ಸಣ್ಣ ಮಗುವಿನ ತಲೆಯಲ್ಲಿ ಬೆವರುವಿಕೆ ಜಾಸ್ತಿ ಏಕೆ ಗೊತ್ತೆ?

ನಿಮ್ಮ ಮಗುವಿಗೆ ಜ್ವರ ಬಂದಿದೆಯಾ ನೋಡಿ

ಬಹುತೇಕ ಶಿಶುಗಳ ದೇಹದ ಉಷ್ಣತೆಗಿಂತ ನೆತ್ತಿಯ ಭಾಗದ ಉಷ್ಣತೆ ಹೆಚ್ಚಾಗಿರುವುದು ಸಾಮಾನ್ಯವಾಗಿದೆ. ಇದು ಬಹುತೇಕ ಶಿಶುಗಳಲ್ಲಿ ಕಂಡುಬರುವ ಪ್ರಕ್ರಿಯೆಯೇ ಆಗಿದೆ. ಆದರೆ ನಿಮ್ಮ ಮಗುವಿಗೆ ಜ್ವರ ಏನಾದರೂ ಇದೆಯಾ ಎಂಬುದನ್ನು ಒಮ್ಮೆ ಪರಿಶೀಲಿಸಿ. ಗಲ್ಲ ಅಥವಾ ಗಲ್ಲದ ಕೆಳಗೆ ಕುತ್ತಿಗೆಯ ಮಧ್ಯಭಾಗದಲ್ಲಿ ಮುಟ್ಟಿ ನೋಡಿದರೆ ಜ್ವರ ಇದೆಯಾ ಅಥವಾ ಇಲ್ಲವಾ ಎಂಬುದನ್ನು ತಿಳಿಯಬಹುದಾಗಿದೆ. ಜ್ವರ ಇಲ್ಲವೆಂದಾದಲ್ಲಿ ಆತಂಕಗೊಳ್ಳುವ ಅಗತ್ಯವಿಲ್ಲ. ಏಕೆಂದರೆ ಶಿಶುಗಳ ದೇಹದ ಕಾರ್ಯಶೈಲಿ ದೊಡ್ಡವರ ದೇಹಕ್ಕಿಂತ ಭಿನ್ನವಾಗಿರುತ್ತದೆ. ಹೀಗಾಗಿ ನಿಮ್ಮ ಶಿಶುವಿನ ತಲೆಯ ಭಾಗ ದೇಹಕ್ಕಿಂತ ತುಸು ಹೆಚ್ಚು ಬಿಸಿ ಇದ್ದಲ್ಲಿ ಡೋಂಟ್ ವರಿ.

ಬೆವರು ಗ್ರಂಥಿಗಳು

ನವಜಾತ ಶಿಶುಗಳಿಗೆ ತಲೆಯ ಭಾಗ ಬಿಟ್ಟು ದೇಹದ ಇನ್ನೆಲ್ಲೂ ಬೆವರು ಗ್ರಂಥಿಗಳು ಬೆಳವಣಿಗೆಯಾಗಿರುವುದಿಲ್ಲ. ಹೀಗಾಗಿ ಸಹಜವಾಗಿಯೇ ತಲೆಯಲ್ಲಿ ಹೆಚ್ಚು ಬೆವರುತ್ತದೆ. ನವಜಾತ ಶಿಶುಗಳ ತಲೆಯ ಭಾಗದಲ್ಲಿ ಮಾತ್ರ ಬೆವರು ಗ್ರಂಥಿಗಳು ಸಕ್ರಿಯವಾಗಿರುತ್ತವೆ. ಶಿಶುವಿನ ತಲೆಯಲ್ಲಿ ಹೆಚ್ಚು ಬೆವರುತ್ತಿದೆ ಎಂದರೆ ಮಗುವಿನ ದೇಹದ ಉಷ್ಣತೆ ಹೆಚ್ಚಾಗಿದ್ದು ಅದು ಹೊರಹೋಗುತ್ತಿದೆ ಎಂದು ಅರ್ಥ.

