ಗರ್ಭಾವಸ್ಥೆಯಲ್ಲಿ ಹೆಚ್ಚುವ ಹಸಿವಿಗೆ ಕಾರಣಗಳು ಮತ್ತು ಪರಿಹಾರೋಪಾಯಗಳು

ಗರ್ಭಾವಸ್ಥೆಯಲ್ಲಿ ಹಸಿವು ಹೆಚ್ಚಾಗಲು ಕಾರಣಗಳು

ತಾಯಿ ತನ್ನ ದೇಹದಲ್ಲಿ ಇನ್ನೊಂದು ಜೀವವನ್ನು ಹೊತ್ತಿರುವ ಸಂದರ್ಭ ಇದಾಗಿದ್ದುದರಿಂದ ಎರಡು ಜೀವಗಳಿಗೆ ಬೇಕಾಗುವ ಪೋಷಕಾಂಶವನ್ನು ಗರ್ಭಿಣಿ ಸೇವಿಸಬೇಕಾಗುವುದು. ದೇಹವು ಹೆಚ್ಚು ಪೋಷಕಾಂಶಗಳನ್ನು ಹೀರಿಕೊಳ್ಳುವುದರಿಂದ ಹಸಿವಿನ ಪ್ರಚೋದನೆಯು ಹೆಚ್ಚುವುದು. ಅಲ್ಲದೆ ನಾವು ಸೇವಿಸುವ ಆಹಾರದಲ್ಲಿ ಪೋಷಕಾಂಶದ ಪ್ರಮಾಣ ಕಡಿಮೆಯಿದ್ದರೂ ಪದೇ ಪದೇ ಹಸಿವು ಉಂಟಾಗುವುದು. ಮಗುವಿನ ಬೆಳವಣಿಗೆಗೆ ಅಗತ್ಯವಾದ ಪೌಷ್ಟಿಕಾಂಶ ಭರಿತ ಆಹಾರವನ್ನು ಸೇವಿಸಬೇಕಾಗುವುದು.

ಗರ್ಭಾವಸ್ಥೆಯಲ್ಲಿ ಕಾಡುವ ಹಸಿವಿಗೆ ಪರಿಹಾರ ಕ್ರಮಗಳು

* ಕ್ಯಾಲೋರಿ ಭರಿತ ಆಹಾರ ಸೇವನೆಯ ಯೋಜನೆ.

* ಊಟದ ಸಂಖ್ಯೆ ಕಡಿಮೆ ಮಾಡಿ.

* ಆರೋಗ್ಯಕರ ಉಪಹಾರವನ್ನು ಸ್ವೀಕರಿಸಿ.

* ನಿಮ್ಮ ಕ್ಯಾಲ್ಸಿಯಂ ಪ್ರಮಾಣವನ್ನು ಪರಿಶೀಲಿಸಿ.

* ನಿಧಾನವಾಗಿ ಆಹಾರ ಸೇವನೆ ಮಾಡಿ.

* ಬೆಳಗಿನ ಉಪಹಾರ ತ್ಯಜಿಸದಿರಿ.

* ಸಾಕಷ್ಟು ನೀರನ್ನು ಕುಡಿಯಿರಿ.

