ದೀಪಾವಳಿಯ ಸಮಯದಲ್ಲಿ ಆರೋಗ್ಯ ಕಾಪಾಡಿಕೊಳ್ಳಲು ಸುಲಭವಾದ ಹತ್ತು ಸಲಹೆಗಳು

ಹಸಿರು ಎಲೆಗಳನ್ನು ಸೇವಿಸಿ

ಹಬ್ಬದ ಸಂದರ್ಭದಲ್ಲಿ ಸಾಕಷ್ಟು ಹಸಿಯಾಗಿ ಸೇವಿಸಬಹುದಾದ ಎಲೆಗಳನ್ನು ಸೇವಿಸಿ. ಪಾಲಕ್, ಪುದಿನಾ ಕೇಲ್ ಎಲೆಗಳು ಮೊದಲಾದವುಗಳನ್ನು ಸಾಕಷ್ಟು ಪ್ರಮಾಣದಲ್ಲಿ ಹಬ್ಬಕ್ಕೂ ಮೊದಲೇ ಖರಿದಿಸಿಟ್ಟುಕೊಂಡು ಹಬ್ಬದ ಎಲ್ಲಾ ದಿನಗಳಲ್ಲಿ ಸಾಧ್ಯವಾದಷ್ಟು ತಿನ್ನುತ್ತಿರಿ. ಈ ಎಲೆಗಳಲ್ಲಿ ಹೆಚ್ಚಿನ ಪ್ರಮಾಣದ ಆಂಟಿ ಆಕ್ಸಿಡೆಂಟುಗಳು, ವಿಟಮಿನ್ನುಗಳು ಹಾಗೂ ಖನಿಜಗಳಿವೆ. ಇವು ರೋಗ ನಿರೋಧಕ ಶಕ್ತಿಯನ್ನು ಉತ್ತಮಗೊಳಿಸಲು ನೆರವಾಗುತ್ತವೆ. ಎಲ್ಲಕ್ಕೂ ಹೆಚ್ಚಾಗಿ ಇದರಲ್ಲಿ ಕರಗದ ನಾರು ಭಾರಿ ಪ್ರಮಾಣದಲ್ಲಿದೆ. ಪರಿಣಾಮವಾಗಿ ತೂಕ ಇಳಿಸುವ ನಿಮ್ಮ ಪ್ರಯತ್ನಕ್ಕೆ ಹೆಚ್ಚಿನ ಬೆಂಬಲ ದೊರಕುತ್ತದೆ ಹಾಗೂ ತ್ವಚೆಯೂ ಆರೋಗ್ಯದಿಂದ ಕಂಗೊಳಿಸುತ್ತದೆ.

ಸಾಕಷ್ಟು ನೀರು ಕುಡಿಯಿರಿ

ಪ್ರತಿದಿನ ಕನಿಷ್ಠ ಎರಡು ಲೀಟರುಗಳಷ್ಟು ನೀರನ್ನು ಕುಡಿಯಿರಿ. ನೀರು ಕುಡಿಯುವುದರಿಂದ ಹಲವಾರು ಆರೋಗ್ಯಕರ ಪ್ರಯೋಜನಗಳಿವೆ ಹಾಗೂ ತ್ವರಿತವಾಗಿ ಪಡೆಯಬಹುದಾದ ಅನುಕೂಲಗಳಿವೆ. ಅಲ್ಲದೇ ನೀರು ತೂಕ ಇಳಿಸುವ ಗತಿಯನ್ನು ಹೆಚ್ಚಿಸುತ್ತದೆ. ತ್ವಚೆಗೆ ಅಗತ್ಯವಾಗಿರುವ ಆರ್ದ್ರತೆ ಹಾಗೂ ಸಾಮಾನ್ಯವಾಗಿ ಕಾಡುವ ಜೀರ್ಣ ಸಂಬಂಧಿ ತೊಂದರೆಗಳಿಗೆ ಬರೆಯ ನೀರು ಸಾಕು.