ರಾತ್ರಿ ಬೆವರುವಿಕೆ

ಮಗು ಮಲಗಿದಾಗ ತಲೆಯಲ್ಲಿ ಹೆಚ್ಚು ಬೆವರುತ್ತಿದ್ದರೆ ಅದೂ ಸಹ ಸಹಜ ಕ್ರಿಯೆಯಾಗಿದೆ. ಶಿಶುಗಳು ದೊಡ್ಡವರಂತೆ ನಿದ್ದೆಯಲ್ಲಿ ಅತ್ತಿತ್ತ ಹೊರಳಾಡಲಾರವು. ಹೀಗಾಗಿ ಮಲಗಿದಾಗ ಶಿಶುಗಳ ತಲೆ ಒಂದೇ ಭಂಗಿಯಲ್ಲಿರುತ್ತದೆ. ಇದರಿಂದ ತಲೆಯ ಭಾಗ ಹೆಚ್ಚು ಬಿಸಿಯಾಗಿ ಅಲ್ಲಿ ಹೆಚ್ಚು ಬೆವರು ಬರಲಾರಂಭಿಸುತ್ತದೆ. ಇನ್ನು ಮಗುವಿಗೆ ಹೆಚ್ಚು ಹೊದಿಕೆಗಳನ್ನು ಸುತ್ತಿ ಮಲಗಿಸುವುದರಿಂದಲೂ ಹೆಚ್ಚು ಬೆವರು ಬರಬಹುದು. ಆದ್ದರಿಂದ ಮಗುವಿಗೆ ಯಾವತ್ತೂ ಅತಿಯಾಗಿ ಹೊದಿಕೆ ಸುತ್ತಿ ಮಲಗಿಸಬೇಡಿ. ಇದು ಒಮ್ಮೊಮ್ಮೆ ಶಿಶುವಿನ 'ಸಡನ್ ಡೆತ್ ಸಿಂಡ್ರೋಮ್' ಗೆ ಕಾರಣವಾಗಿ ಮಗುವಿನ ಪ್ರಾಣ ಹೋಗಬಹುದು.

ಹಾಲೂಡಿಸುವಾಗ ಹೆಚ್ಚು ಬೆವರುವಿಕೆ

ತಾಯಂದಿರು ಸಾಮಾನ್ಯವಾಗಿ ಶಿಶುವನ್ನು ತೊಡೆಯ ಮೇಲೆ ಮಲಗಿಸಿಕೊಂಡು ಹಾಲೂಡಿಸುತ್ತಾರೆ. ಎದೆಹಾಲು ಕುಡಿಸುವಾಗ ಮಗುವಿನ ತಲೆಯನ್ನು ಒಂದೇ ಭಂಗಿಯಲ್ಲಿರುವಂತೆ ತಾಯಂದಿರು ಹಿಡಿದಿರುತ್ತಾರೆ. ತಾಯಿಯ ಅಂಗೈಯಲ್ಲಿನ ಬಿಸಿ ಶಿಶುವಿನ ಮೃದುವಾಗ ತಲೆಗೆ ತಾಕುವುದರಿಂದಲೂ ತಲೆಯಲ್ಲಿ ಹೆಚ್ಚು ಬೆವರುವಿಕೆ ಆರಂಭವಾಗುತ್ತದೆ. ಆದಾಗ್ಯೂ ಶಿಶುವಿನ ತಲೆಯ ಭಾಗದಲ್ಲಿ ಯಾವಾಗಲೂ ಹೆಚ್ಚು ಉಷ್ಣತೆಯಿದ್ದು, ಬೆವರುವಿಕೆ ತೀರಾ ಜಾಸ್ತಿ ಅನಿಸಿದಲ್ಲಿ ತಕ್ಷಣ ವೈದ್ಯರನ್ನು ಕಂಡು ತಪಾಸಣೆ ಮಾಡಿಸಬೇಕು ಎಂಬುದನ್ನು ಮರೆಯದಿರಿ.