ಹೊಟ್ಟೆಯ ಬೊಜ್ಜು ಕರಗಿಸಲು ಪರಿಪೂರ್ಣ 'ನಾವಾಸನ'

ಹಂತ 1

ಮೊದಲು ಕಾಲುಗಳನ್ನು ನೀಳವಾಗಿಸಿ ನೆಲದ ಮೇಲೆ ಕುಳಿತುಕೊಳ್ಳಿ. ಕೈಗಳನ್ನು ಸೊಂಟದಿಂದ ಕೊಂಚವೇ ಹಿಂದಕ್ಕೆ ಹಸ್ತ ಕೆಳಗಿರುವಂತಿರಿಸಿ ನಿರಾಳರಾಗಿರಿ. ಈ ಹಂತದಲ್ಲಿ ಕುತ್ತಿಗೆ, ಬೆನ್ನು ನೆಟ್ಟಗಿರಲು ಹಾಗೂ ದೇಹ ನೇರವಾಗಿರಲಿ. ಆಸನವನ್ನು ಪ್ರಾರಂಭಿಸಲು ಉಸಿರನ್ನು ಮೇಲೆಳೆದುಕೊಳ್ಳುತ್ತಾ ಕುತ್ತಿಗೆಯನ್ನು ಕೊಂಚವೇ ಹಿಂದೆ ಬಾಗಿಸುತ್ತಾ ಕೊಂಚವೇ ಹಿಂದಕ್ಕೆ ಬಾಗಿ, ಅಂದರೆ ಎದೆಯ ಭಾಗ ಮುಂದೆ ಚಾಚುವಂತಿರಬೇಕು.

ಹಂತ 2

ಈಗ ನಿಧಾನವಾಗಿ ಉಸಿರು ಬಿಡುತ್ತಾ ಪಾದಗಳನ್ನು ನೆಲದಿಂದ ಮೇಲಕ್ಕೆತ್ತಿ. ಈಗ ದೇಹದ ಭಾರವನ್ನು ನೆಲಕ್ಕೆ ಒತ್ತಿಕೊಂಡಿರುವ ಕೈಗಳಿಂದ ಸಮತೋಲನದಲ್ಲಿರಿಸಿ. ಕಾಲುಗಳು ನೇರವಾಗಿದ್ದು ನೆಲಕ್ಕೆ ನಲವತ್ತೈದು ಡಿಗ್ರಿ ಕೋನಕ್ಕೆ ಬರುವಷ್ಟು ಮೇಲೆತ್ತಿ. ಕಾಲುಬೆರಳುಗಳನ್ನು ಮುಂದಕ್ಕೆ ಚಾಚಿ. ಅಂದರೆ ಈ ಹಂತದಲ್ಲಿ ಕಾಲುಬೆರಳುಗಳು ಮತ್ತು ಕಣ್ಣುಗಳು ಒಂದೇ ಮಟ್ಟದಲ್ಲಿರಬೇಕು. ಪ್ರಾರಂಭದಲ್ಲಿ ಈ ಹಂತ ಇಷ್ಟು ಮೇಲಕ್ಕೆ ಬರದೇ ಇದ್ದರೂ ಕ್ರಮೇಣ ಸಾಧ್ಯವಾಗುತ್ತದೆ.

ಹಂತ 3

ಈಗ ಕೈಗಳನ್ನು ನಿಧಾನವಾಗಿ ಮುಂದೆ ತಂದು ಮೇಲಕ್ಕೆತ್ತಿ ಕಾಲುಬೆರಳುಗಳತ್ತ ಚಾಚಿ. ಅಂದರೆ ಈ ಹಂತದಲ್ಲಿ ಕೈಗಳು ಭೂಮಿಗೆ ಸಮಾನಾಂತರವಾಗಿದ್ದು ದೇಹ ದೋಣಿಯ ಆಕೃತಿಯಲ್ಲಿರುತ್ತದೆ. ಇದೇ ಕಾರಣಕ್ಕೆ ಇದಕ್ಕೆ ನಾವಾಸನ ಎಂಬ ಹೆಸರು ಬಂದಿದೆ. ಮುಂದಿನ ಸ್ಲೈಡ್ ಕ್ಲಿಕ್ ಮಾಡಿ

