ಫೇಶಿಯಲ್‌ ಮಾಡಿಕೊಳ್ಳುವ ಮುನ್ನ, ಒಮ್ಮೆ ಈ ಲೇಖನ ಓದಿ

ಚರ್ಮದ ಉರಿ

ಕೆಲವೊಮ್ಮೆ ಫೇಶಿಯಲ್‌ಗಾಗಿ ಬಳಸುವ ದ್ರಾವಣ, ಕ್ರೀಮ್ ಮೊದಲಾದವುಗಳಲ್ಲಿ ಚರ್ಮಕ್ಕೆ ಅಲರ್ಜಿಕಾರಕವಾದ ಕಟುವಾದ ರಾಸಾಯನಿಕಗಳಿದ್ದು ಮುಖದ ಸೂಕ್ಷ್ಮ ಚರ್ಮಕ್ಕೆ ಘಾಸಿಯುಂಟು ಮಾಡಬಹುದು. ಪರಿಣಾಮವಾಗಿ ಚರ್ಮದ ಜೀವಕೋಶಗಳು ಒಡೆದು ಚರ್ಮದಲ್ಲಿ ಉರಿ, ತುರಿಕೆ, ಕೆಂಪಗಾಗುವುದು ಮೊದಲಾದ ತೊಂದರೆಗಳು ಎದುರಾಗಬಹುದು.

ಚರ್ಮದ ಬಣ್ಣವನ್ನು ಏರುಪೇರಾಗಿಸಬಹುದು

ನಮ್ಮ ಮುಖದ ಚರ್ಮ ಏಕಪ್ರಕಾರವಾಗಿರುವಂತೆ ಕಂಡರೂ ಇದರ ದಪ್ಪ ಏಕಪ್ರಕಾರವಾಗಿಲ್ಲ. ಕಣ್ಣುಗಳ ಕೆಳಗೆ ಅತಿ ತೆಳುಗಾಗಿದ್ದರೆ ಕೆನ್ನೆಗಳ ಮೂಳೆಗಳ ಮೇಲೆ, ಹುಬ್ಬುಗಳ ಮೇಲೆ ದಪ್ಪನಾಗಿರುತ್ತದೆ. ಅಲ್ಲದೇ ಈ ಭಾಗದಲ್ಲಿ ನರಾಗ್ರಗಳ ಸಾಂದ್ರತೆಯೂ ಹೆಚ್ಚಿರುವುದರಿಂದಲೇ ನಾಚಿಕೆಯಿಂದ ಕೆನ್ನೆ ಕೆಂಪಗಾಗುವುದಕ್ಕೆ ಕಾರಣವಾಗುತ್ತದೆ. ಕಣ್ಣುಗಳ ಕೆಳಗಿನ ಭಾಗ ಸುಲಭವಾಗಿ ಕಪ್ಪಗಾಗುತ್ತದೆ. ಇಂತಿರುವಾಗ ಬಿಳಿಚಿಸುವ ಪ್ರಮಾಣವೂ ಈ ಭಾಗಗಳಿಗೆ ಭಿನ್ನವಾಗಿ ಪರಿಣಾಮ ಬೀರುತ್ತದೆ. ಫೇಶಿಯಲ್‌ನ ಪ್ರಭಾವ ಮುಗಿದ ಬಳಿಕ ಕೆನ್ನೆಯ ಭಾಗದಲ್ಲಿ ಬಿಳಿಚಾಗಿ ಇತರ ಭಾಗದಲ್ಲಿ ಗಾಢವರ್ಣ ಪಡೆಯುವ ಮೂಲಕ ತೇಪೆಹಚ್ಚಿದಂತಹ ರೂಪ ಬರಬಹುದು (Blotchy Skin)

