ದಿಢೀರನೇ ಕಾಡುವ ವೈರಲ್ ಜ್ವರಕ್ಕೆ- ಪವರ್‌ಫುಲ್ ಮನೆಮದ್ದು

ಕೊತ್ತಂಬರಿ ಕಾಳಿನ ಟೀ

ಕೊತ್ತಂಬರಿ ಕಾಳು ಅಥವಾ ಧನಿಯ ಕಾಳಿನಲ್ಲಿ ಉತ್ತಮ ಪ್ರಮಾಣದ ಫೈಟೋನ್ಯೂಟ್ರಿಯೆಂಟ್ ಎಂಬ ಪೋಷಕಾಂಶ ಮತ್ತು ವಿವಿಧ ವಿಟಮಿನ್ನುಗಳಿದ್ದು ಇವೆಲ್ಲವೂ ರೋಗ ನಿರೋಧಕ ಶಕ್ತಿಯನ್ನು ಹೆಚ್ಚಿಸಲು ನೆರವಾಗುತ್ತವೆ. ಅಲ್ಲದೇ ಇದರಲ್ಲಿರುವ ಪ್ರತಿಜೀವಕ ಮತ್ತು ಆವಿಯಾಗುವ ತೈಲಗಳಿದ್ದು ವೈರಸ್ಸುಗಳ ಧಾಳಿಯನ್ನೆದುರಿಸಲು ದೇಹಕ್ಕೆ ಹೆಚ್ಚಿನ ಬಲ ನೀಡುತ್ತದೆ. ಪರಿಣಾಮವಾಗಿ ಜ್ವರ ಶೀಘ್ರವಾಗಿ ಇಳಿಯುತ್ತದೆ.

ಕೊತ್ತಂಬರಿ ಕಾಳಿನ ಟೀ ತಯಾರಿಸುವ ವಿಧಾನ

ಒಂದು ಲೋಟ ನೀರಿಗೆ ಒಂದು ದೊಡ್ಡಚಮಚ ಧನಿಯ ಕಾಳುಗಳನ್ನು ಹಾಕಿ ಕುದಿಸಿ. ಸುಮಾರು ಒಂದು ನಿಮಿಷ ಕುದಿಸಿದ ಬಳಿಕ ಉರಿ ಆರಿಸಿ ತಣಿಯಲು ಬಿಡಿ. ಪೂರ್ಣವಾಗಿ ತಣಿದ ಬಳಿಕ ಇದನ್ನು ಸೋಸಿ ಕೊಂಚ ಹಾಲು ಮತ್ತು ಸಕ್ಕರೆ ಬೆರೆಸಿ ಮತ್ತೊಮ್ಮೆ ಕೊಂಚವೇ ಬಿಸಿ ಮಾಡಿ ಕುಡಿಯಿರಿ. ಜ್ವರ ಹೆಚ್ಚಿದ್ದಾಗ ದಿನಕ್ಕೆ ಮೂರು ಲೋಟ ಕುಡಿಯಿರಿ. ಬಳಿಕವೂ ದಿನಕ್ಕೆರಡು ಲೋಟ ಕುಡಿಯುವ ಮೂಲಕ ಜ್ವರ ಮತ್ತೆ ಏರದಂತೆ ನೋಡಿಕೊಳ್ಳಬಹುದು.

ತುಳಸಿ ಎಲೆಗಳು

ಔಷಧೀಯ ಗುಣಗಳ ಆಗರವೇ ಆಗಿರುವ ತುಳಸಿ ಎಲೆಗಳು ವೈರಲ್ ಜ್ವರವನ್ನೂ ಇಳಿಸಲು ಸಮರ್ಥವಾಗಿವೆ. ಇದರ ಬ್ಯಾಕ್ಟೀರಿಯಾ ನಿವಾರಕ, ಕ್ರಿಮಿನಿವಾರಕ, ಪ್ರತಿಜೀವಕ ಮತ್ತು ಶಿಲೀಂಧ್ರನಿವಾರಕ ಗುಣಗಳು ವೈರಲ್ ಜ್ವರಕ್ಕೆ ಕಾರಣವಾದ ವೈರಸ್ಸುಗಳನ್ನು ಸದೆಬಡಿಯಲು ಮತ್ತು ದೇಹದ ರೋಗ ನಿರೋಧಕ ಶಕ್ತಿಯನ್ನು ಹೆಚ್ಚಿಸಲು ನೆರವಾಗುತ್ತವೆ.

