ಮಲೇಷ್ಯಾದಲ್ಲಿ ಹೊಸ ತಳಿಯ ಕೊರೊನಾವೈರಸ್, ಇದು 10 ಪಟ್ಟು ಅಧಿಕ ಅಪಾಯಕಾರಿ, ಲಸಿಕೆಗೂ ಬಗ್ಗಲ್ಲ

ಕೊರೊನಾವೈರಸ್ ಹೊಸ ತಳಿ

ಇದುವರೆಗೆ ಜಗತ್ತಿನಲ್ಲಿ D614G ಎಂದು ಕರೆಯಲ್ಪಡುವ ಕೊರೊನಾವೈರಸ್ ಪತ್ತೆಯಾಗಿತ್ತು. ಆದರೆ ಇದೀಗ ಮಲೇಷ್ಯಾದಲ್ಲಿ 45 ಜನರಲ್ಲಿ ಕಾಣಿಸಿಕೊಂಡಿರುವ ಕೊರೊನಾವೈರಸ್‌ ಬೇರೆ ತಳಿಯಾಗಿದ್ದು, ಈ ವೈರಸ್‌ ತುಂಬಾ ಅಪಾಯಕಾರಿಯಾಗಿದೆ. ಭಾರತದಿಂದ ಮರಳಿದ್ದ ರೆಸ್ಟೋರೆಂಟ್ ಮಾಲಿಕ ಹಾಗೂ ಫಿಲಿಫೈನ್ಸ್‌ನಿಂದ ಮರಳಿದ ಗುಂಪು ಜನರಲ್ಲಿ ಈ ರೀತಿಯ ವೈರಸ್‌ ಪತ್ತೆಯಾಗಿದೆ.

ಲಸಿಕೆಗಳು ಈ ತಳಿಯ ಮೇಲೆ ಪ್ರಭಾವ ಬೀರಲ್ಲ

ಲಸಿಕೆ ಕುರಿತು ಈಗ ನಡೆಸುತ್ತಿರುವ ಸಂಶೋಧನೆಗಳು ಯಾವುದೂ ಈ ತಳಿಯ ಕೊರೊನಾವೈರಸ್‌ ಮೇಲೆ ಪರಿಣಾಮ ಬೀರಲ್ಲ ಎನ್ನುತ್ತಾರೆ ಮಲೇಷ್ಯಾದ ಆರೋಗ್ಯ ಮಹಾ ನಿರ್ದೇಶಕರಾಗಿರುವ ನೂರ್ ಹಿಶಾಮ್ ಅಬ್ದುಲ್ಲಾ.

ಸೆಲ್‌ ಪ್ರೆಸ್‌ನಲ್ಲಿ ಪ್ರಕಟವಾಗಿರುವ ವರದಿಯು ಕೊರೊನಾ ವೈರಸ್‌ಗೆ ಕಂಡು ಹಿಡಿಯುತ್ತಿರುವ ಲಸಿಕೆಯು ಈ ತಳಿಯ ವೈರಸ್‌ ಮೇಲೆ ಯಾವುದೇ ಪರಿಣಾಮ ಬೀರಲ್ಲ ಎಂದು ಹೇಳಿದೆ.

ವಿಶ್ವ ಆರೋಗ್ಯ ಸಂಸ್ಥೆ ಏನು ಹೇಳಿದೆ?

ಈ ಹೊಸ ಕೊರೊನಾವೈರಸ್‌ ತಳಿ ಅತ್ಯಂತ ಭಯಾನಕ ಕಾಯಿಲೆಯಾಗಲಿದೆ ಎಂಬುವುದಕ್ಕೆ ಯಾವುದೇ ಸಾಕ್ಷ್ಯಗಳಿಲ್ಲ ಎಂದು ವಿಶ್ವ ಆರೋಗ್ಯ ಸಂಸ್ಥೆ ಹೇಳಿದೆ.

ಜನರು ಎಚ್ಚರಿಕೆಯಿಂದ ಇದ್ದರೆ ಮಾತ್ರ ಈ ರೋಗ ತಡೆಗಟ್ಟಲು ಸಾಧ್ಯ

'ಕೊರೊನಾ ವೈರಸ್‌ ತಳಿ ಮಲೇಷ್ಯಾದಲ್ಲಿ ಕಂಡು ಬಂದಿರುವುದರಿಂದ ಜನರು ಅತ್ಯಂತ ಮುನ್ನೆಚ್ಚರಿಕೆಯಿಂದ ಇರಬೇಕು, ಜನರ ಸಹಕಾರ ಇದ್ದರೆ ಮಾತ್ರ ನಾವೆಲ್ಲಾ ಸೇರಿ ಈ ಸೋಂಕಿನ ಚೈನ್‌ ಬ್ರೇಕ್‌ ಮಾಡಬಹುದು' ಎಂದು ನೂರ್ ಹಿಶಾಮ್ ಅಬ್ದುಲ್ಲಾ ಹೇಳಿದ್ದಾರೆ.

ಮಲೇಷ್ಯಾದಲ್ಲೂ ಕೊರೊನಾ ಸೋಂಕಿತರ ಸಂಖ್ಯೆ ಹೆಚ್ಚಳ

ವಿಶ್ವದ ಇತರ ರಾಷ್ಟ್ರಗಳಲ್ಲಿ ಕೊರೊನಾ ಸೋಂಕು ಹೆಚ್ಚುತ್ತಿರುವಾಗ ಮಲೇಷ್ಯಾ ಸೋಂಕು ಹರಡದಂತೆ ತಡೆಯುವಲ್ಲಿ ಯಶಸ್ವಿಯಾಗಿತ್ತು. ಇದೀಗ ಶನಿವಾರ 26, ಭಾನುವಾರ 25 ಕೇಸ್‌ಗಳು ಪತ್ತೆಯಾಗಿದ್ದು ಜುಲೈ 28ರ ಬಳಿಕ ಅತೀ ಹೆಚ್ಚು ಕೊರೊನಾ ಶನಿವಾರ, ಭಾನುವಾರ ಪತ್ತೆಯಾಗಿದೆ.