ಚರ್ಮ ಕೆಂಪಗಾಗುವುದು

ಫೇಶಿಯಲ್‌ಗಾಗಿ ಬಳಸುವ ಕೆಲವು ಪ್ರಸಾದನಗಳು ನಮ್ಮ ಮುಖದ ಚರ್ಮಕ್ಕೆ ತೀರಾ ಪ್ರಬಲವಾಗಿರಬಹುದು ಅಥವಾ ನಮ್ಮ ಚರ್ಮದ ವಿಧಕ್ಕೆ ಸೂಕ್ತವಲ್ಲದ್ದಾಗಿರಬಹುದು. ಅನುಭವಿ ಮತ್ತು ವೃತ್ತಿಪರರು ಚರ್ಮದ ವಿಧಕ್ಕೆ ಸೂಕ್ತವಾದ ಫೇಶಿಯಲ್ ಗಳನ್ನೇ ಸೂಚಿಸುತ್ತಾರಾದರೂ ಕೆಲವೊಮ್ಮೆ ಅವರ ಅನುಭವಕ್ಕೂ ಮೀರಿ ಈ ಪ್ರಸಾದನಗಳಲ್ಲಿರುವ ಯಾವುದೋ ಒಂದು ಘಟಕ ಚರ್ಮಕ್ಕೆ ಅಲರ್ಜಿಕಾರಕವಾಗಿರಬಹುದು. ಇದು ಚರ್ಮಕ್ಕೆ ಉರಿಯೂತವುಂಟುಮಾಡಿ ಕೆಂಪಗಾಗಿಸಲು ಕಾರಣವಾಗಬಹುದು.

ಮೊಡವೆ

ಕೆಲವರಲ್ಲಿ ಫೇಶಿಯಲ್ ಮಾಡಿಸಿಕೊಂಡ ನಂತರದ ದಿನಗಳಲ್ಲಿ ಮೊಡವೆಗಳು ಕಾಣಿಸಿಕೊಳ್ಳುತ್ತವೆ. ಇದಕ್ಕೆ ಪ್ರಮುಖ ಕಾರಣವೆಂದರೆ ಫೇಶಿಯಲ್ ನಲ್ಲಿ ನಮ್ಮ ಚರ್ಮದ ಸೂಕ್ಷ್ಮರಂಧ್ರಗಳನ್ನು ತೆರೆದು ಸ್ವಚ್ಛಗೊಳಿಸುವ ಬಗೆ. ಆದರೆ ತೆಗೆದ ರಂಧ್ರಗಳು ಫೇಶಿಯಲ್ ನ ಪ್ರಸಾದನಗಳ ಕಾರಣ ಮುಚ್ಚದೇ ಪ್ರಸಾದನದ ಅಂಶ ಈ ರಂಧ್ರಗಳಲ್ಲಿ ತುಂಬಿಕೊಳ್ಳುತ್ತವೆ. ಅಲ್ಲದೇ ಸತ್ತ ಜೀವಕೋಶಗಳನ್ನೂ ಕೆರೆದು ತೆಗೆಯುವ ಮೂಲಕ ಚರ್ಮದಡಿಯಲ್ಲಿ ಕೀವು ಉಂಟುಮಾಡಲು ಕಾರಣವಾಗುತ್ತದೆ. ಇದು ಆಗದಂತೆ ಟೋನಿಂಗ್ ವಿಧಾನ ಅನುಸರಿಸುತ್ತಾರಾದರೂ ಇದರಲ್ಲಿ ಕೊಂಚವೂ ಹೆಚ್ಚು ಕಡಿಮೆಯಾದರೆ ಕೀವು ಹೆಚ್ಚಾಗಿ ಮೊಡವೆಗಳಿಂದ ಮುಖವೆಲ್ಲಾ ತುಂಬಿಕೊಳ್ಳುತ್ತದೆ.

