ಸಾರ್ವಜನಿಕ ಅನಿರೀಕ್ಷಿತ ಮುಟ್ಟಿನ ಸ್ರಾವವನ್ನು ನಿರ್ವಹಿಸಿದ ಬಗೆಯನ್ನು ಹಂಚಿಕೊಂಡ ಮಹಿಳೆಯರು

ಒಂದು ಟ್ಯಾಕ್ಸಿ ಬಾಡಿಗೆಗೆ ಪಡೆದು ಮನೆಗೆ ಬಂದೆ

ನಾವೊಂದು ಪಾರ್ಟಿಗೆ ಹೋಗುತ್ತಿದ್ದೆವು, ಇದರಲ್ಲಿ ಪುರುಷರೂ ಇದ್ದರು. ಅಂದು ನನಗೆ ಮಾಸಿಕ ಸ್ರಾವದ ನಾಲ್ಕನೆಯ ದಿನವಾಗಿದ್ದು ಹೆಚ್ಚಿನದೆಲ್ಲಾ ಹೋಗಿ ಇಂದೇನೂ ಹೆಚ್ಚಿರಲಿಕ್ಕಿಲ್ಲ ಎಂದು ನನ್ನ ಎಣಿಕೆಯಾಗಿತ್ತು. ಆದರೆ ನನ್ನ ನಂಬಿಕೆಗೆ ವ್ಯತಿರಿಕ್ತವಾಗಿ ನಾಲ್ಕನೆಯ ದಿನವೂ ಮೊದಲ ದಿನದಂತೆಯೇ ಭಾರೀ ಪ್ರಮಾಣದ ಸ್ರಾವ ನನ್ನಿಂದ ಹರಿಯತೊಡಗಿತು. ಸಾಮಾನ್ಯ ಸ್ರಾವವಾಗಬಹುದೆಂಬ ನಿರೀಕ್ಷೆಯಿಂದ ಮಧ್ಯಮ ಪ್ರಾಬಲ್ಯದ ಪ್ಯಾಡ್ ಧರಿಸಿಕೊಂಡು ಬಂದಿದ್ದರೂ ಕೆಲವೇ ಕ್ಷಣಗಳಲ್ಲಿ ಇದು ಪೂರ್ಣವಾಗಿ ತೋಯ್ದು ನಾನು ತೊಟ್ಟ ಶರಾಯಿಯಿಂದ ಹೊರಸೋರತೊಡಗಿತು. ಆಗ ತಕ್ಷಣ ನಾನೇನು ಮಾಡಿದೆ ಎಂದರೆ ನಾನು ಮನೆಗೆ ಹೋಗುತ್ತಿದ್ದೇನೆ ಎಂದು ನನ್ನ ಸ್ನೇಹಿತೆಯರಿಗೆ ತಿಳಿಸಿ ತಕ್ಷಣವೇ ಹೊರಬಂದು ಟ್ಯಾಕ್ಸಿಯೊಂದನ್ನು ಹಿಡಿದು ನೇರವಾಗಿ ಮನೆಗೆ ಬಂದೆ. ಅಂದು ಪಾರ್ಟಿಯಲ್ಲಿ ಮಂದ ಬೆಳಕಿದ್ದುದು ಹಾಗೂ ನಾನೂ ಗಾಢವರ್ಣದ ದಿರಿಸನ್ನು ಧರಿಸಿದ್ದುದು ಇತರರಿಗೆ ಈ ತೊಂದರೆಯನ್ನು ಕಾಣದಿರಲು ಸಾಧ್ಯವಾಗಿತ್ತು. ಯಾರೂ ನೋಡಿರಲಿಕ್ಕಿಲ್ಲ ಎಂದು ನನ್ನ ಭಾವನೆ.

