ಕತ್ತೆಗೆ ಜಿಬ್ರಾದ ಬಣ್ಣ ಬಳಿದ ಮೃಗಾಲಯದ ಸಿಬ್ಬಂದಿ ಮಾಡಿದ್ದೇನು?

ಕೆಲವೊಂದು ಟಿವಿ ಚಾನೆಲ್ ಗಳನ್ನು ನೋಡಿದರೆ ಅಲ್ಲಿ ಜನರನ್ನು ಮೂರ್ಖರನ್ನಾಗಿಸಿಕೊಂಡು ನಗಿಸುವಂತಹ ಕಾರ್ಯಕ್ರಮಗಳು ಕಾಣಸಿಗುತ್ತದೆ. ಮೂರ್ಖರನ್ನಾಗಿಸಲು ಹೆಚ್ಚಿನ ಬುದ್ಧಿ, ಕ್ರಿಯಾತ್ಮಕತೆ ಹಾಗೂ ಚುರುಕುತನ ಬೇಕಾಗುತ್ತದೆ. ಈ ಕಾರ್ಯಕ್ರಮದಲ್ಲಿ ಕೆಲವರು ಇದರಲ್ಲಿ ಮೂರ್ಖರಾದರೂ ಇನ್ನು ಕೆಲವರು ಮೂರ್ಖರನ್ನಾಗಿಸಲು ಬಂದವರನ್ನೇ ಬೆಚ್ಚಿಬೀಳಿಸಿದ್ದಾರೆ. ಇಂತಹ ಘಟನೆಯೊಂದು ಈಜಿಪ್ಟ್ ನ ಮೃಗಾಲಯವೊಂದರಲ್ಲಿ ನಡೆದಿದೆ. ಇಲ್ಲಿಗೆ ಬರುವಂತಹ ಪ್ರವಾಸಿಗರನ್ನು ಮೋಸ ಮಾಡುವ ಸಲುವಾಗಿ ಮೃಗಾಲಯದ ಸಿಬ್ಬಂದಿ ಕತ್ತೆಯೊಂದಕ್ಕೆ ಜಿಬ್ರಾದ ಬಣ್ಣ ಹಚ್ಚಿದ್ದಾರೆ.

ಇದು ದೊಡ್ಡ ಜೋಕ್ ಎಂದು ನಿಮಗೆ ಅನಿಸಬಹುದು. ಆದರೆ ಇದು ನಿಜ. ಕತ್ತೆ ಜಿಬ್ರಾವಾಗಿರುವುದನ್ನು ಕೆಲವು ಜಾಣ ಪ್ರವಾಸಿಗರು ಪತ್ತೆ ಹಚ್ಚಿ, ಮೃಗಾಲಯದ ಸಿಬ್ಬಂದಿಯೇ ಬೆಚ್ಚಿಬೀಳುವಂತೆ ಮಾಡಿದ್ದಾರೆ.

ಕತ್ತೆಗೆ ಬಿಳಿ ಹಾಗೂ ಕಪ್ಪು ಬಣ್ಣವನ್ನು ಹಚ್ಚಿ ಜಿಬ್ರಾದಂತೆ ಮಾಡಿದ್ದರು. ಆದರೆ ಬಣ್ಣ ಕರಗಲು ಆರಂಭವಾದಾಗ ಏನಾಯಿತು ನೀವೇ ನೋಡಿ...

ಕೈರೋದಲ್ಲಿ ವಿದ್ಯಾರ್ಥಿಯಾಗಿರುವಂತಹ ಮಹಮ್ಮದ್ ಎ. ಸರಹಾನಿ ಈ ವಿಚಿತ್ರ ಜಿಬ್ರಾದ ಫೋಟೊ ತೆಗೆದು ಅದನ್ನು ಶೇರ್ ಮಾಡಿದ್ದಾನೆ. ಇದಕ್ಕೆ ಉದ್ದ ಕೂದಲು ಮಾತ್ರವಲ್ಲದೆ ದೇಹಕ್ಕೆ ವಿಚಿತ್ರವಾಗಿ ಬಣ್ಣ ಕೂಡ ಹಚ್ಚಲಾಗಿತ್ತು. ತುಂಬಾ ಹತ್ತಿರದಿಂದ ಪರಿಶೀಲನೆ ಮಾಡಿದರೆ ಈ ಜಿಬ್ರಾವು ತನ್ನ ಜಾತಿಯ ವಿಶೇಷ ಕೇಸರ ಹೊಂದಿಲ್ಲವೆಂದು ತಿಳಿದುಬಂತು. ಕತ್ತೆಯ ಕೂದಲು ಕತ್ತರಿಸಿ ನುಣ್ಣಗೆ ಮಾಡಿಕೊಂಡು ಅದಕ್ಕೆ ಜಿಬ್ರಾದಂತೆ ಬಿಳಿ ಹಾಗೂ ಕಪ್ಪು ಬಣ್ಣ ಹಚ್ಚಿದ್ದಾರೆ.