ವ್ಯಾಯಾಮವನ್ನು ಬಿಡದಿರಿ

ಒಂದು ವೇಳೆ ನೀವು ನಿತ್ಯವೂ ವ್ಯಾಯಾಮ ಮಾಡುತ್ತಿದ್ದರೆ ಹಬ್ಬದ ದಿನಗಳೆಂದು ಈ ದಿನಗಳಲ್ಲಿ ವ್ಯಾಯಾಮಕ್ಕೂ ರಜೆ ನೀಡಬೇಡಿ. ನಿತ್ಯದ ಸಮಯದಲ್ಲಿ ಈ ದಿನಗಳಂದೂ ಎಂದಿನಂತೆಯೇ ವ್ಯಾಯಾಮ ಮುಂದುವರೆಸಿ. ಓಟ, ಜಾಗಿಂಗ್, ಜುಂಬಾ, ಈಜು ಮೊದಲಾದವು ದೇಹದಲ್ಲಿನ ನೀರಿನ ಪ್ರಮಾಣವನ್ನು ಬಳಸಿಕೊಂಡು ತೂಕವನ್ನು ಕಡಿಮೆ ಮಾಡಲು ನೆರವಾಗುತ್ತದೆ. ಅಲ್ಲದೇ ವ್ಯಾಯಾಮದಿಂದ ದೇಹ ಹಗುರಾಗಿರುತ್ತದೆ ಹಾಗೂ ರೋಗನಿರೋಧಕ ಶಕ್ತಿಯೂ ಹೆಚ್ಚುತ್ತದೆ.

ಸಾಧ್ಯವಾದಷ್ಟು ಹಣ್ಣು ತರಕಾರಿಗಳನ್ನುಸೇವಿಸಿ

ಹಸಿಯಾಗಿ ಸೇವಿಸಬಹುದಾದ ಹಾಗೂ ಸಿಪ್ಪೆ ಸಹಿತ ಸೇವಿಸಬಹುದಾದ ಹಣ್ಣುಗಳನ್ನು ಸಾಧ್ಯವಾದಷ್ಟು ಮಟ್ಟಿಗೆ ಸೇವಿಸಿ. ಇವುಗಳಲ್ಲಿ ಹೆಚ್ಚಿನ ಪ್ರಮಾಣದ ಆಂಟಿ ಆಕ್ಸಿಡೆಂಟುಗಳು ಹಾಗೂ ಇತರ ಪ್ರಮುಖ ಖನಿಜಗಳಿದ್ದು ಆರೋಗ್ಯವನ್ನು ವೃದ್ದಿಸುವುದು ಮಾತ್ರವಲ್ಲ, ತೂಕವನ್ನೂ ಕ್ಷಿಪ್ರವಾಗಿ ಇಳಿಸಲು ನೆರವಾಗುತ್ತದೆ ಹಾಗೂ ರೋಗ ನಿರೋಧಕ ಶಕ್ತಿಯನ್ನೂ ಪ್ರಬಲವಾಗಿಸುತ್ತದೆ.

ಆದರೆ ಆಲುಗಡ್ಡೆ ಮತ್ತು ಬಾಳೆಹಣ್ಣು ಬೇಡ

ಪಿಷ್ಟದ ಪ್ರಮಾಣ ಹೆಚ್ಚಿರುವ ಆಲುಗಡ್ಡೆ ಮೊದಲಾದ ತರಕಾರಿಗಳನ್ನೂ ಪೊಟ್ಯಾಶಿಯಂ ಹೆಚ್ಚಿರುವ ಬಾಳೆಹಣ್ಣು ಮೊದಲಾದ ಫಲಗಳನ್ನೂ ಸೇವಿಸದಿರಿ. ಇವುಗಳಲ್ಲಿ ಇತರ ಖನಿಜಗಳಿದ್ದು ಆರೋಗ್ಯಕ್ಕೆ ಪ್ರಯೋಜನಕಾರಿಯಾದರೂ ಜೊತೆಜೊತೆಗೇ ತೂಕವನ್ನು ಹೆಚ್ಚಿಸುವ ಕೊಬ್ಬನ್ನು ಉತ್ಪಾದಿಸಲು ನೆರವಾಗುವ ಕಾರಣ ಇವುಗಳ ಸೇವನೆಯನ್ನು ಆದಷ್ಟೂ ಕಡಿಮೆ ಮಾಡಿ.