ನಾನು 'ಕುಛ್ ಕುಛ್ ಹೋತಾ ಹೈ' ಚಿತ್ರದ ಮಾದರಿಯಲ್ಲಿ ಮೇಲುಡುಪನ್ನು ಕಟ್ಟಿಕೊಂಡು ಪಾರಾದೆ

'ಕುಛ್ ಕುಛ್ ಹೋತಾ ಹೈ' ನಮಗೆ ಹಲವಾರು ಸಂಗತಿಗಳನ್ನು ಕಲಿಸಿದೆ. ಇದರಲ್ಲಿ ಎರಡು ನನಗೆ ಹೆಚ್ಚು ಪ್ರಿಯವಾಗಿವೆ. ಮೊದಲನೆಯದು ಸ್ನೇಹ. ಇನ್ನೊಂದು ಅನಿರೀಕ್ಷಿತ ಸ್ರಾವದ ಸಮಯದಲ್ಲಿ ನಿಮ್ಮ ಮೇಲುಡುಪನ್ನು ಸೊಂಟಕ್ಕೆ ಕಟ್ಟಿಕೊಂಡು ಮುಜುಗರದಿಂದ ಪಾರಾಗುವುದು. ಶರೀರದ ಮೇಲ್ಭಾಗದಲ್ಲಿ ತೊಡುವ ಉಡುಪನ್ನು ಲುಂಗಿಯ ರೀತಿಯಲ್ಲಿ ಸೊಂಟಕ್ಕೆ ಸುತ್ತಿಕೊಳ್ಳುವ ಮೂಲಕ ಸ್ರಾವದಿಂದ ತೋಯ್ದಿದ್ದ ಹಿಂಭಾಗವನ್ನು ಈ ಮೂಲಕ ಮರೆಮಾಚಿದಂತಾಯಿತು. ಒಮ್ಮೆಯಂತೂ ಕಾಲೇಜಿನಿಂದ ಹೊರಬರುವಾಗ ಸ್ರಾವದಿಂದ ಉಡುಪು ಮಲಿನಗೊಂಡಿತ್ತು. ಆಗ ಇದೇ ವಿಧಾನ ಬಳಸಿ ಮುಜುಗರದಿಂದ ಪಾರಾದೆ.

ಒಂದು ಹೊಸ ಪ್ಯಾಂಟ್ ಖರೀದಿಸಿ ಬದಲಿಸಿಕೊಂಡೆ

ಒಮ್ಮೆ ಮಾಲ್ ಒಂದರಲ್ಲಿ ಖರೀದಿ ಮಾಡುತ್ತಿದ್ದಾಗ ಅನಿರೀಕ್ಷಿತವಾಗಿ ಸ್ರಾವ ಎದುರಾಗಿತ್ತು. ಅಂದೇ ನನ್ನ ಮಾಸಿಕ ದಿನಗಳು ಪೂರ್ಣ ಭರಾಟೆಯಿಂದ ಪ್ರಾರಂಭವಾಗಿತ್ತು. ಸ್ರಾವದ ಕಾರಣ ನಾನು ತೊಟ್ಟ ಜೀನ್ಸ್ ಸಹಾ ತೋಯತೊಡಗಿತು. ಹೆಚ್ಚು ಸಮಯ ಕಳೆಯದೇ ತಕ್ಷಣವೇ ಸಮೀಪದ ಅಂಗಡಿಯೊಂದರಿಂದ ನೈರ್ಮಲ್ಯ ಪ್ಯಾಡ್ ಗಳನ್ನೂ ಹೊಸ ಜೀನ್ಸ್ ಒಂದನ್ನೂ, ಒಳ ಉಡುಪನ್ನೂ ತಕ್ಷಣವೇ ಖರೀದಿಸಿ ಪಕ್ಕದಲ್ಲಿದ್ದ ಶೌಚಾಲಯದಲ್ಲಿ ತಕ್ಷಣವೇ ಬದಲಿಸಿಕೊಂಡೆ. ಹಾಗಾಗಿ ನನಗೆ ಮುಜುಗರಕ್ಕೆ ಒಳಗಾಗುವ ಸಂದರ್ಭ ಎದುರಾಗಲಿಲ್ಲ.

