ಎಣ್ಣೆಗಳ ರಾಣಿ 'ಎಳ್ಳೆಣ್ಣೆ'ಯ ಆರೋಗ್ಯಕರ ಪ್ರಯೋಜನಗಳು

ರಕ್ತದೊತ್ತಡವನ್ನು ಕಡಿಮೆ ಮಾಡುತ್ತದೆ

ಈ ಎಣ್ಣೆಯನ್ನು ಇತರ ಅಡುಗೆ ಎಣ್ಣೆಗಳಿಗೆ ಆರೋಗ್ಯಕರ ಪರ್ಯಾಯವಾಗಿ ಬಳಸಬಹುದು, ಸಂಶೋಧನೆಯ ಮೂಲಕ ಕಂಡುಕೊಂಡಂತೆ ಇದರ ಸೇವನೆ ಅಧಿಕ ರಕ್ತದೊತ್ತಡವನ್ನು ಆರೋಗ್ಯಕರ ಮಟ್ಟಕ್ಕೆ ಇಳಿಸಲು ಸಹಾಯ ಮಾಡುತ್ತದೆ. ಅಧಿಕ ರಕ್ತದೊತ್ತಡವನ್ನು ಇಳಿಸಲು ಇದೊಂದು ನೈಸರ್ಗಿಕ ವಿಧಾನವೂ ಆಗಿದೆ.

ರಕ್ತದಲ್ಲಿನ ಅಧಿಕ ಸಕ್ಕರೆಯ ಪ್ರಮಾಣವನ್ನು ಕಡಿಮೆ ಮಾಡುತ್ತದೆ

ಇದರಲ್ಲಿರುವ ಮೆಗ್ನೀಶಿಯಂ ರಕ್ತದಲ್ಲಿನ ಅಧಿಕ ಸಕ್ಕರೆಯ ಪ್ರಮಾಣವನ್ನು ಕಡಿಮೆ ಮಾಡುತ್ತದೆ. ಅಲ್ಲದೇ ವಿಟಮಿನ್ ಇ ಹಾಗೂ ವಿವಿಧ ಆಂಟಿ ಆಕ್ಸಿಡೆಂಟುಗಳು ರಕ್ತದಲ್ಲಿ ಸಕ್ಕರೆಯ ಮಟ್ಟ ನಿಯಂತ್ರಣದಲ್ಲಿರಲು ನೆರವಾಗುತ್ತದೆ. ಕೆಲವು ಅಧ್ಯಯನಗಳಲ್ಲಿ ಕಂಡುಕೊಂಡಂತೆ ಈ ತೈಲದಿಂದ ತಯಾರಾದ ಆಹಾರವನ್ನು ಮಧುಮೇಹಿಗಳಿಗೆ ಒದಗಿಸಿದಾಗ ಅವರ ರಕ್ತದೊತ್ತಡದ ಮಟ್ಟದಲ್ಲಿ ಗಣನೀಯ ಪ್ರಮಾಣದ ಇಳಿಕೆ ಕಂಡುಬಂದಿದೆ.

ತ್ವಚೆಯ ಪ್ರಯೋಜನಗಳು

ಎಳ್ಳಿನ ಬಳಕೆಯಿಂದ ತ್ವಚೆಗೆ ತೇವಕಾರಕ ಫಲಿತಾಂಶ ದೊರಕುತ್ತದೆ. ಈ ಮೂಲಕ ತ್ವಚೆ ನುಣುಪಾಗಿ ಹಾಗೂ ನೆರಿಗೆಗಳಿಲ್ಲದೇ ಇರಲು ನೆರವಾಗುತ್ತದೆ. ತ್ವಚೆಯ ಹಲವಾರು ತೊಂದಗಳಿಗೆ ಎಳ್ಳೆಣ್ಣೆ ಉತ್ತಮ ಪರಿಹಾರವಾಗಿದೆ ಹಾಗೂ ಇದೊಂದು ನೈಸರ್ಗಿಕ ಸೂರ್ಯಕಿರಣ ವಿಕರ್ಷಕವೂ ಆಗಿದೆ. ಎಳ್ಳೆಣ್ಣೆ ಚರ್ಮದ ಸೂಕ್ಷ್ಮರಂಧ್ರಗಳಲ್ಲಿ ಸುಲಭವಾಗಿ ಇಳಿಯುವ ಮೂಲಕ ಕೆಳಪದರಕ್ಕೆ ಶೀಘ್ರವಾಗಿ ತಲುಪುತ್ತದೆ ಹಾಗೂ ಚರ್ಮದ ಆಳದಿಂದ ಪೋಷಣೆ ನೀಡುವ ಮೂಲಕ ತ್ವಚೆಯನ್ನು ಒಣಗುವುದರಿಂದ ಹಾಗೂ ಬಿರುಕುಗಳಿಂದ ರಕ್ಷಿಸುತ್ತದೆ.

