ಪಂಜಾಬಿ ಸ್ಟೈಲ್ ಮಲೈ ಲಸ್ಸಿ! ಈ ರೀತಿ ಮಾಡಿ ಗಟ್ಟಿ ಕೆನೆಯ ಢಾಬಾ ಸ್ಟೈಲ್ ಲಸ್ಸಿ.. ಬಿಸಿಲ ತಾಪಕ್ಕೆ ಬೆಸ್ಟ್ ಕೂಲ್ ಡ್ರಿಂಕ್

ಬೇಸಿಗೆಯ ಧಗೆ ಹೆಚ್ಚಿದಾಗ ತಂಪಾದ ಪಾನೀಯಗಳ ಮೊರೆ ಹೋಗುವುದು ಸಹಜ. ಬಿಸಿಲಿನ ಬೇಗೆಯಿಂದ ಬಳಲಿದ ದೇಹಕ್ಕೆ ತಕ್ಷಣ ಚೈತನ್ಯ ನೀಡುವ ಪಾನೀಯಗಳು ಬೇಕಾಗುತ್ತವೆ. ಸಾಮಾನ್ಯವಾಗಿ ಅನೇಕರು ರೆಡಿಮೇಡ್ ಕೂಲ್ ಡ್ರಿಂಕ್ಸ್‌ ಅಥವಾ ಪ್ಯಾಕೆಟ್‌ ಜ್ಯೂಸ್‌ಗಳನ್ನು ಆಯ್ಕೆ ಮಾಡಿಕೊಳ್ಳುತ್ತಾರೆ. ಆದರೆ, ಆರೋಗ್ಯದ ದೃಷ್ಟಿಯಿಂದ ನಮ್ಮ ದೇಶೀಯ ಪಾನೀಯಗಳು ಹೆಚ್ಚು ಉತ್ತಮ. ಇಂತಹ ದೇಸೀ ಪಾನೀಯಗಳಲ್ಲಿ ಲಸ್ಸಿ (Lassi) ತನ್ನದೇ ಆದ ವಿಶಿಷ್ಟ ಸ್ಥಾನವನ್ನು ಪಡೆದುಕೊಂಡಿದೆ.

ಲಸ್ಸಿ ಕೇವಲ ಒಂದು ಪಾನೀಯವಾಗಿರದೆ, ಅದು ಉತ್ತರ ಭಾರತದ, ವಿಶೇಷವಾಗಿ ಪಂಜಾಬ್‌ನ ಹೆಮ್ಮೆಯ ಸಂಪ್ರದಾಯದ ಭಾಗವಾಗಿದೆ. ಪಂಜಾಬ್‌ನ ಧಾಬಾಗಳಲ್ಲಿ ದೊರಕುವ ದಪ್ಪನೆಯ, ಕ್ರೀಮಿಯಾಗಿರುವ ಲಸ್ಸಿ, ಮೇಲ್ಭಾಗದಲ್ಲಿ ಹರಡುವ ಮಲೈ ಪದರದಿಂದಲೇ ಬಾಯಲ್ಲಿ ನೀರೂರಿಸುತ್ತದೆ. ಬಿಸಿಲಿನ ಮಧ್ಯಾಹ್ನದ ವೇಳೆ ಒಂದು ಲೋಟ ಢಾಬಾ ಸ್ಟೈಲ್ ಲಸ್ಸಿಯನ್ನು ಕುಡಿಯುವುದರಿಂದ ತಕ್ಷಣದ ಶಕ್ತಿ ಮತ್ತು ಚೈತನ್ಯ ದೊರೆಯುತ್ತದೆ.

