ಬಿಸಿಬಿಸಿ ಕಜ್ಜಾಯ ಮಾಡಿ ಕೊಡಲೆ ನಾನು

ಹಬ್ಬ ಇನ್ನಿತರ ವಿಶೇಷ ಸಂದರ್ಭಗಳಲ್ಲಿ ತಯಾರಿಸುವ ಈ ಕಜ್ಜಾಯದ ಪ್ರಸ್ತಾಪವನ್ನು ಹಾಡು, ಗಾದೆಯಲ್ಲೂ ಕಾಣಬಹುದು. ಕಜ್ಜಾಯ ಮಾಡಿ ಗಾಳಿಯಾಡದ ಡಬ್ಬದಲ್ಲಿ ಮುಚ್ಚಿಟ್ಟರೆ ವಾರವಿಡೀ ಇದರ ರುಚಿಯನ್ನು ಸವಿಯಬಹುದು.

ಕಜ್ಜಾಯ ಮಾಡೋದು ಹೇಗೆ ಎಂದು ಇಲ್ಲಿ ತಿಳಿದುಕೊಳ್ಳಿ.

ಕಜ್ಜಾಯ ಮಾಡಲು ಏನೇನು ಬೇಕು?
* 1 ಕಪ್ ಬೆಲ್ಲ
* 2 ಕಪ್ಪ ಅಕ್ಕಿ
* 1 ಚಮಚ ಏಲಕ್ಕಿ ಪುಡಿ
* 1 ಕಳಿತ ಬಾಳೆಹಣ್ಣು
* ಎಣ್ಣೆ

ಕಜ್ಜಾಯ ಮಾಡುವ ವಿಧಾನ:
* ಬೆಲ್ಲವನ್ನು ಚೆನ್ನಾಗಿ ಪುಡಿ ಮಾಡಿ 1/4 ಕಪ್ ನೀರಿನೊಂದಿಗೆ ಪಾಕ ಮಾಡಿಕೊಳ್ಳಬೇಕು. ತಣ್ಣಗಾದ ನಂತರ ಅದರಲ್ಲಿದ್ದ ಕಲ್ಮಶ ತೊಲಗಿಸಲು ಸೋಸಬೇಕು.

* ಈ ಪಾಕವನ್ನು ಬಿಸಿಗೆ ಇಟ್ಟು ಅದು ಅಂಟಿಗೆ ಬರುವ ತನಕ ಚೆನ್ನಾಗಿ ತಿರುಗಿಸುತ್ತಿರಬೇಕು.

* ತೊಳೆದು ಪುಡಿ ಮಾಡಿದ ಅಕ್ಕಿ ಹಿಟ್ಟನ್ನು ಈ ಬೆಲ್ಲದ ಪಾಕಕ್ಕೆ ಬೆರೆಸಿ ಸ್ವಲ್ಪ ಗಟ್ಟಿ ಹಿಟ್ಟಿನಂತಾಗುವ ತನಕ ಚೆನ್ನಾಗಿ ಕದಡಬೇಕು. ನಂತರ ಅದನ್ನು ತಣ್ಣಗಾಗಲು ಬಿಡಬೇಕು.

* ಇದಕ್ಕೆ ಕಿವುಚಿದ ಬಾಳೆ ಹಣ್ಣು, ಏಲಕ್ಕಿ ಪುಡಿ ಬೆರೆಸಿ ಒಂದು ರಾತ್ರಿಯಿಡೀ ಅಥವಾ 8 ಗಂಟೆಗಳ ಕಾಲ ಹಾಗೆ ಇಡಬೇಕು.

* ಅಗಲವಾದ ಬಾಣಲೆಯಲ್ಲಿ ಎಣ್ಣೆ ಕಾಯಿಸಿ ತಯಾರಾಗಿಟ್ಟಿದ್ದ ಹಿಟ್ಟನ್ನು ವೃತ್ತಾಕಾರವಾಗಿ ಅಗಲವಾಗಿ ತಟ್ಟಿ ಎಣ್ಣೆಯಲ್ಲಿ ಹಾಕಿ ಕಡುಕೆಂಪು ಬಣ್ಣಕ್ಕೆ ತಿರುಗುವವರೆಗೂ ಕರೆಯಬೇಕು.

* ಪೇಪರ್ ಮೇಲೆ ಕರಿದ ಕಜ್ಜಾಯ ಹಾಕಿ ಎಣ್ಣೆ ಹೀರಿಕೊಂಡ ನಂತರ ಡಬ್ಬಕ್ಕೆ ಹಾಕಬೇಕು ಅಥವಾ ಮಾಡಿದ ಕೂಡಲೆ ಬಿಸಿ ಬಿಸಿ ಕಜ್ಜಾಯವನ್ನು ಮನೆಮಂದಿಗೆಲ್ಲಾ ಹಂಚಿದರೂ ಸರಿ.