ಹೆಸರು ಬೇಳೆಯ ಮೋದಕ ರೆಸಿಪಿ

ಗಣೇಶನ ಹಬ್ಬಕ್ಕೆ ಬಗೆ-ಬಗೆಯ ಮೋದಕ ರೆಸಿಪಿಗಳನ್ನು ಮಾಡಲಾಗುವುದು. ನೈವೇದ್ಯಕ್ಕಂತೂ ಮೋದಕವನ್ನು ಇಟ್ಟೇ ಇಡುತ್ತಾರೆ. ಗಣೇಶನಿಗೆ ಪ್ರಿಯವಾದ ಈ ತಿಂಡಿ ಮನೆ-ಮಂದಿಗೂ ತುಂಬಾ ಇಷ್ಟದ ಸಿಹಿ ತಿಂಡಿಯಾಗಿರುವುದು ಮೋದಕದ ಮತ್ತೊಂದು ವಿಶೇಷ.

ಈಗಾಗಲೇ ಹಲವಾರು ಬಗೆಯ ಮೋದಕದ ರೆಸಿಪಿ ನೀಡಿದ್ದೇವೆ, ಇಲ್ಲಿ ನಾವು ಹೆಸರು ಬೇಳೆಯಿಂದ ತಯಾರಿಸುವ ಮೋದಕದ ರೆಸಿಪಿ ನೀಡಿದ್ದೇವೆ ನೋಡಿ:

ಬೇಕಾಗುವ ಸಾಮಾಗ್ರಿಗಳು
ಅಕ್ಕಿ ಅರ್ಧ ಕಪ್
ಹೆಸರು ಬೇಳೆ 1/4 ಕಪ್
ಬೆಲ್ಲ 3/4 ಕಪ್
ತುಪ್ಪ 1 ಚಮಚ
ತೆಂಗಿನ ತುರಿ 1/4 ಕಪ್
ಏಲಕ್ಕಿ ಅರ್ಧ ಚಮಚ
ನೀರು ಒಂದೂವರೆ ಕಪ್

ತಯಾರಿಸುವ ವಿಧಾನ:

* ಹೆಸರು ಬೇಳೆಯನ್ನು ರೋಸ್ಟ್ ಮಾಡಿ ತರಿ-ತರಿಯಾಗಿ ಪುಡಿ ಮಾಡಿ.

* ಅಕ್ಕಿಯನ್ನು ಕೂಡ ತರಿ -ತರಿಯಾಗಿ ಪುಡಿ ಮಾಡಿ.

* ನಂತರ ಈ ಎರಡು ಮಿಶ್ರಣವನ್ನು ಬಟ್ಟಲಿನಲ್ಲಿ ಹಾಕಿ.

* ಈಗ ಪ್ಯಾನ್ ಗೆ ಒಂದೂವರೆ ಕಪ್ ನೀರು ಹಾಕಿ ಕುದಿಸಿ, ನಿರು ಕುದಿಯಲು ಪ್ರಾರಂಭಿಸಿದಾಗ ಮೆಲ್ಲನೆ ಅಕ್ಕಿ ಮತ್ತು ಬೇಳೆಯ ಪುಡಿಯನ್ನು ಉದುರಿಸಿ, ಹೀಗೆ ಉದುರಿಸುವಾಗ ಸೌಟ್ ನಿಂದ ಆಡಿಸಿ, ಇಲ್ಲದಿದ್ದರೆ ಮಿಶ್ರಣ ಉಂಡೆ ಕಟ್ಟುತ್ತದೆ.

* ಈಗ ತುಪ್ಪ ಸೇರಿಸಿ ಚೆನ್ನಾಗಿ ತಿರುಗಿಸಿ, ಪಾತ್ರೆಯ ಬಾಯಿ ಮುಚ್ಚಿ ಕಡಿಮೆ ಉರಿಯಲ್ಲಿ ಬೇಯಿಸಿ.

* ನಂತರ ತುರಿದ ಬೆಲ್ಲ ಮತ್ತು ತೆಂಗಿನಕಾಯಿ ಹಾಕಿ, ಏಲಕ್ಕಿ ಹಾಕಿ ಮಿಕ್ಸ್ ಮಾಡಿ, ನೀರಿನಂಶ ಆವಿಯಾಗುವವರೆಗೆ ಸೌಟ್ ನಿಂದ ಆಡಿಸುತ್ತಾ ಬೇಯಿಸಿ, ನಂತರ ಉರಿಯಿಂದ ಇಳಿಸಿ, ತಣ್ಣಗಾಗಲು ಇಡಿ.
* ನಂತರ ಉಂಡೆ ಕಟ್ಟಿ ಆವಿಯಲ್ಲಿ10 ನಿಮಿಷ ಬೇಯಿಸಿದರೆ ಹೆಸರು ಬೇಳೆಯ ಮೋದಕ ರೆಡಿ.