ದಪ್ಪಗಿರುವವರು ಸಣ್ಣಗಾದರೆ ನಡುವೆ ಅಂತೆ ಕಂತೆಗಳದ್ದೇ ಕಾರುಬಾರು!!!

ಸುಳ್ಳು ಸುದ್ದಿ : ಕೇವಲ ಕ್ರಂಚಿಂಗ್ ವ್ಯಾಯಾಮ ನಿಮ್ಮ ಹೊಟ್ಟೆ ಕರಗಿಸುತ್ತದೆ

ನಿಜಾಂಶ : ಇದರಲ್ಲಿ ಒಂದು ತಿರುವಿದೆ . ಏನೆಂದರೆ ಕ್ರಂಚಿಂಗ್ ವ್ಯಾಯಾಮ ಮಾಡುವುದರಿಂದ ಹೊಟ್ಟೆ ಕರಗಿಸಲು ಅಲ್ಪ ಪ್ರಮಾಣದಲ್ಲಿ ಮಾತ್ರ ಸಹಾಯಕವಾಗುತ್ತದೆ . ನಿಮ್ಮ ಪೂರ್ತಿ ಹೊಟ್ಟೆ ಕರಗಿ ಮೊದಲಿನಂತಾಗಬೇಕಾದರೆ , ನೀವು ನಿಮ್ಮ ಇಡೀ ದೇಹದ ತೂಕ ಕಡಿಮೆ ಮಾಡಿಕೊಳ್ಳುವ ಬಗ್ಗೆ ಗಮನ ಹರಿಸಬೇಕು . " ಜರ್ನಲ್ ಒಫ್ ಸ್ಟ್ರೆಂಥ್ ಅಂಡ್ ಕಂಡೀಷನಿಂಗ್ ರಿಸರ್ಚ್ " ನ ವರದಿಯ ಪ್ರಕಾರ ಹೊಟ್ಟೆಗೆ ಸಂಬಂದಿತ ವ್ಯಾಯಾಮಗಳಾದ ಕ್ರಂಚ್ ಮತ್ತು ಇನ್ನಿತರೇ ಎಕ್ಸರ್ಸೈಜ್ ಗಳಿಂದ ದೇಹದ ತೂಕ ಕಡಿಮೆ ಮಾಡಲು ಸಾದ್ಯವಾಗುವುದಿಲ್ಲ . ಅವರ ವರದಿಯ ಫಲಿತಾಂಶಕ್ಕಾಗಿ ಸುಮಾರು 18 ರಿಂದ 40 ವರ್ಷ ವಯಸ್ಸುಳ್ಳ 24 ಜನರನ್ನು ಸಂಶೋಧನೆಗೆ ಎಂದು ಬಳಸಿಕೊಂಡು ಕಂಡು ಹಿಡಿಯಲಾಗಿತ್ತು . ಫಿಟ್ನೆಸ್ ಅಂಡ್ ವೆಲ್ನೆಸ್ ತಜ್ಞರ ಪ್ರಕಾರ ಉತ್ತಮ ಫಲಿತಾಂಶ ನಿಮ್ಮದಾಗಬೇಕಾದರೆ ಸ್ಟ್ರೆಂಥ್ ಟ್ರೇನಿಂಗ ನ ಜೊತೆಗೆ ಹೈ ಇಂಟೆನ್ಸಿಟಿ ಕಾರ್ಡಿಯೋ ಸೆಶನ್ ಕೂಡ ನಡೆಸಬೇಕು.

ಸುಳ್ಳು ಸುದ್ದಿ : ಗ್ರೀನ್ ಟೀ ಹೊಟ್ಟೆ ಭಾಗದ ಕೊಬ್ಬನ್ನು ಕರಗಿಸುತ್ತದೆ .

