ವಿಚ್ಛೇದನಕ್ಕಾಗಿ ಅರ್ಜಿ ಹಾಕಿದ ಮೇಲೂ ವಿಚ್ಛೇದನ ತಡೆಯುವುದು ಹೇಗೆ?

ಕೌನ್ಸಿಲಿಂಗ್ ಮಾಡಿ

ಮರಿದು ಬೀಳಬೇಕಾಗಿದ್ದ ಎಷ್ಟೋ ವೈವಾಹಿಕ ಜೀವನ ಕೌನ್ಸಿಲಿಂಗ್‌ನಿಂದ ಉಳಿದುಕೊಳ್ಳುತ್ತದೆ, ಮುಂದೆ ಆ ಜೋಡಿ ಚೆನ್ನಾಗಿ ಬದುಕುತ್ತೆ ಕೂಡ. ಪ್ರಾರಂಭದಲ್ಲಿ ಈ ರೀತಿಯ ಕೌನ್ಸಿಲಿಂಗ್‌ಗಳನ್ನು ಮನೆಯಲ್ಲಿ ಹಿರಿಯರೇ ಮಾಡುತ್ತಾರೆ, ಅಂದರೆ ಇಬ್ಬರ ಹತ್ರ ಈ ಕುರಿತು ಮಾತನಾಡಿರುತ್ತಾರೆ, ಅಂದರೂ ವರ್ಕ್ ಆಗುತ್ತಿಲ್ಲ ಎಂದಾದರೆ ಎಕ್ಸ್‌ಪರ್ಟ್‌ಗಳನ್ನು ಭೇಟಿಯಾಗಿ. ಅವರು ಇಬ್ಬರನ್ನೂ ಮಾತನಾಡಿಸುತ್ತಾರೆ. ನಿಜವಾಗಲೂ ನಿಮ್ಮ ವೈವಾಹಿಕ ಜೀವನದಲ್ಲಿ ತೊಂದರೆ ಇದೆಯೇ ಅಥವಾ ಚಿಕ್ಕ ಕಾರಣಕ್ಕೆ ಬೇರೆಯಾಗುತ್ತಿದ್ದೀರಾ ಎಂದು ಅರಿತು ಅವರು ಮಾತನಾಡಿ ಸರಿಪಡಿಸಲು ಪ್ರಯತ್ನಿಸುತ್ತಾರೆ.

ಕ್ಷಮೆ ಕೇಳಿ

ನಿಮ್ಮಿಂದ ತಪ್ಪಾಗಿದ್ದರೆ ಕ್ಷಮೆ ಕೇಳಿ. ಸಾಮಾನ್ಯವಾಗಿ ಈ ರೀತಿಯ ವಿಚ್ಛೇದನಗಳು ಸಂಗಾತಿ ಮಾಡುವ ಮೋಸ ಗೊತ್ತಾಗಿ ಉಂಟಾಗತ್ತಿರುತ್ತದೆ. ಅದರ ಬಗ್ಗೆ ನಿಮಗೆ ಪಶ್ಚಾತಾಪವಿದ್ದರೆ ಇನ್ನು ಮುಂದೆ ಆ ತಪ್ಪು ಮಾಡಲ್ಲ ಎಂದು ಕ್ಷಮೆ ಕೇಳಿ. ಅದರಂತೆ ನಡೆದುಕೊಳ್ಳಿ. ಅವರು ಕ್ಷಮಿಸಿದರೆ ನಿಮ್ಮ ವೈವಾಹಿಕ ಜೀವನ ಉಳಿಯಬಹುದು.

ಪ್ರಯತ್ನ, ಪ್ರಯತ್ನ, ಪ್ರಯತ್ನ

ಈ ವೈವಾಹಿಕ ಜೀವನ ಉಳಿಸಿಕೊಳ್ಳಲು ಪ್ರಯತ್ನಿಸಿ, ಒಂದು ಬಾರಿ ಪ್ರಯತ್ನಿಸಿದಾಗ ನೀವು ಬಯಸಿದ ಫಲ ಸಿಗದೇ ಹೋಗಬಹುದು, ಆದರೆ ಮತ್ತೆ-ಮತ್ತೆ ಪ್ರಯತ್ನ ಮಾಡಿ, ಅವರ ಭಾವನೆ ಬದಲಾಗಿ ಮತ್ತೆ ಪ್ರೀತಿ ಮೂಡಬಹುದು.

ಮನಸ್ಸು ಬಿಚ್ಚಿ ಮಾತನಾಡಿ

ನಿಮ್ಮ ಮನಸ್ಸಿನಲ್ಲಿ ಇರುವುದನ್ನು ಮನಸ್ಸು ಬಿಚ್ಚಿ ಮಾತನಾಡಿ, ಮೊದಲು

ಹೇಗಿದ್ದೀರಿ ಎಂಬುವುದರ ಬಗ್ಗೆ ಇಬ್ಬರು ಮಾತನಾಡಿ, ನಂತರ ಎಲ್ಲಿ ಹಳಿ ತಪ್ಪಿತು, ಇದಕ್ಕೆ ಕಾರಣವೇನು ಎಂಬುವುದರ ಬಗ್ಗೆ ಮುಕ್ತವಾಗಿ ಮಾತನಾಡಿ, ಇಬ್ಬರೂ ಮನಸ್ಸು ಬಿಚ್ಚಿ ಮಾತನಾಡಿದರೆ ಎಲ್ಲವೂ ಸರಿಹೋಗಬಹುದು.

ಒಂದು ವೇಳೆ ಸರಿ ಹೋಗದಿದ್ದರೆ ಪ್ರಯತ್ನ ಮಾಡಿದೆ ಎಂಬ ತೃಪ್ತಿಯಾದರೂ ಇರುತ್ತೆ.

ಕೆಲವೊಂದು ಸಂಬಂಧಗಳು ಮತ್ತೆ ಒಂದಾದರೆ ಚೆನ್ನಾಗಿರುತ್ತದೆ, ಇನ್ನು ಕೆಲವು ಸಂಬಂಧಗಳು ಬೇರೆಯಾದರನೇ ನೆಮ್ಮದಿ, ನಿಮ್ಮದು ಇದರಲ್ಲಿ ಯಾವ ಬಗೆಯ ಸಂಬಂಧ ಅಂತ ಯೋಚಿಸಿ. ವಿಚ್ಛೇದನಕ್ಕೆ ಅರ್ಜಿ ಹಾಕಿದರೂ ವೈವಾಹಿಕ ಜೀವನ ಉಳಿಸಲು ನೀವು ಪ್ರಾಮಾಣಿಕ ಪ್ರಯತ್ನ ಮಾಡಿದ್ದೇ ಆದರೆ ಖಂಡಿತ ಫಲ ಸಿಗುವುದು, ಹೊಂದಿಕೊಂಡು ಹೋಗುವುದು ವೈವಾಹಿಕ ಜೀವನದ ಮೊದಲ ಸೂತ್ರ ಎಂಬುವುದನ್ನು ಮರೆಯದಿರಿ.