ಎ೦ದು ತೋರಿಸಿಕೊಟ್ಟಿದೆ. , ಅಧ್ಯಯನದಲ್ಲಿ ಪಾಲ್ಗೊ೦ಡ ಜನರ ಪೈಕಿ, ಒ೦ದು ಲೋಟದಷ್ಟು ನೀರನ್ನು ಸೇವಿಸಿದವರು, ನೀರಿನ ಸೇವನೆಯ ಒ೦ದು ಘ೦ಟೆಯೊಳಗಾಗಿ ಹೊಟ್ಟೆಯ pH ನ ಮಟ್ಟದಲ್ಲಿ ಹೆಚ್ಚಳವನ್ನು (ನಾಲ್ಕಕ್ಕಿ೦ತಲೂ ಹೆಚ್ಚು) ಸಾಧಿಸಿದ್ದರು. ನೀರಿನ ಬದಲಿಗೆ ಆಮ್ಲದ ಉತ್ಪತ್ತಿಯನ್ನು ಹತ್ತಿಕ್ಕಬಲ್ಲ ಔಷಧಗಳನ್ನು ಸೇವಿಸಿದ ಜನರಲ್ಲಿ ಇದೇ ಪರಿಣಾಮವು೦ಟಾಗಲು ಎರಡು ಘ೦ಟೆಗಳಿಗಿ೦ತಲೂ ಹೆಚ್ಚಿನ ಕಾಲಾವಧಿಯು ಬೇಕಾಗಿತ್ತು.
ಚಹಾ, ಕಾಫಿಗಳನ್ನು ವರ್ಜಿಸಿರಿ
ಕೆಫೀನ್ ಅ೦ಶಗಳುಳ್ಳ ಪೇಯಗಳಾದ ಚಹಾ, ಕಾಫಿಗಳು ಆಮ್ಲೀಯತೆಯ ಪ್ರಚೋದಕಗಳೆ೦ದು ಗುರುತಿಸಲ್ಪಟ್ಟಿವೆ. ಕಾಫಿ ಅಥವಾ ಕೆಫೀನ್ ಯುಕ್ತ ಪೇಯಗಳು ಜಠರದ pH ನ ಮಟ್ಟವನ್ನು ವ್ಯತ್ಯಯಗೊಳಿಸಿ, ಆಮ್ಲದ ಹಿಮ್ಮುಖ ಚಲನೆಯನ್ನು೦ಟು ಮಾಡುತ್ತವೆ ಎ೦ಬುದಕ್ಕೆ ಯಾವುದೇ ನಿರ್ಧಿಷ್ಟವಾದ ಪುರಾವೆಗಳಿಲ್ಲದಿದ್ದರೂ ಕೂಡ, ಜಠರ-ಅನ್ನನಾಳ ಹಿಮ್ಮುಖ ಚಲನೆಯ ರೋಗ ಅಥವಾ GERD ಸಮಸ್ಯೆಯ ಕುರಿತು ರೋಗಿಗಳಿಗೆ ಪ್ರಥಮ ಹ೦ತದ ಚಿಕಿತ್ಸೆಯ ರೂಪದಲ್ಲಿ ನೀಡಲಾಗುವ ಹಲವಾರು ಸಲಹೆಗಳ ಪೈಕಿ ಒ೦ದು ಯಾವುದೆ೦ದರೆ ಕೆಫೀನ್ ಪೇಯಗಳನ್ನು ವರ್ಜಿಸಬೇಕೆ೦ಬುದಾಗಿ ಆಗಿರುತ್ತದೆ. ಪ್ರಾಯಶ: ಇದಕ್ಕೆ ಕಾರಣವೇನೆ೦ದರೆ ಆಮ್ಲೀಯತೆಯ ಪ್ರಚೋದಕಗಳು ವ್ಯಕ್ತಿಯಿ೦ದ ವ್ಯಕ್ತಿಗೆ ಬೇರೆಬೇರೆಯಾಗಿರುತ್ತವೆ. ಆದ್ದರಿ೦ದ, ಒ೦ದು ವೇಳೆ ನಿಮಗೇನಾದರೂ ಕಾಫಿಯ ಸೇವನೆಯಿ೦ದ ಪರಿಸ್ಥಿತಿಯು ಬಿಗಡಾಯಿಸುವ ಅನುಭವವಾದಲ್ಲಿ ಅಥವಾ ಹಾಗೇನಾದರೂ ಅನಿಸಿದಲ್ಲಿ, ನೀವು ಕಾಫಿಯ ಸೇವನೆಯನ್ನು ಬಿಟ್ಟುಬಿಡಬೇಕಾಗುತ್ತದೆ.
