ಒಂದು ವೇಳೆ ಜೇಡ ಕಚ್ಚಿದರೆ-ತಕ್ಷಣ ಹೀಗೆ ಮಾಡಿದ್ರೆ ಕೂಡಲೇ ಗುಣವಾಗುತ್ತದೆ

ಜೇಡದ ಕಡಿತವು ಹೇಗೆ ಕಾಣಿಸುವುದು?

ಸಾಮಾನ್ಯವಾಗಿ ಕೀಟಗಳು ಕಡಿದಾಗ ಹೇಗೆ ಗಾಯವಾಗುತ್ತದೆಯಾ ಅದೇ ರೀತಿಯ ಗಾಯವಾಗುವುದು. ಸ್ವಲ್ಪ ಊದಿಕೊಂಡು ಗುಳ್ಳೆ ಬಂದಿರಬಹುದು. ಇದು ತುರಿಕೆ ಉಂಟುಮಾಡಿ, ಕೆಂಪಾಗಿರಬಹುದು. ಇದು ಹೆಚ್ಚು ಸಮಸ್ಯೆಯುಂಟು ಮಾಡಲ್ಲ. ಜೇನುನೊಣದ ಕಡಿತದಷ್ಟೇ ಇರುವುದು. ಗಂಟೆಯಲ್ಲಿ ಇದು ಮಾಯವಾಗುವುದು. ಕೆಂಪು ಬಣ್ಣವು ಗಾಯದಿಂದ ಸುತ್ತಲಿನ ಭಾಗಕ್ಕೆ ಪಸರಿಸಬಹುದು. ಕಡಿತದ ಭಾಗದಲ್ಲಿ ಒಂದು ಗಾಯವಾಗಿರಬಹುದು. ಕಡಿತದ ಭಾಗದಲ್ಲಿ ಜುಮ್ಮೆನಿಸುವ ಭಾವನೆ ಮೂಡಿಸಬಹುದು.

ಜೇಡ ಕಡಿತದ ವೇಳೆ ಪಾಲಿಸಬೇಕಾದ ಕ್ರಮಗಳು

*ನೀರು ಮತ್ತು ಸೋಪ್ ಹಾಕಿ ಕಡಿತದ ಜಾಗ ಶುಚಿಗೊಳಿಸಿ.

*ಈ ಭಾಗಕ್ಕೆ ಆ್ಯಂಟಿಬಯೋಟಿಕ್ ಕ್ರೀಮ್ ಹಚ್ಚಿ.

*ತಂಪಾದ, ಒದ್ದೆ ಬಟ್ಟೆಯನ್ನು ಕಡಿತದ ಜಾಗಕ್ಕೆ ಕಟ್ಟಿಕೊಳ್ಳಿ.

*ಕಾಲು ಅಥವಾ ಕೈಯ ಭಾಗಕ್ಕೆ ಕಚ್ಚಿದ್ದರೆ ಅದನ್ನು ಮೇಲೆತ್ತಿಕೊಳ್ಳಿ.

*ಆಂಟಿಹಿಸ್ಟಮೈನ್ ನೋವು ಶಮನಗೊಳಿಸುವುದು.

*ಅಸೆಟಾಮಿನೋಫೆನ್ ಅಥವಾ ಐಬುಪ್ರೊಫೇನ್ ನ್ನು ನೋವು ನಿವಾರಿಸಲು ಸೇವಿಸಬಹುದು. ಜೇಡ ಕಚ್ಚಿದರೆ ಮಾಡಬಹುದಾದ ಮನೆಮದ್ದುಗಳು

ಐಸ್(ಮಂಜುಗಡ್ಡೆ)

ಕಡಿತದ ಭಾಗಕ್ಕೆ ಬಿಸಿ ನೀರು ಮತ್ತು ಸೋಪ್ ಹಾಕಿ ತೊಳೆಯಿರಿ. ಇದರ ಬಳಿಕ ಆ ಜಾಗಕ್ಕೆ ಐಸ್ ಇಡಿ. ಇದು ಊತ ತಡೆಯುವುದು. 10 ನಿಮಿಷ ಹಾಗೆ ಬಿಡಿ. ದಿನದಲ್ಲಿ ಹಲವಾರು ಸಲ ಐಸ್ ಇಡಿ. ಜೇಡದ ಕಡಿತಕ್ಕೆ ಇದು ತುಂಬಾ ನೈಸರ್ಗಿಕ ಮತ್ತು ಸರಳ ಚಿಕಿತ್ಸೆ.

ಇದ್ದಿಲು

ವಿಷಕಾರಿ ಅಂಶವನ್ನು ತೆಗೆಯುವಂತಹ ಗುಣವು ಇದರಲ್ಲಿದೆ. ಇದ್ದಿಲಿನ ಪೇಸ್ಟ್ ನ್ನ ಕಚ್ಚಿದ ಜಾಗಕ್ಕೆ ಹಚ್ಚಿಕೊಳ್ಳಿ. ಇದು ವಿಷವಿದ್ದರೆ ಅದನ್ನು ಹೊರಹಾಕುವುದು. ಕಡಿತದ ಜಾಗದಲ್ಲಿ ಒಂದು ಅಥವಾ ಎರಡು ಗಂಟೆಗಳ ಕಾಲ ಪೇಸ್ಟ್ ಇರಲಿ. ಗಾಯವು ಒಣಗುವ ತನಕ ನೀವು ದಿನದಲ್ಲಿ ಎರಡು ಸಲ ಹೀಗೆ ಮಾಡಿ.

