ಸ್ತನಗಳ ತೊಟ್ಟು ಹೆಚ್ಚು ತುರಿಕೆ ಆಗುತ್ತದೆಯೇ ಇದೇ ಕಾರಣಗಳಿರಬಹುದು ನೋಡಿ!

ಗರ್ಭಾವಸ್ಥೆ

ಗರ್ಭಾವಸ್ಥೆಯ ಪ್ರತಿ ಹಂತದಲ್ಲಿಯೂ ಗರ್ಭವತಿಯ ದೇಹದಲ್ಲಿ ನೂರಾರು ಬಗೆಯ ರಸದೂತಗಳ ಪ್ರಭಾವ ಎದುರಾಗುತ್ತದೆ. ಪರಿಣಾಮವಾಗಿ ದೇಹದಲ್ಲಿ ಕೆಲವಾರು ಬದಲಾವಣೆಗಳು ಕಂಡುಬರುತ್ತವೆ. ದೈಹಿಕ ಬದಲಾವಣೆಯ ಜೊತೆಗೇ ಮಾನಸಿಕವಾಗಿಯೂ ಈ ರಸದೂತಗಳು ಪ್ರಭಾವ ಬೀರುವ ಕಾರಣ ಮನೋಭಾವದಲ್ಲಿ ಏರುಪೇರು ಕಾಣಿಸಿಕೊಳ್ಳುತ್ತದೆ.

ಬಹುತೇಕ ಎಲ್ಲಾ ಗರ್ಭವತಿಯರಲ್ಲಿ ಕಾಣಿಸಿಕೊಳ್ಳುವ ಅತಿ ಸಾಮಾನ್ಯ ತ್ವಚೆಗೆ ಸಂಬಂಧಿಸಿದ ತೊಂದರೆ ಎಂದರೆ ಸ್ತನತೊಟ್ಟುಗಳ ತುರಿಕೆ. ಇದಕ್ಕೆ ಪ್ರಮುಖ ಕಾರಣ ಗರ್ಭದಲ್ಲಿರುವ ಮಗುವಿನ ಬೆಳವಣಿಗೆಗೆ ಅನುಗುಣವಾಗಿ ಗರ್ಭವತಿಯ ದೇಹ ಹಿಗ್ಗುತ್ತಿದ್ದಂತೆಯೇ ಇದಕ್ಕೆ ಅನುಸಾರವಾಗಿ ಚರ್ಮವೂ ಸೆಳೆತಕ್ಕೊಳಗಾಗುತ್ತದೆ. ಹೊಟ್ಟೆಯ ಭಾಗದ ಸ್ಟ್ರೆಚ್ ಮಾರ್ಕ್ಸ್ ಎಂದು ಕರೆಯಲ್ಪಡುವ ಗುರುತುಗಳು ಇದರಲ್ಲಿ ಪ್ರಮುಖವಾಗಿವೆ.

ಸ್ತನಪಾನ

ಇನ್ನೊಂದು ಕಾರಣ ಮಗುವಿಗೆ ಹಾಲೂಡಿಸುವ ಮೂಲಕ ಎದುರಾಗುವ ತುರಿಕೆಯಾಗಿದೆ. ಕೆಲವೊಮ್ಮೆ ಹುಟ್ಟಿದ ಮಗು ಹಾಲು ಕುಡಿಯುವ ಪ್ರಯತ್ನದಲ್ಲಿಯೂ ತುರಿಕೆ ಎನಿಸಬಹುದು. ಕೆಲವೊಮ್ಮೆ ಊದಿಕೊಂಡ ಹಾಲಿನ ಗ್ರಂಥಿಗಳು ಅಥವಾ ಎದೆಹಾಲು ತೊಟ್ಟಿನಿಂದ ಹೊರಬಿದ್ದು ಸ್ತನತೊಟ್ಟಿನ ಭಾಗದಲ್ಲಿ ತಾಕಿದ್ದು ಕೊಂಚ ಹೊತ್ತಿನ ಬಳಿಕ ಒಣಗಿದರೆ ಇದೂ ತುರಿಕೆಗೆ ಕಾರಣವಾಗಬಹುದು. ಸ್ವಚ್ಛತೆಯನ್ನು ಕಾಪಾಡುವ ಮೂಲಕ ಈ ತುರಿಕೆಯನ್ನು ಆದಷ್ಟೂ ಇಲ್ಲವಾಗಿಸಬಹುದು.

