ಸದ್ದಿಲ್ಲದೇ ಟ್ರೆಂಡ್ ಆಗ್ತಿದೆ, ತಂದೆಯರ ಹೊರೆ ಕಡಿಮೆ ಮಾಡುವ ಈ ಮೈಕ್ರೋ ವೆಡ್ಡಿಂಗ್ ಪ್ಲಾನ್!

ಏನಿದು ಮೈಕ್ರೋ ವೆಡ್ಡಿಂಗ್ :

ಮೈಕ್ರೋ ವೆಡ್ಡಿಂಗ್ ನಲ್ಲಿ ಜನದಟ್ಟಣೆ ಇಲ್ಲ, ಹೆಚ್ಚು ಗೌಜಿ-ಗಮ್ಮತ್ತು ಇಲ್ಲ, ಅತಿಯಾದ ಖರ್ಚಂತೂ ಮೊದಲೇ ಇಲ್ಲ. ವಧು-ವರರನ್ನು ಹೊರತುಪಡಿಸಿ, ಅವರ ಕುಟುಂಬ ಸದಸ್ಯರು ಮತ್ತು ತುಂಬಾ ಹತ್ತಿರದ ವ್ಯಕ್ತಿಗಳಿಗೆ ಮಾತ್ರ ಆಹ್ವಾನವಿರುವುದು. ಅಂದರೆ ಮದುವೆಗೆ ಹುಡುಗ-ಹುಡುಗಿಯ ಕಡೆಯಿಂದ ಕನಿಷ್ಟ ಜನರನ್ನು ಕರೆದಿರಲಾಗುತ್ತದೆ. ಮದುವೆಗೆ ಆಗಮಿಸುವವರ ಸಂಖ್ಯೆ ಗರಿಷ್ಠ 50-100 ಮತ್ತು ಕನಿಷ್ಠ 20-25 ಆಗಿರಬಹುದು. ಕಡಿಮೆ ಜನರಿದ್ದರೂ, ಯಾವುದೇ ಸಂಪ್ರದಾಯ ಶಾಸ್ತ್ರಗಳಿಗೆ ಅಡ್ಡಿಯಾಗದಂತೆ ಬಹಳ ಅದ್ಭುತ ರೀತಿಯಲ್ಲೇ ವಿವಾಹ ನಡೆಸಲಾಗುತ್ತದೆ.

ಮೈಕ್ರೋ ವೆಡ್ಡಿಂಗ್ ನ ಪ್ರಯೋಜನಗಳು:

ಬ್ರೋಕನ್ ಓಲ್ಡ್ ಟ್ರೆಂಡ್:

ಭಾರತದ ಪ್ರಾಚೀನ ಸಂಪ್ರದಾಯದ ಪ್ರಕಾರ, ಮದುವೆಗಳಿಗೆ ಸಾಕಷ್ಟು ಖರ್ಚು ಮಾಡಲಾಗುತ್ತದೆ. ಮದುವೆ ಅಂದರೆ ಅದೊಂದು ಊರಿನ ಜಾತ್ರೆಯಂತೆ, ಇಡೀ ಊರಿಗೆ ಆಮಂತ್ರಣ ನೀಡಿ, ಭವ್ಯವಾಗಿ ನಡೆಸಲಾಗುತ್ತಿತ್ತು. ಮದುವೆಗೆ ಮಾಡುವ ಖರ್ಚು ಘನತೆ, ಗೌರವದ ಸಂಕೇತವಾಗಿತ್ತು. ಆದರೆ ಈ ಮೈಕ್ರೋ ವೆಡ್ಡಿಂಗ್ ಆ ಹಳೇ ಟ್ರೆಂಡ್ ನ್ನು ಮುರಿದಿದ್ದು, ಇತ್ತೀಚೆಗೆ ಜನರು ಕಡಿಮೆ ಜನಸಂದಣಿಯಲ್ಲಿ ವಿವಾಹವಾಗಲು ಆದ್ಯತೆ ನೀಡುತ್ತಿದ್ದಾರೆ.