ತುಳಸಿ ಎಲೆಗಳ ಟೀ ತಯಾರಿಸುವ ವಿಧಾನ

ಸುಮಾರು ಇಪ್ಪತ್ತರಷ್ಟು ಈಗತಾನೇ ಕೊಯ್ದ ಬಲಿತ ಮತ್ತು ಎಳೆಯ ಎಲೆಗಳನ್ನು ಚೆನ್ನಾಗಿ ತೊಳೆದು ಒಂದು ಲೀಟರ್ ನೀರಿನಲ್ಲಿ ಕುದಿಸಿ. ಈ ನೀರಿಗೆ ಅರ್ಧ ಚಮಚ ಲವಂಗದ ಪುಡಿಯನ್ನು ಸೇರಿಸಿ. ಮಧ್ಯಮ ಉರಿಯಲ್ಲಿ ಈ ನೀರು ಅರ್ಧವಾಗುವವರೆಗೆ ಕುದಿಸಿ. ಬಳಿಕ ಉರಿ ಆರಿಸಿ ತಣಿಸಿ. ಈ ನೀರನ್ನು ಒಂದು ಬಾಟಲಿಯಲ್ಲಿ ಸಂಗ್ರಹಿಸಿ ಪ್ರತಿ ಎರಡು ಘಂಟೆಗಳಿಗೊಮ್ಮೆ ಕೊಂಚ ಕೊಂಚವಾಗಿ ಗುಟುಕರಿಸುತ್ತಾ ಹೋಗಿ. ಒಂದು ಅಥವಾ ಎರಡು ದಿನದಲ್ಲಿಯೇ ಜ್ವರ ಬಿಡುತ್ತದೆ.

ಒಣ ಶುಂಠಿಯ ಪುಡಿ

ಹಸಿಶುಂಠಿಯ ಹಲವು ಗುಣಗಳು ಒಣಗಿದ ಬಳಿಕವೂ ಉಳಿದುಕೊಳ್ಳುತ್ತವೆ. ಇದರಲ್ಲಿರುವ ಉರಿಯೂತ ನಿವಾರಕ ಗುಣ, ಉತ್ಕರ್ಷಣ ನಿರೋಧಕ ಮತ್ತು ನೋವು ನಿವಾರಕ ಗುಣ ಒಣಗಿಸಿ ಪುಡಿಮಾಡಿದ ಬಳಿಕವೂ ಉಳಿದುಕೊಳ್ಳುವ ಕಾರಣ ಒಣ ಶುಂಠಿಯ ಪುಡಿ ಸಹಾ ಹಲವು ವ್ಯಾಧಿಗಳನ್ನು ನಿವಾರಿಸಲು ಸಮರ್ಥವಾಗಿದೆ. ಮುಂದಿನ ಸ್ಲೈಡ್ ಕ್ಲಿಕ್ ಮಾಡಿ

ಒಣ ಶುಂಠಿಯ ಪುಡಿ

ಇದರಲ್ಲಿ ವೈರಲ್ ಜ್ವರ ಸಹಾ ಒಂದಾಗಿದ್ದು ಜ್ವರವಿರುವ ರೋಗಿಗೆ ಕೊಂಚ ಒಣ ಶುಂಠಿಯ ಪುಡಿಯನ್ನು ಸಮಪ್ರಮಾಣದ ಜೇನಿನೊಂದಿಗೆ ಬೆರೆಸಿ ಸೇವಿಸುವ ಮೂಲಕ ಜ್ವರ ಶೀಘ್ರವಾಗಿ ಇಳಿಯಲು ನೆರವಾಗುತ್ತದೆ.

ಇದನ್ನು ತಯಾರಿಸುವ ಬಗೆ

ಒಂದು ವೇಳೆ ಒಣ ಶುಂಠಿಯ ಪುಡಿ ಇಲ್ಲದಿದ್ದರೆ ಒಣಶುಂಠಿಯ ತುಂಡುಗಳನ್ನು ಒಂದು ಕಪ್ ನೀರಿಗೆ ಹಾಕಿ ಚೆನ್ನಾಗಿ ಬೇಯಿಸಿ. ಈ ನೀರು ಕಾಲುಭಾಗವಾದ ಬಳಿಕ ಸಮಪ್ರಮಾಣದ ಜೇನು ಬೆರೆಸಿ ಸೇವಿಸಬಹುದು. ಇನ್ನೊಂದು ವಿಧಾನವೆಂದರೆ ಸಮಪ್ರಮಾಣದಲ್ಲಿ ಒಂದು ಚಿಕ್ಕಚಮಚ ಒಣಶುಂಠಿ, ಅರಿಶಿನ, ಕಾಳುಮೆಣಸಿನ ಪುಡಿ ಮತ್ತು ಕೊಂಚವೇ ಸಕ್ಕರೆ (ಖಾರವನ್ನು ಕಡಿಮೆ ಮಾಡಲು) ಅಥವಾ ಬೆಲ್ಲ ಸೇರಿಸಿ ಒಂದು ಕಪ್ ನೀರಿಗೆ ಸೇರಿಸಿ ಕಲಕಿ ಕುದಿಸಿ. ನೀರು ಅರ್ಧಪ್ರಮಾಣದಷ್ಟಾದ ಬಳಿಕ ಉರಿ ಆರಿಸಿ ತಣಿಸಿ ದಿನಕ್ಕೆ ನಾಲ್ಕು ಬಾರಿ ಒಂದು ಅಥವಾ ಎರಡು ಚಮಚದಷ್ಟು ರೋಗಿಗೆ ತಿನ್ನಿಸಿ. ಇದರಿಂದ ಜ್ವರ ಶೀಘ್ರವಾಗಿ ಇಳಿಯುತ್ತದೆ.