ಎರಡು ವರ್ಷಗಳಲ್ಲಿ 300 ನಾಯಿಗಳನ್ನು ದತ್ತು ಪಡೆದ ವ್ಯಕ್ತಿಯ ಬಗ್ಗೆ ಒಂದು ನೋಟ...

ಜಾಂಗ್ ಕೈ ಲೆಡ್ ಉತ್ತಮ ಜೀವನ ಹೊಂದಿದ್ದರು

ಚೀನಾದ ಚೆಂಗ್ಡು ಮೂಲದ 41 ವರ್ಷದ ವ್ಯಕ್ತಿ ಜಾಂಗ್ ಕೈ ಲೆಡ್. ಈತ ಸರ್ಕಾರಿ ಸ್ವಾಮ್ಯದ ಸಂಸ್ಥೆಯೊಂದರಲ್ಲಿ ವ್ಯವಸ್ಥಾಪಕರಾಗಿ ಕಾರ್ಯ ನಿರ್ವಹಿಸುತ್ತಿದ್ದರು. ಅಲ್ಲದೆ ತಮ್ಮದೇ ಆದ ಟ್ರಾವೆಲ್ ಏಜೆನ್ಸಿಯನ್ನು ಹೊಂದುವುದರ ಮೂಲಕ ಅತ್ಯುತ್ತಮ ಆದಾಯ ಹಾಗೂ ಆರಾಮದಾಯಕ ಜೀವನವನ್ನು ನಡೆಸುತ್ತಿದ್ದರು. ಜೊತೆಗೆ ಒಂದು ಸಾಕು ನಾಯಿಯನ್ನು ತಮ್ಮೊಂದಿಗೆ ಸಾಕಿಕೊಂಡಿದ್ದನು. ಆದರೆ ಪ್ರೀತಿಯಿಂದ ಸಾಕಿಕೊಂಡ ಆ ನಾಯಿಯ ಸಾವಿನ ನಂತರ ಇವರ ಜೀವನದ ದಾರಿಯೇ ಬದಲಾಯಿತು.

ನಾಯಿಯ ಸಾವು ನೋವನ್ನು ಉಂಟುಮಾಡಿತು

13 ವರ್ಷಗಳ ಕಾಲ ತನ್ನೊಂದಿಗೆ ಪ್ರೀತಿಯಿಂದ ಇದ್ದ ನಾಯಿ ಇದ್ದಕ್ಕಿದ್ದ ಹಾಗೆ ತೀರಿಹೋಯಿತು. ಅದು ಅವನ ಜೀವನದಲ್ಲಿ ಸಕಷ್ಟು ನೋವು ಹಾಗೂ ಬದಲಾವಣೆಯನ್ನು ತಂದಿತು. ತನ್ನ ಮುದ್ದು ನಾಯಿಯ ಸಾವಿನ ನೋವನ್ನು ಮರೆಯಲು ಬೀದಿ ನಾಯಿಗಳ ಕಡೆಗೆ ಒಲವನ್ನು ತೋರಿದನು. ಆಗ ಬೀದಿಯಲ್ಲಿ ಇದ್ದ ಎರಡು ನಾಯಿಯನ್ನು ತಂದು ತನ್ನ ಟ್ರಾವೆಲ್ ಏಜೆನ್ಸಿಯ ಜಾಗದಲ್ಲಿ ತಂದು ಸಾಕಿದರು. ಆ ನಾಯಿಗಳ ಬಗ್ಗೆ ಕಾಳಜಿ ತೆಗೆದುಕೊಳ್ಳಲು ತನ್ನ ಹೆಚ್ಚಿನ ಸಮಯವನ್ನು ವಿನಿಯೋಜಿಸಿದನು.

ನಾಯಿಗಳನ್ನು ಸಾಕಲು ಒಂದು ಸ್ಥಳವನ್ನು ಕಂಡುಕೊಂಡನು

ಒಂದು ಖಾಲಿಯಾದ ಕಾರ್ಖಾನೆಯೊಂದರ ಜಾಗದಲ್ಲಿ ಸಾಕುನಾಯಿಗಳ ಪ್ರಾಣಿ ಧಾಮವನ್ನು ಪ್ರಾರಂಭಿಸಿದರು. ಅದಕ್ಕೆ ಲಿಟಲ್ ಏಂಜಲ್ ಅನಿಮಲ್ ಪ್ರೊಡೆಕ್ಷನ್ ಸೆಂಟರ್ ಎಂದು ಹೆಸರಿಟ್ಟರು. ನಾಯಿಗಳ ಸಂಖ್ಯೆ 300ಕ್ಕೆ ಏರುವ ವರೆಗೂ ವಿವಿಧ ಕಡೆಯಿಂದ ಬೀದಿ ನಾಯಿಗಳನ್ನು ತಂದು ಸಾಕಿದರು. ಈಗ ಅವರ ಆರೈಕೆಯಲ್ಲಿ ಸುಮಾರು 260 ನಾಯಿಗಳಿವೆ ಎಂದು ವರದಿಯಾಗಿದೆ.

