ಸ್ನೇಹ ಚಿರಂತರವಾಗಿರಲಿ, ಬಾಯಿ ಸಿಹಿ ಮಾಡಿಕೊಳ್ಳಿ

ಹೇಗೆ ಅಂತೀರ? ನಿಮ್ಮ ಮನೆಯಲ್ಲಿ ಸ್ನೇಹಿತರಿಗೆಂದು ಹೊಸ ಸ್ವೀಟ್ ತಯಾರಿಸಿ, ಹಂಚಿ ಅವರನ್ನು ಖುಷಿ ಪಡಿಸಬಹುದು. ತುಂಬಾ ರುಚಿಯಾಗಿರುವ ಈ ಬಾದಾಮ್ ಕಟ್ಲಿ ಮಾಡಲೂ ಸುಲಭ ಹಂಚಲೂ ಚೆಂದ. ಬಾದಾಮಿ ಕಟ್ಲಿಯನ್ನು ಮಾಡಿ ನಿಮ್ಮ ಸ್ನೇಹಿತರ ಬಾಯಿ ಸಿಹಿ ಮಾಡಿ.

ಬೇಕಾಗುವ ಪದಾರ್ಥಗಳು:
* 500 ಗ್ರಾಂ ಬಾದಾಮಿ
* 400-450 ಗ್ರಾಂ ಸಕ್ಕರೆ
*ಮುಕ್ಕಾಲು ಕಪ್ ಕಾಯಿಸಿದ ಹಾಲು

ಬಾದಾಮಿ ಕಟ್ಲಿ ತಯಾರಿಸುವ ವಿಧಾನ: ಹಿಂದಿನ ದಿನವೇ ಅಂದರೆ 10-12 ಗಂಟೆಗಳ ಕಾಲ ಬಾದಾಮಿಯನ್ನು ನೀರಿನಲ್ಲಿ ನೆನೆಸಿಡಬೇಕು. ನಂತರ ನೀರನ್ನು ತೆಗೆದು ಬಾದಾಮಿ ಸಿಪ್ಪೆಯನ್ನು ಬಿಡಿಸಿಕೊಳ್ಳಬೇಕು. ಇದಕ್ಕೆ ಹಾಲನ್ನು ಹಾಕಿ ಪೇಸ್ಟ್ ನಂತೆ ರುಬ್ಬಿಕೊಳ್ಳಬೇಕು. ಬಾಣಲೆಯಲ್ಲಿ ಬಾದಾಮಿ ಮಿಶ್ರಣ ಮತ್ತು ಸಕ್ಕರೆಯನ್ನು ಹಾಕಿ ಚೆನ್ನಾಗಿ ತಿರುಗಿಸಬೇಕು. ಈ ಮಿಶ್ರಣ ಸ್ವಲ್ಪ ಗಟ್ಟಿಯಾಗುವವರೆಗೂ ತಿರುಗಿಸುತ್ತಲೇ ಇರಬೇಕು.

ಇದು ನಾದುವ ಹಿಟ್ಟಿನಂತೆ ಆಗುತ್ತದೆ. ಅಲ್ಲಿಯವರೆಗೂ ಸಣ್ಣ ಉರಿಯಲ್ಲಿರಿಸಬೇಕು. ನಂತರ ಈ ಮಿಶ್ರಣವನ್ನು ತೆಗೆದುಕೊಂಡು ಸಮತಟ್ಟಾದ ತಟ್ಟೆಗೆ ಹಾಕಿಕೊಂಡು ಒಂದೇ ಸಮ ಬರುವಂತೆ ತಟ್ಟಬೇಕು. ಅದು ಪೂರ ತಣ್ಣಗಾಗುವ ಮುನ್ನ ನಿಮಗೆ ಬೇಕಾದ ಆಕಾರದಲ್ಲಿ ಕತ್ತರಿಸಿಕೊಳ್ಳಬಹುದು.

ಇದನ್ನು ಗಟ್ಟಿ ಮುಚ್ಚಳವಿರುವ ಡಬ್ಬಕ್ಕೆ ಹಾಕಿಟ್ಟರೆ ಎರಡು ವಾರದ ತನಕವೂ ಇರುತ್ತದೆ. ಇದು ಮಕ್ಕಳಿಗೂ ಒಳ್ಳೆಯದು ಮತ್ತು ತಿನ್ನಲೂ ರುಚಿಕರ. ಇನ್ನೇನು ಫ್ರೆಂಡ್ ಶಿಪ್ ಡೇ ಸ್ವೀಟ್ ರೆಸಿಪಿ ಮಾಡಿನೋಡ್ತೀರ ಅಲ್ವ?