ಕೈಕಾಲುಗಳ ಆರೋಗ್ಯ ವೃದ್ಧಿಗೆ ಅನುಸರಿಸಿ ವಸಿಷ್ಠಾಸನ

ಹಂತ 1

ಮೊದಲು ನೆಲದ ಮೇಲೆ ಅಂಗಾತರಾಗಿ ಮಲಗಿ. ಆಸನವನ್ನು ಪ್ರಾರಂಭಿಸಲು ಮೊದಲು ಎಡಮಗ್ಗುಲಿಗೆ ತಿರುಗಿ ಮಲಗಿ. ಬಲಗಾಲು ಎಡಗಾಲಿನ ಮೇಲೆ ಇರಲಿ, ಕಾಲುಗಳನ್ನು ಅಥವಾ ಸೊಂಟವನ್ನು ಬಗ್ಗಿಸಬೇಡಿ.

ಹಂತ 2

ಬಲಗೈಯನ್ನು ಬಲಸೊಂಟದ ಮೇಲೆ ಹಸ್ತ ತಾಕುವಂತೆ ಇರಿಸಿ, ಕೈ ಮಡಚಬೇಡಿ. ಎಡಗೈಯನ್ನು ಅರ್ಧ ಮಡಚಿ ಸೊಂಟದ ಪಕ್ಕ ಬರುವಂತಿರಿಸಿ ದೇಹವನ್ನು ಸಮತೋಲನದಲ್ಲಿರಿಸಿ.

ಹಂತ 3

ಈ ಹಂತದಲ್ಲಿ ಕೊಂಚ ಜಾಗರೂಕರಾಗಿರಬೇಕು. ದೇಹದ ಇಡಿಯ ಭಾರ ಮೊಣಕೈ ಮೇಲೆ ಬೀಳಬಾರದು, ಕೊಂಚವೇ ಪಕ್ಕದಲ್ಲಿದ್ದು ಸೊಂಟ ನೆಲತಾಕುವಂತಿರಬೇಕು. ಈಗ ಎಡಗೈಯ ಸ್ನಾಯುಗಳನ್ನು ಬಳಸಿ ದೇಹದ ಮೇಲ್ಭಾಗವನ್ನು ಮೇಲೆತ್ತಬೇಕು. ಅಂದರೆ ಭುಜವನ್ನು ಬಲಭಾಗಕ್ಕೆ ಎತ್ತಬೇಕು, ಸೊಂಟ ನೆಲದಲ್ಲಿಯೇ ಇರಲಿ.

ಹಂತ 4

ಬಳಿಕ ಮೊಣಕೈ ಮೇಲೆ ದೇಹದ ಮೇಲ್ಭಾಗದ ಭಾರ ಬರುವಂತೆ ಸೊಂಟವನ್ನು ನೇರವಾಗಿಸಿ ಇಡಿಯ ದೇಹ ನೆಟ್ಟಗಾಗಿಸಿ. ಈ ಹಂತದಲ್ಲಿ ತೊಡೆಯ ಸ್ನಾಯುಗಳು, ಕಾಲಿನ ಮೀನಖಂಡ, ಸೊಂಟದ ಸ್ನಾಯುಗಳೆಲ್ಲವೂ ಹುರಿಗಟ್ಟಬೇಕು. ಎಡಪಾದದ ಮೇಲೇ ದೇಹದ ಕೆಳಗಿನ ಭಾರ ಇರಲಿ. ಈ ಹಂತದಲ್ಲಿ ಉಸಿರನ್ನು ಪೂರ್ಣವಾಗಿ ಒಳಗೆಳೆದುಕೊಳ್ಳಿ.

ಹಂತ 5

ಈಗ ಬಲಗೈಯನ್ನು ಭುಜಕ್ಕೆ ಸಮಾನವಾಗಿ ಮೇಲೆತ್ತಿ, ಕೈಬೆರಳುಗಳನ್ನು ಮುಂದಕ್ಕೆ ಚಾಚಿ.