ನಿಜಾಂಶ : ಗ್ರೀನ್ ಟೀ ಅಲ್ಲಿ ಅನೇಕ ರೀತಿಯ ಒಳ್ಳೆಯ ಆಂಟಿ ಆಕ್ಸಿಡಾಂಟ್ಸ್ ಸೇರಿವೆ . ಇವು ಮನುಷ್ಯನ ದೇಹದ ಮೆಟಬೋಲಿಸಂ ಉತ್ತಮ ಗೊಳಿಸುತ್ತವೆ . ಆದರೆ ಕೇವಲ ಗ್ರೀನ್ ಟೀ ಹೊಟ್ಟೆ ಕರಗುವಿಕೆಯಲ್ಲಿ ತನ್ನ ಪಾತ್ರ ವಹಿಸಲಾರದು . ಇದರ ಜೊತೆ ನಿಮ್ಮ ಇತರ ಆಹಾರ ಪದ್ದತಿಗಳ ಕಡೆ ಕೂಡ ನೀವು ಗಮನ ಹರಿಸಬೇಕು . ತಜ್ಞರ ಪ್ರಕಾರ ನೀವು ದೈಹಿಕವಾಗಿ ಪ್ರತಿನಿತ್ಯ ವ್ಯಾಯಾಮ ಮಾಡಿ ಒಳ್ಳೆಯ ಆರೋಗ್ಯಕರ ಆಹಾರ ಪದ್ದತಿಗಳನ್ನು ರೂಢಿಸಿಕೊಂಡಿದ್ದೇ ಆದರೆ ಗ್ರೀನ್ ಟೀ ಮನುಷ್ಯನ ಒಟ್ಟಾರೆ ದೇಹದ ತೂಕ ಕಡಿಮೆ ಮಾಡುವಲ್ಲಿ ಮುಂದಿದೆ .

ಸುಳ್ಳು ಸುದ್ದಿ : ವ್ಯಾಯಾಮ ಅಥವಾ ಇನ್ನಿತರೇ ದೇಹ ದಂಡಿಸುವ ಕಾರ್ಯಗಳಲ್ಲಿ ತೊಡಗಿದರೆ ಯಾವ ಆಹಾರ ಬೇಕಾದರೂ ತಿನ್ನಬಹುದು .

ನಿಜಾಂಶ : " ಬ್ರಿಟಿಷ್ ಮೆಡಿಕಲ್ ಜರ್ನಲ್ " ನ ವರದಿಯ ಪ್ರಕಾರ ಕೇವಲ ನಮ್ಮ ದೇಹದ ಕೊಬ್ಬಿನಂಶ ಕರಗಿಸಲು ದೇಹಕ್ಕೆ ವ್ಯಾಯಾಮ ಅಷ್ಟೇ ಸಾಲದು . ಒಳ್ಳೆಯ ಆಹಾರ ಪದ್ದತಿಯನ್ನು ಕೂಡ ರೂಡಿಸಿಕೊಳ್ಳಬೇಕು . ಆರೋಗ್ಯಕರವಲ್ಲದ ಆಹಾರ ನಮ್ಮ ದೇಹದ ತೂಕ ಇನ್ನೂ ಹೆಚ್ಚು ಮಾಡುತ್ತದೆ . ಮತ್ತು ಆ ಸಮಯದಲ್ಲಿ ವ್ಯಾಯಾಮದಿಂದ ಏನೂ ಪ್ರಯೋಜನವಾಗುವುದಿಲ್ಲ . ಆದ್ದರಿಂದ ಕೇವಲ ಗ್ರೀನ್ ಟೀ ಕುಡಿದು ಕ್ರಂಚಿಂಗ್ ವ್ಯಾಯಾಮ ಮಾಡಿದರೆ ಸಾಕು ದೇಹದ ತೂಕ ತಾನಾಗಿಯೇ ಇಳಿಯುತ್ತದೆ ಇನ್ನು ಮೇಲೆ ನಾವು ಕಣ್ಣಿಗೆ ಬೇಕಾದ ಆಹಾರ ತಿನ್ನಲು ಸ್ವತಂತ್ರರು ಎಂದು ನೀವು ಭಾವಿಸುವುದಾದರೆ ಖಂಡಿತ ಅದು ತಪ್ಪು ಕಲ್ಪನೆ .