ಮೂಳೆಗಳ ಬೆಳವಣಿಗೆ ಹೆಚ್ಚಿಸುತ್ತದೆ

ಎಳ್ಳೆಣ್ಣೆಯಲ್ಲಿರುವ ಕ್ಯಾಲ್ಸಿಯಂ ಮೂಳೆಗಳು ದೃಢಗೊಳ್ಳಲು ಅಗತ್ಯವಾದ ಖನಿಜವಾಗಿದೆ. ಅಲ್ಲದೇ ಜೊತೆಗೆ ತಾಮ್ರ, ಸತು ಮತ್ತು ಮೆಗ್ನೀಶಿಯಂಗಳೂ ಮೂಳೆಗಳ ದೃಢತೆ ಹೆಚ್ಚಿಸಲು ನೆರವಾಗುತ್ತವೆ. ಇದೇ ಕಾರಣಕ್ಕೆ ಆಯುರ್ವೇದ ಮೂಳೆಗಳ ದೃಢತೆಗೆ ಬಲಸಲಾಗುವ ಮಸಾಜ್ ಎಣ್ಣೆಯಾಗಿ ಎಳ್ಳೆಣ್ಣೆಯನ್ನು ಬಳಸುತ್ತದೆ. ಮೂಳೆಗಳ ಮೇಲೆ ಮಾಡಿದ ಎಳ್ಳೆಣ್ಣೆಯ ಮಸಾಜ್ ಮೂಳೆಗಳನ್ನು ಗಟ್ಟಿಗೊಳಿಸುವುದರ ಜೊತೆಗೇ ಬಹಳ ಹಳೆಯ ಮೂಳೆಯ ಶಿಥಿಲತೆಯನ್ನೂ ಸರಿಪಡಿಸಲು ನೆರವಾಗುತ್ತದೆ.

ಹಲ್ಲುಗಳ ತೊಂದರೆಯನ್ನು ಸರಿಪಡಿಸುತ್ತದೆ

ಬಾಯಿಯ ಮತ್ತು ಹಲ್ಲುಗಳ ಸ್ವಚ್ಛತೆಗೆ ಎಳ್ಳೆಣ್ಣೆಯನ್ನು ಬಹಳ ಹಿಂದಿನಿಂದಲೂ ಬಳಸಲಾಗುತ್ತಾ ಬರಲಾಗಿದೆ. ಬಾಯಿಯಲ್ಲಿ ಕೊಂಚ ಎಳ್ಳೆಣ್ಣೆಯನ್ನು ಹಾಕಿ ಕೊಂಚ ಹೊತ್ತು ಮುಕ್ಕಳಿಸಿಕೊಳ್ಳುವ ಮೂಲಕ (ಈ ವಿಧಾನಕ್ಕೆ oil pulling ಎಂದು ಕರೆಯುತ್ತಾರೆ) ಬಾಯಿಯ ಸ್ವಚ್ಛತೆ ಹೆಚ್ಚುವುದಲ್ಲದೇ ಹಲ್ಲುಗಳ ನಡುವೆ ಸಿಲುಕಿಕೊಂಡಿದ್ದ ಆಹಾರಕಣಗಳನ್ನು ಸೆಳೆದು ಸ್ವಚ್ಛಗೊಳಿಸಲು ಸಾಧ್ಯವಾಗುತ್ತದೆ. ಹಲ್ಲುಗಳು ದೃಢವಾಗುತ್ತದೆ ಹಾಗೂ ಒಟ್ಟಾರೆ ಬಾಯಿಯ ಆರೋಗ್ಯವೂ ಉತ್ತಮಗೊಳ್ಳುತ್ತದೆ.

ಹೃದಯದ ಆರೋಗ್ಯ ಉಳಿಸಿಕೊಳ್ಳುತ್ತದೆ

ಎಳ್ಳೆಣ್ಣೆಯಲ್ಲಿ ಪ್ರಬಲ ಆಂಟಿ ಆಕ್ಸಿಡೆಂಟು ಗುಣವಿದ್ದು ಹೃದಯದ ಮೇಲೆ ಇದು ಧನಾತ್ಮಕ ಪರಿಣಾಮವನ್ನುಂಟುಮಾಡುತ್ತದೆ. ರಕ್ತದ ಕೊಲೆಸ್ಟ್ರಾಲ್ ಮಟ್ಟವನ್ನು ಕಡಿಮೆ ಮಾಡುವ ಮೂಲಕ ರಕ್ತಪರಿಚಲನೆ ಸುಗಮಗೊಳ್ಳಲು ನೆರವಾಗುತ್ತದೆ. ಅಲ್ಲದೇ ಇದರಲ್ಲಿರುವ ಸೆಸಮಾಲ್ ಮತ್ತು ಸೆಸಮಿನ್ ಎಂಬ ಕೊಬ್ಬಿನ ಆಮ್ಲಗಳು ರಕ್ತಪರಿಚಲನಾ ವ್ಯವಸ್ಥೆಯನ್ನು ಬಲಪಡಿಸುತ್ತದೆ ಹಾಗೂ ಕೊಲೆಸ್ಟ್ರಾಲ್ ಮಟ್ಟಗಳನ್ನು ಆರೋಗ್ಯಕರ ಮಟ್ಟದಲ್ಲಿರಿಸಲು ನೆರವಾಗುತ್ತದೆ.