ಸಾಕು ನಾಯಿಗಳಿಗಾಗಿ ಸಾಕಷ್ಟು ಹಣವನ್ನು ವ್ಯಯಿಸಿದರು

ಆರಂಭದಲ್ಲಿ ಸಾಕು ಪ್ರಾಣಿಗಳಿಂದ ಹೆಚ್ಚು ಪ್ರಭಾವಿತರಾದರು. ನಂತರ ಅವರಿಗಾಗಿಯೇ ತನ್ನ ಜೀವನ ಹಾಗೂ ಸಮಯವನ್ನು ಮೀಸಲಿಟ್ಟರು. ಆದರೆ ನಾಯಿಯ ಸಂಖ್ಯೆ ಹೆಚ್ಚುತ್ತಾ ಹೋದಂತೆ ಅಧಿಕ ಹಣದ ಅವಶ್ಯಕತೆ ಇರುತ್ತದೆ ಎನ್ನುವುದನ್ನು ಅರಿತರು. ಇವರಲ್ಲಿ ಇರುವ ಸಾಕು ನಾಯಿಗಳ ಆರೈಕೆ ಹಾಗೂ ಆಹಾರಕ್ಕಾಗಿ ಉಂಟಾಗುವ ಖರ್ಚುಗಳು ಇವರ ಮಾಸಿಕ ಸಂಬಳ ಹಾಗೂ ವ್ಯವಹಾರದಲ್ಲಿ ಬರುವ ಲಾಭಕ್ಕೂ ಮೀರಿತ್ತು. ಈ ಕಾರಣದಿಂದ ಇವರು ಬ್ಯಾಂಕ್‍ಗಳಿಂದ ಸಾಲ ಪಡೆದುಕೊಂಡರು. ತಮ್ಮ ನಾಯಿಗಳಿಗಾಗಿ ತಿಂಗಳಿಗೆ ಸುಮಾರು 20,000 ಯುವಾನ್ ಹಣವನ್ನು ಖರ್ಚುಮಾಡುತ್ತಾರೆ ಎಂದು ಬಹಿರಂಗ ಪಡಿಸಿದ್ದಾರೆ. ಪ್ರತಿ ದಿನ ಎರಡು 40 ಕೆಜಿ ಯ ಚೀಲ ನಾಯಿಯ ಆಹಾರವನ್ನು ಖರೀದಿಸಬೇಕಿದೆ. ನಾಯಿಗಳನ್ನು ನೋಡಿಕೊಳ್ಳುವ ಇಬ್ಬರು ಕಾರ್ಮಿಕರಿಗೆ ತಿಂಗಳಿಗೆ 6,000 ಯುವಾನ್ ಹಣವನ್ನು ನೀಡುತ್ತಾರೆ.

ಸಾಲದ ಹಣ ವಿಪರೀತವಾಗಿ ಬೆಳೆಯಿತು

ಸಾಲ ಮಾಡಿ ನಾಯಿಗಳ ಆಹಾರ ಹಾಗೂ ಆರೈಕೆಗಳಿಗೆ ವ್ಯಯ ಮಾಡುವುದರಿಂದ ದಿನದಿಂದ ದಿನಕ್ಕೆ ಸಾಲದ ಮಿತಿ ಏರುತ್ತಲೇ ಹೋಯಿತು. ಅದನ್ನು ಮರುಪಾವತಿಸಬೇಕು ಎಂದು ಯೋಚಿಸಿದರೂ, ಅದು ಸಾಧ್ಯವಾಗದೆ ಉಳಿಯಿತು. ತನ್ನ ವೃದ್ಧ ತಂದೆತಾಯಿಗಳಿಗೆ ತೊಂದರೆ ಹಾಗೂ ನೋವನ್ನು ನೀಡುತ್ತಿದ್ದೇನೆ ಎಂದು ಅಂದುಕೊಳ್ಳುತ್ತಿದ್ದರು. ಜಾಂಗ್ 600,000 ಯುವಾನ್ ಹಣಗಳ ಸಾಲವನ್ನು ಹೊಂದಿದ್ದರು. ಆ ಸಾಲ ತೀರಿಸುವುದರ ಬಗ್ಗೆ ನಿರಾಶೆ ಹಾಗೂ ಗೊಂದಲವನ್ನು ಹೊಂದಿದ್ದರು. ಇವರ ಸ್ಥಿತಿ ಹಾಗೂ ನಾಯಿಗಳ ಬಗ್ಗೆ ಇರುವ ಕಾಳಜಿಯನ್ನು ಅರಿತ ಪಾಲಕರು ಈಗ ಇವರ ಸಾಲವನ್ನು ತೀರಿಸಲು ಸಹಾಯ ಮಾಡುತ್ತಿದ್ದಾರೆ. ಹಾಗಂತ ಜಾಂಗ್ ತನ್ನ ನಾಯಿಗಳನ್ನುಬಿಡಲಿಲ್ಲ. ಅವರ ಕಾಳಜಿ ಹಾಗೂ ಆರೈಕೆಗೆ ಬೇಕಾದ ಅಗತ್ಯತೆಯನ್ನು ಪೂರೈಸುತ್ತಿದ್ದಾರೆ.