ಸುಳ್ಳು ಸುದ್ದಿ : ಕಡಿಮೆ ತಿನ್ನುವುದರಿಂದ ಹೊಟ್ಟೆಯಲ್ಲಿನ ಕೊಬ್ಬು ಕರಗುತ್ತದೆ

ನಿಜಾಂಶ : ಇಲ್ಲಿ ನಾವು ಅತ್ಯಂತ ಸೂಕ್ಷ್ಮವಾಗಿ ಗಮನಿಸಬೇಕಾದ ಅಂಶ ಎಂದರೆ ಒಬ್ಬೊಬ್ಬರ ದೇಹ ಸ್ಥಿತಿ ಒಂದೊಂದು ಥರ ಇರುತ್ತದೆ . ಯಾರು ಈ ತೂಕ ಕಡಿಮೆ ಮಾಡಿಕೊಳ್ಳಬೇಕೆಂದು ಪಣ ತೊಟ್ಟು ಎಲ್ಲ ಆರೋಗ್ಯಕರ ಪದ್ದತಿಗಳನ್ನು ಅವರ ಜೇವನದಲ್ಲಿ ಅಳವಡಿಸಿಕೊಂಡಿರುತ್ತಾರೋ , ಅಂತಹವರು ಅವರ ಆಹಾರ ಪದ್ದತಿಗಳ ಮೇಲೆ ಕೂಡ ತೀವ್ರ ನಿಗಾ ವಹಿಸಬೇಕಾಗುತ್ತದೆ ನಿಜ . ಹಾಗೆಂದು ಊಟ ಮಾಡುವುದನ್ನೇ ಬಿಟ್ಟರೆ ? ಇದು ಖಂಡಿತ ತಪ್ಪು . ಹೀಗೆ ಮಾಡಿದಾಕ್ಷಣ ಅದರ ನೇರ ಪರಿಣಾಮ ಮೆಟಬೋಲಿಸಂ ಮೇಲೆಯೇ ಆಗುತ್ತದೆ . ದೇಹದ ಮೆಟಬೋಲಿಸಂ ಪ್ರಕ್ರಿಯೆ ಕಡಿಮೆ ಆದರೆ ಖಂಡಿತ ಅದು ತೂಕ ಇಳಿಸುವ ಪ್ರಕ್ರಿಯೆ ಮೇಲೆ ಅಡ್ಡ ಪರಿಣಾಮ ಬೀರುತ್ತದೆ . ಆದರಿಂದ ಒಬ್ಬ ನುರಿತ ಆರೋಗ್ಯ ತಜ್ಞರನ್ನು ಸಂಪರ್ಕಿಸಿ ವೆಯಿಟ್ ಲಾಸ್ ಪ್ಲಾನ್ ನಲ್ಲಿರುವ ನಿಮಗೆ ಒಂದು ದಿನಕ್ಕೆ ಎಷ್ಟು ಪ್ರೋಟೀನ್ , ಕಾರ್ಬೋಹೈಡ್ರೇಟ್ , ವಿಟಮಿನ್ ಗಳು ಬೇಕು ಎನ್ನುವುದನ್ನು ಮೊದಲು ತಿಳಿದುಕೊಂಡು ನಿಯಮಿತ ಆಹಾರವನ್ನು ತೆಗೆದುಕೊಳ್ಳಬಹುದು.

ಸುಳ್ಳು ಸುದ್ದಿ : ಕಡಿಮೆ ಆಹಾರ ದಿನಕ್ಕೆ ಬಹಳ ಸಲ ಮಾಡುವುದರಿಂದ ಕೊಬ್ಬಿನಂಶ ಕಡಿಮೆ ಆಗುತ್ತದೆ .

