ಮದುವೆಯಾಗೋ ಪ್ಲ್ಯಾನ್ ಇದ್ಯಾ? ಈಗಲೇ ಈ ವಿಚಾರಗಳನ್ನು ಸಂಗಾತಿಯೊಡನೆ ಚರ್ಚಿಸಿ

ಇಷ್ಟ-ಕಷ್ಟ:

ಪರಸ್ಪರರ ಇಷ್ಟ -ಕಷ್ಟ ಅರಿಯುವುದು ಬಹಳ ಮುಖ್ಯ. ಇಲ್ಲವಾದಲ್ಲಿ ಮುಂದೆ ಇದೇ ನಿಮ್ಮ ಜೀವನದಲ್ಲಿ ಮುಳುವಾಗಬಹುದು. ಪರಸ್ಪರರ ಹವ್ಯಾಸ, ಇಷ್ಟ ಹಾಗೂ ಇಷ್ಟವಿಲ್ಲದೆ ಇರುವುದನ್ನು ಮೊದಲು ತಿಳಿಯಬೇಕು. ಸಂಗಾತಿ ಜತೆಗೆ ನೀವು ಇದರ ಬಗ್ಗೆ ಮಾತನಾಡುವುದು ಒಳ್ಳೆಯದು. ಯಾಕೆಂದರೆ ಒಂದೇ ರೀತಿಯ ಆಯ್ಕೆ ಇದ್ದರೆ ಆಗ ನಿಮಗೆ ಭವಿಷ್ಯದಲ್ಲಿ ಸಮಸ್ಯೆಗಳನ್ನು ಬಗೆಹರಿಸಲು ಸುಲಭವಾಗುವುದು. ಅವರ ಜೀವನಶೈಲಿ, ಇಷ್ಟದ ಅಡುಗೆ ಮತ್ತು ಪ್ರವಾಸದ ಬಗ್ಗೆ ತಿಳಿಯಿರಿ. ಇದು ಮುಂಎ ನಿಮಗೆ ಅವರ ಆಸೆಗಳನ್ನು ಈಡೇರಿಸಲು ಸಹಾಯವಾಗುತ್ತದೆ.

​ಮದುವೆ ಬಳಿಕ ವೃತ್ತಿ:

ಇದು ಈಗಿನ ಕಾಲದಲ್ಲಿ ಕೇಳಲೇಬೇಕಾದ ಮಾತು. ಆದರೆ ಮದುವೆ ಬಳಿಕ ಉದ್ಯೋಗಕ್ಕೆ ಹೋಗಬಾರದು ಎಂದು ಹೇಳುವ ಕಾಲ ಈಗಿಲ್ಲ. ಎಲ್ಲರೂ ತಮ್ಮ ಆರ್ಥಿಕ ಪರಿಸ್ಥಿತಿಯು ಉತ್ತಮವಾಗಿರಬೇಕು ಎಂದು ಬಯಸುವರು ಮತ್ತು ಪತ್ನಿಯು ಉದ್ಯೋಗಕ್ಕೆ ಹೋಗಲಿ ಎಂದು ಹೇಳುವರು. ಆದರೆ ನೀವು ಮದುವೆಗೆ ಮೊದಲು ಸಂಗಾತಿಗೆ ಕೆಲಸಕ್ಕೆ ಹೋಗಲು ಇಷ್ಟವಿದೆಯಾ ಎಂದು ತಿಳಿಯುವುದು ಉತ್ತಮ. ಯಾಕಂದ್ರೆ ಕೆಲ ಹಿರಿಯರಿಗೆ ಸೊಸೆ ಮನೆ ಬಿಟ್ಟು ಹೊರಹೋಗಿ ದುಡಿಯುವುದು ಇಷ್ಟವಿರುವುದಿಲ್ಲ.

​ಸಸ್ಯಹಾರಿ-ಮಾಂಸಹಾರಿ:

ಆಹಾರ ಆಯ್ಕೆಯು ವೈಯಕ್ತಿಕವಾಗಿ ಇರುವಂತಹದ್ದು. ಇದನ್ನು ಯಾರ ಮೇಲೂ ಹೇರಲು ಆಗದು. ಹೀಗಾಗಿ ನೀವು ಮದುವೆಗೆ ಮೊದಲು ನಿಮ್ಮ ಆಹಾರ ಕ್ರಮದ ಬಗ್ಗೆ ತಿಳಿಸುವುದು ಉತ್ತಮ. ನಿಮ್ಮ ಸಂಗಾತಿಯು ಸಸ್ಯಾಹಾರಿಯಾಗಿ, ನೀವು ಮಾಂಸಾಹಾರಿಯಾಗಿದ್ದರೆ ಆಗ ಭವಿಷ್ಯದಲ್ಲಿ ತೊಂದರೆ ಆಗುವುದು. ಹೀಗಾಗಿ ನೀವು ಆಹಾರದ ಆಯ್ಕೆ ಬಗ್ಗೆ ಸರಿಯಾಗಿ ತಿಳಿದುಕೊಂಡು ಮುಂದಿನ ಆಯ್ಕೆ ಮಾಡಿ. ಪ್ರೀತಿ ಹಾಗೂ ಆರೋಗ್ಯವು ಭಿನ್ನ ವಿಚಾರ. ಇದರ ಬಗ್ಗೆ ನೀವು ಗಮನಿಸುವುದು ಅಗತ್ಯ.

