ನೀವೇ ಮನೆಯಲ್ಲಿ ಮಾಡಿ ನೋಡಿ: ಕಾಂತಿಯುತ ತ್ವಚೆಗಾಗಿ ಸರಳ ಫೇಸ್ ಮಾಸ್ಕ್‌ಗಳು

ಪಪ್ಪಾಯಿ ಹಾಗೂ ನಿಂಬೆ ರಸದ ಫೇಸ್ ಮಾಸ್ಕ್

ಪಪ್ಪಾಯಿ ಹಣ್ಣಿನಲ್ಲಿರುವ ಆಂಟಿ ಹೈಡ್ರಾಕ್ಸಿ ಆಸಿಡ್ ನಿರ್ಜೀವ ಚರ್ಮಕೋಶಗಳನ್ನು ತೆಗೆದು ಹಾಕಿ ಚರ್ಮದ ರಂಧ್ರಗಳನ್ನು ತೆರೆಯಲು ಸಹಕಾರಿಯಾಗಿದೆ. ನಿಂಬೆ ರಸ ಚರ್ಮದ ಮೊಡವೆ ಹಾಗೂ ಕಲೆಗಳನ್ನು ನಿವಾರಿಸಿ ಚರ್ಮಕ್ಕೆ ಕಾಂತಿ ನೀಡುವ ಗುಣ ಹೊಂದಿದೆ.

ಬಳಸುವ ವಿಧಾನ

ಹಣ್ಣಾದ ಪಪ್ಪಾಯಿಯೊಂದರ ಅರ್ಧ ಭಾಗ ತೆಗೆದುಕೊಂಡು ಅದನ್ನು ಸಣ್ಣದಾಗಿ ಕತ್ತರಿಸಿಕೊಳ್ಳಿ. ಇದನ್ನು ಮಿಕ್ಸಿಗೆ ಹಾಕಿ ಗಟ್ಟಿ ಹಾಗೂ ನುಣುಪಾದ ಪೇಸ್ಟ್ ತಯಾರಿಸಿ. ಇದಕ್ಕೆ ಕೆಲ ಹನಿ ನಿಂಬೆ ರಸ ಸೇರಿಸಿ ಸರಿಯಾಗಿ ಮಿಕ್ಸ್ ಮಾಡಿ. ಈ ಪೇಸ್ಟ್ ಅನ್ನು ಮುಖ ಹಾಗೂ ಕತ್ತಿನ ಭಾಗಕ್ಕೆ ಹಚ್ಚಿಕೊಂಡು ಸುಮಾರು ೨೦ ನಿಮಿಷದವರೆಗೆ ಹಾಗೆಯೇ ಬಿಡಿ. ನಂತರ ತಣ್ಣೀರಿನಲ್ಲಿ ಮುಖ ತೊಳೆದುಕೊಳ್ಳಿ. ಕನಿಷ್ಠ ವಾರಕ್ಕೊಮ್ಮೆ ಈ ವಿಧಾನ ಅನುಸರಿಸುವುದು ಒಳ್ಳೆಯದು.

ಗ್ರೀನ್ ಟೀ ಹಾಗೂ ಜೇನಿನ ಫೇಸ್ ಮಾಸ್ಕ್

ಚರ್ಮದ ಆರೈಕೆಗಾಗಿ ನೀವು ಬಳಸಿ ಬಿಟ್ಟ ಗ್ರೀನ್ ಟೀ ಬ್ಯಾಗ್‌ಗಳನ್ನು ಸಹ ಉಪಯೋಗಿಸಬಹುದು. ಗ್ರೀನ್ ಟೀ ಚರ್ಮದ ಮೇಲಿನ ಕೊಳೆಯನ್ನು ನಿವಾರಿಸುವ ಗುಣ ಹೊಂದಿದೆ. ಇನ್ನು ಜೇನು ತುಪ್ಪ ಚರ್ಮಕ್ಕೆ ಹಿತವನ್ನುಂಟು ಮಾಡುತ್ತದೆ.

ಬಳಸುವ ವಿಧಾನ

ಬಳಸಿದ ಗ್ರೀನ್ ಟೀ ಬ್ಯಾಗ್ ಒಂದನ್ನು ಕಟ್ ಮಾಡಿ ಅದರೊಳಗಿಂದ ಚಹಾ ಎಲೆಗಳನ್ನು ಹೊರತೆಗೆದಿಟ್ಟುಕೊಳ್ಳಿ. ಇದನ್ನು ಸ್ವಚ್ಛ ಬಟ್ಟಲಿಗೆ ಹಾಕಿ ಅದರಲ್ಲಿ 1 ರಿಂದ 2 ಟೇಬಲ್ ಸ್ಪೂನ್ ಜೇನು ತುಪ್ಪ ಹಾಕಿ ಸರಿಯಾಗಿ ಮಿಕ್ಸ್ ಮಾಡಿ. ಸ್ವಚ್ಛವಾಗಿ ಮುಖ ತೊಳೆದುಕೊಂಡ ನಂತರ ಈ ಮಿಶ್ರಣವನ್ನು ಮುಖಕ್ಕೆ ಹಚ್ಚಿಕೊಳ್ಳಿ. 5 ರಿಂದ 10 ನಿಮಿಷಗಳ ನಂತರ ಇದನ್ನು ಸಾದಾ ನೀರಿನಿಂದ ತೊಳೆದುಕೊಳ್ಳಿ. ವಾರಕ್ಕೆರಡು ಬಾರಿ ಈ ವಿಧಾನವನ್ನು ಅನುಸರಿಸಬಹುದು.