ನಿಜಾಂಶ : ಇದು ಖಂಡಿತ ಯಾವುದೇ ರೀತಿಯಲ್ಲೂ ಕೂಡ ಸಮಂಜಸವಲ್ಲ . ಏಕೆಂದರೆ ನಾವು ಕಡಿಮೆ ಆಹಾರವನ್ನು ದಿನಕ್ಕೆ ಆಗಾಗ ಬಹಳ ಸಲ ಮಾಡುವುದರಿಂದ ನಮ್ಮ ಜೀರ್ಣ ಕ್ರಿಯೆ ಕುಂಠಿತಗೊಳ್ಳುತ್ತದೆ . ಇದರಿಂದ ನಾವು ತಿನ್ನುವ ಆಹಾರದಲ್ಲಿ ಸೇರಿರುವ ಕೊಬ್ಬಿನಂಶವನ್ನು ಕರಗಿಸಿ ಅದನ್ನು ನಮ್ಮ ದೇಹದ ಕಾರ್ಯ ನಿರ್ವಹಣೆಗೆ ಬೇಕಾದ ಶಕ್ತಿಯ ರೂಪದಲ್ಲಿ ಮಾರ್ಪಾಡು ಮಾಡುವ ಪ್ರಕ್ರಿಯೆ ಸಾಮಾನ್ಯ ರೀತಿಯಲ್ಲಿ ಇರುವುದಿಲ್ಲ . " ಜರ್ನಲ್ ಒಬೆಸಿಟಿ " ಪ್ರಕಟಿಸಿದ ವರದಿಯಲ್ಲಿ ಈ ಬಗ್ಗೆ ಉಲ್ಲೇಖವಿದೆ . ಅವರು ಸಂಶೋದನೆಯಲ್ಲಿ ಭಾಗವಹಿಸಿದ ಪ್ರತಿಯೊಬ್ಬರಿಗೂ ತಾವು ತೆಗೆದುಕೊಳ್ಳುವ ಊಟದ ಪ್ರಮಾಣ ಕಡಿಮೆ ಮಾಡಿ ದಿನಕ್ಕೆ 3 ರಿಂದ 6 ಬಾರಿ ಊಟ ಮಾಡಲು ಹೇಳಿದರು . ಆದರೆ ಅಲ್ಲಿ ತಿಳಿದ ಅಂಶವೆಂದರೆ ಅವರಿಗೆಲ್ಲ ಬರುಬರುತ್ತ ಹೊಟ್ಟೆ ಹಸಿವು ಜಾಸ್ತಿಯಾಯಿತೇ ವಿನಃ ಹೊಟ್ಟೆಯ ಕೊಬ್ಬು ಕರಗಿಸುವಲ್ಲಿ ಯಾವುದೇ ಯಶಸ್ವಿ ಕಾಣಲಿಲ್ಲ .

ಸುಳ್ಳು ಸುದ್ದಿ : 8 ಗಂಟೆ ನಿದ್ದೆ ಮಾಡಿದರೆ ಹೊಟ್ಟೆ ಕೊಬ್ಬು ಕರಗುತ್ತದಂತೆ !!

ನಿಜಾಂಶ : ಆರೋಗ್ಯಕರ ಆಹಾರದ ಪದ್ದತಿಯ ಜೊತೆಗೆ ಮನುಷ್ಯನಿಗೆ ನಿದ್ದೆ ಕೂಡ ಅವಶ್ಯಕ . ಹಾಗೆಂದು ಮಿತಿ ಮೀರಿ ನಿದ್ದೆ ಮಾಡಿದರೂ ಅಪಾಯವೇ . ನಿದ್ದೆ ಕಡಿಮೆ ಮಾಡಿದರೂ ಅಪಾಯವೇ . " ಜರ್ನಲ್ ಒಫ್ ಕ್ಲಿನಿಕಲ್ ಸ್ಲೀಪ್ ಮೆಡಿಸಿನ್ " ನ ವರದಿಯ ಪ್ರಕಾರ ಗುಣಮಟ್ಟವಲ್ಲದ ಮತ್ತು ಕಡಿಮೆ ನಿದ್ದೆ ಮನುಷ್ಯನ ದೇಹದ ಕೊಬ್ಬನ್ನು ಜಾಸ್ತಿ ಮಾಡುತ್ತದೆ . ಏಕೆಂದರೆ ಕಡಿಮೆ ನಿದ್ದೆ ಮಾಡಿದರೆ ಅದು ನಾವು ತಿನ್ನುವ ಆಹಾರದ ಮೇಲೂ ಪರಿಣಾಮ ಬೀರಿ ಆರೋಗ್ಯಕರವಲ್ಲದ ಆಹಾರ ತಿನ್ನುವುದಕ್ಕೆ ದಾರಿ ಮಾಡಿಕೊಡುತ್ತದಂತೆ . ಆದ್ದರಿಂದ ಒಳ್ಳೆಯ ಮತ್ತು ಸೂಚಿಸಿದ ಗಂಟೆಗಳಷ್ಟೇ ನೆಮ್ಮದಿಯಿಂದ ಮಲಗಿ ನಿದ್ದೆ ಮಾಡಿ ನಿಮ್ಮ ಅರೋಗ್ಯ ಕಾಪಾಡಿಕೊಳ್ಳಿ .

