ಬೆಳಗ್ಗೆ ಒಂದು ಲೋಟ ಬಿಸಿನೀರಿನ ಜೊತೆ ಒಂದು ಬಾಳೆಹಣ್ಣು ತಿಂದರೆ ಏನಾಗುತ್ತೆ ಗೊತ್ತಾ?

ಬ್ರೇಕ್‌ಫಾಸ್ಟ್‌ ಏಕೆ ಮಿಸ್‌ ಮಾಡಲೇ ಬಾರದು?

ಟೈಮ್‌ ಇಲ್ಲ ಅಂತ ಕಾರಣ ಹೇಳಿ ಏನೂ ತಿನ್ನದೆ, ಒಂದು ಲೋಟ ನೀರು ಕೂಡ ಕುಡಿಯದೆ ಕೆಲಸಕ್ಕೆ ಗಡಿಬಿಡಿಯಿಂದ ಹೊರಡುವ ಎಷ್ಟೋ ಮಂದಿ ನಮ್ಮ ನಡುವೆ ಇದ್ದಾರೆ. ಆದರೆ ಈ ಅಭ್ಯಾಸ ಮುಂದೆ ನಿಮಗೆ ದೊಡ್ಡ ಆಪತ್ತು ತರುತ್ತದೆ ಎಂಬುವುದು ನೆನಪಿರಲಿ. ಬೆಳಗ್ಗೆ ಖಾಲಿ ಹೊಟ್ಟೆಯಲ್ಲಿರಬಾರದು. ಎಷ್ಟೇ ಕೆಲಸದ ಒತ್ತಡವಿರಲಿ, ಬೆಳಗ್ಗೆ ನಿಮ್ಮ ಹೊಟ್ಟೆ ತುಂಬಿಸುವ ಕಡೆ ಸ್ವಲ್ಪವಾದರೂ ಗಮನಕೊಡಲೇಬೇಕು. ಇಲ್ಲದಿದ್ದರೆ ಪೋಷಕಾಂಶದ ಕೊರತೆಯ ಜೊತೆಗೆ ಮರೆವಿನ ಸಮಸ್ಯೆಯೂ ಉಂಟಾಗುವುದು.

ಪೋಷಕಾಂಶದ ಅವಶ್ಯಕತೆ

ಬೆಳಗ್ಗೆ ದೇಹಕ್ಕೆ ಅವಶ್ಯಕವಾದ ಪೋಷಕಾಂಶಗಳು ಬೇಕು. ಬೆಳಗ್ಗೆ ಉಪಾಹಾರ ಮಾಡುವುದರಿಂದ ನಮ್ಮ ದೇಹವು ಅದರಲ್ಲಿರುವ ಪೋಷಕಾಂಶಗಳನ್ನು ಸುಲಭವಾಗಿ ಹೀರಿಕೊಳ್ಳುತ್ತದೆ. ಆದ್ದರಿಂದ ಬೆಳಗ್ಗೆ ಬ್ರೇಕ್‌ಫಾಸ್ಟ್‌ಗೆ ಆರೋಗ್ಯಕರ ಆಹಾರ ಸೇವಿಸಿ. ಫಾಸ್ಟ್‌ ಫುಡ್ಸ್, ರೆಡಿ ಮೇಡ್‌ ಫುಡ್ಸ್ ಇವುಗಳನ್ನು ಸೇವಿಸಲೇಬೇಡಿ. ಬೆಳಗ್ಗೆ ಸ್ವಲ್ಪ ಹೆಚ್ಚೇ ಆಹಾರ ಸೇವಿಸಿದರೂ ತೊಂದರೆಯಿಲ್ಲ, ದೇಹ ಅರಗಿಸಿಕೊಳ್ಳುತ್ತದೆ, ದಪ್ಪವೇನು ಆಗುವುದೂ ಇಲ್ಲ.

ಒಂದು ಲೋಟ ಬಿಸಿ ನೀರು ಮತ್ತು ಬಾಳೆಹಣ್ಣು

ನೀವು ತೂಕ ಇಳಿಕೆಗಾಗಿ ಬೆಳಗ್ಗೆ ಏನೂ ತಿನ್ನುತ್ತಿಲ್ಲವೇ? ಹಾಗಾದರೆ ನೀವು ಬೆಳಗ್ಗೆ ಒಂದು ಲೋಟ ಬಿಸಿ ನೀರು ಹಾಗೂ ಬಾಳೆಹಣ್ಣು ತಿನ್ನುವುದರಿಂದ ತೂಕ ಇಳಿಕೆ ಮಾಡಬಹುದು ಗೊತ್ತಾ? ಒಂದು ಲೋಟ ಬಿಸಿ ನೀರಿನ ಜೊತೆಗೆ ಬಾಳೆಹಣ್ಣು ತಿಂದರೆ ಜೀರ್ಣಕ್ರಿಯೆಗೆ ತುಂಬಾ ಒಳ್ಳೆಯದು. ಇನ್ನು ಬೆಳಗ್ಗೆ ತಣ್ಣೀರು ಕುಡಿಯುವ ಬದಲು ಬಿಸಿ ನೀರು ಕುಡಿಯುವುದರಿಂದ ನೀರು ಮತ್ತಷ್ಟು ಕುಡಿಯಬೇಕೆನಿಸುವುದು. ತಣ್ಣೀರು ಆದರೆ ಅರ್ಧ ಲೋಟ ಕುಡಿದಾಗ ಸಾಕು ಅನಿಸುವುದು. ತೂಕ ಇಳಿಕೆಗೆ ಬಿಸಿ ನೀರು ಕುಡಿಯುವುದು ಒಳ್ಳೆಯದು.

ಬಾಳೆಹಣ್ಣಿನಲ್ಲಿರುವ ಪೋಷಕಾಂಶಗಳು

ಬಾಳೆಹಣ್ಣು ಬೆಳಗ್ಗೆ ತಿನ್ನುವುದರಿಂದ ದೇಹಕ್ಕೆ ಬೇಕಾದ ಪೋಷಕಾಂಶಗಳೂ ದೊರೆಯುತ್ತದೆ. ಇದರಲ್ಲಿ ಪೊಟಾಷ್ಯಿಯಂ, ವಿಟಮಿನ್ ಬಿ6, ವಿಟಮಿನ್ ಸಿ, ಮೆಗ್ನಿಷ್ಯಿಯಂ, ಸತು, ಕಾರ್ಬ್ಸ್, ನಾರಿನಂಶವಿದೆ. ಆದ್ದರಿಂದ ಖಾಲಿ ಹೊಟ್ಟೆಯಲ್ಲಿರುವುದಕ್ಕಿಂತ ಈ ವಿಧಾನ ಪಾಲಿಸಿ, ಆರೋಗ್ಯ ಕಾಪಾಡಿ.