ಸಿಹಿ ಅನ್ನ ಅಥವಾ ಸಾಕರ್ ಭಾತ್

ಇದನ್ನು ಮಾಮೂಲಿ ಸೋನಾ ಮಸೂರಿ ಅಕ್ಕಿಯಿಂದಲೇ ಮಾಡುತ್ತಾರೆ, ಜೊತೆಗೊಂದಿಷ್ಟು ಬಾಸುಮತಿ ಅಕ್ಕಿ ಹಾಕಿದರೆ ಘಮ್ಮನೆ ವಾಸನೆ ಬರುತ್ತದೆ. ಇದನ್ನು ಮಾಡುವ ವಿಧಾನ ನೋಡೋಣ.

* ನಿವೇದಿತಾ ಪ್ರಭಾಕರ್, ಬೆಂಗಳೂರು

ಬೇಕಾಗುವ ಪದಾರ್ಥಗಳು

1 ಪಾವು ಅಕ್ಕಿ
1 ಮುಟ್ಟಿಗೆಯಷ್ಟು ಬಾಸುಮತಿ ಅಕ್ಕಿ
1 ಪಾವು ಸಕ್ಕರೆ
ನಾಲ್ಕು ಚಮಚ ತುಪ್ಪ
ಲವಂಗ ನಾಲ್ಕಾರು
ಏಲಕ್ಕಿ ಪುಡಿ ಚಿಟಿಕೆಯಷ್ಟು
ಗೋಡಂಬಿ, ಬೇದಾಣಿ (ಒಣದ್ರಾಕ್ಷಿ)
ಕೇಸರಿ ಬಣ್ಣ ಅರ್ಧ ಚಮಚ

ಮಾಡುವ ವಿಧಾನ

* ಸೋನಾ ಮಸೂರಿ ಅಕ್ಕಿಗೆ ಬಾಸುಮತಿ ಅಕ್ಕಿಯನ್ನು ಸೇರಿಸಿ ಉದುರುದುರಾಗುವಂತೆ ಬೇಯಿಸಿಟ್ಟುಕೊಳ್ಳಬೇಕು. ಯಾವುದೇ ಕಾರಣಕ್ಕೂ ಮುದ್ದೆಯಾಗಲು ಬಿಡಬೇಡಿ.

* ಅಕ್ಕಿಯಷ್ಟೇ ಸಕ್ಕರೆಯನ್ನು ತುಪ್ಪ ಮತ್ತು ಲವಂಗ ಹಾಕಿದ ಬೋಗುಣಿಯಲ್ಲಿ ಹಾಕಿರಿ. ಸಕ್ಕರೆ ಮುಳುಗುವಷ್ಟು ನೀರು ಹಾಕಿ ಎಳೆಪಾಕ ಬರುವವರೆಗೆ ಕುದಿಸಿರಿ. ಜಾಸ್ತಿ ಗಟ್ಟಿಯಾಗುವುದು ಬೇಡ.

* ಗೋಡಂಬಿ ಮತ್ತು ಬೇದಾಣಿಯನ್ನು ಕಾಲು ಚಮಚ ತುಪ್ಪ ಹಾಕಿ ಹುರಿದಿಟ್ಟುಕೊಂಡು ಸಕ್ಕರೆ ಪಾಕಕ್ಕೆ ಏಲಕ್ಕಿ ಪುಡಿ ಮತ್ತು ಕೇಸರಿ ಬಣ್ಣದೊಡನೆ ಹಾಕಿ ಕೈಯಾಡಿಸಿ.

* ಇಳಿಸಿಟ್ಟುಕೊಂಡ ಅನ್ನವನ್ನು ಸಕ್ಕರೆ ಪಾಕಕ್ಕೆ ಹಾಕಿ ಚೆನ್ನಾಗಿ ಕೈಯಾಡಿಸಿ. ಕೇಸರಿ ಕೇಸರಿ ಬಣ್ಣದ ಸಿಹಿ ಸಿಹಿ ಸಾಕರ್ ಭಾತ್ ಯಾವುದೇ ಶುಭ ಸಮಾರಂಭದ ಸಂಭ್ರಮವನ್ನು ಹೆಚ್ಚಿಸುತ್ತದೆ.