Photo Credit: ಸಂಗ್ರಹ ಚಿತ್ರ: ಇಂಟರ್ನೆಟ್

ಆದರೆ, ಮನೆಯಲ್ಲಿ ಲಸ್ಸಿಯನ್ನು ತಯಾರಿಸುವಾಗ ಹಲವರಿಗೆ ಧಾಬಾದಲ್ಲಿ ಸಿಗುವಂತಹ ದಪ್ಪ ಮತ್ತು ರುಚಿಕರವಾದ ಲಸ್ಸಿ ಮಾಡಲು ಸಾಧ್ಯವಾಗುವುದಿಲ್ಲ ಎಂಬ ಅಸಮಾಧಾನವಿದೆ. ಮಿಕ್ಸಿಯಲ್ಲಿ ಲಸ್ಸಿ ಮಾಡಿದರೆ ಅದು ನೀರಿನಂತೆ ತೆಳ್ಳಗಾಗುತ್ತದೆ ಎಂಬುದು ಸಾಮಾನ್ಯವಾದ ದೂರು. ಆದರೆ, ಕೆಲವು ಸರಳ ವಿಧಾನಗಳನ್ನು ಅನುಸರಿಸಿದರೆ, ಮನೆಯಲ್ಲಿಯೇ ಪರಿಪೂರ್ಣ ಢಾಬಾ ಸ್ಟೈಲ್ ಮಲೈ ಲಸ್ಸಿಯನ್ನು (Dhaba Style Malai Lassi recipe) ಸುಲಭವಾಗಿ ತಯಾರಿಸಬಹುದು.

ಮಲೈ ಲಸ್ಸಿ ಮಾಡಲು ಬೇಕಾಗುವ ಪದಾರ್ಥಗಳು

• ತಾಜಾ ಮೊಸರು (ದಪ್ಪ ಮತ್ತು ಸಿಹಿಯಾದ)
• ಸಕ್ಕರೆ
• ಏಲಕ್ಕಿ ಪುಡಿ
• ರೋಸ್ ವಾಟರ್
• ಐಸ್ ಕ್ಯೂಬ್‌ಗಳು
• ಮಲೈ (ಕೆನೆ)
• ಬಾದಾಮಿ
• ಪಿಸ್ತಾ
• ಕುಂಕುಮಪು

ಲಸ್ಸಿ ತಯಾರಿಸುವ ವಿಧಾನ

- ಮೊದಲಿಗೆ, ಒಂದು ದೊಡ್ಡ ಪಾತ್ರೆಯನ್ನು ತೆಗೆದುಕೊಂಡು ಅದಕ್ಕೆ ತಣ್ಣನೆಯ ದಪ್ಪ ಮೊಸರನ್ನು ಹಾಕಿ.

- ನಂತರ ಅದಕ್ಕೆ ಸಕ್ಕರೆ ಸೇರಿಸಿ. ಈಗ ಮರದ ಕವ್ವೆಯ ಸಹಾಯದಿಂದ ನಿಧಾನವಾಗಿ, ಆದರೆ ಚೆನ್ನಾಗಿ ಕಡೆಯಿರಿ. ಸಕ್ಕರೆ ಸಂಪೂರ್ಣವಾಗಿ ಕರಗಿ, ಮೊಸರಿನ ಮೇಲೆ ನೊರೆ ಕಾಣಿಸಿಕೊಳ್ಳುವವರೆಗೆ ಕಡೆಯುವುದನ್ನು ಮುಂದುವರಿಸಿ.

- ಈ ಹಂತದಲ್ಲಿ ಮೊಸರು ನಿಧಾನವಾಗಿ ತಿಳಿ ಕೆನೆಯಂತೆ ರೂಪುಗೊಳ್ಳುತ್ತದೆ. ನಂತರ ಇದಕ್ಕೆ ಸಣ್ಣ ಪ್ರಮಾಣದ ಏಲಕ್ಕಿ ಪುಡಿ ಮತ್ತು ಎರಡು ಹನಿ ರೋಸ್ ವಾಟರ್ ಸೇರಿಸಿ. ಇದು ಲಸ್ಸಿಗೆ ಆಕರ್ಷಕವಾದ ಸುವಾಸನೆ ಹಾಗೂ ವಿಶಿಷ್ಟವಾದ ರುಚಿಯನ್ನು ನೀಡುತ್ತದೆ, ಅದನ್ನು ಮತ್ತಷ್ಟು ಆಹ್ಲಾದಕರವಾಗಿಸುತ್ತದೆ.