ಸುಳ್ಳು ಸುದ್ದಿ : ಕಾಫಿಯಲ್ಲಿನ ಕೆಫೀನ್ ಅಂಶ ಕೊಬ್ಬನ್ನು ಕರಗಿಸುತ್ತದೆ .

ನಿಜಾಂಶ : ಬೆಳಗ್ಗೆ ಎದ್ದು ಬೆಡ್ ಕಾಫಿ ಕುಡಿಯುವ ಎಲ್ಲರೂ ಗಮನಿಸಬೇಕಾದ ಅಂಶ ಇದು . ಬೆಳಗಿನ ಕಾಫಿ ನಮ್ಮನ್ನು ಇಡೀ ದಿನ ಉತ್ಸಾಹದಿಂದ ಇರಲು ಮತ್ತು ನಮ್ಮ ದೇಹದ ಚೈತನ್ಯವನ್ನು ವೃದ್ಧಿಗೊಳಿಸುತ್ತದೆ . ಆದರೆ ಅದಕ್ಕೂ ನಮ್ಮ ದೇಹದ ಕೊಬ್ಬಿನಂಶ ಕರಗುವುದಕ್ಕೂ ಯಾವುದೇ ಸಂಬಂಧ ಇಲ್ಲ . ದಿನಕ್ಕೆ ಎರಡು ಕಪ್ ಕಾಫಿ ನಮಗೆ ಮತ್ತು ನಮ್ಮ ದೇಹದ ಆರೋಗ್ಯಕ್ಕೆ ಒಳ್ಳೆಯದೇ ನಿಜ . ಹಾಗೆಂದು ಅದು ಅತಿಯಾದರೆ ಖಂಡಿತ ಅದೂ ಕೂಡ ನಮ್ಮ ದೇಹದ ' ಕಾರ್ಟಿಸೋಲ್ ' ಅಂಶವನ್ನು ಹೆಚ್ಚಿಸಿ ಕೊಬ್ಬಿನಂಶವನ್ನು ಜೊತೆಗೆ ದೇಹದ ತೂಕವನ್ನೂ ಕೂಡ ಜಾಸ್ತಿ ಮಾಡುತ್ತದೆ ಎಂದರೆ ನೀವು ಅಚ್ಚರಿಗೊಳ್ಳಲೇಬೇಕು . " ಜರ್ನಲ್ ಸೈಕೊಸೊಮ್ಯಾಟಿಕ್ ಮೆಡಿಸಿನ್ " ನ ವರದಿಯ ಪ್ರಕಾರ ಯಾರು ಮಾನಸಿಕ ಖಿನ್ನತೆಯಿಂದ ಬಳಲುತ್ತಿರುತ್ತಾರೋ ಅವರಲ್ಲಿ ಕಾರ್ಟಿಸೋಲ್ ಅಂಶ ಬಹಳವೇ ಹೆಚ್ಚಿಗೆ ಇದ್ದು , ಅವರ ಕೊಬ್ಬಿನ ಅಂಶದಲ್ಲೂ ಕೂಡ ಗಮನಾರ್ಹ ಏರಿಕೆ ಕಂಡು ಬರುತ್ತದೆ .