ಕ್ಯಾಲೋರಿ ಭರಿತ ಆಹಾರ ಸೇವನೆಯ ಯೋಜನೆ

ಎರಡು ಜೀವ ಒಂದೇ ದೇಹದಲ್ಲಿ ಇರುವುದರಿಂದ ಹೆಚ್ಚು ಆಹಾರ ಸೇವನೆಯನ್ನು ಮಾಡಬೇಕಾಗುವುದು. ಆದರೆ ಮಿತಿಮೀರಿ ಸೇವಿಸುವುದು ಸಹ ಸೂಕ್ತ ವಿಧಾನ ಆಗಿರದು. ಹಾಗಾಗಿ ನೀವು ನಿತ್ಯ ಎಷ್ಟು ಕ್ಯಾಲೋರಿ ಇರುವ ಆಹಾರವನ್ನು ಸ್ವೀಕರಿಸಬೇಕು ಎನ್ನುವುದರ ಕುರಿತು ಸೂಕ್ತ ಮಾಹಿತಿ ಹೊಂದಬೇಕು. ಮೊದಲ ಮತ್ತು ಎರಡನೇ ತ್ರೈಮಾಸಿಕದಲ್ಲಿ 300ಕ್ಕಿಂತಲೂ ಹೆಚ್ಚು ಕ್ಯಾಲೋರಿಯನ್ನು ಹೊಂದಬೇಕಾಗುವುದು. ಮೂರು ತಿಂಗಳಲ್ಲಿ 450ಕ್ಕಿಂತಲೂ ಹೆಚ್ಚು ಕ್ಯಾಲೋರಿಯನ್ನು ಸೇವಿಸಬೇಕಾಗುವುದು. ಹಾಗಾಗಿ ಇವುಗಳನ್ನು ಮನಸ್ಸಿನಲ್ಲಿಟ್ಟುಕೊಂಡು ಕ್ಯಾಲೋರಿ ಭರಿತ ಆಹಾರವನ್ನು ಎಷ್ಟು ಸೇವಿಸಬೇಕು ಎನ್ನುವುದನ್ನು ಪಟ್ಟಿಮಾಡಿಕೊಳ್ಳಿ.

ಊಟದ ಸಂಖ್ಯೆ ಕಡಿಮೆ ಮಾಡಿ

ದಿನದಲ್ಲಿ ಮೂರು ದೊಡ್ಡ ಊಟ ಮಾಡುವ ಬದಲು, ನೀವು 6 ಅಥವಾ 7 ಸಣ್ಣ ಊಟವನ್ನು ಆರಿಸಿಕೊಳ್ಳುವುದು ಸೂಕ್ತ. ಹೀಗೆ ಮಾಡುವುದರಿಂದ ಊಟದ ಅವಧಿಯು ಪರಸ್ಪರ ಅಧಿಕ ಸಮಯದ ಅಂತರವನ್ನು ಹೊಂದುವುದಿಲ್ಲ. ಹೆಚು ಸಮಯಗಳ ಕಾಲ ಹಸಿವಿನ ನೋವು ಉಂಟಾಗುವುದಿಲ್ಲ. ನೈಸರ್ಗಿಕವಾಗಿ ಉಂಟಾಗುವ ಹಸಿವಿನ ಸಮಸ್ಯೆಯನ್ನು ಇದು ತಪ್ಪಿಸುವುದು. ಜೊತೆಗೆ ಅಗತ್ಯಕ್ಕಿಂತ ಹೆಚು ತಿನ್ನಬಾರದು ಎನ್ನುವುದನ್ನು ಮರೆಯದೆ ಪಾಲಿಸಬೇಕು.

