ಕರುಕುರು ರಿಬ್ಬನ್ ಪಕೋಡ ರೆಸಿಪಿ

ಮಳೆಗಾಲದ ಸಮಯದಲ್ಲಿ ಚಕ್ಕುಲಿ, ಚಿಪ್ಸ್ ಹೀಗೆ ಸ್ವಲ್ಪ ಕರುಮುರು ತಿಂಡಿಗಳನ್ನು ತಿನ್ನಲು ಇಷ್ಟವಾಗುತ್ತದೆ. ಈ ತಿಂಡಿಗಳಲ್ಲದೆ ಬೇರೆ ರೀತಿಯ ಕರುಕುರು ತಿಂಡಿ ತಿನ್ನ ಬಯಸುವವರಿಗೆ ರಿಬ್ಬನ್ ಪಕೋಡದ ರುಚಿ ಇಷ್ಟವಾಗುವುದು. ಈ ರಿಬ್ಬನ್ ಪಕೋಡ ಮಾಡಲು ಸುಲಭವಾಗಿದ್ದು ಮಾಡುವ ವಿಧಾನ ನೋಡಿ ಇಲ್ಲಿದೆ.

ಬೇಕಾಗುವ ಸಾಮಾಗ್ರಿಗಳು:
* ಅಕ್ಕಿ ಹಿಟ್ಟು 1/2 ಕಪ್
* ಕಡಲೆಹಿಟ್ಟು 1/2 ಕಪ್
* ಬೆಣ್ಣೆ 1 ಚಮಚ
* ಕೆಂಪು ಮೆಣಸಿನ ಹುಡಿ 1 ಚಮಚ
* ಕರಿಯಲು ಎಣ್ಣೆ
* ಬಿಸಿ ಎಣ್ಣೆ 1/4 ಸೌಟು
* ಚಿಟಿಕೆಯಷ್ಟು ಇಂಗು
* ರುಚಿಗೆ ತಕ್ಕಷ್ಟು ಉಪ್ಪು

ತಯಾರಿಸುವ ವಿಧಾನ:

1. ಒಂದು ಪಾತ್ರೆಯಲ್ಲಿ ಅಕ್ಕಿ ಹಿಟ್ಟು, ಕಡಲೆ ಹಿಟ್ಟು, ಕೆಂಪು ಮೆಣಸಿನ ಪುಡಿ, ಇಂಗು, ಬೆಣ್ಣೆ, ಬಿಸಿ ಎಣ್ಣೆ, ಸ್ವಲ್ಪ ನೀರು ಹಾಕಿ ಚೆನ್ನಾಗಿ ಮಿಶ್ರಮಾಡಬೇಕು. ಈ ಮಿಶ್ರಣ ಚಕ್ಕುಲಿಯ ಅಚ್ಚಿನಲ್ಲಿ ಹಾಕಿದಾಗ ಸುಲಭವಾಗಿ ಒತ್ತಲಿಕ್ಕೆ ಬರುವ ಹಾಗೆ ಹದವಾಗಿ ಕಲೆಸಬೇಕು.

2. ಬಾಣಲೆಯಲ್ಲಿ ಅರ್ಧದಷ್ಟು ಎಣ್ಣೆ ಹಾಕಿ, ಎಣ್ಣೆಯನ್ನು ಚೆನ್ನಾಗಿ ಕುದಿಸಿ, ಅದಕ್ಕೆ ಚಕ್ಕುಲಿ ಅಚ್ಚಿನಿಂದ ನೇರವಾಗಿ ಹಿಟ್ಟು ಒತ್ತಿ. ಆ ಹಿಟ್ಟು ಎಣ್ಣೆಯಲ್ಲಿ ಕರೆದು ಕಂದು ಬಣ್ಣಕ್ಕೆ ಬರುವಾಗ ತೆಗೆಯಬೇಕು. ಈ ರೀತಿ ಮಾಡಿದರೆ ರಿಬ್ಬನ್ ಪಕೋಡ ರೆಡಿ.

ಇದನ್ನು ಟೀ ಜೊತೆ ಸವಿಯಲು ತುಂಬಾ ರುಚಿಕರವಾಗಿರುತ್ತದೆ.

ಸಲಹೆ:
* ಹಿಟ್ಟು ಕಲೆಸಿದ ಕೂಡಲೇ ಮಾಡಬೇಕು.
* ಇದನ್ನು ಒಂದು ವಾರದವರೆಗೆ ಇಡಬಹುದಾಗಿದೆ.