​ಮದುವೆ ಬಳಿಕ ಸ್ನೇಹಿತರು:

ವಿವಾಹದ ಬಳಿಕ ಸ್ನೇಹಿತರನ್ನೇ ಮತ್ತಷ್ಟು ಹಚ್ಚಿಕೊಳ್ಳುವುದು ಕೆಲವರಿಗೆ ಇಷ್ಟವಾಗದು. ಅದರಲ್ಲೂ ಹುಡುಗಿಯರಿಗೆ ಪುರುಷ ಸ್ನೇಹಿತರಿರುವುದು ಕೆಲವೊಂದು ಪತಿಯರಿಗೆ ಇಷ್ಟವಾಗುವುದಿಲ್ಲ. ಹೀಗಾಗಿ ಮದುವೆ ಬಳಿಕ ಪತ್ನಿಗೆ ಯಾರಾದರೂ ಒಳ್ಳೆಯ ಹುಡುಗ ಸ್ನೇಹಿತನಿದ್ದರೆ ಆಗ ಸಮಸ್ಯೆ ಕಾಡಬಹುದು. ಇದಕ್ಕಾಗಿ ಇಂತಹ ವಿಚಾರವನ್ನು ಮದುವೆಗೆ ಮೊದಲೇ ತೀರ್ಮಾನಿಸುವುದು ಸೂಕ್ತ. ಆಗ ಯಾವುದೇ ಗೊಂದಲಗಳಿರುವುದಿಲ್ಲ. ಹಾಗಂತ ಸ್ನೇಹಿತರನ್ನು ಮರೆತುಬಿಡುವುದು ಸರಿಯಲ್ಲ.

​ಕುಟುಂಬ ಯೋಜನೆ:

ಇಂದಿನ ಕಾಲದಲ್ಲಿ ಈ ಚರ್ಚೆ ಬಹಳ ಅವಶ್ಯಕವಾಗಿದೆ. ಏಕೆಂದರೆ ಮುಂದೆ ದಂಪತಿಗಳ ನಡುವೆ ವೈಮನಸ್ಸಿಗೆ ಕಾರಣವಾಗುವ ಅನೇಕ ಉದಾಹರಣೆಗಳನ್ನು ನೋಡಿದ್ದೇವೆ. ಮದುವೆ ಬಳಿಕ ತಕ್ಷಣವೇ ಮಕ್ಕಳು ಬೇಕು ಎಂದು ಕೆಲವು ದಂಪತಿ ಇಷ್ಟುಪಟ್ಟರೆ, ಇನ್ನು ಕೆಲ ದಂಪತಿಯು ಇದನ್ನು ಮುಂದೂಡುತ್ತಾರೆ. ಮಗುವಿನ ಬಗ್ಗೆ ಅಭಿಪ್ರಾಯವೇನು ಎಂದು ತಿಳಿಯಿರಿ. ಇಬ್ಬರ ನಿಲುವು ಒಂದೇ ರೀತಿಯಾಗಿ ಇಲ್ಲದೆ ಇದ್ದರೆ ಆಗ ಸಮಸ್ಯೆಯು ಕಾಡುವುದು. ಮಕ್ಕಳ ಪಾಲನೆ, ವಿದ್ಯಾಭ್ಯಾಸ ಇತ್ಯಾದಿಗಳ ಬಗ್ಗೆ ಕೂಡ ಮೊದಲೇ ಆಲೋಚನೆ ಮಾಡಿ.

​ಬಟ್ಟೆ ಹಾಗೂ ಆಭರಣಗಳು:

ಮದುವೆ ಆದ ಮೇಲೆ ಸಾಮಾನ್ಯವಾಗಿ ಹೆಚ್ಚಾಗಿ ಹುಡುಗರು ಮನೆಯಲ್ಲಿ ತಂದೆತಾಯಿಯ ಮುಂದೆ ಸಂಪ್ರದಾಯಬದ್ಧ ಬಟ್ಟೆ ಧರಿಸಬೇಕೆಂದು ಬಯಸುವುದು ಸಹಜ. ಆದರೆ ನೀವು ಮದುವೆಗೆ ಮೊದಲು ವಿದೇಶಿ ಬಟ್ಟೆ ಈಗಿನ ಫ್ಯಾಶನ್ ಎಂದು ತಿಳಿಸಿ. ಮದುವೆ ಬಳಿಕ ನಿಮಗೆ ಈ ಬಗ್ಗೆ ವಾಗ್ವಾದ ಆಗುವ ಮೊದಲು ಇದನ್ನು ಮೊದಲೇ ಬಗೆಹರಿಸಿಕೊಂಡರೆ ತುಂಬಾ ಒಳ್ಳೆಯದು. ಮದುವೆ ಬಳಿಕ ಬೋಲ್ಡ್ ಆಗಿ ಕಾಣಿಸುವಂತಹ ಬಟ್ಟೆ ಧರಿಸುವ ಬಗ್ಗೆಯೂ ನೀವು ಸರಿಯಾದ ತೀರ್ಮಾನ ಮಾಡಿಕೊಳ್ಳಿ. ಇಲ್ಲವಾದಲ್ಲಿ ನಿಮ್ಮ ತಂದೆ ತಾಯಿ ಹಾಗೂ ಹೆಂಡತಿಯ ನಡುವೆ ಸಿಲುಕಿ ಬೀಳಬಹುದು.