ಕಾರಣವಿಲ್ಲದೇ ಸುಸ್ತಾಗುತ್ತಿದೆಯೇ? ಹಾಗಾದರೆ ಇದೆಲ್ಲಾ ಕಾರಣವಿರಬಹುದು!

ನಿಮಗೆ ಖಿನ್ನತೆ ಆವರಿಸಿದೆ

ಖಿನ್ನತೆಯ ಪರಿಣಾಮವಾಗಿ ಮಾನಸಿಕವಾಗಿ ಕುಗ್ಗುವುದು ಮಾತ್ರವಲ್ಲ, ವ್ಯಕ್ತಿಯನ್ನು ದೈಹಿಕವಾಗಿಯೂ ನಿತ್ರಾಣಗೊಳಿಸುತ್ತದೆ. ಜೊತೆಗೇ ಸ್ನಾಯುಗಳ ನೋವು, ನಿದ್ದೆ ಆವರಿಸಲು ತೊಂದರೆಯಾಗುವುದು ಮೊದಲಾದವುಗಳೂ ಎದುರಾದರೆ ನಿಮಗೆ ತಕ್ಷಣ ವೈದ್ಯರನ್ನು ಭೇಟಿಯಾಗುವ ಅಗತ್ಯವಿದೆ.

ನೀವು ಅಗತ್ಯವಿದ್ದಷ್ಟು ವ್ಯಾಯಾಮ ಮಾಡುತ್ತಿಲ್ಲ

ದೇಹವನ್ನು ನಿತ್ಯವೂ ಕನಿಷ್ಠ ಪ್ರಮಾಣದಲ್ಲಿಯಾದರೂ ದಂಡಿಸುವುದು ಆರೋಗ್ಯಕ್ಕೆ ಅಗತ್ಯವಾಗಿದೆ. ಸಾಕಷ್ಟು ವ್ಯಾಯಾಮದ ಮೂಲಕ ದೇಹ ಚಟುವಟಿಕೆಯಿಂದ ಹಾಗೂ ಲವಲವಿಕೆಯಿಂದ ಇರಲು ಸಾಧ್ಯವಾಗುತ್ತದೆ. ವ್ಯಾಯಾಮದಿಂದ ಜೀವಕೋಶಗಳ ಒಳಗೆ ಹೊಸದಾದ ಮೈಟೋಕಾಂಡ್ರಿಯಾ ಎಂಬ ಭಾಗ ಹೊಸದಾಗಿ ಉತ್ಪತ್ತಿಯಾಗಲು ನೆರವಾಗುತ್ತದೆ. ಇದು ಜೀವಕೋಶಗಳ ಮಟ್ಟದಿಂದ ದೇಹಕ್ಕೆ ಹೆಚ್ಚಿನ ಚೇತನವನ್ನು ನೀಡುತ್ತದೆ.

ನೀವು ಮಧುಮೇಹಿಗಳಾಗಿರಬಹುದು

ವಿಶೇಷವಾಗಿ ಟೈಪ್ 2 ಮಧುಮೇಹವಿರುವ ವ್ಯಕ್ತಿಗಳ ದೇಹದಲ್ಲಿ ಸಾಕಷ್ಟು ಸಕ್ಕರೆ ಲಭ್ಯವಿದ್ದರೂ ಇದನ್ನು ಬಳಸಿಕೊಳ್ಳುವಲ್ಲಿ ವಿಫಲವಾಗುತ್ತವೆ. ತನ್ಮೂಲಕ ಈ ಸಕ್ಕರೆ ಶಕ್ತಿಯಾಗಿ ಪರಿವರ್ತಿತವಾಗದೇ ದೇಹಕ್ಕೆ ಹೆಚ್ಚಿನ ಶ್ರಮದ ಕೆಲಸ ಮಾಡಲು ಸಾಧ್ಯವಾಗದೇ ಸುಸ್ತು ಆವರಿಸಿ ಇಡಿಯ ದಿನ ಹಾಗೇ ಇರುತ್ತದೆ.

ನಿಮ್ಮ ಥೈರಾಯ್ಡ್ ಗ್ರಂಥಿಗಳ ಕ್ಷಮತೆ ಕುಂದಿದೆ

ನಿತ್ಯದ ಹತ್ತು ಹಲವು ಕೆಲಸಗಳು ಸೂಕ್ತವಾಗಿ ಕಾರ್ಯನಿರ್ವಹಿಸಬೇಕಾದರೆ ಥೈರಾಯ್ಡ್ ಗ್ರಂಥಿಯೂ ರಸದೂತಗಳನ್ನು ಸ್ರವಿಸಬೇಕಾಗುತ್ತದೆ. ಒಂದು ವೇಳೆ ನಿಮ್ಮ ಥೈರಾಯ್ಡ್ ಗ್ರಂಥಿಯ ಕ್ಷಮತೆ ಕುಂದಿದ್ದರೆ ಇದು ಸಾಕಷ್ಟು ಪ್ರಮಾಣದ ರಸದೂತವನ್ನು ಉತ್ಪಾದಿಸಲು ಸಾಧ್ಯವಾಗದೇ ಅಥವಾ ನಿಯಂತ್ರಣಕ್ಕೆ ಸಿಗದ ಪ್ರಮಾಣದಲ್ಲಿ ಉತ್ಪತ್ತಿಗೊಳಿಸಿ ಶಕ್ತಿಹೀನತೆಯನ್ನು ಎದುರಿಸಬೇಕಾಗುತ್ತದೆ.