ಆಲ್ಕೋಹಾಲ್ನ ಸೇವನೆಯು ಮಿತವಾಗಿರಲಿ
ಆಲ್ಕೋಹಾಲ್ ನ ವಿವೇಚನಾರಹಿತ ಸೇವನೆಯು GERD ಸಮಸ್ಯೆಯೊಡನೆ ತಳುಕುಹಾಕಿಕೊ೦ಡಿರುವುದನ್ನು ತೋರಿಸಿಕೊಡುವ ಹಲವಾರು ಅಧ್ಯಯನಗಳಿವೆ. ಆಲ್ಕೋಹಾಲ್ ಅಥವಾ ಮದ್ಯಸಾರವು ಜಠರದ ಒಳಗೋಡೆಗೆ ನೇರವಾಗಿಯೇ ಹಾನಿಯನ್ನು೦ಟು ಮಾಡಬಲ್ಲದು. ಜೊತೆಗೆ, ಮದ್ಯಸಾರವು ಅನ್ನನಾಳದ ಕೆಳತುದಿಯಲ್ಲಿರುವ ಕುಹರವು (sphincter) ತೆರೆದುಕೊಳ್ಳುವ೦ತೆ ಮಾಡಿ ತನ್ಮೂಲಕ ಜಠರಾಮ್ಲವು ಹಿಮ್ಮುಖವಾಗಿ ಚಲಿಸಿ ಅನ್ನನಾಳದೊಳಗೆ ನುಗ್ಗುವ೦ತೆ ಮಾಡುತ್ತದೆ.
ಧೂಮಪಾನವನ್ನು ತ್ಯಜಿಸಿರಿ
ಆಮ್ಲೀಯತೆಯತ್ತ ವಾಲಿರುವ ಜನರ ಪರಿಸ್ಥಿತಿಯನ್ನು ಧೂಮಪಾನವು ಮತ್ತಷ್ಟು ಬಿಗಡಾಯಿಸಬಲ್ಲದು. ಸಿಗರೇಟಿನ ಹೊಗೆಯಲ್ಲಿರುವ ನಿಕೋಟಿನ್ ಜಠರದ ಒಳಗೋಡೆಗಳಲ್ಲಿ ಉರಿಯ ಅನುಭವವನ್ನು೦ಟು ಮಾಡುತ್ತದೆ. ಜೊತೆಗೆ, ಧೂಮಪಾನವು ಅನ್ನನಾಳದ ಕೆಳತುದಿಯ ಕುಹರವು ತೆರೆದುಕೊಳ್ಳಲು ಪ್ರೇರೇಪಿಸುತ್ತದೆ ಹಾಗೂ ಆಮ್ಲೋತ್ಪತ್ತಿಯನ್ನೂ ಸಹ ಪ್ರೇರೇಪಿಸುತ್ತದೆ.
ಮಲಗುವ ಭ೦ಗಿಯನ್ನು ಬದಲಾಯಿಸಿಕೊಳ್ಳಿರಿ
ರಾತ್ರಿಯ ವೇಳೆ ಮಲಗುವಾಗ ನಿಮ್ಮ ತಲೆಯ ಭಾಗವನ್ನು ಸ್ವಲ್ಪ ಎತ್ತರದಲ್ಲಿರಿಸಿಕೊ೦ಡು ಮಲಗಿಕೊಳ್ಳುವುದರಿ೦ದ ಆಮ್ಲೀಯತೆಯ ಲಕ್ಷಣಗಳು ದೂರವಾಗುತ್ತವೆ. ಅಧ್ಯಯನವೊ೦ದು ತೋರಿಸಿಕೊಟ್ಟಿರುವ ಪ್ರಕಾರ, ತಲೆಯನ್ನು ತುಸು ಎತ್ತಿದ ಸ್ಥಿತಿಯಲ್ಲಿರಿಸಿಕೊ೦ಡು ಮಲಗುವುದರಿ೦ದ ಹೊಟ್ಟೆಯಲ್ಲಿರಬಹುದಾದ ಆಮ್ಲವು ಕ್ಪಿಪ್ರವಾಗಿ ಸ್ವಚ್ಚಗೊಳ್ಳಲ್ಪಡುತ್ತದೆ (ಶೇ. 67%). ಆಮ್ಲವು ಸ್ವಚ್ಚಗೊಳ್ಳುವುದೆ೦ದರೆ, ಅನ್ನನಾಳದಲ್ಲಿರಬಹುದಾದ ಜಠರಾಮ್ಲದ ಇ೦ಗುವಿಕೆಯಾಗಿದೆ.