ಆಲೂಗಡ್ಡೆ

ಆಲೂಗಡ್ಡೆಯಲ್ಲಿ ಉರಿಯೂತ ಶಮನಗೊಳಿಸುವಂತಹ ಗುಣವು ಇದೆ. ಬಟಾಟೆಯನ್ನು ತುರಿದುಕೊಳ್ಳಿ ಮತ್ತು ಇದನ್ನು ತೆಳುವಾದ ಬಟ್ಟೆಯಲ್ಲಿ ಹಾಕಿ ಕಟ್ಟಿ. ಇದನ್ನು ಕಚ್ಚಿದ ಜಾಗಕ್ಕೆ ಇಟ್ಟುಬಿಡಿ. ಬಟಾಟೆ ಒಣಗುವ ತನಕ ಹೀಗೆ ಬಿಡಿ.

ಲ್ಯಾವೆಂಡರ್ ತೈಲ

ಜೇಡ ಕಡಿತದಿಂದ ಆಗಿರುವಂತಹ ಉರಿಯೂತವನ್ನು ಈ ಎಣ್ಣೆಯು ಶಮನಗೊಳಿಸುವುದು. ಕೆಲವು ಹನಿ ಲ್ಯಾವೆಂಡರ್ ತೈಲವನ್ನು ತೆಂಗಿನೆಣ್ಣೆ ಜತೆಗೆ ಮಿಶ್ರಣ ಮಾಡಿಕೊಂಡು ಕಚ್ಚಿದ ಜಾಗಕ್ಕೆ ಹಚ್ಚಿಕೊಳ್ಳಿ.

ಅಡುಗೆ ಸೋಡಾದ ಪೇಸ್ಟ್

ಅಡುಗೆ ಸೋಡಾವನ್ನು ಬಳಸಿಕೊಂಡು ಜೇಡ ಕಡಿತವನ್ನು ಶಮನ ಮಾಡುವುದು ತುಂಬಾ ಸರಳ ಹಾಗೂ ಅಗ್ಗದ ಚಿಕಿತ್ಸೆ. ಅಡುಗೆ ಸೋಡಾ ಮತ್ತು ನೀರನ್ನು ಬಳಸಿಕೊಂಡು ಪೇಸ್ಟ್ ಮಾಡಿ. ಇದನ್ನು ಕಚ್ಚಿದ ಜಾಗಕ್ಕೆ ಹಲವಾರು ಸಲ ಹಚ್ಚಿಕೊಳ್ಳಿ.

ಎತ್ತರದಲ್ಲಿಡಿ

ನಿಮ್ಮ ಕೈ ಅಥವಾ ಕಾಲಿಗೆ ಜೇಡವು ಕಚ್ಚಿದರೆ ಆಗ ಅವುಗಳನ್ನು ಎತ್ತರದ ಭಾಗದಲ್ಲಿ ಇಡಿ. ಇದರಿಂದ ಊತ ಕಡಿಮೆಯಾಗುವುದು.

ಅಲೋವೆರಾ

ಇದು ಕಡಿತದಿಂದ ಆಗುವ ಉರಿಯೂತ ಮತ್ತು ತುರಿಕೆ ಕಡಿಮೆ ಮಾಡುವುದು. ಅಲೋವೆರಾವನ್ನು ದಿನದಲ್ಲಿ ಕೆಲವು ಬಾರಿ ಕಡಿತದ ಭಾಗಕ್ಕೆ ಹಚ್ಚಿಕೊಳ್ಳಿ.

ವಿಚ್ ಹ್ಯಾಝೆಲ್

ಇದರಲ್ಲಿ ಇರುವಂತಹ ಆ್ಯಂಟಿಆಕ್ಸಿಡೆಂಟ್ ಮತ್ತು ಸಂಕೋಚನ ಗುಣದಿಂದಾಗಿ ಇದು ಚರ್ಮಕ್ಕೆ ಶಮನ ನೀಡುವುದು. ವಿಚ್ ಹ್ಯಾಝೆಲ್ ಜೇಡ ಕಡಿತಕ್ಕೆ ಒಳ್ಳೆಯ ಚಿಕಿತ್ಸೆ.

ಅಪಾಯ ಮತ್ತು ವೈದ್ಯರನ್ನು ಯಾವಾಗ ಭೇಟಿಯಾಗಬೇಕು?

ಕಡಿತದ ಭಾಗದಲ್ಲಿ ತೀವ್ರ ನೋವು ಅಥವಾ ಸೆಳೆತ ಉಂಟಾಗುತ್ತಲಿದ್ದರೆ ಆಗ ನೀವು ವೈದ್ಯರನ್ನು ಭೇಟಿಯಾಗಲೇಬೇಕು. ಉಸಿರಾಟದಲ್ಲಿ ತೊಂದರೆ ಅಥವಾ ಬೇರೆ ಯಾವುದೇ ಸಮಸ್ಯೆಯು ಕಡಿತದ ಬಳಿಕ ಕಾಣಿಸಿಕೊಂಡರೆ ಆಗ ನೀವು ತಕ್ಷಣ ವೈದ್ಯರನ್ನು ಭೇಟಿಯಾಗಿ. ಕಚ್ಚಿದ ಗಾಯವು ಒಣಗದೆ ಇದ್ದರೆ ಅಥವಾ ಸುತ್ತಲಿನ ಭಾಗವು ಕೆಂಪಾಗಿದ್ದು, ಗಾಯದಲ್ಲಿ ಕುಳಿ ಕಾಣಿಸಿದ್ದರೆ ಆಗ ನೀವು ವೈದ್ಯರ ಸಲಹೆ ಪಡೆಯಬೇಕು. ಲಕ್ಷಣಗಳು ಹೆಚ್ಚಾದಾಗ ವಿಷಕಾರಿ ಜೇಡವು ಕಚ್ಚಿದೆ ಎಂದು ಹೇಳಬಹುದು.