- ಲಸ್ಸಿ ತುಂಬಾ ಗಟ್ಟಿಯಾಗಿದೆ ಎಂದು ಅನಿಸಿದರೆ, ಸ್ವಲ್ಪ ತಣ್ಣನೆಯ ಹಾಲು ಅಥವಾ ಅತಿ ಕಡಿಮೆ ನೀರನ್ನು ಸೇರಿಸಬಹುದು. ಆದರೆ ಧಾಬಾ ಸ್ಟೈಲ್ ಲಸ್ಸಿ ಎಂದಿಗೂ ತೆಳ್ಳಗಿರಬಾರದು ಎಂಬುದನ್ನು ನೆನಪಿನಲ್ಲಿಡಿ. ಆದ್ದರಿಂದ, ಹಾಲು ಅಥವಾ ನೀರನ್ನು ಬಹಳ ಅಲ್ಪ ಪ್ರಮಾಣದಲ್ಲಿ ಮಾತ್ರ ಬಳಸಬೇಕು, ದಪ್ಪನೆಯ ವಿನ್ಯಾಸಕ್ಕೆ ಆದ್ಯತೆ ನೀಡಬೇಕು.

- ಈ ಎಲ್ಲಾ ಪದಾರ್ಥಗಳನ್ನು ಸೇರಿಸಿದ ನಂತರ ಐಸ್ ಕ್ಯೂಬ್‌ಗಳನ್ನು ಹಾಕಿ ಮತ್ತೊಮ್ಮೆ ನಿಧಾನವಾಗಿ ಕಡೆಯಿರಿ. ಈಗ ಘಮಘಮಿಸುವ, ತಂಪು ಮತ್ತು ಸಿಹಿಯಾದ ಧಾಬಾ ಸ್ಟೈಲ್ ಮಲೈ ಲಸ್ಸಿ ಕುಡಿಯಲು ಸಿದ್ಧವಾಗುತ್ತದೆ. ಇದರ ರುಚಿ ಖಂಡಿತ ನಿಮ್ಮನ್ನು ಸೆಳೆಯುತ್ತದೆ. ಬೇಸಿಗೆಯ ಬಿಸಿಲಿಗೆ ಹೇಳಿ ಮಾಡಿಸಿದಂತಿದೆ.

ಸರ್ವ್ ಮಾಡುವ ವಿಧಾನ

ಲಸ್ಸಿಯನ್ನು ಸಾಮಾನ್ಯವಾಗಿ ಗ್ಲಾಸ್‌ಗಳಲ್ಲಿ ನೀಡಬಹುದಾದರೂ ಸಹ, ಪಂಜಾಬಿ ಧಾಬಾಗಳಲ್ಲಿ ದೊರಕುವಂತಹ ಅನುಭವವನ್ನು ಪಡೆಯಲು ಮಣ್ಣಿನ ಗ್ಲಾಸ್‌ಗಳಲ್ಲಿ ಸರ್ವ್ ಮಾಡುವುದು ಉತ್ತಮ. ಮಣ್ಣಿನ ಗ್ಲಾಸ್‌ನಲ್ಲಿ ಲಸ್ಸಿ ಕುಡಿಯುವುದರಿಂದ ಅದರ ಸುವಾಸನೆ ಮತ್ತು ರುಚಿ ಇನ್ನಷ್ಟು ಸ್ವಾದಯುಕ್ತವಾಗಿ, ಬೇಸಿಗೆಯ ಬಿಸಿಲಿಗೆ ತಂಪು ನೀಡುತ್ತದೆ.