ನೀವು ಅಗತ್ಯವಿದ್ದಷ್ಟು ಕ್ಯಾಲೋರಿಗಳನ್ನು ಸೇವಿಸುತ್ತಿಲ್ಲ

ನಿಮ್ಮ ನಿತ್ಯದ ಚಟುವಟಿಕೆಗಳಿಗೆ ಸಾಕಷ್ಟು ಪ್ರಮಾಣದ ಕ್ಯಾಲೋರಿಗಳೂ ಅಗತ್ಯ. ಒಂದು ವೇಳೆ ನಿಮ್ಮ ಆಹಾರದ ಮೂಲಕ ಸಾಕಷ್ಟು ಕ್ಯಾಲೋರಿಗಳು ಲಭ್ಯವಾಗದೇ ಇದ್ದರೆ ನಿಮಗೆ ಇಡಿಯ ದಿನ ಸುಸ್ತು ಆವರಿಸುತ್ತದೆ.

ನೀವು ಹೆಚ್ಚು ಸಕ್ಕರೆ ಸೇವಿಸುತ್ತಿದ್ದೀರಿ

ಒಂದು ದಿನಕ್ಕೆ ಅಗತ್ಯವಿರುವ ಸಕ್ಕರೆಯ ಪ್ರಮಾಣಕ್ಕೂ ಹೆಚ್ಚು (37.5ಗ್ರಾಂ ಪುರುಷರಿಗೆ, 25 ಗ್ರಾಂ ಮಹಿಳೆಯರಿಗೆ) ಸಕ್ಕರೆಯನ್ನು ಸೇವಿಸಿದರೆ ಇದು ರಕ್ತದಲ್ಲಿ ಥಟ್ಟನೇ ಸಕ್ಕರೆಯ ಪ್ರಮಾಣವನ್ನು ಹೆಚ್ಚಿಸುತ್ತದೆ. ಅಗತ್ಯಕ್ಕೂ ಹೆಚ್ಚು ಸಕ್ಕರೆ ಇದ್ದರೆ ಇದನ್ನು ಹೀರಿಕೊಳ್ಳಲು ಸಾಧ್ಯವಾಗದೇ ಅಂಗಗಳು ಕುಸಿಯುತ್ತವೆ. ಇದು ಸುಸ್ತು ಹಾಗೂ ತಲೆಸುತ್ತುವಿಕೆಗೆ ಕಾರಣಾವಾಗಿದೆ.

ನೀವು ಸಾಕಷ್ಟು ನೀರು ಕುಡಿಯುತ್ತಿಲ್ಲ

ಒಂದು ವೇಳೆ ಇಡಿಯ ದಿನ ಸುಸ್ತು ಆವರಿಸಿದ್ದರೆ ನೀವು ಟೀ ಅಥವಾ ಕಾಫಿ ಕುಡಿಯುವ ಬಗ್ಗೆ ಯೋಚಿಸುತ್ತಿದ್ದರೆ ಇದು ಖಂಡಿತಾ ತಪ್ಪು ಆಲೋಚನೆಯಾಗಿದೆ. ದಿನದ ಅಗತ್ಯದ ನೀರನ್ನು ಸ್ವಚ್ಛ ನೀರೇ ಪೂರೈಸಬಲ್ಲುದೇ ಹೊರತು ಬೇರಾವ ಪೇಯವೂ ಈ ಕೊರತೆಯನ್ನು ನೀಗಿಸಲಾಗದು. ಪ್ರತಿಯೊಬ್ಬರೂ ದಿನಕ್ಕೆ ಕನಿಷ್ಟ 64 ಔನ್ಸ್‌ಗಳಷ್ಟು ನೀರು ಕುಡಿಯಲೇಬೇಕು. ಸಾಕಷ್ಟು ನೀರು ಕುಡಿಯದೇ ಇದ್ದರೆ, ಇಷ್ಟೇ ಪ್ರಮಾಣದ ಇತರ ಪಾನೀಯ ಕುಡಿದರೂ ನೀರು ದೇಹಕ್ಕೆ ಲಭ್ಯವಾಗದೇ ಇಡಿಯ ದಿನ ನಿತ್ರಾಣ ಆವರಿಸುತ್ತದೆ.