ಫೇಶಿಯಲ್‌ಗೆ ಅನಾವಶ್ಯಕ ಹಣ ಖರ್ಚು ಮಾಡುವುದನ್ನು ಇಂದೇ ನಿಲ್ಲಿಸಿ!

ಉಗುರುಬೆಚ್ಚಗಿರುವ ಹಾಲು....

ಈ ಚರ್ಮದವರು ಮೊದಲು ಚರ್ಮವನ್ನು ತಣ್ಣೀರಿನಿಂದ ತೊಳೆದುಕೊಂಡು ಬಳಿಕ ಹತ್ತಿಯುಂಡೆಯನ್ನು ಉಗುರುಬೆಚ್ಚಗಿರುವ ಹಸಿ ಹಾಲಿನಲ್ಲಿ ಮುಳುಗಿಸಿ ಹೆಚ್ಚಿನ ಒತ್ತಡವಿಲ್ಲದೇ ಮುಖವನ್ನು ಒರೆಸಿಕೊಳ್ಳಬೇಕು. ಕೆಳಗಿನಿಂದ ಮೇಲಕ್ಕೆ ಬರುವಂತೆ ಒರೆಸಿಕೊಳ್ಳುವ ಮೂಲಕ ಸೂಕ್ಷ್ಮರಂಧ್ರಗಳು ತೆರೆದು ಕಲ್ಮಶಗಳನ್ನು ನಿವಾರಿಸಲು ಸಾಧ್ಯವಾಗುತ್ತದೆ.

ಒಣಚರ್ಮಕ್ಕಾಗಿ-ಕುಟ್ಟಿ ಪುಡಿಮಾಡಿದ ಓಟ್ಸ್

ಇದಕ್ಕಾಗಿ ಚೆನ್ನಾಗಿ ಕುಟ್ಟಿ ಪುಡಿಮಾಡಿದ ಓಟ್ಸ್ ರವೆಯನ್ನು ಸಮಪ್ರಮಾಣದಲ್ಲಿ ಜೇನಿನೊಂದಿಗೆ ಬೆರೆಸಿ ತೆಳುವಾಗಿ ಹಚ್ಚಿಕೊಳ್ಳಿ, ಕೊಂಚ ಹೊತ್ತಿನ ಬಳಿಕ ತಣ್ಣೀರಿನಿಂದ ತೊಳೆದುಕೊಳ್ಳುವ ಮೂಲಕ ಮುಖದ ಚರ್ಮದ ಮೇಲೆ ಅಂಟಿಕೊಂಡಿದ್ದ ಸತ್ತ ಜೀವಕೋಶಗಳು ಸಡಿಲವಾಗಿ ಕಳಚಿಕೊಳ್ಳುತ್ತವೆ. ಪರಿಣಾಮವಾಗಿ ಚರ್ಮ ನೈಜ ಕಳೆಯಿಂದ ಹೊಳೆಯುತ್ತದೆ.

ಒಣಚರ್ಮಕ್ಕಾಗಿ - ಮುಖಲೇಪ

ಬಳಿಕ ಗಟ್ಟಿ ಮೊಸರನ್ನು ದಪ್ಪನಾಗಿ ಇಡಿಯ ಮುಖದ ಮೇಲೆ (ಕಣ್ಣುಗಳನ್ನು ಮುಚ್ಚಿ ಇವುಗಳ ಮೇಲೆಯೂ ಬರುವಂತೆ) ಹಚ್ಚಿ ಸುಮಾರು ಹದಿನೈದರಿಂದ ಇಪ್ಪತ್ತು ನಿಮಿಷ ಒಣಗಲು ಬಿಡಿ. ಇದರಿಂದ ಚರ್ಮದ ಕಾಂತಿ ಹೆಚ್ಚುತ್ತದೆ ಹಾಗೂ ಚರ್ಮ ಮೃದುವಾಗುತ್ತದೆ. ಬಳಿಕ ಕೇವಲ ತಣ್ಣೀರಿನಿಂದ ತೊಳೆದುಕೊಳ್ಳಿ.

ಒಣಚರ್ಮಕ್ಕಾಗಿ - ತೇವಕಾರಕ

ಮೊಸರಿನ ಲೇಪನದ ಬಳಿಕ ದಪ್ಪ ಟವೆಲ್ಲಿನಿಂದ ಮುಖವನ್ನು ಒತ್ತಿಕೊಂಡು ಒಣಗಿಸಿದ ಬಳಿಕ ನಿಮ್ಮ ನಿತ್ಯದ ಬಳಕೆಯ ತೇವಕಾರಕ ಅಥವಾ ಮಾಯಿಶ್ಚರೈಸರ್ ದ್ರವವನ್ನು ತೆಳುವಾಗಿ ಹಚ್ಚಿ.