ಗ್ಲಾಸ್‌ಗಳಿಗೆ ಲಸ್ಸಿ ಹಾಕಿದ ನಂತರ, ಅದರ ಮೇಲ್ಭಾಗದಲ್ಲಿ ಒಂದು ಚಮಚ ತಾಜಾ ಮಲೈ ಅನ್ನು ಹಾಕಿ. ನಂತರ ಸಣ್ಣಗೆ ಕತ್ತರಿಸಿದ ಬಾದಾಮಿ ಮತ್ತು ಪಿಸ್ತಾ ತುಂಡುಗಳಿಂದ ಅಲಂಕರಿಸಿ. ಕೊನೆಯಲ್ಲಿ ಸ್ವಲ್ಪ ಕುಂಕುಮಪು ಚಲ್ಲಿ, ಪಂಜಾಬಿ ಧಾಬಾ ಸ್ಟೈಲ್ ಮಲೈ ಲಸ್ಸಿಯನ್ನು ಅತಿಥಿಗಳಿಗೆ ಅಥವಾ ಕುಟುಂಬದ ಸದಸ್ಯರಿಗೆ ಸರ್ವ್ ಮಾಡಬಹುದು.

ಬೇಸಿಗೆಯಲ್ಲಿ ಲಸ್ಸಿಯ ಪ್ರಯೋಜನಗಳು

ಬೇಸಿಗೆಯಲ್ಲಿ ದೇಹಕ್ಕೆ ನವಚೈತನ್ಯ ಮತ್ತು ತಂಪು ನೀಡುವ ಪಾನೀಯಗಳಲ್ಲಿ ಲಸ್ಸಿ ಮುಂಚೂಣಿಯಲ್ಲಿದೆ. ಮೊಸರಿನಿಂದ ತಯಾರಾಗುವ ಈ ಪಾನೀಯವು ದೇಹಕ್ಕೆ ತಕ್ಷಣ ಶಕ್ತಿಯನ್ನು ನೀಡುತ್ತದೆ ಮಾತ್ರವಲ್ಲದೆ, ಜೀರ್ಣಕ್ರಿಯೆಯನ್ನು ಸುಧಾರಿಸಲು ಸಹಕರಿಸುತ್ತದೆ. ಬಿಸಿಲಿನಿಂದ ಮನೆಗೆ ಮರಳಿದಾಗ ಒಂದು ಲೋಟ ತಣ್ಣನೆಯ ಲಸ್ಸಿ ಕುಡಿಯುವುದರಿಂದ ದೇಹ ನಿರಾಳವಾಗಿ, ಹೊಸ ಚೈತನ್ಯ ತುಂಬಿಕೊಳ್ಳುತ್ತದೆ.

ಒಟ್ಟಾರೆ, ಮನೆಯಲ್ಲಿ ಸರಿಯಾದ ವಿಧಾನದಲ್ಲಿ ತಯಾರಿಸಿದ ಮಲೈ ಲಸ್ಸಿ, ಖಂಡಿತವಾಗಿಯೂ ಧಾಬಾಗಳಲ್ಲಿ ದೊರಕುವ ಪ್ರಸಿದ್ಧ ಲಸ್ಸಿಗೆ (Punjabi Lassi) ಯಾವುದೇ ರೀತಿಯಲ್ಲಿ ಕಡಿಮೆ ಇಲ್ಲ. ಈ ಬೇಸಿಗೆಯಲ್ಲಿ ನಿಮ್ಮ ಕುಟುಂಬದೊಂದಿಗೆ ಕುಳಿತು ತಂಪಾದ ಧಾಬಾ ಸ್ಟೈಲ್ ಮಲೈ ಲಸ್ಸಿಯನ್ನು ಸವಿಯುವ ಅನುಭವವು ಮತ್ತಷ್ಟು ಸಿಹಿಯಾಗಿ, ಮರೆಯಲಾಗದಂತಹ ನೆನಪನ್ನು ನೀಡುತ್ತದೆ.