ಹಂತ 3

ಒಂದು ವೇಳೆ ಪ್ರಾರಂಭದ ಹಂತದಲ್ಲಿ ಕೈಗಳನ್ನು ಮೇಲಕ್ಕೆತ್ತಲು ವಿಪರೀತ ಕಷ್ಟವಾದರೆ ಕೂಡಲೇ ಕೈಗಳನ್ನು ಇಳಿಸಿ ನೆಲದ ಮೇಲಿರಿಸಿ. ಆದರೆ ಕ್ರಮೇಣ ಇದು ಅಭ್ಯಾಸವಾಗುತ್ತದೆ. ಕುತ್ತಿಗೆಯನ್ನು ಹಿಂದಕ್ಕೆ ವಾಲಿಸಬೇಡಿ, ಬೆನ್ನುಮೂಳೆಗೆ ಸಮಾನವಾಗಿ ನೆಟ್ಟಗೇ ಇರಲಿ.

ಹಂತ 4

ಈ ಹಂತದಲ್ಲಿ ದೀರ್ಘವಾಗಿ ಉಸಿರಾಡುತ್ತಾ ಎಷ್ಟು ಹೊತ್ತು ಸಾಧ್ಯವೋ ಅಷ್ಟೂ ಹೊತ್ತು ಹಾಗೇ ಇರಿ. ಈ ಆಸನದಲ್ಲಿ ಹೊಟ್ಟೆಯ ಸ್ನಾಯುಗಳಿಗೆ ಅತೀವವಾದ ಒತ್ತಡ ಬೀಳುವ ಕಾರಣ ಪ್ರಾರಂಭದ ಹಂತದಲ್ಲಿ ನೋವು ಪ್ರಾರಂಭವಾದೊಡನೆ ನಿಲ್ಲಿಸಿಬಿಡಿ. ಹೊಟ್ಟೆಯ ಸ್ನಾಯುಗಳು ಸಾಕು ಎಂಬ ಬಳಿಕ ನಿಧಾನವಾಗಿ ಆಸನವನ್ನು ಪ್ರಾರಂಭಿಸಿದ ವಿರುದ್ಧ ಕ್ರಿಯೆಯನ್ನು ಅನುಸರಿಸಿ ಕುಳಿತುಕೊಳ್ಳಿ.

ಪರಿಪೂರ್ಣ ನಾವಾಸನದ ಪ್ರಯೋಜನಗಳು

* ಹೊಟ್ಟೆಯ ಸ್ನಾಯುಗಳನ್ನು ಬಲಪಡಿಸಿ ಕೊಬ್ಬನ್ನು ಕರಗಿಸಲು ಅತ್ಯುತ್ತಮ ಕ್ರಮವಾಗಿದೆ.

* ಬೆನ್ನುಹುರಿ ಮತ್ತು ಬೆನ್ನುಮೂಳೆಯನ್ನೂ ದೃಢಗೊಳಿಸುತ್ತದೆ.

* ಮೂತ್ರಪಿಂಡ, ಥೈರಾಯ್ಡ್ ಗ್ರಂಥಿ, ಕರುಳುಗಳು ಮತ್ತು ಪ್ರೋಸ್ಟೇಟ್ ಗ್ರಂಥಿಗಳಿಗೆ ಹೆಚ್ಚಿನ ಪ್ರಚೋದನೆ ದೊರಕುತ್ತದೆ.

* ಒತ್ತಡದಿಂದ ನಿರಾಳರಾಗಲು ನೆರವಾಗುತ್ತದೆ.

* ಜೀರ್ಣಕ್ರಿಯೆಯನ್ನು ಉತ್ತಮಗೊಳಿಸುತ್ತದೆ.

ಎಚ್ಚರಿಕೆ

ಒಂದು ವೇಳೆ ನಿಮಗೆ ಕುತ್ತಿಗೆ ಅಥವಾ ಬೆನ್ನುನೋವಿನ ತೊಂದರೆ ಇದ್ದರೆ ಈ ಆಸನ ನಿಮಗೆ ತಕ್ಕುದಲ್ಲ. ಅಂತೆಯೇ ಗರ್ಣಿಣಿಯರು ಸರ್ವಥಾ ಈ ಆಸನ ಅನುಸರಿಸಕೂಡದು. ಅಸ್ತಮಾ, ಹೃದಯದ ತೊಂದರೆ, ಕಡಿಮೆ ರಕ್ತದೊತ್ತಡ ಮತ್ತು ಇತ್ತೀಚೆಗೆ ಅತಿಸಾರದಿಂದ ಬಳಲಿದ್ದರೆ ಈ ಆಸನ ಅನುಸರಿಸಬಾರದು.