ಗರ್ಭಾವಸ್ಥೆಯಲ್ಲಿ ಕಾಡುವ ಶೀತ-ಕೆಮ್ಮಿಗೆ ಫಲಪ್ರದ ಸಲಹೆ

ಕಟ್ಟಿರುವ ಮೂಗಿಗೆ ಉಪ್ಪುನೀರಿನ ಚಿಕಿತ್ಸೆ

ಸಾಮಾನ್ಯವಾಗಿ ಶೀತದಿಂದ ಮೂಗು ಕಟ್ಟಿಬಿಡುತ್ತದೆ. ಇದಕ್ಕೆ ಉಪ್ಪುನೀರಿನ ದ್ರಾವಣ ಉತ್ತಮ ಪರಿಹಾರವಾಗಿದೆ. ಇದು saline nasal drops ಎಂಬ ಹೆಸರಿನಲ್ಲಿ ಔಷಧಿ ಅಂಗಡಿಗಳಲ್ಲಿ ಲಭ್ಯವಿದೆ. ಇದು ಒಂದು ಸುರಕ್ಷಿತ ವಿಧಾನವಾಗಿದ್ದು ಮಗುವಿಗೂ ಯಾವುದೇ ಅಪಾಯವಿಲ್ಲ.

ಹಬೆಯ ಚಿಕಿತ್ಸೆ

ಶೀತದ ಕಾರಣ ಮೂಗು ಕಟ್ಟಿಕೊಂಡಿದ್ದರೆ ಹಬೆಯ ಉಪಚಾರವೂ ನಿಮಗೆ ಉತ್ತಮವಾಗಿದೆ. ಆದರೆ ಇದಕ್ಕೆ ಕೆಲವರು ವಿಕ್ಸ್ ಮೊದಲಾದ ದ್ರಾವಣ ಅಥವಾ ಎಣ್ಣೆಗಳನ್ನು ಸೇರಿಸಿ ಹೆಚ್ಚಿನ ಪರಿಣಾಮ ಅಪೇಕ್ಷಿಸುತ್ತಾರೆ. ಇದು ನಿಮಗೆ ಸರ್ವಥಾ ಸಲ್ಲದು. ನಿಮ್ಮ ಆರೋಗ್ಯಕ್ಕೆ ಕೇವಲ ನೀರಿನ ಹಬೆ ಮಾತ್ರ ಸಾಕು. ಒಂದು ವೇಳೆ ಅಗತ್ಯವೆನಿಸಿದರೆ ನಿಮ್ಮ ವೈದ್ಯರೇ ಇದಕ್ಕೆ ಏನು ಸೇರಿಸಬೇಕೆಂದು ಸಲಹೆ ನೀಡುತ್ತಾರೆ.

ಸಾಕಷ್ಟು ವಿಶ್ರಾಂತಿ ಪಡೆಯಿರಿ

ಮೂರನೆಯ ತ್ರೈಮಾಸಿಕದಲ್ಲಿ ಆವರಿಸುವ ಶೀತ ಹೆಚ್ಚು ಆಯಾಸವನ್ನುಂಟುಮಾಡುತ್ತದೆ. ಅದರಲ್ಲೂ ನೀವು ಉದ್ಯೋಗಸ್ಥೆಯಾಗಿದ್ದರೆ ಕೆಲಸದ ಸಮಯದಲ್ಲಿ ಆರಾಮ ತೆಗೆದುಕೊಳ್ಳಲೂ ಸಾಧ್ಯವಾಗದಿರಬಹುದು. ಆದರೆ ಈ ಅವಧಿಯಲ್ಲಿ ನಿಮಗೆ ಸಾಕಷ್ಟು ಆರಾಮದ ಅವಶ್ಯಕತೆ ಇದ್ದು ವಿರಾಮ ಹೆಚ್ಚು ತೆಗೆದುಕೊಳ್ಳಲು ಕ್ರಮ ಕೈಗೊಳ್ಳುವುದು ಅನಿವಾರ್ಯವಾಗಿದೆ.

ಶುಂಠಿ ಬೆರೆಸಿದ ಟೀ ಕುಡಿಯಿರಿ

ಹಸಿಶುಂಠಿಯ ರಸ ಬೆರೆಸಿದ ಟೀ ಈ ಅವಧಿಯಲ್ಲಿ ಶೀತ ಮತ್ತು ಕೆಮ್ಮು ಕಡಿಮೆಮಾಡಲು ಉತ್ತಮವಾದ ಆಯ್ಕೆಯಾಗಿದೆ. ನಿತ್ಯ ಮೂರರಿಂದ ನಾಲ್ಕು ಕಪ್ ಹಾಲು ಬೆರೆಸದ ಶುಂಠಿಯ ಚಹಾ ಸೇವಿಸುವ ಮೂಲಕ ಮೂರು ಅಥವಾ ನಾಲ್ಕು ದಿನಗಳಲ್ಲಿಯೇ ಶೀತ ಮತ್ತು ಕೆಮ್ಮು ಹತೋಟಿಗೆ ಬರುತ್ತದೆ.

ಜೇನು ಸೇರಿಸಿದ ಟೀ ಸೇವಿಸಿ

ಬಹಳ ಹಿಂದಿನಿಂದಲೂ ಜೇನನ್ನು ಶೀತ ಮತ್ತು ಕೆಮ್ಮಿನ ಪರಿಹಾರವಾಗಿ ಬಳಸಲಾಗುತ್ತಾ ಬರಲಾಗಿದೆ. ನಿಮ್ಮ ನಿತ್ಯದ ಟೀ (ಹಾಲಿಲ್ಲದಿದ್ದರೆ ಉತ್ತಮ) ಕಪ್ ನಲ್ಲಿ ಒಂದು ಚಮಚ ಶುದ್ಧವಾದ ಜೇನುತುಪ್ಪವನ್ನು ಕದಡಿ ದಿನಕ್ಕೆ ನಾಲ್ಕಾರು ಬಾರಿ ಕುಡಿಯುವ ಮೂಲಕವೂ ಕೆಮ್ಮು ಮತ್ತು ಶೀತ ಕಡಿಮೆಯಾಗುತ್ತದೆ. ಅದರಲ್ಲೂ ಕಫ ಕಟ್ಟಿಕೊಂಡಿದ್ದರೆ ಒಂದು ಲೋಟ ಬರೆಯ ಬಿಸಿನೀರಿಗೆ ಒಂದು ಚಮಚ ಜೇನು ಸೇರಿಸಿ ಎಷ್ಟು ಸಾಧ್ಯವೋ ಅಷ್ಟು ಬಿಸಿಯಾಗಿ ಕುಡಿಯಿರಿ. ಇದರಲ್ಲಿ ಯಾವುದೇ ಅಡ್ಡಪರಿಣಾಮಗಳಿಲ್ಲದಿದ್ದು ಮಗುವಿಗೂ ನಿರಪಾಯಕಾರಿಯಾಗಿದೆ.