ಆರೋಗ್ಯಕರ ಉಪಾಹಾರ ಸೇವಿಸಿ

ನಮ್ಮ ದಿನದ ಮೂರೂ ಹೊತ್ತಿನ ಊಟಗಳಲ್ಲಿ ಅತ್ಯಂತ ಪ್ರಮುಖವಾದುದೆಂದರೆ ಮುಂಜಾನೆಯ ಪ್ರಥಮ ಆಹಾರ. ಇದು ಕಡಿಮೆ ಪ್ರಮಾಣದಲ್ಲಿದ್ದು ಪೌಷ್ಟಿಕವಾಗಿದ್ದಷ್ಟೂ ಉತ್ತಮ. ಒಂದು ದೊಡ್ಡ ಲೋಟ ಕೆನೆರಹಿತ ಹಾಲು ಹಾಗೂ ಒಂದು ಇಡಿಯ ಸೇಬುಹಣ್ಣು ತಿಂದರೆ ಬೇಕಾದಷ್ಟಾಯಿತು. ಇದರಿಂದ ಮುಂದಿನ ಅವಧಿಯಲ್ಲಿ ನಡುವೆ ಹಸಿವಾಗುವುದಿಲ್ಲ ಹಾಗೂ ತೂಕ ಇಳಿಸಿಕೊಳ್ಳಲೂ ನೆರವಾಗುತ್ತದೆ. ಈ ಆಹಾರಗಳಲ್ಲಿ ಕೊಬ್ಬು ಇಲ್ಲದಿರುವುದು ಹಾಗೂ ಕ್ಯಾಲೋರಿಗಳೂ ಕಡಿಮೆ ಇರುವುದು ತೂಕ ಇಳಿಕೆಗೆ ಪೂರಕವಾಗಿದೆ.

ಕೆಂಪು ಮಾಂಸದ ಸೇವನೆ ಬೇಡ

ಒಂದು ವೇಳೆ ನೀವು ಮಾಂಸಾಹಾರಿಗಳಾಗಿದ್ದರೆ ಕೆಂಪು ಮಾಂಸದ ಆಹಾರಗಳ ಬದಲಿಗೆ ಬಿಳಿ ಮಾಂಸಗಳನ್ನು ಆಯ್ಕೆ ಮಾಡಿಕೊಳ್ಳಿ. ಸಾಗರ ಉತ್ಪನ್ನಗಳು ಅತ್ಯುತ್ತಮ ಆಯ್ಕೆಯಾಗಿದೆ. ಇವುಗಳ ಸೇವನೆಯಿಂದ ನಿಮ್ಮ ತೂಕ ಇಳಿಕೆಯ ಕಾರ್ಯಕ್ರಮಕ್ಕೆ ಯಾವುದೇ ತೊಂದರೆಯಾಗುವುದಿಲ್ಲ ಹಾಗೂ ರೋಗ ನಿರೋಧಕ ಶಕ್ತಿಯೂ ಉತ್ತಮವಾಗುತ್ತದೆ.