ಮೊದಲ ಸ್ರಾವವಾಗಿದ್ದರೂ ಹೆಚ್ಚೇನೂ ತೊಂದರೆಯಾಗಲಿಲ್ಲ

ಅಂದು ನಾನು ನನ್ನ ಮೆಚ್ಚಿನ ಜೀನ್ಸ್ ತೊಟ್ಟು ನನ್ನ ಸ್ನೇಹಿತೆಯರೊಂದಿಗೆ ಕೆಫೆಯೊಂದಕ್ಕೆ ಹೋಗಿದ್ದೆ. ಅಂದೇ ಅನಿರೀಕ್ಷಿತವಾಗಿ ನನ್ನ ಮಾಸಿಕ ಸ್ರಾವ ಪ್ರಾರಂಭವಾಗಿತ್ತು. ಮೊದಲ ದಿನ ಸಾಮಾನ್ಯವಾಗಿ ಅಷ್ಟು ಸ್ರಾವವಿರುವುದಿಲ್ಲವಾದರೂ ಅಂದು ಬಹಳವೇ ಸ್ರಾವವಾಗಿತ್ತು. ಆದರೂ, ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ಇದು ಅಸಹಜ ಎಂದೆನಿಸಲಿಲ್ಲ. ವಾಸ್ತವವಾಗಿ ದೇಹದ ಇತರ ಯಾವುದೋ ಅಂಗಕ್ಕೆ ಗಾಯವಾದಾಗ ಒಸರುವ ರಕ್ತದಿಂದ ನಮಗೆ ಮುಜುಗರ ಎದುರಾಗುತ್ತದೆಯೇ? ಹಾಗಿದ್ದಾಗ ನಿಸರ್ಗನಿಯಮದ ಈ ಸ್ರಾವಕ್ಕೇಕೆ ನಾವು ಮುಜುಗರ ಅನುಭವಿಸಬೇಕು? ಇದರ ಮೂಲಕ ಬಟ್ಟೆಗಳು ತೋಯುವುದು ಅನಿವಾರ್ಯ. ಇದರಲ್ಲಿ ತೊಂದರೆಯೆಲ್ಲಿ ಬಂತು? ಅಂದು ನಾನು ನಿರಾಳವಾಗಿಯೇ ಹೊಸ ಪ್ಯಾಡ್ ಗೆ ಬದಲಿಸಿಕೊಂಡೆ. ತೊಟ್ಟಿದ್ದ ಜೀನ್ಸ್ ಕಳಚಿ ಕಲೆಯಿದ್ದಲ್ಲಿ ನೀರಿನಿಂದ ಚೆನ್ನಾಗಿ ತೊಳೆದು ಇದನ್ನೇ ತೊಟ್ಟು ಸುಮಾರು ಒಂದು ಘಂಟೆಯ ಕಾಲ ಪ್ಲಾಸ್ಟಿಕ್ಕಿನ ಕುರ್ಚಿಯೊಂದರ ಮೇಲೆ ಕುಳಿತೆ. ಅಲ್ಲದೇ ಯಾವುದೇ ಕಲೆ ಉಳಿಯದಂತೆ ಸ್ವಚ್ಛಗೊಳಿಸಿ ಬಳಿಕ ಅಲ್ಲಿಂದ ನಿರ್ಗಮಿಸಿದೆ.

ಬೀದಿಕಾಮುಕರ ಟೀಕೆ ಎದುರಿಸಬೇಕಾಗಿ ಬಂದು ನನ್ನನ್ನೇ ಹಳಿದುಕೊಂಡೆ

ಕೆಲವು ವರ್ಷಗಳ ಹಿಂದೆ ನನಗಿನ್ನೂ ಚಿಕ್ಕ ವಯಸ್ಸಾಗಿದ್ದು ಮಾಸಿಕ ಸ್ರಾವದ ಬಗ್ಗೆ ಮುಜುಗರವಿತ್ತು. ಅಂದು ನನ್ನ ಚಿಕ್ಕ ತಂಗಿಯನ್ನು ಶಾಲೆಯಿಂದ ಕರೆತರಲು ಹೋಗಿ ಹಿಂದಿರುಗುತ್ತಿದ್ದಾಗ ಅನಿರೀಕ್ಷಿತವಾಗಿ ಸ್ರಾವ ಎದುರಾಗಿತ್ತು. ಇದರ ಕಲೆ ಪ್ರಕಟಗೊಳ್ಳುತ್ತಿದ್ದಂತೆಯೇ ಅಲ್ಲಿದ್ದ ಬೀದಿಕಾಮುಕರ ಗುಂಪೊಂದು ಇದನ್ನು ಗಮನಿಸಿ ಟೀಕೆ ಮಾಡತೊಡಗಿದರು. 'ಈ ಕೆಲೆ ತೊಲಗಿಸಲು ಈಗ ಟೈಡ್ ಡಿಟರ್ಜೆಂಟೇ ಬೇಕು' ಎಂಬೆಲ್ಲಾ ಮಾತುಗಳನ್ನು ಆಡತೊಡಗಿದರು. ಈ ಟೀಕಾಪ್ರಹಾರಗಳನ್ನು ಎದುರಿಸಲಾಗದೇ ಹಿಂದಿರುಗಿ ಹೆಚ್ಚೂ ಕಡಿಮೆ ಓಡಿಯೇ ಮನೆಗೆ ಬಂದಿದ್ದೆ. ಆದರೆ ಅಂದು ಆ ಗುಂಪಿಗೆ ಸರಿಯಾಗಿ ಬುದ್ದಿ ಕಲಿಸಬೇಕಿತ್ತು ಎಂದು ಈಗ ಅನ್ನಿಸುತ್ತಿದೆ.

