ಸೆಕ್ಸ್ ಬಗ್ಗೆ ಕಟ್ಟುಕಥೆಗಳು: ಈ ನಂಬಿಕೆಗಳನ್ನು ಎಂದೂ ನಂಬದಿರಿ!

1.ಶಿಶ್ನದ ಗಾತ್ರ ದೊಡ್ಡದಿದ್ದಷ್ಟೂ ಸುಖವೂ ಹೆಚ್ಚು

ಇಂದಿಗೂ ಪ್ರಚಲಿತದಲ್ಲಿರುವ ಅತ್ಯಂದ ದೊಡ್ಡ ತಪ್ಪು ಆಗಿದ್ದು ವಿಶ್ವದ ಎಲ್ಲೆಡೆ ಈ ಮಿಥ್ಯೆ ಜನಜನಿತವಾಗಿದೆ. ಶಿಶ್ನದ ಗಾತ್ರ ಎಷ್ಟು ದೊಡ್ಡದೋ ಅಷ್ಟೂ ಮಟ್ಟಿಗೆ ಪುರುಷ ಮಹಿಳೆಯನ್ನು ತೃಪ್ತಿಪಡಿಸುತ್ತಾನೆ ಎಂಬ ನಂಬುಗೆ ಎಷ್ಟೋ ಕಾಲದಿಂದ ಪ್ರಚಲಿತವಾಗಿದೆ. ಆದರೆ ಈ ಬಗ್ಗೆ ನಡೆಸಿದ ಸಂಶೋಧನೆಗಳು, ಅಂಕಿ ಅಂಶಗಳು, ಸಮೀಕ್ಷೆಗಳು ಈ ಮಾಹಿತಿ ತಪ್ಪು ಎಂದು ದೃಢೀಕರಿಸಿವೆ. ವೈದ್ಯಕೀಯ ಮಾಹಿತಿಯಂತೆ ಮಹಿಳೆಯ ಯೋನಿಯ ಕೇವಲ ಮೇಲ್ಭಾಗದ ಎರಡಿಂಚಿನಷ್ಟು ಮಾತ್ರವೇ ಅತಿ ಹೆಚ್ಚಿನ ಸಂವೇದನಾಶೀಲವಾಗಿರುತ್ತದೆ. ಆದ್ದರಿಂದ ಇಷ್ಟು ಉದ್ದವಿರುವ ಶಿಶ್ನ ಮಹಿಳೆಯನ್ನು ತೃಪ್ತಿಪಡಿಸಲು ಸಾಕು. ಹಾಗಾಗಿ ಇದಕ್ಕೂ ಹೆಚ್ಚಿನ ಗಾತ್ರದ ಶಿಶ್ನ ಮಹಿಳೆಯರಿಗೆ ನೋವನ್ನುಂಟುಮಾಡಬಹುದೇ ವಿನಃ ತೃಪ್ತಿಯನ್ನು ಹೆಚ್ಚಿಸಲು ಸಾಧ್ಯವಿಲ್ಲ. ಅಲ್ಲದೇ ಚಿಕ್ಕದಾಗಿದ್ದರೇ ತಮಗೆ ಇಷ್ಟ, ಇದರಿಂದ ಕಡಿಮೆ ನೋವಾಗುತ್ತದೆ ಎಂದು ಹೆಚ್ಚಿನ ಮಹಿಳೆಯರ ಅಭಿಪ್ರಾಯವಾಗಿದೆ.