ಕೂದಲ ಹೊರಮೈಯನ್ನು ಉತ್ತಮಗೊಳಿಸುತ್ತದೆ

ಎಳ್ಳೆಣ್ಣೆ ಕೂದಲನ್ನು ರಕ್ಷಿಸುತ್ತದೆ ಹಾಗೂ ಪೋಷಿಸುತ್ತದೆ. ಇದರ ಬಳಕೆಯಿಂದ ಸೂರ್ಯನ ರಶ್ಮಿಯಿಂದ ಕೂದಲ ಮೇಲೆ ಆಗುವ ದುಷ್ಟರಿಣಾಮಗಳನ್ನು ತಡೆಯಬಹುದು. ವಿಶೇಷವಾಗಿ ಸೂರ್ಯನ ಅತಿನೇರಳೆ ಕಿರಣಗಳು ಹಾಗೂ ಪರಿಸರ ಮಾಲಿನ್ಯದ ಪರಿಣಾಮಗಳಿಂದ ರಕ್ಷಣೆ ಒದಗಿಸುತ್ತದೆ. ತಲೆಯ ಚರ್ಮ ಹಾಗೂ ಕೂದಲ ಬುಡಕ್ಕೆ ಹೆಚ್ಚಿನ ಪೋಷಣೆ ಒದಗಿಸುವ ಮೂಲಕ ಕೂದಲು ಆರೋಗ್ಯಕರ ಹಾಗೂ ಅಕಾಲಿಕ ಕೂದಲು ನೆರೆಯುವುದನ್ನು ತಡೆಯುತ್ತದೆ. ಎಳ್ಳೆಣ್ಣೆಯಿಂದ ತಲೆಯನ್ನು ಮಸಾಜ್ ಮಾಡುವ ಮೂಲಕ ತಲೆಯ ಚರ್ಮದಲ್ಲಿ ರಕ್ತಪರಿಚಲನೆ ಉತ್ತಮಗೊಳ್ಳುತ್ತದೆ ಹಾಗೂ ಕೂದಲ ಬೆಳವಣಿಗೆ ಶೀಘ್ರಗೊಳ್ಳುತ್ತದೆ.

ಉದ್ವೇಗ ಹಾಗೂ ಖಿನ್ನತೆ ಕಡಿಮೆ ಮಾಡಲು ನೆರವಾಗುತ್ತದೆ

ಎಳ್ಳೆಣ್ಣೆಯ ಬಳಕೆಯಿಂದ ಮನೋಭಾವ ಬದಲಿಸಲು ಸಾಧ್ಯವಾಗುತ್ತದೆ. ಮೆದುಳಿನ ಮೇಲಿನ ಒತ್ತಡ ಹಾಗೂ ಇತರ ಕಾರಣಗಳಿಂದ ಎದುರಾದ ಉದ್ವೇಗ ಹಾಗೂ ಖಿನ್ನತೆಯಿಂದ ಹೊರಬರಲು ಸಾಧ್ಯವಾಗುತ್ತದೆ. ಎಳ್ಳೆಣ್ಣೆಯಿಂದ ರಾತ್ರಿ ಮಲಗುವ ಮುನ್ನ ಪಾದಗಳನ್ನು ಮಸಾಜ್ ಮಾಡಿಕೊಂಡು ಮಲಗುವ ಮೂಲಕ ಸುಖನಿದ್ದೆ ಆವರಿಸಲು ಸಾಧ್ಯವಾಗುತ್ತದೆ. ಈ ಗುಣಗಳನ್ನು ಕಂಡ ನಮ್ಮ ಹಿರಿಯರು ಎಳ್ಳೆಣ್ಣೆಯನ್ನು ಬಹಳ ಹಿಂದಿನಿಂದಲೇ ಇದನ್ನು ಔಷಧೀಯ ರೂಪದಲ್ಲಿ ಬಳಸುತ್ತಾ ಬಂದಿದ್ದಾರೆ. ಈ ಪ್ರಬಲ ಹಾಗೂ ಆರೋಗ್ಯಕರ ಎಣ್ಣೆಯನ್ನು ಬಳಸುವ ಮೂಲಕ ನಮ್ಮ ಹಿರಿಯರು ಹೊಂದಿದ್ದ ಸೌಂದರ್ಯ ಹಾಗೂ ಆರೋಗ್ಯವನ್ನು ನಾವೂ ಪಡೆಯಬಾರದೇಕೆ?