ಬಾದಾಮಿ ಹಾಗೂ ಜೇನು ತುಪ್ಪದ ಮಾಸ್ಕ್

ಬಾದಾಮಿ ಬೀಜಗಳಲ್ಲಿನ ಆಂಟಿ ಆಕ್ಸಿಡೆಂಟ್, ವಿಟಮಿನ್-ಇ ಹಾಗೂ ಫ್ಯಾಟ್‌ಗಳು ಚರ್ಮಕ್ಕೆ ಹೊಳಪು ನೀಡುತ್ತವೆ. ಇದನ್ನು ಚರ್ಮದ ಮೇಲೆ ಲೇಪಿಸುವುದರಿಂದ ಇದು ನಿರ್ಜೀವ ಜೀವಕೋಶಗಳನ್ನು ತೆಗೆದು ಹಾಕಿ, ಚರ್ಮವನ್ನು ಆಳವಾಗಿ ಸ್ವಚ್ಛಗೊಳಿಸುತ್ತದೆ.

ಬಳಸುವ ವಿಧಾನ

10ರಿಂದ 15 ಬಾದಾಮಿ ಬೀಜಗಳನ್ನು ಕೆಲ ಗಂಟೆಗಳವರೆಗೆ ನೀರಲ್ಲಿ ನೆನೆಸಿಡಿ. ನಂತರ ಇದನ್ನು ಅರೆದು ನುಣ್ಣನೆಯ ಪೇಸ್ಟ್ ತಯಾರಿಸಿ. ಇದಕ್ಕೆ 2 ಟೇಬಲ್ ಸ್ಪೂನ್ ಜೇನು ತುಪ್ಪ ಸೇರಿಸಿ ಸರಿಯಾಗಿ ಮಿಕ್ಸ್ ಮಾಡಿ. ಪೇಸ್ಟ್ ಅನ್ನು ಮುಖದ ಮೇಲೆ ಹಚ್ಚಿಕೊಂಡು ವೃತ್ತಾಕಾರವಾಗಿ ಮೆತ್ತಗೆ ಮಸಾಜ್ ಮಾಡಿ. 20 ನಿಮಿಷಗಳ ನಂತರ ತೊಳೆದುಕೊಳ್ಳಿ.

ಅಲೋವೆರಾ ಹಾಗೂ ಗ್ರೀನ್ ಟೀ ಮಾಸ್ಕ್

ಆರೋಗ್ಯಕರ ತ್ವಚೆಗೆ ಬೇಕಾಗುವಂಥ ಎಲ್ಲ ವಿಟಮಿನ್ ಹಾಗೂ ಮಿನರಲ್ ಗಳು ಅಲೊ ವೆರಾದಲ್ಲಿವೆ. ಇದು ಚರ್ಮದ ಮೇಲಿನ ಕಪ್ಪು ಕಲೆಗಳನ್ನು ನಿವಾರಿಸಲು ಸಹಕಾರಿಯಾಗಿದೆ.

ಬಳಸುವ ವಿಧಾನ

2 ರಿಂದ 4 ಟೇಬಲ್ ಸ್ಪೂನ್‌ಗಳಷ್ಟು ಅಲೊವೆರಾವನ್ನು ಬ್ಲೆಂಡರ್‌ಗೆ ಹಾಕಿ. ಇದಕ್ಕೆ 1 ಟೇಬಲ್ ಸ್ಪೂನ್ ಗ್ರೀನ್ ಟೀ ಸೇರಿಸಿ ಚೆನ್ನಾಗಿ ಬ್ಲೆಂಡ್ ಮಾಡಿ ನುಣುಪಾದ ಪೇಸ್ಟ್ ತಯಾರಿಸಿ. ಪೇಸ್ಟ್ ಅನ್ನು ಮುಖಕ್ಕೆ ಹಚ್ಚಿ 15 ರಿಂದ 20 ನಿಮಿಷ ಇರಲು ಬಿಟ್ಟು ನಂತರ ತೊಳೆದುಕೊಳ್ಳಿ. ಆಗಾಗ ಈ ವಿಧಾನವನ್ನು ಅನುಸರಿಸಿ ಕಾಂತಿಯುತ ಚರ್ಮವನ್ನು ನಿಮ್ಮದಾಗಿಸಿಕೊಳ್ಳಬಹುದು.