ತೆಳ್ಳಗಾದ ಕೂದಲನ್ನು ಮತ್ತೆ ಮಂದವಾಗಿಸಲು ಹರಳೆಣ್ಣೆ ಹೇಗೆ ಬಳಸಬೇಕು?

ಕೂದಲು ಮರಳಿ ಹುಟ್ಟಲು ಹರಳೆಣ್ಣೆ ತುಂಬಾ ಸಹಕಾರಿ

ಕೂದಲು ಉದುರುತ್ತಿದ್ದರೆ ಅದರಲ್ಲೂ ತಲೆಯ ಮೇಲ್ಬಾಗದಲ್ಲಿ ತುಂಬಾ ಕೂದಲು ಉದುರುತ್ತಿದ್ದರೆ ಬಕ್ಕ ತಲೆ ಉಂಟಾಗಬಹುದು. ಕೂದಲು ಉದುರುತ್ತಿದ್ದಾಗಲೇ ತಲೆ ಬುಡಕ್ಕೆ ಹರಳೆಣ್ಣೆ ಹಚ್ಚಿ ಆರೈಕೆ ಮಾಡಿದರೆ ಆ ಭಾಗದಲ್ಲಿ ಕೂದಲು ಹುಟ್ಟಲು ಸಹಕಾರಿಯಾಗುತ್ತದೆ.

ಅಲ್ಲದೆ ಕೂದಲು ತುಂಬಾ ತೆಳುವಾಗಿದ್ದವರೂ ಕೂಡ ಹರಳೆಣ್ಣೆ ಹಚ್ಚುತ್ತಿದ್ದರೆ ಕೆಲವು ತಿಂಗಳಿನಲ್ಲಿ ಕೂದಲು ಮಂದಾಗಿ ಬೆಳೆಯುವುದು.

ಬೇರೆ ಎಣ್ಣೆ ಹಚ್ಚುತ್ತಿದ್ದಂತೆ ಹರಳೆಣ್ಣೆ ಹಚ್ಚಲು ಸಾಧ್ಯವಿಲ್ಲ

ಶುದ್ಧವಾದ ಹರಲೆಣ್ಣೆ ತುಂಬಾ ಅಂಟು-ಅಂಟಾಗಿರುತ್ತದೆ, ಆದ್ದರಿಂದ ಈ ಎಣ್ಣೆ ತಲೆಗೆ ಹಾಕಿ ತೆಂಗಿನೆಣ್ಣೆ ಹಾಕಿ ಮಸಾಜ್‌ ಮಾಡುವಂತೆ ಮಾಡಲು ಸಾಧ್ಯವಿಲ್ಲ.

ಇದನ್ನು ಕೂದಲು ಉದುರುತ್ತಿರವ ಭಾಗಕ್ಕೆ ಸರಿಯಾಗಿ ಹಾಕಬೇಕು. ಹೀಗೆ ಹಾಕಲು ಸ್ಪೂನ್ ಅಥವಾ ಡ್ರಾಪರ್‌ ಬಳಸಬಹುದು. ಅಲ್ಲದೆ ತಲೆಗೆ ಹಚ್ಚಿ ಮಸಾಜ್‌ ಮಾಡುವುದಾದರೆ ತೆಂಗಿನೆಣ್ಣೆ ಜೊತೆ ಮಿಶ್ರ ಮಾಡಿ. ಇನ್ನು ಭೃಂಗರಾಜ ಎಣ್ಣೆ ಜೊತೆ ಬೆರೆಸಿ ಹಾಕಿದರೆ ಮತ್ತಷ್ಟು ಒಳ್ಳೆಯದು.

ಎಷ್ಟು ಪ್ರಮಾಣದಲ್ಲಿ ಬಳಸಬೇಕು?

ಸಾಮಾನ್ಯವಾಗಿ ಹರಳೆಣ್ಣೆಯನ್ನು 1:2 ಪ್ರಮಾಣದಲ್ಲಿ ಬಳಸುವುದು ಒಳ್ಳೆಯದು. ಒಂದು ಕಪ್ ಹರಳೆಣ್ಣೆ ಇದ್ದರೆ 2 ಕಪ್ ತೆಂಗಿನೆಣ್ಣೆ ಅಥವಾ ಭೃಂಗರಾಜ ಎಣ್ಣೆ ಮಿಕ್ಸ್ ಮಾಡಿ ತಲೆಗೆ ಹಚ್ಚಿ.

ಅದರಲ್ಲೂ ತೆಂಗಿನೆಣ್ಣೆಗೆ ಮೆಂತೆ ಬೀಜ, ಕತ್ತರಿಸಿದ ಈರುಳ್ಳಿ, ಕರಿ ಬೇವಿನ ಎಲೆ ಹಾಕಿ ಕುದಿಸಿ ಒಂದು ಗಂಟೆ ಬಿಡಿ. ನಂತರ ಹರಳೆಣ್ಣೆ ಜೊತೆ ಮಿಶ್ರ ಮಾಡಿ, ತಲೆಗೆ ಹಚ್ಚಿ. ಎಣ್ಣೆ ಸ್ವಲ್ಪ ಬಿಸಿಯಿರಲಿ, ನಂತರ ತಲೆಗೆ ಹಚ್ಚಿ ಟವಲ್‌ ಅನ್ನು ಬಿಸಿ ನೀರಿನಲ್ಲಿ ಒದ್ದೆ ಮಾಡಿ ಹಿಂಡಿ ತಲೆಗೆ ಹಚ್ಚಿ ಒಂದು ಗಂಟೆ ಬಿಡಿ, ನಂತರ ಮೈಲ್ಡ್ ಶ್ಯಾಂಪೂ ಹಚ್ಚಿ ತಲೆ ತೊಳೆಯಿರಿ.

ವಾರದಲ್ಲಿ ಎಷ್ಟು ಬಾರಿ ಹಚ್ಚಬೇಕು?

3 ದಿನಕ್ಕೊಮ್ಮೆ ಈ ರೀತಿ ಮಾಡುತ್ತಿದ್ದರೆ ತುಂಬಾನೇ ಒಳ್ಳೆಯದು. ಸಮಯ ಇಲ್ಲದವರೂ ವಾರಕ್ಕೆ ಒಂದು ಬಾರಿಯಾದರೂ ಮಾಡಿದರೆ ಕೂದಲಿನ ಆರೋಗ್ಯ ಕಾಪಾಡಿಕೊಳ್ಳಬಹುದು.

ಇನ್ನು ಹರಳೆಣ್ಣೆ ತುಂಬಾ ಅಂಟು-ಅಂಟಾಗಿರುವುದರಿಂದ ಈ ಜಿಡ್ಡು ಹೋಗಲಾಡಿಸಲು ಶ್ಯಾಂಪೂ ಬೇಕೆ-ಬೇಕು, ಬಳಸುವ ಶ್ಯಾಂಪೂ ಮೈಲ್ಡ್ ಆಗಿರಲಿ, ಸೀಗೇಪುಡಿ ಬಳಸಿದರೆ ಮತ್ತಷ್ಟು ಒಳ್ಳೆಯದು.