ಆರೋಗ್ಯಕರ ಉಪಹಾರವನ್ನು ಸ್ವೀಕರಿಸಿ

ಹಸಿವಾದಾಗ ಏನಾದರೂ ತಿಂದು ಹಸಿವನ್ನು ಮರೆಮಾಚುವುದು ಸಹಜ. ಆದರೆ ಗರ್ಭಾವಸ್ಥೆಯಲ್ಲಿ ಇರುವಾಗ ಹಸಿವು ಹೆಚ್ಚುವುದು ಹೇಗೆ ಸ್ವಾಭಾವಿಕ ಕ್ರಿಯೆಯಾಗಿರುತ್ತದೆಯೋ ಹಾಗೆಯೇ ನೀವು ನಿಮ್ಮ ಆಹಾರ ಸೇವನೆಯ ಬಗ್ಗೆಯೂ ಕಾಳಜಿ ವಹಿಸಬೇಕಾಗುವುದು. ಹಸಿವಾದ ತಕ್ಷಣ ಮನಸ್ಸಿಗೆ ಬಂದಿದ್ದನ್ನು ಸೇವಿಸಬಾರದು. ಅನಗತ್ಯ ಕ್ಯಾಲೋರಿಗಳು ದೇಹದಲ್ಲಿ ತೊಂದರೆಯನ್ನುಂಟು ಮಾಡುವ ಸಾಧ್ಯತೆಗಳಿವೆ. ಹಠಾತ್ ಉಂಟಾಗುವ ಹಸಿವಿನ ನೋವಿಗೆ ಮೊಸರು, ಹಣ್ಣುಗಳು, ಒಣ ಹಣ್ಣು, ಮೊಳಕೆ ಭರಿಸಿದ ಕಾಳುಗಳನ್ನು ಸೇವಿಸುವುದರಿಂದ ಪರಿಹಾರ ದೊರೆಯುವುದು. ಮಿತಿಮೀರಿದ ಕುರುಕಲು ತಿಂಡಿ, ಮಸಾಲೆ ಭರಿತ ಆಹಾರ ಹಾಗೂ ಇನ್ನಿತರ ಬೇಕರಿ ತಿನಿಸುಗಳಿಂದ ದೂರವಿರಿ.

ನಿಮ್ಮ ಕ್ಯಾಲ್ಸಿಯಂ ಪ್ರಮಾಣವನ್ನು ಪರಿಶೀಲಿಸಿ

ಗರ್ಭಾವಸ್ಥೆಯಲ್ಲಿ ಹಸಿವು ಉಂಟಾಗುವುದು ನೈಸರ್ಗಿಕ ಕ್ರಿಯೆ ಆಗಿರಬಹುದು. ಅಂತೆಯೇ ದೇಹದಲ್ಲಿ ಕ್ಯಾಲ್ಸಿಯಂ ಪ್ರಮಾಣ ಕಡಿಮೆಯಾಗಿದ್ದರೆ ಅಥವಾ ಕೊರತೆಯಿಂದ ಕೂಡಿದ್ದರೆ ಪದೇ ಪದೇ ಹಸಿವು ಉಂಟಾಗುವುದು. ಹಾಗಾಗಿ ಹಾಲಿನ ಉತ್ಪನ್ನಗಳನ್ನು ಸೇವಿಸುವುದರ ಮೂಲಕ ಹಸಿವಿನ ಪ್ರಮಾಣವನ್ನು ಕಡಿಮೆ ಮಾಡಬಹುದು. ಗರ್ಭಾವಸ್ಥೆಯಲ್ಲಿ ಇರುವಾಗ ಲ್ಯಾಕ್ಟೋಸ್ ಕೊರತೆಯನ್ನು ಹೊಂದಿದ್ದರೆ ದೈನಂದಿನ ಪೋಷಣೆಯ ಪ್ರಮಾಣವನ್ನು ಪೂರೈಸಲು ಮೇಕೆ ಹಾಲನ್ನು ಆಯ್ಕೆ ಮಾಡಿಕೊಳ್ಳಬಹುದು. ಕ್ಯಾಲ್ಸಿಯಂ ಪ್ರಮಾಣದಲ್ಲಿ ಸಮಾನತೆ ಸೃಷ್ಟಿಸಿಕೊಂಡರೆ ಹಸಿವಿನ ಪ್ರಮಾಣವು ಸಾಮಾನ್ಯ ಸ್ಥಿತಿಗೆ ಬರುವುದು.

