ಒಂದೆರಡು ಚಮಚ ಆಲಿವ್ ಎಣ್ಣೆ-ಇದುವೇ 'ಸೌಂದರ್ಯದ ಗಣಿ'!

ಒಣಚರ್ಮಕ್ಕಾಗಿ

ಆಲಿವ್ ಎಣ್ಣೆಯ ಉತ್ತಮವಾದ ಗುಣಗಳಲ್ಲಿ ಇದರ ತೇವಕಾರಕ ಗುಣ ಪ್ರಮುಖವಾಗಿದೆ. ಈ ಗುಣ ಒಣಚರ್ಮಕ್ಕೆ ಹೇಳಿ ಮಾಡಿಸಿದಂತಿದೆ. ಸ್ನಾನವಾದ ಬಳಿಕ ಕೆಲವು ಹನಿ ಆಲಿವ್ ಎಣ್ಣೆಯಿಂದ ಚರ್ಮವನ್ನು ಕೆಲವು ನಿಮಿಷಗಳ ಮಸಾಜ್ ಮೂಲಕ ಹಚ್ಚಿಕೊಳ್ಳುವ ಮೂಲಕ ಚರ್ಮ ಒಣಗುವುದನ್ನು ತಪ್ಪಿಸಬಹುದು.

ಹಸ್ತಗಳ ಮೃದುತ್ವಕ್ಕಾಗಿ

ಹಸ್ತಗಳು ಒರಟಾಗಿದ್ದರೆ ಕೆಲವು ಹನಿ ಆಲಿವ್ ಎಣ್ಣೆಯನ್ನು ಹಚ್ಚಿಕೊಂಡು ನಯವಾಗಿ ಉಜ್ಜಿಕೊಳ್ಳುವ ಮೂಲಕ ಮೃದುವಾಗುತ್ತದೆ. ಅಲ್ಲದೇ ಕೈ ತೊಳೆದುಕೊಳ್ಳುವ ಮುನ್ನ ಆಲಿವ್ ಎಣ್ಣೆಯನ್ನು ಹಚ್ಚಿಕೊಂಡು ಆ ಬಳಿಕ ಸೋಪು ಹಚ್ಚಿ ತೊಳೆದುಕೊಂಡರೆ ಕೈಗಳು ಮೃದುವಾಗಿಯೇ ಉಳಿಯುತ್ತವೆ.

ತಲೆ ಹೊಟ್ಟಿನ ನಿವಾರಣೆಗಾಗಿ

ಒಂದು ವೇಳೆ ನಿಮ್ಮ ತಲೆಯ ಚರ್ಮ ಒಣಗಿದ್ದು ತುರಿಕೆಯಿಂದ ಹಾಗೂ ತಲೆಹೊಟ್ಟಿನಿಂದ ಕೂಡಿದ್ದರೆ ವಾರಕ್ಕೆ ಮೂರು ಬಾರಿಯಾದರೂ ಆಲಿವ್ ಎಣ್ಣೆಯನ್ನು ಹಾಕಿ ಮಸಾಜ್ ಮಾಡಿ ಸೌಮ್ಯ ಶಾಂಪೂವಿನಿಂದ ತೊಳೆದುಕೊಳ್ಳುವ ಮೂಲಕ ಉತ್ತಮ ಪರಿಣಾಮವನ್ನು ಪಡೆಯಬಹುದು.