ಹಂತ 6

ಈ ಹಂತವನ್ನು ಉಸಿರುಗಟ್ಟಿ ಸುಮಾರು ಅರ್ಧನಿಮಿಷದವರೆಗಾದರೂ ಉಳಿಸಿಕೊಳ್ಳಿ. ಪ್ರಾರಂಭದಲ್ಲಿ ಹೆಚ್ಚು ಹೊತ್ತು ಇರಲು ಸಾಧ್ಯವಾಗದಿದ್ದರೂ ಕ್ರಮೇಣವಾಗಿ ಸ್ನಾಯುಗಳು ಹುರಿಗಟ್ಟುತ್ತಾ ಹೋದಂತೆ

ಸಾಧ್ಯವಾಗುತ್ತಾ ಹೋಗುತ್ತದೆ. ಬಳಿಕ ಈ ಹಂತಕ್ಕೆ ಹೇಗೆ ಬಂದಿರೋ ಹಾಗೇ ಹಿಮ್ಮುಖವಾಗಿ ಅನುಸರಿಸುತ್ತಾ ಮೊದಲ ಸ್ಥಾನಕ್ಕೆ ಬನ್ನಿ. ಹೀಗೆ ಬರುವಾಗ ಉಸಿರನ್ನು ಪೂರ್ಣವಾಗಿ ಹೊರಬಿಡುತ್ತಾ ಬನ್ನಿ. ಮೊದಲ ಸ್ಥಾನಕ್ಕೆ ಬಂದ ಬಳಿಕ ದೀರ್ಘವಾಗಿ ಕೆಲವು ಬಾರಿ ಉಸಿರಾಡಿ.

ಹಂತ 7

ಈ ವಿಧಾನವನ್ನು ಈಗ ಇನ್ನೊಂದು ಬದಿಗೆ ಅಂದರೆ ಬಲಮಗ್ಗುಲಿಗೆ ಮಲಗಿ ಪುನರಾವರ್ತಿಸಿ. ಪ್ರಾರಂಭದಲ್ಲಿ ಈ ಆಸನ ಕೊಂಚ ಕಷ್ಟಕರ ಅನ್ನಿಸಿದರೂ ಕ್ರಮೇಣ ಬಾಳೆಹಣ್ಣು ಸುಲಿಯುವಷ್ಟು ಸುಲಭವೂ ಆಗುತ್ತದೆ. ಈ ಆಸನದ ಮುಖ್ಯ ಅಂಗವೆಂದರೆ ದೇಹವನ್ನು ಮೊಣಕೈಮೇಲೆ ಸಮತೋಲನದಲ್ಲಿರಿಸುವುದು. ಹೊಸಬರಿಗೆ ಇದು ಯೋಗಶಿಕ್ಷಕರ ನೆರವಿಲ್ಲದೇ ಅನುಸರಿಸಲು ಸಾಧ್ಯವಾಗದೇ ಹೋಗಬಹುದು. ಆಗ ಗೋಡೆಯ ಬದಿಯಲ್ಲಿ ಮಲಗಿ ಗೋಡೆಯ ಸಹಾಯದಿಂದ ಸಮತೋಲನದಲ್ಲಿರಿಸಲು ತೊಡಗಿದರೆ ಸುಲಭವಾಗುತ್ತದೆ.

ವಸಿಷ್ಠಾಸನದ ಪ್ರಯೋಜನಗಳು

• ಕೈ ಮತ್ತು ಕಾಲುಗಳ ಸ್ನಾಯುಗಳಿಗೆ ಅತ್ಯುತ್ತಮ ಬಲ ನೀಡುತ್ತದೆ.

• ಮಣಿಕಟ್ಟು ಮತ್ತು ಹೊಟ್ಟೆಯ ಸ್ನಾಯುಗಳನ್ನೂ ಬಲಪಡಿಸುತ್ತದೆ.

• ಇಡಿಯ ದೇಹವನ್ನು ಪೂರ್ಣವಾಗಿ ಸೆಳೆಯಲು ನೆರವಾಗುತ್ತದೆ.

• ಕಂಕುಳ ಕೆಳಭಾಗದ ಸ್ನಾಯುಗಳನ್ನು ಬಲಪಡಿಸುತ್ತದೆ.

• ದೇಹದ ಸಮತೋಲನ ಕಾಪಾಡಿಕೊಳ್ಳಲು ನೆರವಾಗುತ್ತದೆ.

ಎಚ್ಚರಿಕೆ

ಭುಜ, ಸೊಂಟದ ನರದ ತೊಂದರೆ, ಕೆಳಬೆನ್ನಿನ ನೋವು, ಸ್ಲಿಪ್ ಡಿಸ್ಕ್ ತೊಂದರೆ ಇರುವವರು ಈ ಆಸನವನ್ನು ಅನುಸರಿಸಬಾರದು. ಈ ನೋವುಗಳ ತೀವ್ರತೆಯನ್ನು ಪರಿಗಣಿಸಿ ಯೋಗಶಿಕ್ಷಕರು ಅಥವಾ ನಿಮ್ಮ ವೈದ್ಯರು ನಿಮಗೆ ಸರಿಯಾದ ಮಾರ್ಗದರ್ಶನ ನೀಡಬಲ್ಲರು.