ಕೈ ತೋಟದ ಆರೈಕೆಯ 12 ಮಹಾನ್ ಸೂತ್ರಗಳು

By Super

Updated: Tuesday, June 18, 2013, 16:17 [IST]

ಕೈ ತೋಟವನ್ನು ಹಸಿರಾಗಿ ಹಾಗೂ ಸ್ವಚ್ಚವಾಗಿ ಕಾಪಾಡಿಕೊಳ್ಳುವುದು ಕಠಿಣ ಕೆಲಸವೇ ಸರಿ. ಹವಾಮಾನದಲ್ಲಾಗುವ ಬದಲಾವಣೆ, ಪ್ರಾಣಿಗಳ ಹಾಗೂ ಕಳೆ ಗಿಡಗಳ ಉಪಟಳವನ್ನು ಯಾವಾಗಲೂ ನಿಭಾಯಿಸುತ್ತಿರಬೇಕಾಗುತ್ತದೆ. ಹಾಗಾದರೆ ನಿಮ್ಮ ಕೈತೋಟವು ನಿತ್ಯವೂ ಹಚ್ಚ ಹಸುರಾಗಿ ನಂದನವನದಂತೆ ಕಂಗೊಳಿಸಲು, ನೋಡುಗರ ಹೃನ್ಮನಗಳನ್ನು ಸೆಳೆಯುವ ಹಾಗೆ ಆಕರ್ಷಕವಾಗಿ ಕಾಣುವಂತೆ ಮಾಡಲು ಅನುಸರಿಸಬೇಕಾದ ಮಾರ್ಗೋಪಾಯಗಳು ಯಾವುವು ? ಅರ್ಥಾತ್, ಕೈ ತೋಟದ ಆರೈಕೆ ಮಾಡಲು ನೀವು ಅನುಸರಿಸಬೇಕಾದ ಮಾರ್ಗದರ್ಶಿ ಸೂತ್ರಗಳು ಯಾವುವು...?

ಉತ್ತರವನ್ನು ಕಂಡುಕೊಳ್ಳಲು ಇದನ್ನು ಓದಿ.

1. ಸೂಕ್ತವಾದ ಸಲಕರಣೆಗಳನ್ನು ಸಂಗ್ರಹಿಸಿ

ನಿಮ್ಮ ಕೈತೋಟವನ್ನು ಸರಿಯಾಗಿ ನಿರ್ವಹಿಸಲು ಮಾಡಬೇಕಾದ ಮೊದಲ ಮತ್ತು ಅತಿ ಮುಖ್ಯವಾದ ಕೆಲಸವೇನೆಂದರೆ, ನೆಲವನ್ನು ಸಮತಟ್ಟುಗೊಳಿಸುವ ಸಲಕರಣೆ, ಗಿಡಗಳನ್ನು ಓರಣಗೊಳಿಸಲು ಉಪಯೋಗಿಸುವ ಕತ್ತರಿಯೇ ಮೊದಲಾದ ಸರಿಯಾದ ಸಲಕರಣೆಗಳನ್ನು ಖರೀದಿಸುವುದು.

2. ಸರಿಯಾದ ಸಮಯದಲ್ಲಿ ನೀರಿನ ಪೂರೈಕೆ

ಆವಿಯಾಗುವುದನ್ನು ತಪ್ಪಿಸಲು, ಮುಂಜಾವಿನ ವೇಳೆ ಅಥವಾ ರಾತ್ರಿಯ ಹೊತ್ತು ನಿಮ್ಮ ಕೈತೋಟಕ್ಕೆ ನೀರುಣಿಸಬಹುದು.

3. ಸರಿಯಾದ ಗೊಬ್ಬರವನ್ನು ಪಡೆಯಿರಿ

ನಿಮ್ಮ ಸಸಿಗಳನ್ನು ನಿತ್ಯ ಹಸಿರಾಗಿರಿಸಲು, ಮಣ್ಣಿನ ಗುಣವನ್ನಾಧರಿಸಿ ಯಾವಾಗಲೂ ಸಮರ್ಪಕವಾದ ಗೊಬ್ಬರವನ್ನು ಉಪಯೋಗಿಸಿ.