ಕೂದಲ ಹೊಳಪಿಗಾಗಿ

ಕೆಲವು ಹನಿ ಆಲಿವ್ ಎಣ್ಣೆಯನ್ನು ಬಿಸಿಮಾಡಿ ತಣಿಯಲು ಬಿಡಿ. ಇದು ಉಗುರುಬೆಚ್ಚಗಾಗುವಷ್ಟು ತಣಿದ ಬಳಿಕ ಈ ಎಣ್ಣೆಯಿಂದ ತಲೆಗೂದಲಿಗೆ ನಯವಾದ ಮಸಾಜ್ ಮೂಲಕ ಹಚ್ಚಿ. ಇದರಿಂದ ಕೂದಲ ಹೊಳಪು ಹೆಚ್ಚುತ್ತದೆ. ಕೊಬ್ಬರಿ ಎಣ್ಣೆಯನ್ನು ಹಚ್ಚಿಕೊಳ್ಳುವ ಮೂಲಕ ಕೂದಲು ಹೆಚ್ಚು ಎಣ್ಣೆಪಸೆಯಿಂದ ಕೂಡಿದ್ದು ಧೂಳನ್ನು ಸುಲಭವಾಗಿ ಆಕರ್ಶಿಸುತ್ತದೆ. ಆದರೆ ಆಲಿವ್ ಎಣ್ಣೆಯಲ್ಲಿ ಹೆಚ್ಚು ಎಣ್ಣೆ ಪಸೆ ಇಲ್ಲದ ಕಾರಣ ಹೊರಗೆ ಹೋಗುವಾಗ ಹಚ್ಚಿಕೊಳ್ಳಲು ಸೂಕ್ತವಾಗಿದೆ.

ತಲೆಹೊಟ್ಟು ಸಮಸ್ಯೆಗೆ ರಾಮಬಾಣ...

ಆಲಿವ್ ಎಣ್ಣೆಯು ತನ್ನಲ್ಲಿರುವ ಕೇಶ ಸ್ನೇಹಿಗುಣಗಳಿಂದಾಗಿ ಭಾರೀ ಖ್ಯಾತಿಯನ್ನು ಪಡೆದಿದೆ. ಇದಕ್ಕೆ ಈ ಖ್ಯಾತಿ ಬರಲು ಇದರಲ್ಲಿರುವ ಕೂದಲನ್ನು ಹೊಳಪುಗೊಳಿಸುವ ಅಂಶಗಳೇ ಕಾರಣವಾಗಿವೆ. ಆಲಿವ್ ಎಣ್ಣೆಯಿಂದ ಮಸಾಜ್ ಮಾಡಿದರೆ ತಲೆಹೊಟ್ಟು ಬರುವುದಿಲ್ಲ ಮತ್ತು ಇದು ಒಂದು ಅತ್ಯುತ್ತಮ ಡೀಪ್ ಕಂಡೀಶನರ್ ಆಗಿ ಸಹ ಕಾರ್ಯ ನಿರ್ವಹಿಸುತ್ತದೆ. ಇದಕ್ಕಾಗಿ ಶಾಂಪೂ ಹಾಕಿಕೊಂಡ ನಂತರ ಕೂದಲಿಗೆ ಆಲಿವ್ ಎಣ್ಣೆ ಮತ್ತು ನೀರನ್ನು ಬೆರೆಸಿ ಮಸಾಜ್ ಮಾಡಿ. ಇದನ್ನು ಹಾಗೆಯೇ 5 ನಿಮಿಷ ಬಿಟ್ಟು ನಂತರ ನೀರಿನಲ್ಲಿ ತೊಳೆಯಿರಿ. ಇದರಲ್ಲಿರುವ ಕಂಡೀಶನಿಂಗ್ ಗುಣಗಳು ಪರಿಣಾಮಕಾರಿಯಾಗಿ ಕೆಲಸ ಮಾಡುತ್ತದೆಯಲ್ಲದೆ, ನಿಮ್ಮ ಕೂದಲಿಗೆ ಹೆಚ್ಚಿನ ಆಕರ್ಷಣೆಯನ್ನು ಮತ್ತು ಆರೋಗ್ಯವನ್ನು ನೀಡುತ್ತದೆ.

ತುರಿಕೆಯುಕ್ತ ಚರ್ಮಕ್ಕಾಗಿ

ಒಂದು ವೇಳೆ ನಿಮ್ಮ ಚರ್ಮ ತುರಿಕೆಯಿಂದ ಕೂಡಿದ್ದರೆ ಈ ಭಾಗದಲ್ಲಿ ಕೆಲವು ಹನಿ ಆಲಿವ್ ಎಣ್ಣೆಯನ್ನು ಹಚ್ಚಿ ನೊರೆ ಬರುವಂತೆ ಮಾಡಿ. ಕೆಲವು ನಿಮಿಷಗಳ ಬಳಿಕ ಸೌಮ್ಯ ಸೋಪು ಬಳಸಿ ತೊಳೆದುಕೊಳ್ಳಿ.