ಎಣ್ಣೆ ಚರ್ಮಕ್ಕಾಗಿ- ಸ್ವಚ್ಛಕಾರಕ

ಮೊದಲು ಕೊಂಚ ಅಡುಗೆ ಸೋಡಾಪುಡಿಯನ್ನು ನೀರಿನಲ್ಲಿ ಬೆರೆಸಿ ಚೆನ್ನಾಗಿ ಮಿಶ್ರಣ ಮಾಡಿ. ಈ ಮಿಶ್ರಣವನ್ನು ತೆಳುವಾಗಿ ಮುಖದ ಮೇಲೆ ಹಚ್ಚಿ ಕೆಲವು ನಿಮಿಷ ಬಿಟ್ಟು ತಣ್ಣೀರಿನಿಂದ ತೊಳೆದುಕೊಳ್ಳಿ. ಇದರಿಂದ ತ್ವಚೆಯ ಮೇಲಿದ್ದ ಎಣ್ಣೆ ಪಸೆ ನಿವರಣೆಯಾಗಿ ಮೃದುವಾದ ಒಣಗಿದ ಚರ್ಮ ಲಭ್ಯವಾಗುತ್ತದೆ.

ಎಣ್ಣೆ ಚರ್ಮಕ್ಕಾಗಿ- ಸತ್ತ ಜೀವಕೋಶಗಳನ್ನು ಕೆರೆದು ತೆಗೆಯಲು

ಇದಕ್ಕಾಗಿ ಕೊಂಚ ಸಕ್ಕರೆ ಮತ್ತು ಆಲಿವ್ ಎಣ್ಣೆಯನ್ನು ಮಿಶ್ರಣ ಮಾಡಿ ಮುಖದ ಮೇಲೆ ದಪ್ಪನಾಗಿ ಹಚ್ಚಿಕೊಳ್ಳಿ. ಕಣ್ಣುಗಳನ್ನು ಮುಚ್ಚಿ ರೆಪ್ಪೆಗಳಿಗೂ ಹಚ್ಚಿ, ಆದರೆ ತುಂಬಾ ನಾಜೂಕಿನಿಂದ ಬಳಸಿ. ಕೊಂಚ ಹೊತ್ತಿನ ಬಳಿಕ ತಣ್ಣೀರಿನಿಂದ ತೊಳೆದುಕೊಳ್ಳಿ. ಇದರಿಂದ ಸತ್ತ ಜೀವಕೋಶಗಳು ಸಡಿಲವಾಗಿ ನಿವಾರಣೆಯಾಗುತ್ತದೆ ಹಾಗೂ ಕೊಂಚ ಆರ್ದ್ರತೆಯನ್ನೂ ಪಡೆಯುತ್ತದೆ.

ಎಣ್ಣೆ ಚರ್ಮಕ್ಕಾಗಿ- ಮುಖಲೇಪ

ಇದಕ್ಕಾಗಿ ಜೇಡಿಮಣ್ಣಿನ ಮುಖಲೇಪವನ್ನು ಬಳಸಿ. ಮುಲ್ತಾನಿ ಮಿಟ್ಟಿ ಅಥವಾ Fuller's earth ಎಂದು ಸಿಗುವ ಜೇಡಿಮಣ್ಣನ್ನು ಕೊಂಚ ನೀರಿನೊಂದಿಗೆ ಬೆರೆಸಿ ದಪ್ಪನಾಗಿ ಹಚ್ಚಿ ಕೊಂಚ ಹೊತ್ತಿನ ಬಳಿಕ ತಣ್ಣೀರಿನಿಂದ ತೊಳೆದುಕೊಳ್ಳಿ. ಇದರ ಮೂಲಕ ಅಳಿದುಳಿದ ಎಣ್ಣೆ ಪಸೆ ನಿವಾರಣೆಯಾಗುತ್ತದೆ ಹಾಗೂ ಚರ್ಮ ಉತ್ತಮ ಕಾಂತಿಯನ್ನು ಪಡೆಯುತ್ತದೆ.

ಎಣ್ಣೆ ಚರ್ಮಕ್ಕಾಗಿ-ತೇವಕಾರಕ

ಎಣ್ಣೆಚರ್ಮ ಎಂದಾಕ್ಷಣ ನಿಮಗೆ ತೇವಕಾರಕ ಅಗತ್ಯವಿಲ್ಲ ಎಂದರ್ಥವಲ್ಲ. ಬದಲಿಗೆ ನಿಮಗೆ ಕೊಂಚ ಭಿನ್ನವಾದ ತೇವಕಾರಕದ ಅಗತ್ಯವಿದೆ. ಮಾರುಕಟ್ಟೆಯಲ್ಲಿ ಲಭ್ಯವಿರುವ ಜೆಲ್ ಆಧಾರಿತ ತೇವಕಾರಕ (gel-based moisturiser) ವೊಂದನ್ನು ಖರೀದಿಸಿ ಬಳಸಿ.