ರಜೋನಿವೃತ್ತಿ

ರಜೋನಿವೃತ್ತಿಯ ದಿನಗಳಲ್ಲಿರುವ ಮಹಿಳೆಯರ ತ್ವಚೆ ಹೆಚ್ಚು ಒಣದಾಗಿರುತ್ತದೆ ಹಾಗೂ ಸುಲಭವಾಗಿ ತುರಿಕೆಗೆ ಒಳಗಾಗುತ್ತದೆ. ದೇಹದ ರಸದೂತಗಳ ಏರುಪೇರಿನ ಜೊತೆಗೇ ತ್ವಚೆಯಲ್ಲಿ ಉತ್ಪತ್ತಿಯಾಗುವ ನೈಸರ್ಗಿಕ ತೈಲಗಳೂ ಕಡಿಮೆ ಉತ್ಪತ್ತಿಯಾಗುವ ಕಾರಣ ದೇಹದ ಎಲ್ಲಾ ಭಾಗದಲ್ಲಿಯೂ ತುರಿಕೆ ಕಾಣಿಸಿಕೊಂಡರೂ ಸೂಕ್ಷ್ಮ ಭಾಗಗಳಾದ ಸ್ತನತೊಟ್ಟುಗಳಲ್ಲಿ ತುರಿಕೆ ಹೆಚ್ಚುತ್ತದೆ.

ಕ್ಯಾಂಡಿಡೈಯಾಸಿಸ್

ಇದು ಶಿಲೀಂಧ್ರದ ಸೋಂಕು ಆಗಿದೆ ಹಾಗೂ ಸ್ತನಪಾನ ಮಾಡಿಸುವ ತಾಯಂದಿರಿಗೆ ಅತಿ ಹೆಚ್ಚಾಗಿ ಬಾಧಿಸುತ್ತದೆ. ಸ್ತನತೊಟ್ಟು ಮತ್ತು ಹಾಲು ಒಸರುವ ತೂತಿನ ಭಾಗದಲ್ಲಿ ಈ ಶಿಲೀಂಧ್ರದ ಸೋಂಕು ಅತಿ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತದೆ. ಈ ಭಾಗದಲ್ಲಿ ಚಿಕ್ಕದಾಗಿ ಹೊಳಪುಳ್ಳ ಪಕಳೆ ಎದ್ದಂತೆ ಚರ್ಮದ ಹೊರಪದರ ಒಣಗುತ್ತದೆ. ಅಲ್ಲದೇ ಹಾಲು ಕುಡಿಸುವಾಗ ತುರಿಕೆಯ ಜೊತೆಗೇ ಚಿಕ್ಕದಾಗಿ ಉರಿಯುವಂತೆಯೂ ಅನ್ನಿಸುತ್ತದೆ. ಸ್ತನತೊಟ್ಟಿನ ತುದಿಭಾಗದಿಂದ ಬುಡದವರೆಗೂ ಚಿಕ್ಕ ಚಿಕ್ಕ ಕೆಂಪಗಿನ ಗುಳ್ಳೆಗಳು ಕಾಣಿಸಿಕೊಂಡು ಅಪಾರ ಉರಿ ತರಿಸಬಹುದು. ತಕ್ಷಣವೇ ಚರ್ಮ ವೈದ್ಯರನ್ನು ಕಂಡು ಚಿಕಿತ್ಸೆ ಪಡೆಯಬೇಕು.

ಕ್ಯಾನ್ಸರ್

ವಿವಿಧ ಕ್ಯಾನ್ಸರ್ ಗಳಿಗೆ ನೀಡಲಾಗುವ ಚಿಕಿತ್ಸೆಯಿಂದಲೂ ತುರಿಕೆ ಎದುರಾಗಬಹುದು. ರೇಡಿಯೇಶನ್ ಥೆರಪಿ ಯಿಂದ ಚರ್ಮ ಅತೀವವಾಗಿ ಒಣಗುತ್ತದೆ. ಅಲ್ಲದೇ ಖೀಮೋಥೆರಪಿಯಲ್ಲಿ ನೀಡಲಾಗುವ ಆಲ್ಕಲಾಯ್ಡುಗಳು ಮತ್ತು ಆಂಟಿ ಮೆಟಾಬೊಲೈಟುಗಳು ಮೊದಲಾದ ಔಷಧಿಗಳು ತೀವ್ರ ತುರಿಕೆ ಈ ಸ್ಥಿತಿಗೆ ಕಾರಣವಾಗುತ್ತವೆ.