ಚೀನಾ-ಜಪಾನ್ ಸುಂದರಿಯರ ಸೌಂದರ್ಯದ ಸೀಕ್ರೆಟ್..

ಅಕ್ಕಿಯ ನೀರು

ಚೀನೀ ಮಹಿಳೆಯರ ಆರೋಗ್ಯ ಗುಟ್ಟು ಇದು. ರಾತ್ರಿ ಎರಡು ಕಪ್ ನೀರಿನಲ್ಲಿ ಸುಮಾರು ಒಂದು ಕಪ್ ಅಕ್ಕಿಯನ್ನು ನೆನೆಸಿಟ್ಟು ಮರುದಿನ ಬೆಳಿಗ್ಗೆ ಈ ಅಕ್ಕಿಯನ್ನು ಸೋಸಿದ ನೀರನ್ನು ಒಂದು ಪಾತ್ರೆಯಲ್ಲಿ ಸಂಗ್ರಹಿಸಿ. ಈ ನೀರಿನಿಂದ ಮುಖವನ್ನು ತೊಳೆದುಕೊಂಡರೆ ಚರ್ಮದ ಸೆಳೆತ ಹೆಚ್ಚುವ ಮೂಲಕ ಚರ್ಮದ ಕಾಂತಿ ಹೆಚ್ಚುತ್ತದೆ.

ಹೆಸರು ಬೇಳೆಯ ಲೇಪ

ಈ ವಿಧಾನವೂ ಚೀನಾದ ಪ್ರಾಚೀನ ವಿಧಾನಗಳೊಲ್ಲೊಂದಾಗಿದೆ. ಹೆಸರು ಬೇಳೆಯನ್ನು ನೆನೆಸಿಟ್ಟು ಬಳೀಕ ನುಣ್ಣಗೆ ಅರೆದು ಈ ಲೇಪವನ್ನು ಚರ್ಮದ ಮೇಲೆ ಹಚ್ಚುವ ಮೂಲಕ ಚರ್ಮದಲ್ಲಿರುವ ಸೂಕ್ಷ್ಮ ರಂಧ್ರಗಳಲ್ಲಿ ಅಡಗಿದ್ದ ಬ್ಯಾಕ್ಟೀರಿಯಾಗಳನ್ನು ನಿವಾರಿಸಿ ಆರೋಗ್ಯ ಹೆಚ್ಚಿಸುತ್ತದೆ. ಅಲ್ಲದೇ ಚರ್ಮದ ಅಡಿಯಲ್ಲಿ ಸೋಂಕು, ಉರಿಯೂತವಾಗುವುದನ್ನು ತಡೆಯುವ ಮೂಲಕ ಮೊಡವೆಯಾಗುವುದನ್ನು ತಡೆಯಬಹುದು.

ಕಪ್ಪೆ ಚಿಪ್ಪಿನ ಪುಡಿ

ಸಮುದ್ರತಟದಲ್ಲಿ ಸಿಗುವ ಕಪ್ಪೆಚಿಪ್ಪು (Oyster shell) ಚೆನ್ನಾಗಿ ಒಣಗಿಸಿ ಕುಟ್ಟಿ ಪುಡಿಮಾಡಿ ನುಣ್ಣನೆಯ ಪೌಡರ್ ನಂತೆ ಮಾಡಿರುವ ಉತ್ಪನ್ನ ಈಗ ಆನ್ಲೈನ್ ಮೂಲಕ ಸಿಗುತ್ತದೆ. ಈ ಪುಡಿ ಚರ್ಮದ ಜೀವಕೋಶಗಳಿಗೆ ಪೋಷಣೆ ನೀಡುವ ಮೂಲಕ ಪುನರುಜ್ಜೀವನ ನೀಡುತ್ತದೆ. ಪರಿಣಾಮವಾಗಿ ಚರ್ಮದ ಕಾಂತಿಯೂ ಹೆಚ್ಚುತ್ತದೆ. ಈ ವಿಧಾನವನ್ನು ಚೀನೀಯರು ಬಹಳ ವರ್ಷಗಳಿಂದ ಅನುಸರಿಸುತಾ ಬಂದಿದ್ದಾರೆ.