ಸಾಮಾನ್ಯ ಚರ್ಮಕ್ಕಾಗಿ - ಸ್ವಚ್ಛಕಾರಕ

ಸಾಮಾನ್ಯ ಚರ್ಮದವರು ಕೊಬ್ಬರಿ ಎಣ್ಣೆಯನ್ನು ಈ ಕಾರ್ಯಕ್ಕಾಗಿ ಬಳಸಬಹುದು. ಹತ್ತಿಯುಂಡೆಯನ್ನು ಕೊಬ್ಬರಿ ಎಣ್ಣೆಯಲ್ಲಿ ಮುಳುಗಿಸಿ ಹಿಂಡಿ ಈಗ ತಾನೇ ತಣ್ಣೀರಿನಿಂದ ತೊಳೆದುಕೊಂಡ ಮುಖಕ್ಕೆ ಹೆಚ್ಚಿನ ಒತ್ತಡವಿಲ್ಲದೇ ಒರೆಸಿಕೊಳ್ಳುವ ಮೂಲಕ ಧೂಳು ಮತ್ತು ಸೂಕ್ಷ್ಮ ಕಣಗಳನ್ನು ಚರ್ಮದ ಸೂಕ್ಷ್ಮರಂಧ್ರಗಳಿಂದ ಹೀರಿ ತೆಗೆಯಲು ಸಾಧ್ಯ. ಇದು ಮೊದಲ ಹಂತವಾಗಿದೆ.

ಸಾಮಾನ್ಯ ಚರ್ಮಕ್ಕಾಗಿ - ಸತ್ತ ಜೀವಕೋಶಗಳನ್ನು ಕೆರೆದು ತೆಗೆಯಲು

ಇದಕ್ಕಾಗಿ ಸಮಪ್ರಮಾಣದಲ್ಲಿ ಚೆನ್ನಾಗಿ ಕಳಿತ ಸ್ಟ್ರಾಬೆರಿ ಹಣ್ಣು ಮತ್ತು ಮೊಸರನ್ನು ಬೆರೆಸಿದ ಲೇಪನ ಬಳಸಿ. ಸ್ಟ್ರಾಬೆರಿಯಲ್ಲಿರುವ ಪೋಷಕಾಂಶಗಳು ಚರ್ಮದ ಜೀವಕೋಶಗಳಿಗೆ ಕಳೆ ನೀಡುವ ಜೊತೆಗೆ ಕಾಂತಿಯನ್ನೂ ಹೆಚ್ಚಿಸುತ್ತದೆ.

ಸಾಮಾನ್ಯ ಚರ್ಮಕ್ಕಾಗಿ - ಮುಖಲೇಪ

ಅರಿಶಿನವನ್ನು ಅರೆದು ತಯಾರಿಸಿದ ಮುಖಲೇಪ ಈ ಚರ್ಮದವರಿಗೆ ಅತ್ಯುತ್ತಮವಾಗಿದೆ. ಅರಿಶಿನದ ಕೊಂಬನ್ನು ಹಾಲಿನೊಂದಿಗೆ ತೇದಿ ಮುಖಲೇಪ ತಯಾರಿಸಿ. ಈಗ ತಾನೇ ತೊಳೆದುಕೊಂಡ ಮುಖಕ್ಕೆ ಈ ಲೇಪನವನ್ನು ತೆಳುವಾಗಿ ಹಚ್ಚಿ ಸುಮಾರು ಇಪ್ಪತ್ತು ನಿಮಿಷ ಹಾಗೇ ಬಿಡಿ. ಬಳಿಕ ತಣ್ಣೀರಿನಿಂದ ತೊಳೆದುಕೊಳ್ಳಿ. ಈ ವಿಧಾನದಿಂದ ಚರ್ಮದಲ್ಲಿದ್ದ ಹೆಚ್ಚುವರಿ ಎಣ್ಣೆಯಂಶ ನಿವಾರಣೆಯಾಗುತ್ತದೆ ಹಾಗೂ ಚರ್ಮದ ಕಾಂತಿಯೂ ಹೆಚ್ಚುತ್ತದೆ.

ಸಾಮಾನ್ಯ ಚರ್ಮಕ್ಕಾಗಿ -ತೇವಕಾರಕ

ಸಾಮಾನ್ಯ ಚರ್ಮದವರಿಗೆ ನೀರು ಆಧಾರಿತ ತೇವಕಾರಕವೇ ಅತ್ಯುತ್ತಮ ಆಯ್ಕೆಯಾಗಿದೆ. ಮಾರುಕಟ್ಟೆಯಲ್ಲಿ ಲಭ್ಯವಿರುವ ನಿಮ್ಮ ಆಯ್ಕೆಯ ನೀರು ಆಧಾರಿತ ತೇವಕಾರಕವನ್ನು ತೆಳುವಾಗಿ ಹಚ್ಚಿ. ಈ ವಿಧಾನವನ್ನು ಅನುಸರಿಸಿದರೆ ಯಾವುದೇ ವೃತ್ತಿಪರ ಮಳಿಗೆಯಲ್ಲಿ ದೊರಕುವ ಫೇಶಿಯಲ್ ಗಿಂತಲೂ ಉತ್ತಮವಾದ ಪರಿಣಾಮವನ್ನು ಮನೆಯಲ್ಲಿಯೇ ಪಡೆಯಬಹುದು.