ಈರುಳ್ಳಿ, ಬೆಳ್ಳುಳ್ಳಿ ಹಾಕದ ಸೌತೆಕಾಯಿ ಸಾರು

ಈರುಳ್ಳಿ ಬೆಲೆ ಏರುತ್ತಿರುವುದು ನೋಡಿದರೆ ಈರುಳ್ಳಿ ಹಾಕದೆ ಅಡುಗೆ ಮಾಡುವ ಪ್ರಸಂಗ ಬಂದರೂ ಬರಬಹುದು. ಈರುಳ್ಳಿ ಹಾಕಿ ಅಡುಗೆ ಮಾಡಿ ಅಭ್ಯಾಸ ಇರುವವರಿಗೆ ಈರುಳ್ಳಿ ಹಾಕದೆ ಅಡುಗೆ ಮಾಡು ಅಂದರೆ ಈರುಳ್ಳಿ ಇಲ್ಲದೆ ಸಾರು ಮಾಡುವುದು ಹೇಗೆ? ಒಂದು ವೇಳೆ ಮಾಡಿದರೂ ಆ ಅಡುಗೆ ರುಚಿಯಾಗಿರುತ್ತದೆಯೇ? ಎಂಬ ಸಂಶಯವಿರುತ್ತದೆ.

ಈರುಳ್ಳಿ- ಬೆಳ್ಳುಳ್ಳಿ ಹಾಕದೆ ಮಾಡುವ ಜೈನ್ ಅಡುಗೆಗಳು ತಿನ್ನಲು ರುಚಿಕರವಾಗಿರುತ್ತವೆ. ಆದ್ದರಿಂದ ಇಲ್ಲಿ ನಾವು ಜೈನ್ ಶೈಲಿಯ ಈರುಳ್ಳಿ ಬೆಳ್ಳುಳ್ಳಿ ಹಾಕದ ಸೌತೆಕಾಯಿ ಸಾರಿನ ರೆಸಿಪಿ ನೀಡಿದ್ದೇವೆ. ಈ ಅಡುಗೆಯನ್ನು ಟ್ರೈ ಮಾಡಿ ನೋಡಿ ರುಚಿ ಇಲ್ಲದಿದ್ದರೆ ಮತ್ತೆ ಕೇಳಿ.

ಬೇಕಾಗುವ ಸಾಮಾಗ್ರಿಗಳು
* 6-7 ಸಾಮಾನ್ಯ ಗಾತ್ರದ ಸೌತೆಕಾಯಿ
* 4 ಚಮಚ ಎಣ್ಣೆ
* 4 ಚಮಚ ಹೆಸರು ಬೇಳೆ
* 2 ಹಸಿ ಏಲಕ್ಕಿ
* 1 ಚಕ್ಕೆ
* 5-6 ಲವಂಗ
* ಅರ್ಧ ಚಮಚ ಅರಿಶಿಣ ಪುಡಿ
* ರುಚಿಗೆ ತಕ್ಕ ಉಪ್ಪು

ತಯಾರಿಸುವ ವಿಧಾನ:

* ಸಾಧಾರಣ ಗಾತ್ರದ ಸೌತೆಕಾಯಿಯ ಸಿಪ್ಪೆ ಸುಲಿದು ಒಂದು ಇಂಚಿನಷ್ಟು ಉದ್ದದ ತುಂಡುಗಳಾಗಿ ಕತ್ತರಿಸಿ ಒಂದು ಪಾತ್ರೆಯಲ್ಲಿಡಿ.

* ಈಗ ಪಾತ್ರೆಯನ್ನು ತೆಗೆದು 4 ಚಮಚ ಎಣ್ಣೆ ಹಾಕಿ ಅದರಲ್ಲಿ ಹೆಸರು ಬೇಳೆ ಹಾಕಿ 4-5 ನಿಮಿಷ ಹುರಿಯಿರಿ. ನಂತರ ಏಲಕ್ಕಿಯ ಸಿಪ್ಪೆ ಸುಲಿದು ಏಲಕ್ಕಿ ಬೀಜಗಳನ್ನು ಹಾಕಿ. ನಂತರ ಚಕ್ಕೆ ಮತ್ತು ಲವಂಗ ಹಾಕಿ ಸೌಟ್ ನಿಂದ ಎರಡು ನಿಮಿಷ ಆಡಿಸಿ.

* ನಂತರ ಕತ್ತರಿಸಿ ಸೌತೆಕಾಯಿ, ರುಚಿಗೆ ತಕ್ಕ ಉಪ್ಪು ಮತ್ತು ಅರಿಶಿಣ ಪುಡಿ ಹಾಕಿ ಸೌತೆಕಾಯಿ ಸ್ವಲ್ಪ ಮೆತ್ತಗಾಗುವವರೆಗೆ ಬೇಯಿಸಿ(ಆಗಾಗ ಸೌಟ್ ನಿಂದ ಆಡಿಸುತ್ತಾ ಇರಿ).

* ಸೌತೆಕಾಯಿ ಬೆಂದು ಸ್ವಲ್ಪ ಮೆತ್ತಗಾದ ಮೇಲೆ ಉರಿಯಿಂದ ಇಳಿಸಿದರೆ ರುಚಿಕರವಾದ ಸೌತೆಕಾಯಿ ಸಾರು ರೆಡಿ.