ಹಸಿರು ಟೀ

ಹಸಿರು ಟೀ ನಮಗೆ ಹೊಸದಾಗಿರಬಹುದು. ಆದರೆ ಚೀನೀಯರು ನೂರಾರು ವರ್ಷಗಳಿಂದ ಇದನ್ನು ಬಳಸುತ್ತಾ ಬಂದಿದ್ದಾರೆ. ಇದರಲ್ಲಿ ಉತ್ತಮ ಪ್ರಮಾಣದಲ್ಲಿರುವ ಆಂಟಿ ಆಕ್ಸಿಡೆಂಟುಗಳು ಚರ್ಮದ ಸೆಳೆತವನ್ನು ಹೆಚ್ಚಿಸಲು ನೆರವಾಗುತ್ತದೆ. ಪರಿಣಾಮವಾಗಿ ಚರ್ಮದ ನೆರಿಗೆ ಮೂಡುವುದು ತಡವಾಗಿ ವೃದ್ಧಾಪ್ಯವನ್ನು ದೂರಾಗಿಸಬಹುದು.

ಮಸಾಜ್

ನಿಯಮಿತವಾಗಿ ಮೈಗೆ ಮತ್ತು ಮುಖಕ್ಕೆ ವೃತ್ತಿಪರರಿಂದ ಮಸಾಜ್ ಸೇವೆ ಪಡೆದುಕೊಳ್ಳುವ ಮೂಲಕ ರಕ್ತಪರಿಚಲನೆ ಉತ್ತಮಗೊಳ್ಳುತ್ತದೆ ಹಾಗೂ ಚರ್ಮದ ಸೆಳೆತವೂ ಹೆಚ್ಚುತ್ತದೆ. ಚೀನಾದ ಮಹಿಳೆಯರು ಸೌಂದರ್ಯ ವೃದ್ಧಿಗಾಗಿ ಮಸಾಜ್ ಅನ್ನು ಒಂದು ವೇಳಾಪಟ್ಟಿಯಂತೆ ಅನುಸರಿಸುತ್ತಾ ಬರುವ ಮೂಲಕ ತಾರುಣ್ಯವನ್ನು ಕಾಪಾಡಿಕೊಳ್ಳುತ್ತಾರೆ.

ಪುದೀನಾ ಎಲೆಗಳು

ಚೀನೀ ಮಹಿಳೆಯರು ಚರ್ಮದ ಬಣ್ಣ ಬಿಳಿಚಿಸಲು ಪುದೀನಾ ಎಲೆಗಳನ್ನು ನೂರಾರು ವರ್ಷಗಳಿಂದ ಬಳಸುತ್ತಾ ಬಂದಿದ್ದಾರೆ. ಕೆಲವು ಪುದೀನಾ ಎಲೆಗಳನ್ನು ನುಣ್ಣಗೆ ಅರೆದು ಈ ಲೇಪನವನ್ನು ನೇರವಾಗಿ ಮುಖದ ಚರ್ಮದ ಮೇಲೆ ದಪ್ಪನಾಗಿ ಹಚ್ಚುತ್ತಾರೆ. ಇದರಿಂದ ಚರ್ಮದ ಸೆಳೆತ ಹೆಚ್ಚುವ ಜೊತೆಗೇ ಚರ್ಮದ ಬಣ್ಣವೂ ಗೌರವರ್ಣಕ್ಕೆ ತಿರುಗುತ್ತದೆ.

ಅರಿಶಿನ ಪುಡಿ

ಅರಿಶಿನ ಪುಡಿ ಕೇವಲ ಭಾರತದಲ್ಲಿ ಮಾತ್ರವಲ್ಲ, ಚೀನಾದಲ್ಲಿಯೂ ಬಹಳಷ್ಟು ಪ್ರಸಿದ್ಧಿ ಪಡೆದಿದೆ. ಚರ್ಮದ ಬಣ್ಣ ಬೆಳಗಲು, ಕಲೆಗಳನ್ನು ನಿವಾರಿಸಲು ಮತ್ತು ವಿಶೇಷವಾಗಿ ಸತ್ತ ಜೀವಕೋಶಗಳನ್ನು ನಿವಾರಿಸಲು, ತನ್ಮೂಲಕ ಚರ್ಮದ ಬಣ್ಣ ಗೌರವರ್ಣಕ್ಕೆ ತಿರುಗಲು ಅರಿಸಿನವನ್ನು ಅರೆದು ತಯಾರಿಸಿದ ಲೇಪನವನ್ನು ಅವರು ಬಳಸುತ್ತಾರೆ.