2. ಕಡೆಘಳಿಗೆಯಲ್ಲಿ ಹಿಮ್ಮರಳುವ ವಿಧಾನ ಸುರಕ್ಷಿತ

ಹಲವು ದಂಪತಿಗಳು ಗರ್ಭನಿರೋಧಕ ವ್ಯವಸ್ಥೆಗಳನ್ನು ಅನುಸರಿಸುವ ಬದಲು ಸ್ಖಲನಕ್ಕೂ ಮುನ್ನ ಹಿಮ್ಮೆಟ್ಟುವ ವಿಧಾನವನ್ನು ಅನುಸರಿಸುತ್ತಾರೆ. ಇದಕ್ಕೆ "pull-out" method ಎಂದು ಕರೆಯುತ್ತಾರೆ. ಆದರೆ ಈ ವಿಧಾನ ಸಂಪೂರ್ಣವಾಗಿ ಸುರಕ್ಷತೆಯನ್ನು ಒದಗಿಸುವುದಿಲ್ಲ, ಅಲ್ಲದೇ ಲೈಂಗಿಕ ರೋಗಗಳನ್ನು ಹರಡುವುದರಿಂದಲೂ ತಡೆಯಲು ಸಾಧ್ಯವಿಲ್ಲ. ವಾಸ್ತವದಲ್ಲಿ ಸ್ಖಲನವನ್ನು ಮೆದುಳುಬಳ್ಳಿ ನಿಯಂತ್ರಿಸುತ್ತದೆಯೇ ವಿನಃ ಮೆದುಳಲ್ಲ, ಹಾಗಾಗಿ ಪುರುಷನ ಇಚ್ಛೆಯಂತೆ ಸ್ಖಲನಗೊಳ್ಳುವ ಅಥವಾ ಸ್ಖಲನ ನಿಲ್ಲಿಸಲು ಸಾಧ್ಯವಿಲ್ಲ. ಹೊರತೆಗೆಯುವ ಮುನ್ನವೇ ಸ್ಖಲನಗೊಳ್ಳುವ ಸಾಧ್ಯತೆ ಹೆಚ್ಚಾಗಿರುತ್ತದೆ. ಅಲ್ಲದೇ ಸ್ಖಲನಕ್ಕೂ ಮುನ್ನ ತೆಳುವಾಗಿ ಸ್ರವಿಸುವ ದ್ರವವೂ ( pre-seminal fluid) ವೀರ್ಯಾಣುಗಳಿಂದ ಸಮೃದ್ದವಾಗಿದ್ದು ಸ್ಖಲನಕ್ಕೂ ಮುನ್ನ ಹೊರತೆಗೆದರೂ ಈ ದ್ರವವೇ ಗರ್ಭಧಾರಣೆಗೆ ಸಾಕಾಗುತ್ತದೆ. ಅಲ್ಲದೇ ಈ ದ್ರವದಲ್ಲಿಯೂ ಲೈಂಗಿಕವಾಗಿ ಹರಡುವ ರೋಗಾಣುಗಳಿದ್ದರೆ ರೋಗ ಹರಡುವುದರಿಂದ ತಡೆಯಲಾಗದು.

3. ಕಾಂಡೋಂಗಳನ್ನು ಮರುಬಳಸಬಹುದು

ಇದೊಂದು ವಿಚಿತ್ರವಾದ ನಂಬಿಕೆಯಾಗಿದೆ ಹಾಗೂ ಇಂದಿಗೂ ಕೆಲವು ವ್ಯಕ್ತಿಗಳು ಈ ಮಲಿನ ಸತ್ಯವನ್ನು ನಂಬುತ್ತಾರೆ. ವಿಶೇಷವಾಗಿ ಬಡತನದ ಬೇಗೆಯಲ್ಲಿ ಬೇಯುತ್ತಿರುವ ಬಡವ್ಯಕ್ತಿಗಳು ಹಾಗೂ ಇವುಗಳನ್ನು ಸುಲಭವಾಗಿ ಕೊಳ್ಳಲು ಕಷ್ಟವಾಗಿರುವ ಯುವಜನತೆ ಈ ವಿಧಾನವನ್ನು ಅನುಸರಿಸುತ್ತಾರೆ. ಒಮ್ಮೆ ಬಳಸಿದ ಕಾಂಡೋಂ ಅನ್ನು ಮತ್ತೊಮ್ಮೆ ತೊಳೆದು ಬಳಸಲು ತೊಡಗುತ್ತಾರೆ. ಇದು ಅತ್ಯಂತ ಅಸುರಕ್ಷಿತ ವಿಧಾನವಾಗಿದೆ ಹಾಗೂ ಗುಪ್ತಾಂಗಗಳನ್ನು ಸೋಂಕಿನಿಂದ ರಕ್ಷಿಸಲು ಅಸಮರ್ಥವಾಗಿದೆ. ಪರಿಣಾಮವಾಗಿ ಈ ಕಾಂಡೋಂ ಬಳಸಿದ ಇಬ್ಬರು ವ್ಯಕ್ತಿಗಳಿಗೂ ಸೋಂಕು ಹರಡುವ ಸಾಧ್ಯತೆ ದಟ್ಟವಾಗಿದೆ. ಇವು ಸುಲಭವಾಗಿ ಹರಿಯುವ ಸಾಧ್ಯತೆಯಿಂದ ಅನಪೇಕ್ಷಿತ ಗರ್ಭಧಾರಣೆ, ಲೈಂಗಿಕ ರೋಗಗಳು ಆವರಿಸಿಕೊಳ್ಳುವ ಸಾಧ್ಯತೆಗಳೂ ಹೆಚ್ಚುತ್ತವೆ.