ನಿಧಾನವಾಗಿ ಆಹಾರ ಸೇವನೆ ಮಾಡಿ

ವೇಗದಲ್ಲಿ ಆಹಾರ ಸೇವನೆ ಮಾಡುವುದರಿಂದ ದೇಹಕ್ಕೆ ಆಹಾರ ಪೂರೈಕೆ ಸಮಪ್ರಮಾಣದಲ್ಲಿ ಆಗಿದೆಯೇ ಎನ್ನುವ ಸಂವೇದನೆ ಸೂಕ್ತವಾಗಿ ದೊರೆಯದು. ಆಹಾರ ಸೇವಿಸುವಾಗ ನಿಧಾನವಾಗಿ ಅಗೆಯುವುದು ಹಾಗೂ ಅದರ ಸ್ವಾದವನ್ನು ಅನುಭವಿಸುತ್ತಾ ತಿಂದರೆ ಮಾನಸಿಕವಾಗಿ ಹಾಗೂ ದೈಹಿಕವಾಗಿಯೂ ಹೊಟ್ಟೆ ತುಂಬಿರುವ ಸಂವೇದನೆ ಹಾಗೂ ಸಂತೃಪ್ತ ಭಾವ ಉಂಟಾಗುವುದು. ಗರ್ಭಾವಸ್ಥೆಯಲ್ಲಿ ಇರುವಾಗಲೂ ಸೂಕ್ತ ರೀತಿಯಲ್ಲಿ ನಿಧಾನವಾಗಿ ಆಹಾರ ಸೇವಿಸುವುದು ಉತ್ತಮ.

ಬೆಳಗಿನ ಉಪಹಾರ ತ್ಯಜಿಸದಿರಿ

ಮುಂಜಾನೆಯ ಸಮಯವು ಗರ್ಭಿಣಿಯರಿಗೆ ಕಿರಿಕಿರಿಯನ್ನು ಉಂಟುಮಾಡುವುದು ಸಹಜ. ಮುಂಜಾನೆಯ ಸಮಯದಲ್ಲಿ ವಾಕರಿಕೆ, ತಲೆ ಸುತ್ತು, ಆಹಾರ ಸೇವನೆಗೆ ಮನಸ್ಸು ಒಗ್ಗದಿರುವುದು ಉಂಟಾಗಬಹುದು. ಹಾಗಂತ ಮುಂಜಾನೆಯ ಉಪಹಾರವನ್ನು ತ್ಯಜಿಸಬಾರದು. ಮುಂಜಾನೆಯ ಉಪಹಾರ ತ್ಯಜಿಸಿದರೆ ದಿನವಿಡೀ ಹಸಿವಿನ ನೋವು ಕಾಡುವುದು. ಆರೋಗ್ಯ ಭರಿತ ಉಪಹಾರವನ್ನು ಕ್ರಮಬದ್ಧವಾಗಿ ಸೇವಿಸುವುದರಿಂದ ಆರೋಗ್ಯ ಸುಧಾರಣೆ ಹಾಗೂ ಹಸಿವಿನ ನೋವು ಕಡಿಮೆಯಾಗುವುದು.

ಸಾಕಷ್ಟು ನೀರನ್ನು ಕುಡಿಯಿರಿ

ಕೆಲವರು ನೀರು ಕುಡಿಯುವುದು ಎಂದರೆ ಒಂದು ಬಗೆಯ ಬೇಸರ ವ್ಯಕ್ತಪಡಿಸುತ್ತಾರೆ. ಗರ್ಭಾವಸ್ಥೆಯಲ್ಲಿ ಇರುವಾಗ ಸಾಧ್ಯವಾದಷ್ಟು ಹೆಚ್ಚು ನೀರನ್ನು ಕುಡಿಯಬೇಕು. ಗರ್ಭಿಣಿಯು ನಿತ್ಯ 10 ಕಪ್ ನೀರನ್ನು ಕುಡಿಯಲೇ ಬೇಕು. ಅದು ನೀರು, ಚಹಾ, ಕಾಫಿ ಅಥವಾ ಇನ್ಯಾವುದೇ ಪಾನೀಯಗಳನ್ನು ಒಳಗೊಂಡಿರಬಹುದು. ಆರೋಗ್ಯಕರ ಗರ್ಭಧಾರಣೆಗೆ ಸೂಕ್ತ ಪ್ರಮಾಣದ ನೀರು ಸೇವನೆಯು ಅತ್ಯಗತ್ಯ ಎನ್ನುವುದನ್ನು ನೆನಪಿಡಿ.