ಹೆಚ್ಚಿನ ಪ್ರೋಟೀನ್ ಸೇವಿಸಿ

ನಿಮ್ಮ ಊಟದಲ್ಲಿ ಹೆಚ್ಚಿನ ಪ್ರೋಟೀನ್ ಇರುವ ಆಹಾರಗಳಿರಲಿ. ಕಡಿಮೆ ಕೊಬ್ಬಿನ ಕೋಳಿ ಮಾಂಸ, ಕಡ್ಲೆ ಕಾಳು, ರಾಜ್ಮಾ, ಸೋಯಾ, ಟೋಫು ಇತ್ಯಾದಿಗಳು ಪ್ರೋಟೀನ್ ಭರಿತವಾಗಿದ್ದು ಇವನ್ನು ಜೀರ್ಣಿಸಿಕೊಳ್ಳಲು ದೇಹ ಹೆಚ್ಚಿನ ಕೊಬ್ಬನ್ನು ದಹಿಸಬೇಕಾಗಿ ಬರುವ ಕಾರಣ ತೂಕ ಇಳಿಕೆಗೆ ಸುಲಭವಾಗುತ್ತದೆ. ಪ್ರೋಟೀನ್ ಯುಕ್ತ ಆಹಾರಗಳು ಸ್ನಾಯುಗಳ ವರ್ಧನೆಗೂ ಪೂರಕವಾಗಿದ್ದು ನಿಮ್ಮ ವ್ಯಾಯಾಮದ ಪ್ರಯತ್ನಗಳಿಗೆ ಉತ್ತಮ ಫಲ ನೀಡಿ ಹುರಿಗಟ್ಟಿದ ಸ್ನಾಯುಗಳ ಉಡುಗೊರೆ ನೀಡುತ್ತವೆ.

ವಿಷವಸ್ತುಗಳನ್ನು ವಿಸರ್ಜಿಸಿ

ದೀಪಾವಳಿಗೆ ಒಂದು ವಾರವಿದ್ದಂತೆಯೇ ಒಂದು ದಿನವನ್ನು ದೇಹದ ಸ್ವಚ್ಛತೆಗಾಗಿ ಮೀಸಲಿಡಿ. ಈ ದಿನವಿಡೀ ಕೇವಲ ಆರೋಗ್ಯಕರವಾದ ಹಣ್ಣುಗಳ ಹಾಗೂ ತರಕಾರಿಗಳ ರಸವನ್ನು ಮಾತ್ರವೇ ಸೇವಿಸುತ್ತಾ ಬನ್ನಿ ಹಾಗೂ ಕೇವಲ ಸಾಲಾಡ್ ಸೇವಿಸಿ. ಇದರಿಂದ ದೇಹದಲ್ಲಿರುವ ಕಲ್ಮಶಗಳು ಪೂರ್ಣವಾಗಿ ಹೊರಹೋಗಲು ನೆರವಾಗುತ್ತದೆ ಹಾಗೂ ಜೀವರಾಸಾಯನಿಕ ಕ್ರಿಯೆಯ ಗತಿ ಹೆಚ್ಚುತ್ತದೆ.

ಕೆಲವು ಆಹಾರಗಳಿಗೆ ಬದಲಿ ಆಹಾರಗಳನ್ನು ಸೇವಿಸಿ

ಬಿಳಿ ಅಕ್ಕಿಯ ಬದಲು ಕಂದು ಅಕ್ಕಿ, ಬಿಳಿ ಬ್ರೆಡ್ ಬದಲು ಇಡಿಯ ಧಾನ್ಯಗಳ ಬ್ರೆಡ್, ಬುರುಗು ಬರುವ ಪಾನೀಯಗಳ ಬದಲಿಗೆ ಸಕ್ಕರೆ ರಹಿತ ಹಣ್ಣಿನ ರಸಗಳು ಮೊದಲಾಗಿ ಬದಲಿಸಿಕೊಳ್ಳುವ ಮೂಲಕ ಅನಗತ್ಯವಾಗಿ ಏರಬಹುದಾಗಿದ್ದ ತೂಕವನ್ನು ನಿಯಂತ್ರಿಸಲು ಸಾಧ್ಯವಾಗುತ್ತದೆ ಹಾಗೂ ಈ ಮೂಲಕ ಆರೋಗ್ಯವೂ ಉತ್ತಮಗೊಳ್ಳುತ್ತದೆ.