ಮೊಟ್ಟೆಯ ತಾಜಾತನ ಪರೀಕ್ಷಿಸುವುದು ಹೇಗೆ?

1. ಮೊಟ್ಟೆ ನೀರಿನಲ್ಲಿ ಮುಳುಗಿತೇ ಇಲ್ಲಾ ತೇಲಿತೇ?

ಮೊಟ್ಟೆಯ ತಾಜಾತನ ಪರೀಕ್ಷಿಸಲು ಈ ಟಿಪ್ಸ್ ತುಂಬಾ ಸಹಕಾರಿಯಾಗಿದೆ. ನೀವು ತಂದ ಮೊಟ್ಟೆಯನ್ನು ನೀರು ತುಂಬಿದ ಲೋಟದಲ್ಲಿ ಹಾಕಿದಾಗ ಅದು ಎಷ್ಟು ಮುಳುಗಿದೆ ಎನ್ನುವುದರ ಮೇಲೆ ಅದರ ತಾಜಾತನ ಅಳೆಯಬಹುದು. ಮೊಟ್ಟೆ ಕೆಳ ಭಾಗಕ್ಕೆ ಹೋದರೆ ಫ್ರೆಷ್ ಮೊಟ್ಟೆ ಎನ್ನಬಹುದು. ಒಂದೆರಡು ದಿನವಾದರೆ ಮೊಟ್ಟೆ ಲೋಟದ ತಳದಿಂದ ಸ್ವಲ್ಪ ಮೇಲಕ್ಕೆ ಬರುತ್ತದೆ. ಇನ್ನು ಎರಡು ಮೂರು ವಾರ ಕಳೆದಿದ್ದರೆ ಅಂಥ ಮೊಟ್ಟೆ ನೀರಿನ ಮೇಲ್ಬಾಗ ತೇಲುತ್ತದೆ.

2. ಮೊಟ್ಟೆಯನ್ನು ಅಲುಗಾಡಿಸಿ

ಮತ್ತೊಂದು ವಿಧಾನವಿದೆ. ಅದು ಅಷ್ಟೊಂದು ನಿಖರವಾದ ವಿಧಾನ ಎಂದು ಹೇಳಲು ಸಾಧ್ಯವಿಲ್ಲ. ಮೊಟ್ಟೆಯನ್ನು ತೆಗೆದು ಕಿವಿ ಬಳಿ ಹಿಡಿದು ಅಲುಗಾಡಿಸಿದರೆ ಅದರೊಳಗಿನಿಂದ ತುಂಬಾ ಗುಳ-ಗುಳ ಅಂತ ನೀರಿನ ಶಬ್ದದ ರೀತಿ ಕೇಳಿಸಿದರೆ ಆ ಮೊಟ್ಟೆ ಹಾಳಾಗಿದೆ ಎಂದು ಹೇಳಬಹುದು. ಹೆಚ್ಚೇನು ಶಬ್ದ ಬಾರದಿದ್ದರೆ ಆ ಮೊಟ್ಟೆ ತಿನ್ನಲು ಯೋಗ್ಯವಿದೆ ಎಂದು ಹೇಳಬಹುದು.

3. ಮೊಟ್ಟೆಯ ವಾಸನೆ ಮೂಲಕ

ಮೊಟ್ಟೆಯನ್ನು ಒಡೆದಾಗ ಅದು ಮಾಮೂಲಿಗಿಂತ ಬೇರೆ ವಾಸನೆ ಬೀರಿದರೆ ಅಂಥ ಮೊಟ್ಟೆ ಹಾಳಾಗಿದೆ ಎಂದು ಹೇಳಬಹುದು.

4. ಮೊಟ್ಟೆಯ ಬಿಳಿ ಮತ್ತು ಹಳದಿ ಗಮನಿಸಿ

ಮೊಟ್ಟೆಯನ್ನು ಒಡೆದು ಬೌಲ್‌ಗೆ ಹಾಕಿ ಅದರಿಂದ ರುಚಿ-ರುಚಿಯಾದ ಆಮ್ಲೆಟ್ ಮಾಡುವ ಮುನ್ನ ಅದರ ಬಿಳಿ ಹಾಗೂ ಹಳದಿಯನ್ನು ಗಮನಿಸಿ. ಬಿಳಿ ಹಳದಿಗೆ ಅಂಟಿದಂತೆ ಇದ್ದು, ತಕ್ಷಣ ಹರಡಿದರೆ ಅದು ತಾಜಾ ಮೊಟ್ಟೆಯಲ್ಲ. ಇನ್ನು ಮೊಟ್ಟೆ ಹಳೆಯದಾದರೆ ಅದರ ಹಳದಿ ಸ್ವಲ್ಪ ಕೆಂಪು ಬಣ್ಣಕ್ಕೆ ತಿರುಗಿರುತ್ತದೆ.

ಮೊಟ್ಟೆ ಹಾಳಾಗುತ್ತದೆ ಎಂದಾಗ ಏನು ಮಾಡಬಹುದು?

ಮೊಟ್ಟೆಯ ತಾಜಾತನ ಪರೀಕ್ಷಿಸುವುದು ಹೇಗೆ ಎಂದು ತಿಳಿದಿರಿ. ಈಗ ಮೊಟ್ಟೆ ಇನ್ನೊಂದು ವಾರ ಇಟ್ಟರೆ ಹಾಳಾಗುತ್ತದೆ ಎಂಬ ಹಂತ ತಲುಪಿದಾಗ ಏನು ಮಾಡುವುದು ಎಂದು ನೋಡೋಣ:

ಮೊಟ್ಟೆ ಇಟ್ಟರೆ ಹಾಳಾಗುತ್ತದೆ ಎಂದಾದಾಗ ಅದನ್ನು ಚೆನ್ನಾಗಿ ಬೇಯಿಸಿ, ಅದರಿಂದ ಉಪ್ಪಿನಕಾಯಿ ಮಾಡಿ ಬಳಸಬಹುದಾಗಿದೆ. ಇನ್ನು ಡೆವಿಲ್ ಎಗ್‌ ರೆಸಿಪಿಯೂ ಟ್ರೈ ಮಾಡಬಹುದಾಗಿದೆ.