ನನ್ನ ಸ್ನೇಹಿತೆಯರು ನನ್ನನ್ನು ಮುಂದಿರಿಸಿ ಹಿಂದಿನಿಂದ ಹಿಂಬಾಲಿಸಿದರು

ಒಮ್ಮೆ ಶಾಲೆಯ ತರಗತಿಯಲ್ಲಿ ಬಿಳಿ ಸಮವಸ್ತ್ರ ಧರಿಸಿದ್ದ ದಿನ ನನಗೆ ಅನಿರೀಕ್ಷಿತವಾಗಿ ಸ್ರಾವ ಪ್ರಾರಂಭವಾಯಿತು. ನಾನು ನಿಂತಾಗ ನನ್ನ ಹಿಂದಿದ್ದ ಸ್ನೇಹಿತೆ ನನ್ನ ಸ್ಕರ್ಟ್ ಮಲಿನವಾಗಿದೆ ಎಂದು ತಿಳಿಸಿದಳು. ಈ ಸಂದರ್ಭವನ್ನು ಮುಜುಗರಕ್ಕೆ ಎದುರಾಗಲು ಇಚ್ಛಿಸದ ನನ್ನ ಸ್ನೇಹಿತೆಯರು ನನ್ನನ್ನು ಮುಂದಿರಿಸಿ ತಾವು ಹಿಂದಿನಿಂದ ನನ್ನನ್ನು ಹಿಂಬಾಲಿಸತೊಡಗಿದರು. ಹಾಗಾಗಿ ಇತರರು ಇದನ್ನು ನೋಡುವುದರಿಂದ ರಕ್ಷಣೆ ಪಡೆದಂತಾಯಿತು ರಸ್ತೆಗೆ ಬಂದ ಬಳಿಕ ರಿಕ್ಷಾವೊಂದನ್ನು ಹತ್ತಿ ನೇರವಾಗಿ ಮನೆಗೆ ಬಂದಿದ್ದೆ.

ನನ್ನ ಟೀ-ಶರ್ಟ್ ಅನ್ನು ಕೆಳಕ್ಕೆಳೆದುಕೊಂಡಿದ್ದೆ

ಅಂದು ನನ್ನ ಮಾಸಿಕ ದಿನಗಳ ಮೂರನೆಯ ದಿನವಾಗಿತ್ತು ಹಾಗೂ ಅಂದು ಹೆಚ್ಚಿನ ಸ್ರಾವವನ್ನು ನಿರೀಕ್ಷಿಸಿರಿರಲಿಲ್ಲ. ಆದರೂ ಅಂದು ನಿರೀಕ್ಷೆಗೂ ಮೀರಿದ ಸ್ರಾವವಾಗಿ ನನ್ನ ಸ್ಕರ್ಟ್ ತೋಯತೊಡಗಿತು. ಅಂದು ನಾನು ಹಳೆಯ ವಸ್ತುಗಳನ್ನು ಮಾರಾಟ ಮಾಡುವ ಸ್ಥಳದಲ್ಲಿದ್ದೆ ಹಾಗೂ ಸಮೀಪದಲ್ಲೆಲ್ಲೂ ಶೌಚಾಲಯವೂ ಇರಲಿಲ್ಲ. ಈ ಸಂದರ್ಭದಲ್ಲಿ ನನಗೆ ಹೊಳೆದದ್ದೆಂದರೆ ನಾನು ತೊಟ್ಟಿದ್ದ ಟೀ ಶರ್ಟ್ ಅನ್ನು ಕೆಳಕ್ಕೆಳೆದು ತೋಯ್ದ ಭಾಗವನ್ನು ಮರೆಮಾಚಿಕೊಂಡಿದ್ದೆ.