ಅತಿಥಿಗಳ ಆರೈಕೆ ಸುಲಭ:

ಭವ್ಯ ವಿವಾಹಗಳಲ್ಲಿ ಅತಿಥಿಗಳ ಹಾಗೂ ಆಗಮಿಸುವವರ ಸಂಖ್ಯೆಯೂ ಹೆಚ್ಚಾಗಿರುತ್ತದೆ. ಅಂತಹ ಪರಿಸ್ಥಿತಿಯಲ್ಲಿ, ಸಂಬಂಧಿಕರ ಆರೈಕೆ ಯಲ್ಲಿ ಏನಾದರೂ ಹೆಚ್ಚು-ಕಮ್ಮಿ ಆದಾಗ ಅವರು ಮನೆ ಯಜಮಾನರ ಮೇಲೆ ಅದರಲ್ಲೂ ಹುಡುಗಿಯ ಅಪ್ಪನ ಮೇಲೆ ಕೋಪಗೊಳ್ಳುತ್ತಿದ್ದರು. ಆದರೆ ಮೈಕ್ರೋ ವೆಡ್ಡಿಂಗ್ ನಿಂದಾಗಿ ಕನಿಷ್ಠ ಅತಿಥಿಗಳನ್ನು ಆಹ್ವಾನಿಸಿರುವುದರಿಂದ ಜನರು ಕೋಪಗೊಳ್ಳುವ ಪ್ರವೃತ್ತಿಯೂ ಕಡಿಮೆಯಾಗುವುದು.

ಸಾಲಭಾರವಿಲ್ಲದ ಮದುವೆ:

ಮಧ್ಯಮ ಹಾಗೂ ಬಡ ಕುಟುಂಬದಲ್ಲಿ ಮದುವೆ ಮಾಡುವುದೆಂದರೆ ಅಲ್ಲಿ ಸಾಲ ಕಡ್ಡಾಯವಾಗಿ ಮಾಡಲೇಬೇಕು. ವಿಜೃಂಭಣೆಯ ಮದುವೆಗಾಗಿ ಸಾಲ ಮಾಡಿಕೊಂಡು ಆ ಹೊರೆಯನ್ನು ಮದುವೆಯ ಬಳಿಕ ಹೊತ್ತುಕೊಂಡೇ ಸಾಗುತ್ತಾರೆ. ಆದರೆ ಮೈಕ್ರೋ ವೆಡ್ಡಿಂಗ್ ನಲ್ಲಿ ಜನರು ತಮ್ಮ ಮದುವೆಯನ್ನು ಬಹಳ ಬಜೆಟ್ ಸ್ನೇಹಿ ರೀತಿಯಲ್ಲಿ ಮಾಡಬಹುದು. ಕಡಿಮೆ ಖರ್ಚಿನಿಂದ, ಬಹಳ ಸರಳವಾಗಿ ಮದುವೆ ಆಗಬಹುದು.

ಅಲಂಕಾರದಲ್ಲೂ ವಿನಾಯಿತಿ:

ಮೈಕ್ರೋ ವೆಡ್ಡಿಂಗ್ ಗೆ, ಅದರ ಕೂಟಕ್ಕೆ ಒಂದು ಸಣ್ಣ ಸ್ಥಳ ಮಾತ್ರ ಬೇಕಾಗುತ್ತದೆ. ಆದ್ದರಿಂದ, ವಿವಾಹದ ಸ್ಥಳದ ಸಂಪೂರ್ಣ ಅಲಂಕಾರವನ್ನು ಕನಿಷ್ಠ ವೆಚ್ಚದಲ್ಲಿ ಮಾಡಬಹುದು. ಕಡಿಮೆ ಹಣದಲ್ಲಿ ಎಲ್ಲಾ ಜಾಗವನ್ನು ಸುಂದರವಾಗಿ ನಿಮಗೆ ಬೇಕಾಗಿರುವ ರೀತಿಯಲ್ಲಿ ಅಲಂಕಾರ ಮಾಡಬಹುದು. ಖರ್ಚು ಕಡಿಮೆ, ಸಮಯವೂ ವ್ಯರ್ಥವಾಗದು.