4. ಕೊಳೆತ ತರಕಾರಿ, ಹಿಂಡಿಯನ್ನು ಮಣ್ಣಿನ ಮೇಲೆ ಹರವಿರಿ

ಮಣ್ಣಿನ ಸವಕಳಿಯನ್ನು ತಡೆಗಟ್ಟಲು, ಕೊಳೆತ ತರಕಾರಿ, ಹಿಂಡಿಯನ್ನು ಬಳಸಿ. ಇದು ಮಣ್ಣಿನ ತೇವಾಂಶವನ್ನು ಕಾಪಾಡುತ್ತದೆ ಹಾಗೂ ಕಳೆ ಗಿಡಗಳು ಬೆಳೆಯುವುದನ್ನು ತಡೆಗಟ್ಟುತ್ತದೆ. ಅದ್ದರಿಂದ, ಕೈತೋಟದ ಪ್ರಯೋಜನವನ್ನು ಪಡೆಯಲು ಕೊಳೆತ ತರಕಾರಿ, ಹಿಂಡಿಯನ್ನು ನಿಯಮಿತವಾಗಿ ಮಣ್ಣಿನ ಮೇಲೆ ಹರಡಿರಿ.

5. ಆಯಾ ಕಾಲಕ್ಕನುಗುಣವಾಗಿ ಬೆಳೆಯುವ ಸಸಿಗಳನ್ನು ಪಡೆಯಿರಿ

ಆಯಾ ಋತುವಿಗನುಸಾರವಾಗಿ ಬೆಳೆಯುವ ಸಸಿಗಳು ಯಾವಾಗಲೂ ನಿಮ್ಮ ಕೈತೋಟವನ್ನು ಸಮೃಧ್ಧಿಯಾಗಿ ಇರಿಸುತ್ತವೆ ಹಾಗೂ ವರ್ಷದ ಬಹುತೇಕ ಸಮಯ ಹಚ್ಚ ಹಸಿರಾಗಿರಿಸುತ್ತವೆ. ಹೀಗಾಗಿ, ಸಸಿಗಳನ್ನು ಸರಿಯಾದ ಕಾಲದಲ್ಲಿ ನೆಡಿರಿ ಹಾಗೂ ವರ್ಷಪೂರ್ತಿ ಹಸಿರಾದ ಕೈತೋಟವನ್ನು ನಿಮ್ಮದಾಗಿಸಿಕೊಳ್ಳಿ.

6. ಕಳೆಗಿಡಗಳು

ಕೈತೋಟದ ಆರೈಕೆಯ ಬಹು ಮುಖ್ಯ ಭಾಗಗಳಲ್ಲಿ ಒಂದು, ಕಳೆ ಗಿಡಗಳನ್ನು ಕೀಳುವುದು. ನಿಮಗೆ ಸಮಯಾವಕಾಶ ಸಿಕ್ಕಿದಾಗಲೆಲ್ಲ ಕೈತೋಟದತ್ತ ನಡೆಯಿರಿ ಹಾಗೂ ಕಳೆಯನ್ನು ತೆಗೆಯಿರಿ.

7. ನಿತ್ಯಹರಿದ್ವರ್ಣ, ಅಲಂಕಾರಿಕ ಪೊದೆಗಳನ್ನು ಬೆಳೆಸಿರಿ

ಇಂತಹ ಪೊದೆ (ಸಣ್ಣ ಸಸಿ) ಗಳನ್ನು ಬೆಳೆಸುವುದರಿಂದ ನಿಮ್ಮ ಕೈತೋಟದ ಒಂದು ಭಾಗವು ವರ್ಷದ ಯಾವುದೇ ಕಾಲದಲ್ಲಿಯೂ ಸಹ ಹಸಿರಾಗಿ ಕಂಗೊಳಿಸುವಂತೆ ಮಾಡುತ್ತದೆ.

8. ಶೀಘ್ರವಾಗಿ ಬೆಳೆಯುವ ಸಸಿಗಳನ್ನು ಬೆಳೆಸಿರಿ

ಹೀಗೆ ಮಾಡುವುದರಿಂದ ನೀವು ಬೇಗನೇ ಕಟಾವು ಮಾಡಬಹುದು ಹಾಗೂ ಆ ಜಾಗದಲ್ಲಿ ಹೊಸ ಸಸಿಗಳನ್ನು ಬೆಳೆಸಬಹುದು. ಹೀಗೆ ಮಾಡುವುದರ ಮೂಲಕ ಕಳೆ ಗಿಡಗಳಿಗೆ ಅವಕಾಶ ನೀಡದಂತಾಗುತ್ತದೆ ಹಾಗೂ ನಿಮ್ಮ ಕೈತೋಟವೂ ಕೂಡ ಸಮೃಧ್ಧವಾಗುತ್ತದೆ.