ಅಲರ್ಜಿಕಾರಕ ಪರಿಣಾಮಗಳು

ಯಾವುದೇ ಸಲೂನ್ ನಲ್ಲಿ ವಿವಿಧ ಫೇಶಿಯಲ್ ಗಳು ಲಭ್ಯವಿವೆ. ಆದರೆ ಇವೆಲ್ಲರೂ ಎಲ್ಲರಿಗೂ ಸೂಕ್ತ ಎಂದು ಹೇಳಲು ಸಾಧ್ಯವಿಲ್ಲ. ಯಾವುದೋ ಒಂದು ಪ್ರಸಾದನ ಕೆಲವರಿಗೆ ಅಲರ್ಜಿಕಾರಕವಾಗಿರಬಹುದು. ಇದರಿಂದ ತುರಿಕೆ, ಸೂಕ್ಷ್ಮಗೀರುಗಳು ಎದುರಾಗಬಹುದು. ಪರಿಣಾಮ ವಿಪರೀತವಾದರೆ ಚರ್ಮದಲ್ಲಿ ಗುಳಿಗಳು ಬೀಳುವ ಸಾಧ್ಯತೆ ಇದೆ. (ಚಿತ್ರನಟ ಓಂಪುರಿಯವರ ಮುಖವನ್ನು ಗಮನಿಸಿ)

ಕಲೆಗಳಾಗುವ ಸಾಧ್ಯತೆ

ಬ್ಲಾಕ್ ಹೆಡ್ ನಿವಾರಿಸುವ ನಿಟ್ಟಿನಲ್ಲಿ ವೃತ್ತಿಪರರು ತಮ್ಮ ಬೆರಳುಗಳನ್ನು ಅಥವಾ ಇದಕ್ಕಾಗಿಯೇ ಇರುವ ಉಪಕರಣಗಳನ್ನು ಬಳಸಬಹುದು. ಒಂದು ವೇಳೆ ಯಾವುದೋ ಚಿಕ್ಕ ಅಚಾತುರ್ಯ ಅಥವಾ ಮೈ ಮರೆತ ಕ್ಷಣದಲ್ಲಿ ತಪ್ಪಾದ ಒತ್ತಡ ನೀಡಿದರೆ ಇಲ್ಲಿ ಗಾಯಗಳಾಗುವ ಸಾಧ್ಯತೆ ಇದೆ. ಗಾಯ ಮಾಗಿದರೂ ಗಾಯದ ಗುರುತು ಕಲೆಯಾಗಿ ಶಾಶ್ವತವಾಗಿ ಉಳಿದುಕೊಳ್ಳಬಹುದು.

ಒಣಚರ್ಮ

ಯಾವುದೇ ಫೇಶಿಯಲ್‌ನಲ್ಲಿ ಚರ್ಮ ತನ್ನ ಆರ್ದ್ರತೆಯನ್ನು ಕಳೆದುಕೊಳ್ಳುತ್ತದೆ. ಇದು ಚರ್ಮದ ಪಿಎಚ್ ಮಟ್ಟವನ್ನು ಏರುಪೇರು ಗೊಳಿಸುತ್ತದೆ. ಆದ್ದರಿಂದ ಒಮ್ಮೆ ಫೇಶಿಯಲ್ ಮಾಡಿಸಿದ ಬಳಿಕ ಸಾಕಷ್ಟು ಸಮಯ ಮತ್ತೊಮ್ಮೆ ಮಾಡಿಸಬಾರದು. ಕೆಲವರಲ್ಲಿ ಕಳೆದುಕೊಂಡ ಆರ್ದ್ರತೆ ಕೆಲವೇ ದಿನಗಳಲ್ಲಿ ಮರುತುಂಬಿಕೊಂಡರೆ ಕೆಲವರಿಗೆ ಇನ್ನೂ ಹೆಚ್ಚಿನ ಸಮಯ ತೆಗೆದುಕೊಳ್ಳಬಹುದು. ಆದರೆ ಅಷ್ಟೂ ದಿನ ನಿಮ್ಮ ಚರ್ಮ ಒಣದಾಗಿಯೇ ಇದ್ದು ಇದರ ಪರಿಣಾಮಗಳನ್ನೂ ಎದುರಿಸಬೇಕಾಗಿ ಬರಬಹುದು.