4. ಮೇಹರೋಗವಿಲ್ಲ ಎಂದರೆ ಉತ್ತಮ ಆರೋಗ್ಯ ಎಂದೇ ಅರ್ಥ

ಒಂದು ವೇಳೆ ವ್ಯಕ್ತಿಯೊಬ್ಬರು ಲೈಂಗಿಕವಾಗಿ ಚಟುವಟಿಕೆಯಿಂದಿದ್ದರೆ, ವಿಶೇಷವಾಗಿ ಒಬ್ಬರಿಗಿಂತ ಹೆಚ್ಚು ಸಂಗಾತಿಗಳನ್ನು ಹೊಂದಿದ್ದರೆ ಇವರಿಗೆ ಲೈಂಗಿಕ ರೋಗಗಳು ಹರಡುವ ಸಾಧ್ಯತೆಗಳು ಅತಿ ಹೆಚ್ಚು. ಇವರಿಗೆ ಈ ರೋಗ ಆವರಿಸಿರುವ ಸೂಚನೆಗಳು ತಕ್ಷಣಕ್ಕೆ ಗೋಚರವಾಗದೇ ಇದ್ದರೂ ಇವರ ದೇಹದಲ್ಲಿ ಈಗಾಗಲೇ ಪ್ರವೇಶಿಸಿರುವ ಲೈಂಗಿಕ ರೋಗಾಣುಗಳು ಪೂರ್ಣಪ್ರಮಾಣದಲ್ಲಿ ಬೆಳೆದು ರೋಗ ಹರಡಲು ಕೆಲವಾರು ತಿಂಗಳುಗಳೇ ಬೇಕಾಗಬಹುದು. ಇದರರ್ಥ ಈ ವ್ಯಕ್ತಿಗಳು ಎಲ್ಲಾ ರೋಗಗಳಿಂದ ಮುಕ್ತರು ಹಾಗೂ ಉತ್ತಮ ಆರೋಗ್ಯ ಹೊಂದಿರುತ್ತಾರೆ ಎಂದರ್ಥವಲ್ಲ. ಬದಲಿಗೆ ಇವರು ಆರೋಗ್ಯವಾಗಿದ್ದರೂ ಇವರಿಂದ ಇವರೊಂದಿಗೆ ಸಂಸರ್ಗ ನಡೆಸುವವರಿಗೆ ಶೀಘ್ರವಾಗಿ ರೋಗ ಹರಡಬಹುದು.

