ಬೊಕ್ಕತಲೆ ಸಮಸ್ಯೆ ನಿಮ್ಮನ್ನೂ ಕಾಡಬಹುದು!

Hair Care

oi-Sumalatha N

By Sumalatha N

Published: Wednesday, August 17, 2011, 17:08 [IST]

ಅತಿಯಾದ ಒತ್ತಡ, ಕೆಲಸ, ಕೂದಲೆಡೆಗಿನ ನಿರ್ಲಕ್ಷ್ಯ ಅಥವಾ ವಂಶವಾಹಿಯಿಂದ ಪುರುಷರಲ್ಲಿ ತಲೆಗೂದಲುದುರುವ ಸಮಸ್ಯೆ ಕಾಡುತ್ತದೆ. ಅದರಲ್ಲೂ 25-35 ರ ವಯೋಮಿತಿಯವರಲ್ಲಿ ಬೊಕ್ಕತಲೆ ಮತ್ತು ಬೇಗನೆ ನೆರೆ ಕೂದಲು ಬರುವ ಸಮಸ್ಯೆ ಹೆಚ್ಚಾಗುತ್ತಿದೆ. ಈ ಸಮಸ್ಯೆಯಿರುವ ಪುರುಷರಿಗೆ ಕೆಲವೊಂದು ಸುಲಭ ಸಲಹೆಯನ್ನು ಇಲ್ಲಿ ನೀಡಲಾಗಿದೆ.

ಕೂದಲುದುರುವಿಕೆ ತಡೆಯಲು ಪುರುಷರು ಅನುಸರಿಸಬೇಕಾದ ಮಾರ್ಗ:

* ಮೃದುವಾದ ಪೋಷಣೆ: ಕೂದಲು ದೇಹದಷ್ಟು ಸದೃಢವಲ್ಲ. ಆದ್ದರಿಂದ ಕೂದಲನ್ನು ಮೃದುವಾಗಿ ಪೋಷಿಸಬೇಕು. ಅದರಲ್ಲೂ ಕೂದಲು ತೇವವಿದ್ದಾಗ ಗಟ್ಟಿಯಾದ ಬಟ್ಟೆಯಿಂದ ಗಡುಸಾಗಿ ಒರೆಸಬಾರದು. ಇದು ಬೆಳೆಯುತ್ತಿರುವ ಕೂದಲನ್ನೂ ಕಿತ್ತುಹಾಕಿ ಕೂದಲಿಗೆ ಹಾನಿಯುಂಟು ಮಾಡುತ್ತದೆ. ಸ್ನಾನವಾದ ನಂತರ ಮೆತ್ತನೆ ಬಟ್ಟೆಯಲ್ಲಿ ತಲೆ ಒಣಗಿಸುವುದೇ ಸೂಕ್ತ ಮಾರ್ಗ.

* ಬೆರಳನ್ನೇ ಬಾಚಣಿಕೆ ಮಾಡಿಕೊಳ್ಳಿ: ತೇವಗೊಂಡಿರುವ ಕೂದಲನ್ನು ಬಾಚಣಿಕೆಯಲ್ಲಿ ಬಾಚುವುದರಿಂದ ಕೂದಲು ಕಿತ್ತು ಬರುವುದು ಗ್ಯಾರಂಟಿ. ಆದ್ದರಿಂದ ಅದು ಒಣಗುವವರೆಗಾದರೂ ಕೇವಲ ಕೈಯ್ಯ ಬೆರಳುಗಳನ್ನಷ್ಟೇ ಉಪಯೋಗಿಸಿಕೊಂಡು ಕೂದಲ ಸಿಕ್ಕನ್ನು ಸರಿಪಡಿಸಿಕೊಂಡರೆ ಉತ್ತಮ.

* ಹೇರ್ ಕಟ್: ಪುರುಷರು ತಮ್ಮ ತಲೆಗೂದಲನ್ನು ತುಂಡಾಗಿ ಕತ್ತರಿಸಿಕೊಳ್ಳುವುದೇ ಒಳ್ಳೆಯದು. ಚಿಕ್ಕ ಕೂದಲಿದ್ದರೆ ಅದನ್ನು ಸಂಬಾಳಿಸುವುದೂ ಕೂಡ ಸುಲಭ. ಇದರಿಂದ ಸ್ನಾನವಾದ ನಂತರ ಕೂದಲು ಬೇಗನೆ ಒಣಗುತ್ತದೆ. ಕೂದಲನ್ನು ತುಂಡಾಗಿ ಕತ್ತರಿಸಿ ಸ್ಟೈಲಿಶ್ ಆಗೂ ಕಾಣಿಸಿಕೊಳ್ಳಬಹುದು.

* ಕೂದಲಿನ ಉತ್ಪನ್ನಗಳನ್ನು ತ್ಯಜಿಸಿ: ನಿಮ್ಮ ಕೂದಲು ತುಂಬಾ ತೆಳುವಾಗುತ್ತಿದ್ದರೆ ನೀವು ಹೇರ್ ಸ್ಟ್ರೇಟನಿಂಗ್ ಅಥವಾ ಕರ್ಲಿಂಗ್ ಮಾಡಿಕೊಳ್ಳುತ್ತಿರುವುದೂ ಕಾರಣವಾಗಬಹುದು. ಸ್ಟೈಲಿಂಗ್ ಉತ್ಪನ್ನಗಳಾದ ಜೆಲ್, ಹೇರ್ ಕಲರ್, ಪೇಸ್ಟ್ ಮುಂತಾದುವುಗಳು ಕೆಮಿಕಲ್ ಒಳಗೊಂಡಿರುವುದರಿಂದ ನಿಮ್ಮ ಕೂದಲಿಗೆ ಸಮಸ್ಯೆ ತಂದೊಡ್ಡಬಹುದು. ಆದ್ದರಿಂದ ಹೆಚ್ಚು ಉತ್ಪನ್ನಗಳನ್ನು ಬಳಸದಿದ್ದರೆ ಉತ್ತಮ.

* ಎಣ್ಣೆ ಎಂಬ ನೈಸರ್ಗಿಕ ಮದ್ದು: ಕೂದಲಿಗೆ ಪೋಷಣೆ ನೀಡುವುದರಲ್ಲಿ ಮನೆ ಮದ್ದಿನಷ್ಟು ಇನ್ನಾವುದೂ ಪರಿಣಾಮಕಾರಿಯಾಗುವುದಿಲ್ಲ. ಸೂಕ್ತ ಎಣ್ಣೆಯಿಂದ ಕೂದಲ ಬುಡವನ್ನು ಮಸಾಜ್ ಮಾಡಿಕೊಂಡರೆ ಸಾಕು, ಅಲ್ಲಿಗೆ ಕೂದಲಿನ ಸಮಸ್ಯೆ ಪರಿಹಾರಗೊಳ್ಳುತ್ತದೆ. ಅಷ್ಟಕ್ಕೂ ಉತ್ಪನ್ನಗಳನ್ನು ಬಳಸಲೇಬೇಕೆಂದಿದ್ದಲ್ಲಿ ಅವುಗಳಲ್ಲಿ ಕೂದಲುದುರುವಿಕೆ ತಡೆಯುವ ಅಂಶ 'ಮೈನಾಕ್ಸಿಡಿಲ್' ಇರುವುದನ್ನು ಖಚಿತಪಡಿಸಿಕೊಂಡು ಖರೀದಿಸಿ.