5. ಮಾಸಿಕ ದಿನಗಳಲ್ಲಿ ಮಹಿಳೆಯರು ಗರ್ಭ ಧರಿಸಲಾರರು

ಇನ್ನೊಂದು ಜನಪ್ರಿಯ ಮಿಥ್ಯೆ ಎಂದರೆ ಮಾಸಿಕ ದಿನಗಳಲ್ಲಿ ಕೂಡುವುದರಿಂದ ಮಹಿಳೆಯರು ಗರ್ಭ ಧರಿಸುವುದಿಲ್ಲ ಎಂಬುದಾಗಿದೆ. ವಾಸ್ತವವಾಗಿ ಇದೊಂದು ದೊಡ್ಡ ತಪ್ಪು ನಂಬಿಕೆಯಾಗಿದೆ. ಈ ದಿನಗಳಲ್ಲಿ ಮಹಿಳೆಯ ದೇಹದಲ್ಲಿ ಹಲವಾರು ಬದಲಾವಣೆಗಳು ಉಂಟಾಗುತ್ತವೆ ಹಾಗೂ ಈ ದಿನಗಳಲ್ಲಿ ಮಹಿಳೆಯರಿಗೆ ಸಂಪೂರ್ಣವಾಗಿ ರಜೆ ನೀಡಬೇಕಾಗುತ್ತದೆ. ಆದರೆ ಮಹಿಳೆಯರು ಯಾವುದೇ ಸಮಯದ ಮಿಲನದಲ್ಲಿಯೂ ಗರ್ಭಧಾರಣೆಗೆ ಒಳಾಗಾಗುವ ಸಾಮರ್ಥ್ಯ ಪಡೆದಿರುತ್ತಾರೆ. ಏಕೆಂದರೆ ಮಹಿಳೆಯ ದೇಹ ಪ್ರವೇಶಿಸಿರುವ ವೀರ್ಯಾಣುಗಳು ಹೊರಬರದೇ ಸುಮಾರು ಐದು ದಿನಗಳ ಕಾಲ ಜೀವಂತವಾಗಿರುವ ಸಾಮರ್ಥ್ಯ ಹೊಂದಿರುತ್ತವೆ. ಹಾಗಾಗಿ ರಜಾದಿನಗಳ ಮಿಲನವೂ ಗರ್ಭಧಾರಣೆಗೆ ಕಾರಣವಾಗಬಹುದು.

6. ಲೈಂಗಿಕ ರೋಗ ಬರಲು ಪ್ರವೇಶವೇ ಆಗಬೇಕು

ಕೇವಲ ಶಿಶ್ನದ ಪ್ರವೇಶದಿಂದ ಮಾತ್ರವೇ ಲೈಂಗಿಕ ರೋಗವನ್ನು ಹರಡುವುದು ಸಾಧ್ಯ ಎಂದು ಹೆಚ್ಚಿನ ಜನರು ನಂಬಿರುವ ಮಿಥ್ಯೆಯಾಗಿದೆ. ಅಂದರೆ ಅಸುರಕ್ಷಿತ ಮಿಲನದ ಬಳಿಕ ಮಹಿಳೆಯ ಗರ್ಭನಾಳದಲ್ಲಿ ವೀರ್ಯಾಣುಗಳು ಸ್ಖಲನಗೊಂಡರೆ ಮಾತ್ರವೇ ಲೈಂಗಿಕ ರೋಗ ಹರಡಬಹುದು ಎಂದಾಗಿದೆ. ಆದರೆ ಇದು ತಪ್ಪು ನಂಬಿಕೆಯಾಗಿದ್ದು ಲೈಂಗಿಕ ರೋಗಗಳು ಮುಖಮೈಥುನ, ತುಟಿಚುಂಬನ, ರೋಗಾಣುಯುಕ್ತ ರಕ್ತದಾನ, ರೋಗಾಣುಗಳಿಂದ ಕೂಡಿದ್ದ ಚುಚ್ಚುಮದ್ದಿನ ಸೂಜಿಯ ಬಳಕೆ ಮೊದಲಾದವುಗಳಿಂದಲೂ ಹರಡಬಹುದು. ಆದ್ದರಿಂದ ಲೈಂಗಿಕ ಸಂಬಂಧದಲ್ಲಿ ಒಳಗೊಳ್ಳುವ ಮುನ್ನ ಇಬ್ಬರೂ ಪರೀಕ್ಷೆಗೊಳಪಟ್ಟು ಖಚಿತಗೊಳಿಸುವುದು ಅಗತ್ಯವಾಗಿದೆ.